SAN MATEO 11

1'Ba kionga Jesús je jet'are nga kitsuyare xutare xi tejó mé= xi tjinnere nga sa'en, 'ba 'batsa'en kikakuya 'ba kitsikja'axtiuya enre Na'enchana ngajin naxinanda xi tjin nga'ndebiu. 2'Ba Juan kjint'e en ngaya nduyo ngat'are mé= xi titsa'en Cristo. 'Ba 'batsa'en kitsikasen yak'a xutare, 3tuxi skuiningiyanire: ―¿A ji= ni xi techuya_ri̱? ¿Asa kja'e= xi xuya_ri̱? 4'Ba Jesús kitsingojore: ―Tangiun 'ba tik'in_ru Juan mé= xi tenu'yo 'ba te'yo nga'e. 5Xuta ka inyamatsejen nganire. Xi bi ma fi ma fi ngani. Xi chi'in fe'ndujun kunre inyamatsejen ngani ngat'are chi'inre. Xi xtaya inyant'e=ngani. Xi je jesun inyafa'aya nganire. Xuta xi ni̱ma̱ inyafa'axtiuyare en ndare Na'enchana. 6¡Ndaxure xuta xi bi s'ejñujinre ngat'ana̱ 'ba kuasent'axin! 7'Ba kionga je inyafi ngani xutare Juan, Jesús 'etuts'inre nga kinchja ngat'are Juan, 'ba kitsure xutankjiun: ―¿Mé= xi tsanginchutsejen_ru nga'nde t'axin? ¿A jngu yanaxu xi titsiteya ntjo? 8Tsa bi kui, ngu, ¿mé= xi tsanginchutsejen_ru? ¿A jngu xuta xi yaja najñu xi tsja kji'i? Tunga xi baja najñu xi tsja kun, kui= xi tjindu ndaba rey. 9Tunga, ¿mé= xa 'etjuñu? ¿Asa tsanginchutsejen_ru jngu profeta? Jun, kui. 'Ba xin_nuu̱ nga Juan xi ngisa je ngisa nga ko mare nchja chinga profeta xi yak'a. 10Ngat'are Juan nga 'bitsa'en kua'indut'a enre Na'enchana: An tetsikasentitjunra̱ xi ya'a enna̱. Kui xi k'uendatitjun ndiyari. 11Kjuakixi= xi xin_nuu̱. Nijngu xuta xi tjin ngasun'ndebi ngisa je ngisa nga ko mare Juan Bautista. Tunga kui xi ngisa ichi 'yare ña batexuma Na'enchana ngisa= je ngisa nga ko mare Juan. 12'Nda ni nga ye'e nijmi Juan Bautista enre Na'enchana ka'nda nganda'e 'ñu timixkjanya ña batexuma Na'enchana, 'ba xuta xi fa'a ko kjua'ñu, kui= xi inyatsitse'e kio. 13Ngayéje xi yakuya nchja chinga profeta ko xi kua'indut'a kjuatexumo, kui= xi kitsutitjun ngat'a tse'e nixtjin kionga kuatexuma Na'enchana ka'nda nga 'etuts'inre nga ye'e nijmi Juan. 14'Ba tsa mejénnú ku̱akjainnu ion, Juan= xi Elías xi tjinnere nga kjua'e. 15Xi tjin ñojon, ngatasen ñojon. 16¿Tunga mé= xi singusunkua̱ xuta xi tjin nganda'e? Jo=ni nchja nisti xi 'bendu ndetsin 'ba tsure xinkjin nga kji'ndaya: 17“Kjinikjaneri̱ son xi nda tsu, 'ba bi kjicho. 'Ba kijndari̱ son xi ba tsu, 'ba bi kichi'ndo.” 18Ngat'a kionga ja'e Juan, 'echjonre yojore nga tsakjen 'ba nga kits'i binu, 'ba xuta kitsu: “Isennixtjin xi bi nda tijñajinre.” 19'Ba jaskan ja'e ngani Ki'ndire Xuta xi'iun, kui xi nda kjen 'ba 'bi binu, 'ba xuta 'bi kitsu nganire: “Kui xutabi tse kjen 'ba 'ñu 'bi binu, jngu xuta xi nda ya'a nchja xi kjebechjintjai tsajmi ngat'are Roma ko xuta je.” Tunga kjuankjin kakunre Na'enchana makixiya ngat'are mé= xi tsa'en ―kitsu Jesús. 20'Ba 'batsa'en Jesús 'etuts'inre nga jatiko xuta xi tjindu naxinanda ña je ngisa 'ñu kitsa'en kjuakun, ngat'a xutabiu bi kitsik'antjaiya kjuafa'etsjenre nga ja'e ngani ngixkun Na'enchana. 'Ba kitsure: 21―¡Nimaxuni ngat'anu jun, xuta xi tse'e Corazín! ¡Nimaxuni ngat'anu jun, xuta xi tse'e Betsaida! Ngat'a tsa xuta xi tse'e Tiro ko xi tse'e Sidón tsabe kjuakun xi kuán ngajinnu, jeru nda'e kitsik'antjaiyani kjuafa'etsjenre nga ja'e ngani ngixkun Na'enchana 'ba tsakaja najñu kjue 'ba 'e'a chojo nindaku. 22Tunga an xin_nuu̱. Nixtjin nga ku̱anre kjua ngasun'ndio, ngisa= tse kjuanima xjo'o nga ko mare xuta xi tse'e naxinanda Tiro ko xi tse'e naxinanda Sidón. 23'Ba jun xuta xi tse'e Capernaum, tsa manu nga stunitjion ka'nda ngank'a, tusa Na'enchana sik'etukajennu ka'nda nga'nde ña kjua'a kjuanima xuta 'ba ña bi 'boya ndi'i. Ngat'a tsa naxinanda Sodoma tsabe kjuakun xi kuán ngajinnu, tojo tijñaru 'nda nganda'e tsakaiñu. 24Tunga an xin_nuu̱. Kionga kjua'e nixtjin nga ku̱anre kjua ngasun'ndio, ngisa= tse kjuanima xjo'o nga ko mare xuta tse'e Sodoma ―kitsu Jesús. 25'Ba kui nixtjinbiu 'bi kitsu Jesús: ―An tetsjara̱ kjuanda, Na'en xi tse'e ngank'aa 'ba ko t'anangiu. Ngat'a kik'ejñatsejen_ri xuta xi bi mare xujun mé= xi kik'ejña'mo_ri xuta nkjin kakun 'ba xi mankjinre mé= xi tjin. 26Jun Na'en, ngat'a 'ba=tsa'en kuatsjari. 27Ngayéje xi tjin je kitsingantsjana̱ Na'enna̱. 'Ba tu'yá bexkun Ki'ndiu, tu Na'en sani xi bexkun. 'Ba nde ni'yá bexkun xi Na'en, tu Ki'ndiu sani xi bexkun. 'Ba xuta xi mejénre kuakutsejenre Ki'ndiu 'yá= xi Na'en, kui xi skuexkun Na'en. 28Ndechunnu ngatsi'u xi tifejndanu nga teña'axo 'ba xi kich'anijiun ch'a, 'ba an sikja'ejndanu. 29Ngisa ngi'nde teko yojonu ngat'ana̱ 'ba ngatjamo xutana̱, ngat'a tsjejndaña̱ 'ba ni̱ma̱= kjiya kakua̱n, 'ba kuasjainu nga'nde ña sikja'aya inimanu. 30Ngat'a bi na'en tjinre nga ngi'nde kueko yojonu ngat'ana̱ 'ba nga xutana̱ kuon, 'ba ch'a xi sika'anu kijna ―kitsu Jesús.

will be added

X\