SAN MARCOS 9

1Jesús 'ba nde kitsure: ―'Ba xinkixi_nuu̱, nga yak'a xuta xi tjindu i bi kjuesun 'nda nga̱ skue nga kjua'e ña batexuma Na'enchana ko kjua'ñu. 2'Ba jon nixtjin jaskan nde, Jesús tsijun jngu nindu nk'a nga tu Pedro, Santiago 'ba ko Juan kiko sa. 'Ba ngixkun kui, Jesús ts'antjaiya isenre. 3'Ba se 'na kis'e najñure 'ba ngisa 'ñu tiba kis'e nga ninga nkjin ndiya kjue bi 'ba s'e̱. 4'Ba tsabe Elías ko Moisés, nga inyafako nijmi Jesús. 5'Ba Pedro kitsure Jesús: ―Na'en, ¡á nda ni nga nga'e tetsuba! Ján ni'ya sindai̱: jngu xi tsiji, 'ba jngu xi tse'e Moisés 'ba jngu xi tse'e Elías. 6Ngat'a xutare inyatsakjun, 'ba Pedro bi be mé= xi kuetsu. 7'Ba kio kuatsejen jngu yufi 'ba kitsink'ianre, 'ba ngajin yufibiu 'etju jngu jnda xi kitsu: ―Kui=bi xi ki'ndina̱ xi 'ñu mejénna̱; tasen ñojon_ru kui. 8'Ba ndekuini chubabiu, kionga kiskutsejenndaire, tu'yá nde tsabekoni Jesús, tu kui tajngu sejña ngisa. 9'Ba yejerañu nga inya'betukajen nindu, Jesús kitsure xutare nga tu'yá ngate'ere nijmi mé= xi tsabe ka'nda nga̱ Ki'ndire Xuta xi'iun kjua'aya nganire ngajinre mik'en. 10'Bamani xutare 'ejin kakun suba kjua'mobiu, nisi miningiyare xinkjin mé= xi tsunire nga kjua'aya nganire ngajinre mik'en. 11'Ba tsiningiyare Jesús: ―¿Ánñu tsuni chjine kjuatexuma nga tjinnere Elías tjun kjua'e? 12'Ba kui kitsingojore: ―Kjuakixi= nga Elías tjun kjua'e, 'ba nga kui k'uejñanda yeje. Tunga ¿a bi 'batsa'en kua'indut'a enre Na'enchana nga Ki'ndire Xuta xi'iun tse kjuanima kjua'a 'ba xiaton? 13Tunga an xin_nuu̱ nga je ja'e Elías, 'ba nga xuta kitsiko jotsa'en nga kuamejénre, jo tsu enre Na'enchana ngat'are kui. 14'Ba kionga ja'e ngani ña tjindu xutare xi yak'a, tsabe nga 'ñu nkjin xuta kitsendaire; 'ba yak'a chjine tse'e kjuatexuma inyafosiko. 15'Ba kionga xutankjiun tsabe nga je ja'e Jesús, ngatsi'i 'ñu kuakunre 'ba mangatsanga kiji nga kitsite'ndare. 16'Ba Jesús tsiningiyare: ―¿Mé= xi techubasiko kui? 17'Ba jngu xi kio sejñajinre xutankjiun kitsu: ―Ji na'en, nga'e ja'ekora̱ ki'ndina̱, ngu jngu isennixtjin tijñajinre xi bi tsja'ndere nga nchja. 18'Ba nitu ñañu isennixtjinbiu kjebe, kanikja'at'a t'anangiu, 'ba ndaxu 'baxje ts'a, 'ba majngaya nde'ñu 'ba s'ejñataja. 'Ba je tsi'a_ra̱ xutari nga ngat'axjejinre isennixtjinbiu, tunga bi kuánre. 19'Ba Jesús kitsingojo: ―¡Xuta xi tjin nganda'e xi tsajainre kjuamakjain! ¿Kjia'á=ñu 'nda kuatejñako_nuu̱? ¿Kjia'á=ñu 'nda xukjuako_nuu̱? Ndekonu nga'e chana'enbiu. 20'Ba 'batsa'en kichanire chana'enbiu ngixkun Jesús. Tunga kionga isennixtjinbiu tsabe Jesús, ta'a kitsa'en nga 'etsujmeyare chana'enbiu 'ba kiska t'anangiu, 'betikjakoni 'ba 'etju ndaxu ts'a. 21'Ba Jesús tsiningiyare na'enre chana'enbiu: ―¿Kjia'á=ñu 'nda 'ba manire? 'Ba na'enre kitsingojo: ―'Ndani nga ki'ndi; 22'ba nkjin ndiya isennixtjinbiu kanikja'ajin ndi'i 'ba ko nanda, tuxi sik'enni. Tunga tsa ku̱an xi si'en, ngatja'animari ngat'ani̱ 'ba tisekoni. 23'Ba Jesús kitsure: ―¿Jótsa'en tsa “ku̱an xi si'en”? Ngayéje ma ngat'are kui xi makjainre. 24'Ba tukjia'a kiski'ndaya na'enre chana'enbiu: ―¡Makjainna̱ an; tisekona nga ngatamakjain ngisana̱! 25'Ba kionga tsabe Jesús nga 'ñu nkjin xuta inyamañajan, jatiko isennixtjin xi bi nda, 'ba kitsure: ―Ji isennixtjin xi bi ba'e'nde_ri nga nchja 'ba xi kitsixtaya, an xinra̱ t'etukajin yojore chana'enbi, 'ba bi nde bitjas'enjinni_ri. 26'Ba isennixtjinbiu kiski'ndaya, 'ba kitsa'en nga 'ñu 'etsujmeya nganire chana'enbiu 'ba 'etukajin yojore. 'Ba kitsik'ejña chana'enbiu joni xi je k'en, 'ba nkjin xuta kitsu nga je k'en. 27Tunga Jesús kiskjebe ntsja, 'ba kiskjenitjen; 'ba chana'enbiu tsakasen nduju. 28'Ba jaskan Jesús ja'as'en jngu ni'ya, 'ba xutare tsiningiyat'axinre Jesús: ―¿Ánñu ji̱n bi kuán kji'naxjenii̱ isennixtjinbiu? 29'Ba Jesús kitsingojore: ―Jngu isennixtjin joni kibi bi tu chu̱ba̱ 'betju, tu kio=nga chukua Na'enchana. 30'Ba kionga je kijini kio, ja'axtiu nangi Galilea. 'Ba Jesús bi kuamejénre nga tjin xi skue, 31ngat'a tibakuyare xutare. Tsure: ―Ki'ndire Xuta xi'iun ku̱angantsja xuta, 'ba sik'en; tunga xi majánni nixtjin, kjua'ayare. 32Tunga xutare bi mankjinre mé= xi tsure, 'ba tsakjun nga miningiyare. 33'Ba echu naxinanda Capernaum. 'Ba kionga je tjinduya ni'ya, Jesús tsiningiyare xutare: ―¿Mé= xi techubasini_ru ngaya ndiyo? 34Tunga tu xiu= tsik'endu, ngat'a ngaya ndiyo inyafosi nga 'yá= xi tjun sejña ngajinre. 35'Ba Jesús tsik'ejña 'ba kinchjare nga tejó xutare, 'ba kitsure: ―Tsa tjin xi mejénre tjun ku̱an ngajinnu, tusa ngataxjenima yojore, 'ba chu'ndare ngatsi'i ngatjama. 36'Ba jaskan kiskjebe jngu ki'ndi 'ba kitsikasen ngajinre kui, 'ba tsakank'a 'ba kitsure xutare: 37―Kui xi kjebetjo ngat'ana̱ jngu ki'ndi joni kibi, an kjebetjona̱; 'ba kui xi kjebetjona̱ an, bi tu an kjebetjona̱, 'ba=nde kjebetjo kui xi kitsikasenna̱. 38'Ba Juan kitsure: ―Na'en, je kji'yee̱ jngu xuta xi 'baxje isennixtjin xi bi nda nga tsichjen ja'enri 'ba ji̱n kik'echja'nde_ri̱, ngat'a bi ña tjenkona. 39Tunga Jesús kitsingojo: ―Bi 'bechja'nde_ru; ngat'a tsajain xi sa'en jngu kjuakun nga tsichjen ja'enna̱, xi jaskan ku̱an ch'o tsa'en kuinchja ngat'ana̱ an. 40Kui= xi bi stikena, ko ña tijñakona. 41'Ba tu'yañu xi sjanu ninga tu jngu vaso nanda ngat'a xutana̱= ñu, 'ba xinkixi_nuu̱ nga sakure chjire. 42'Ba tu'yañu xi sikajngije jngu ki'ndi chibi xi makjainre ngat'ana̱, ngisa= nda ku̱anre nga xanikja'ajin ndachikun ko jngu ndiojo tse xi tji'ñut'a ngisin. 43'Ba tsa ndsai sikajngijeri, tusa tichatjin; ngisa= nda ni kutu ntsja tetsji nga kuitjas'en ngank'aa, 'ba tu'bani tsa tjinri ngojó ndsai 'ba tsa k'uikisen nga'nde ña fa'a kjuanima xuta, kioña bi 'boya ndi'i. 44Kioña bi fesun tjiuchindu 'ba nga bi 'boya ndi'i. 45'Ba tsa ndsakui sikajngijeri, tusa tichatjin; ngisa= ndani kutu ndsaku tetsji nga kuitjas'en ngank'aa, 'ba tu'bani tsa tjinri ngojó ndsakui 'ba tsa nga'nde ña fa'a kjuanima xuta xanikja'ajinri. 46Kioña bi fesun tjiuchindu 'ba nga bi 'boya ndi'i. 47'Ba tsa xkuin sikajngijeri, tusa 'naxje; ngisa= nda ni nga kat'a tetsji nga kuitjas'en ña batexuma Na'enchana tu'bani tsa tjin ngojó tuxkuin 'ba tsa nga'nde ña fa'a kjuanima xuta xanikja'ajinri, 48kioña bi fesun tjiuchindu 'ba nga bi 'boya ndi'i. 49Ngat'a ngatsi'i ku̱atsje ko ndi'i jotsa'en matsje yojo nga maxtiani. 50'Ba na̱xo̱ nda; tunga tsa bi nde xtiani, ¿jótsa'en ku̱axtia ngani? 'Ba ngatjas'e ngajinnu na̱xa̱ nga jngu jnguu, 'ba ko kjuaxiu tetsubako xingiu.

will be added

X\