SAN MARCOS 6

1'Ba Jesús 'etjuni kio 'ba kiji nangire, 'ba kitjenngi xutare. 2'Ba kionga ja'e nixtjin nga nikja'aya, Jesús 'etuts'inre nga yakuya ni'ya sinagoga. 'Ba nkjin xuta kjint'ere Jesús, 'ba tu miningiyakun=re xinkjin: ―¿Ñáñu kikja'anire xutabi ngayéje tsajmi xi bakuya? ¿Mé= kjuankjinkakun xi kitsa'ere, 'ba ko kjuakun xi tsa'en? 3¿A bi tsa chjine yo kibi, ki'ndire Marío, xi nts'e mani Sandio, Kusio, ko Judo, 'ba ko Simón? ¿A bi tsa nde i tjindujinnina ndichja ngayeje? Kui= kjuañu ch'o kuánnire ngat'a tse'e 'ba bi kuamejénre nga ku̱akjainre. 4Tunga Jesús kitsure: ―Ngayéje nga'nde 'yaxuta= jngu xuta profeta, tunga ña nangire, ngajinre xinkjin 'ba ninga ña ni'yare bi 'yakunre. 5'Ba bi kuán kitsa'en jngu kjuakun kio, tu chuba xuta xi yanere ntsja xi inyafesun 'ba kitsinda. 6'Ba Jesús tu kutsejenkuun nga xutabiu bi kuamejénre nga kuakjainre ngat'a tse'e kui. 'Ba Jesús fikakuya nga'nde xi tjindundai kio. 7'Ba Jesús kinchjare nga tejó xutare, 'ba 'etuts'inre nga jo jó kitsikasen, 'ba kitsjare kjua'ñu nga k'uaxje isennixtjin xi bi nda. 8'Ba kitsure nga tumé kua'a ngaya ndiyo, tu jngu sa yanise. 'Ba nga bi ku̱an kueko niñuxtila, chitsa, 'ba ninga ton. 9'Ba nga ku̱an kuaya jndere, tunga bi ku̱an kua'a ngijngu nga najñure. 10'Ba kitsure: ―'Ba tuñañu nga kuitjas'ion jngu ni'ya, tetsubo kio ka'nda nga̱ k'uetjuñu nga'ndebiu. 11'Ba tsa jngu nga'nde bi stukja'atjo ninga bi kuasen ñojonnu xuta xi tjindu kio, tusa t'etju nga'ndebiu 'ba t'etsujmio chojore ndsakú, joni jngu chu̱ba̱ nga kui xutabiu tjinre je. 12'Ba kio 'etju xutare, 'ba ye'eyare nijmi xuta nga ngatatsik'antjaiya kjuafa'etsjenre. 13'Ba nkjin isennixtjin xi bi nda ts'axjejinre xuta, 'ba nkjin xuta xi inyafesun kitsinda nga kitsikajunre aseti. 14'Ba xuta ngaku xi titjun Herodes 'ba nde kjint'e en ngat'a tse'e Jesús, ngat'a ne nkjin nga'nde nda 'yare ja'enre Jesús. 'Ba yak'a xuta kitsu: ―Kui Juan Bautista xi je ja'aya nganire, 'ba kui= kjuañu tjinnire nga'ñu nga titsa'en ngani kjuakun. 15'Ba kja'e xuta kitsu: ―Kui Elías. 'Ba xuta xi yak'a kitsu: ―Kui jngu xuta profeta joni ngasa'e. 16Tunga Herodes, kionga kjint'e kui enbi, kitsu: ―Kui Juan. An 'exa nga kitisin, 'ba nganda'e je ja'aya nganire. 17Nga tu kjuare chjun Herodia= nini, nga Herodes 'exa nga kjinduba Juan, 'e'ñu, 'ba kiskanis'en nduya. Chjun Herodia, chjunre Felipe kuán tsakaiñu, xi nts'e Herodes, tunga Herodes tsixanko ngani chjunbiu. 18Ngat'a Juan ja'ba je kitsure Herodes: ―Kjuatexumo tsu nga bi ku̱an chjunre nts'é kuenikue. 19'Ba tu kjuabiu= nini nga chjun Herodia kuastike Juan 'ba kuamejénre kitsik'en tsakaiñu, tunga bi kuán jó kitsa'ennire; 20ngat'a Herodes be= nga Juan jngu xuta kixi, tsje ko ni. Kui= kjua kitsakjunkeni 'ba tsikuenda. 'Ba kionga Herodes nt'ere Juan, ka'nda bi be mé= xi sa'en, tunga tsja mare nga basen ñojonre. 21Tunga tuchan ja'e nixtjin nga chjun Herodia kisaku ndiyare kionga kichu nu Herodes. Kui= nixtjinbiu ts'axje jngu s'i 'ba tsakjenko xutaxare ngatsi'i ngakure chasoldadu ngayeje 'ba ko xuta nyina xi 'ñu 'yaxkunre nangi Galilea. 22'Ba ki'ndi chjunre chjun Herodia ja'as'en nga'nde ña inyakjen 'ba kite. 'Ñu kuatsjare Herodes 'ba ko xi tjindut'a yamixo jotsa'en kite. 'Ba Herodes kitsure ki'ndi chjunbiu: ―Chja'ana tume xi mejénri, 'ba sjara̱. 23'Ba kitsja'enre nga sjare tume xi skui'are, nisi masen naxinanda ña batexuma. 24'Ba kui ki'ndi chjunbiu 'etju, 'ba tsiningiyare nare: ―¿Mé= xi skui'a_ra̱? 'Ba nare kitsingojore: ―Nindaku Juan Bautista chja'a_ri. 25'Ba ki'ndi chjunbiu tukjuan ja'as'en ngani ña tijña xuta ngaku xi titjun, 'ba kitsure: ―Nganda'e fani nga mejénna̱ nga kua'enaa̱ nindaku Juan Bautista ngaya jngu tiba. 26'Ba Herodes ne ba kis'ere; tunga ngat'a ja'ba je kitsja enre ngixkun xi tu kitsikjint'e, tjinnere kitsjare xi tsi'a. 27'Ba tukjuan 'exare jngu chasoldadu nga kuekatesin Juan. 28'Ba chasoldadu kiji nduyo, tsatesin Juan, 'ba jngu tiba 'eya nindaku. 'Ba kitsjare ki'ndi chjunbiu, 'ba kui kitsja nganire nare. 29'Ba kionga xutare Juan kjint'e nga je k'en, ja'ekja'a yojore 'ba kik'eyanijin. 30'Ba jaskan, kuañajan ngani nga tejó xutare kioña tijña Jesús 'ba ye'ere nijmi mé= xi tu kitsa'en, 'ba xi yakuya. 31'Ba Jesús kitsure: ―Jabiu, tjintaja jngu nga'nde ña jña chun, tuxi sikja'ayachiña. Ngat'a ne nkjin xuta i fi i ndiba tsa'enni, ka'nda kui bi saku'ndere nga kjen. 32'Ba 'batsa'en Jesús ko xutare ja'as'en jngu barku 'ba kiji jngu nga'nde t'axin. 33Tunga 'ñu nkjin xuta tsabexkun Jesús, 'ba tsabe ña kiji. 'Ba kio ne nkjin xuta 'etjuni nga'nde xi tjindu kio, 'ba tsangatsanga kiji ña tifi Jesús. 'Ba xutankjiun tu kui tjun echuni tu'bani ko Jesús. 34'Ba kionga Jesús 'etukajenni barkubiu, tsabe xutankjiun 'ba ja'animare, ngat'a 'ba tsa'en tjindu joni chutsanga xi tsajainjínre nai. 'Ba Jesús 'etuts'inre nga yakuyare nkjin tsajmi. 35'Ba kionga kuangixun, xutare kitsitiñat'are 'ba kitsure: ―Na'en, je kuangixun, 'ba nga'e ne t'axin. 36Tikaxant'ai xutankjinbi, tuxi ngatjikatseni mé= xi skine nga'nde xi tjindundai nga'e. 37Tunga Jesús kitsure: ―Ta'e_ru jun xi skine. 'Ba kui kitsingojo: ―¿A mejénri nga kuekindai niñuxtila xi ngusun tjin chjire chjina nga jó sientu nixtjin ña'axa, tuxi kua'eni_ra xi chine? 38―¿Jótjin niñuxtila tjinnu? Tangichutsejen_ru ―kitsu Jesús. 'Ba kionga je tsabe, kitsure: ―Ón niñuxtila 'ba jó tjiuti. 39'Ba Jesús 'exare nga kuetsik'enduku xutankjiun ngajin ndiji xkjuion; 40'ba tjin xi jngu sientu 'ba tjin xi yachute kitsik'enduku nini. 41'Ba jaskan Jesús kiskjebe nga ón niñuxtilo 'ba ngojó tjiutiu. 'Ba kiskutsejen ngank'aa 'ba kitsjare kjuanda Na'enchana, 'ba kitsixkua niñuxtilo 'ba kitsjare nga jngu jngu xutare, tuxi sika'binire ngatsi'i xutankjiun. 'Ba nde kitsika'bire ngojó tjiutiu ngayeje. 42'Ba ngatsi'i tsakjen ka'nda nga̱ kitsere; 43'ba kiskja'añajan xie xi ts'angi tse'e tjiutiu ko niñuxtilo 'ba tejó nisin kitse ngisare. 44'Ba ón mi kuán xuta xi'in xi tsakjen. 45'Ba ta'a, Jesús 'exa nga xutare ngatja'as'en barku 'ba nga tjun ngatji xingunda ndachikun ña tijña naxinanda Betsaida, yejerañu kui titsikixant'a xutankjiun. 46'Ba kionga je kitsikixant'a xutankjiun, Jesús tsijin jngu nindu nga kikjako Na'enchana. 47'Ba kionga je kuajñu, nga je masen ndachikun tjensun barku, Jesús, xi tsik'ejña tajngu ña kixi chun, 48tsabe nga na'en inyatsunginiña barku, ngat'a 'ñu tibe'ere ntjo. Kionga je tjis'e isen, Jesús tifisun ndachikun nga kitjenngi xutare. 'Ba je mejénre nga tu kjua'at'are tsakaiñu, 49kionga tsabe xutare nga ndachikun tsu'basun Jesús. 'Ba kitsikja'etsjen nga jngu=ru isen xi tsabe 'ba kiski'ndaya; 50ngat'a ngatsi'i tsabe 'ba kitsakjun. Tunga ta'a jako 'ba kitsure: ―¡Jún, na'en, ngatama'ñu kakún; an= ña̱, bi kun! 51'Ba kio Jesús ja'as'en barku, 'ba kis'e xiu ntjo. 'Ba tu kuakunre xutare 52ngat'a kje mankjinjínre kjuakun xi kitsa'en Jesús ngat'a tse'e niñuxtilo, ngat'a tojo titsujñu ngisare. 53'Ba kionga Jesús 'ba ko xutare je ja'axtiunda ndachikun, echu nga'nde xi Genesaret 'mi, 'ba barkure ngandai ndachikun 'et'a'ñu. 54'Ba kionga je 'etukajen barku, ta'a fani tsabexkun xuta nga Jesús= xi 'etukajen. 55'Ba kio tsangatsanga nga kiji ngayéje nga'nde xi tjin kionga ye'ere nijmi xuta ña tijña Jesús. 'Ba kionga kjint'e, xutabiu 'etuts'inre nga ja'eko xi sefesun xi kjiyuya nijña. 56'Ba tu ñañu nga fa'as'en Jesús, a naxinanda chi=, a naxinanda je= asa ngijña=, tuchuba tsikayuju xinkjin xi inyafesun kioña tsa'en ndetsin. 'Ba 'bets'are Jesús nga nisi tu tetjun najñure siko sa; 'ba manda ngatsi'i xi tu tsiko najñure.

will be added

X\