SAN MARCOS 4

1'Ba kio 'etuts'in nganire Jesús nga yakuyare xuta ndai ndachikun, 'ba ne nkjin xuta kuañajant'are. 'Ba kui= kjuañu, tsijinni barku xi tikijñajin ndachikun 'ba tsik'ejñayare, 'ba ngatsi'i xutankjiun ngandai ña kixí chun tsikinya. 2'Ba nga 'ejñare kjuakusun; 'etuts'inre nga yakuyare ne nkjin tsajmi. 'Bi tsa'en yakuyare: 3―Tasen ñojon enbi: Jngu xuta kiji nga kikjejndi xujma. 4'Ba kionga je tikjejndi xujma, masen xujmare tsixu ndai ndiyo; 'ba ja'e tjiunisio 'ba kiskine. 5'Ba ngimasen xujmare tsixujin ndiojo, ña bi tse nangi tjin; 'ba ta'a jesu ngat'a bi 'ñu nanga nangiu. 6Tunga kionga 'etju tsu'biu, yaka 'ba kitsixí ngat'a bi 'ñu nanga kiji jamare. 7'Ba ngijngu ka'a xujma tsixu ngajin na'ya, 'ba kuank'a na'yo 'ba bi kitsja'ndere nga nda kuacha xujmabiu, 'ba nimé tu kitsja. 8Tunga ngijngu ka'a xujmabiu tsixu ña nda nangi. 'Ba jesu xujmabiu 'ba kuacha, 'ba ne nda chan kitsja; 'ba tjin xujmabiu xi kitsja kate tu, tjin xi yachute ko te, 'ba tjin xi jngu sientu tu kitsja. 9'Ba kitsu ngisa Jesús: ―Xi tjin ñojon, ngatasen ñojon. 10'Ba jaskan, kionga Jesús tsik'ejña tajngu ko xuta xi tsikinyat'a tiñare 'ba ko nga tejó xutare, nchjabiu tsiningiyare mé xi tsunire kjuakusunbiu. 11'Ba Jesús kitsingojore: ―Jun, kitsa'e'ndenu nga ku̱ankjinnu mé xi tji'mo ngat'are ña batexuma Na'enchana; tunga kja'e xuta xi tjindu ngandetsin, ko kjuakusun sakuyanire; 12tuxi nisi nda skutsejen, bi skueni, 'ba tsa ninga nda kuasen ñojon, bi ku̱ankjinre, tuxi 'ba tsa'en bi k'uantjaiyani kjuafa'etsjenre 'ba bi ku̱achat'are jere. 13Jun, ¿a bi mankjinnu jó tsunire kjuakusunbiu? Tsa bi mankjinnu jun, ¿jótsa'en ku̱ankjinninu ngayéje kjuakusun xi yak'a? ―kitsure Jesús―. 14Xuta xi kjejndi xujma xuta xi tsikja'axtiuya enre Na'enchana tsinguyanire. 15Tjin xuta xi joni xujma xi tsixu ngandai ndiyo: ngu nt'e enbi, tunga ta'a ndiba chanayi 'ba kja'axin en xi je kis'entjejin inimare. 16'Ba yak'a xuta xi joni xujma xi tsixujin ndiojo: ngu nt'e enbi 'ba ta'a tsja s'ere nga makjainre, 17tunga bi nanga kiji jamare ngajin inimare 'ba bi tsé kixi minya; kui= kjuañu, nga tu ngat'are ion fa'axtiuni kjuanima 'ba tsjenngire xuta 'ba ngutjun fani tsichaja kjuamakjainre. 18'Ba tjin xuta xi joni xujma xi tsixujin na'ya: ngu nt'e enbi, 19tunga ne 'ñu tsikja'etsjen ngat'are tsajmi xi tjinre ngasun'ndebi, 'ba kjuanyino 'bejñure 'ba tu kui s'e̱ yejere tsajmi xi mejénre. 'Ba ngayejebi inimare fa'as'enjin 'ba bi tsja'ndere nga nda ku̱acha enbi ngajin inimare, 'ba bi tsja tu. 20Tunga tjin yak'a xuta xi joni xujma xi tsixu ña nda nangi: ngu kui xutabi nt'e enbi 'ba makjainre, 'ba ne nda chan tsja. Tjin xi kate, xi yachute ko te, 'ba xi jngu sientu tu tsja nga jngu jngu. 21'Ba Jesús kitsure ngayeje: ―¿A tjin= xi baka jngu ndi'i tuxi ngi'ndere jngu kaxa k'uejñayani asa ngi'ndere jngu nachan? ¿A bi tsa nga nk'a chun s'ejña ndi'i tuxi nda sitsejenni? 22Ngat'a ngayéje xi tijña'mo nganda'e kjua'e nixtjin nga s'e̱jñatsejen; 'ba xi bi matsejen nganda'e kjua'e nixtjinre nga k'uetukatsejen. 23Xi tjin ñojon, ngatasen ñojon. 24'Ba Jesús kitsu nganire: ―'Ñu nda tasen ñojon_ru mé xi tenu'yo. Ngat'a chu̱ba̱ xi sichjon nga k'uechubo kja'e xuta, 'ba=nde kui xi sichubako nganinu Na'enchana; 'ba ngisa= tse k'uesunnu. 25Ngat'a xi tjinre, ngisa= tse kua'e ngisare; tunga xi tsajainre, ka'nda stukja'are xi ichi tjinre. 26Nga ko ña batexuma Na'enchana ―kitsu Jesús― nde 'ba=nire joni xuta xi 'bentje xujma ngajin nangiu; 27ngu nde 'ba=nire tsa tikijñafe asa tijñakun, a ngajñu= asa nga nixtjin=, xujmo fesu 'ba mank'a, nisi bi tjibe jótsa'en tjimank'a. 28Ngat'a nangiu tsja tajngu chan; titjun xka chi'ndere, 'ba jaskan nts'enre, 'ba xi fet'ani s'ere tu xujmo; 29'ba kionga je kichji ture, kio xutabiu 'beñajan, ngat'a je= ja'e nixtjinre chan. 30'Ba kitsu ngisare: ―¿Mé xi mangusun ña batexuma Na'enchana, asa mé kjuakusun sikjia̱n an tuxi ku̱an singusunña? 31Kui jo=ni jngu xujma tse'e mostaza xi s'entjejin nangiu. Ninga ngisa ichi kun tu'bani ko ngayéje xujma xi tjin ngasun'ndebi; 32tunga, kionga je kis'entje, mank'a 'ba ngisa 'ñu je ma tu'bani ko ngayéje ya xi 'bentje xuta, 'ba ne ya'e= ma tjiare ka'nda tjiunise xi setsuma ngank'aa ma tsinda ndaba ngi'ndere nk'ianre yabiu ―kitsu Jesús. 33'Ba ne nkjin kjuakusun joni kibi kitsichjen Jesús nga yakuyare xuta. Yakuyare jotsa'en ku̱an ngisa nda ku̱ankjinre. 34Bi fako tsa bi ko jngu kjuakusun, ninga xin tsuyanire xutare jó tsunire kjuakusunbiu. 35'Ba ndekuini nixtjinbiu, kionga je tjima'ña, Jesús kitsure xutare: ―Tjian xingunda jan. 36'Ba 'batsa'en kitsik'endu xutankjiun 'ba xutare kiko Jesús ngaya barku xi je tjinduya, 'ba=nde tjenngi ngisare kja'e barku xi ñatjen tjen. 37'Ba kio kuán jngu ntjo 'ñu xi niki kjenitjen= nando 'ba tsindiure nando niki kitsiteya barku, 'ba ja'as'enntjai nanda, 'ba je mején kitse. 38Tunga Jesús ngastun barku tsakjajñafe, nga jngu najñu ngiku tikjijña ngi ku; 'ba xutare kitsikja'are 'ba kitsure: ―¡Na'en! ¿Ánñu bi kuenda teña'anni ninga tetiungijndia? 39'Ba Jesús tsisetjen 'ba jatiko ntjo 'ba ndachikun kitsure: ―¡Xiu teni! 'Ba kis'exiu ntjo 'ba jña kuachun. 40'Ba jaskan Jesús kitsure xutare: ―¿Ánñu ne tekunñu? ¿A tojo kje chunnuu̱? 41'Ba se kitsakjun= nchjabiu, 'ba miningiyare xinkjin: ―¿'Yá= tsé xutabi, nga ka'nda ntjo 'ba ko ndachikun tsik'etjusunnire?

will be added

X\