SAN MARCOS 14

1'Ba tu ngijó= nixtjin chaja ngisa nga s'e̱ya s'i pascua kionga chine niñuxtila xi tsajainre na'yu san. 'Ba ngakure na'mi 'ba ko chjine kjuatexuma inyamangisjai ndiyare jótsa'en ku̱an suba'moni Jesús, 'ba sik'en. 2Ngu tsure xinkjin: ―Bi ngajinre s'iu kjuinduba, tuxi bi sisi'ani xutankjiun. 3'Ba kionga Jesús tijña naxinanda Betania, nga ndaba Simón, xi xuta chi'in fe'ndujun 'mire; yejerañu Jesús tijñat'a yamixo, ja'e jngu chjun xi ya'a jngu lameta xi alabastro nini. Kui= lametabiu kjitse nanda xi suba naxu nardo 'bejunire 'ba xi ne chjire. 'Ba chjunbiu yakjan lameto 'ba kio 'estenjunre nindaku Jesús nandabiu. 4'Ba yak'a xuta xi tjindu kio kuakjanre, 'ba kitsure xinkjin: ―¿Ánñu tu 'ba tsa'en kitistentonni nandabi? 5Kui kjua nga ts'axtiu ján sientu ton denario chjire tsa kisateña tsakaiñu, 'ba kuán kitsa'ere xuta ni̱ma̱ tonbiu tsakaiñu. 'Ba jatiko chjunbiu. 6Tunga Jesús kitsu: ―Bi 'ba 'mi_ru; ¿ánñu tenistini_ru? Nda= tjin mé= xi kitsikona̱. 7Ngat'a xuta ni̱ma̱ tu i= tjindujinntsjainu, 'ba ku̱an kuiseko tu kjia'añu nga mejénnú; tunga an bi nga'e kuatejñajinntsjai_nuu̱. 8Kui= chjunbiu kitsa'en= mé= xi kuán xi kitsa'en; nde nganda'e=ni je kitsikja'ajnda ixi titjun yojona̱ ngat'a s'e̱yanijin=ña̱. 9'Ba fa texinkixi_nuu̱, nitu ñañu nga'ndere ngasun'ndio ña kjua'axtiuya en ndare Na'enchana, 'ba=nde kjuinukjua mé= xi kitsa'en chjunbi, 'ba 'batsa'en kjuinikja'etsjenya ―kitsu Jesús. 10'Ba Judas Iscariote, jngu xutare xi tejó, kikun ngakure na'miu tuxi singantsjanire Jesús. 11'Ba kionga na'miu kjint'ere, se kuatsja=re, 'ba kitsure nga sjare ton. 'Ba Judas 'etuts'inre nga tsangisjai mé= fa chu̱ba̱ xi ngisa nda nga singantsja Jesús. 12Nixtjin nga 'etuts'inre s'i pascua kionga chine niñuxtila xi tsajainre na'yu san 'ba nga nik'en chutsanga tse'e s'iu, xutare Jesús tsiningiyare: ―¿Ñáñu mejénri nga kuek'endai xi xina nga s'i pascua? 13'Ba kio Jesús kitsikasen jó xutare 'ba kitsure: ―Tangiun naxinanda jan. 'Ba kio skajiun jngu xuta xi jngu nisa nanda ya'a. Kui= tangintjenngiu. 14'Ba kioña kjua'as'en, 'ba t'in_ru xi naire ni'yo: “'Bi titsu Naini̱: ¿Ñáre nga'ndeñu nga kuakjenkua̱ xutana̱ kionga kuechjijñii̱ s'i pascua?” 15'Ba kio kui kuakunu jngu nga'nde teya xi je tijñanda 'ba xi ngank'are ni'yo tijña. Kio t'endo xi xina. 16'Ba xutare 'etju 'ba kiji naxinanda jan. 'Ba 'ba fa tsa'en kuasjaire jotsa'en ja'ba je kitsure Jesús. 'Ba kio 'enda xi skinejñu s'i pascua. 17'Ba kionga je tjima'ña, Jesús 'ba ko nga tejó xutare ja'e nga'ndebiu. 18'Ba yejerañu kionga inyakjent'a yamixo, Jesús kitsu: ―'Ba fa xinkixi_nuu̱ nga jngu ñu jun xi ñatjen tikjenkona̱, kui= xi singantsjana̱. 19'Ba xutare kuabare, 'ba 'etuts'inre nga tsiningiyare nga jngu jngu: ―¿A an= ña̱? 20―Jngu xi tejó mañu, kui= xi ndekuini tiba titsika'nyijinni niñuxtilare nga ko an ―kitsingojore Jesús―. 21Ngat'a tjinnere 'ba ku̱anre Ki'ndire Xuta xi'iun jotsa'en kua'indut'a enre Na'enchana ngat'are kui. Tunga nimaxuni xi singantsja kui. Tusa ngisa nda kuánre tsa bi kitsin. 22'Ba yejerañu inyakjenjñu, Jesús kiskjebe niñuxtilo 'ba kionga je kitsjare kjuanda Na'enchana, kitsijoya 'ba kitsjare xutare nga titsu: ―Chjubio. Yojona̱=bi. 23'Ba jaskan kiskjebe=ni jngu chutsin. 'Ba kionga je kitsjare kjuanda Na'enchana, kitsjare xutare ngayeje. 'Ba ngatsi'i kits'i. 24'Ba Jesús kitsure: ―Kibi= xi jinna̱ xi tse'e kjua xatse xi ti'bendakoni Na'enchana ko xutare. Kui= xi ne nkjin xuta tistenntjainire. 25'Ba fa xinkixi_nuu̱ nga bi nde binu k'uiña̱ ka'nda nixtjin nga binu xatse k'uia̱ ña batexuma Na'enchana. 26'Ba kionga je kise jngu son xi tse'e Na'enchana, kiji tjenngi tse'e Ya Olivo. 27'Ba Jesús kitsure xutare: ―Ngatsi'u sichajañu kjuamakjainnu ngat'a tsa'an; ngat'a 'ba=tsa'en kua'indut'a enre Na'enna: “Sik'ía̱n xi tsikuenda chutsango, 'ba kui tuchuña k'uetsumaba.” 28Tunga kionga kjua'ayana̱ an, kjuititjun_nuu̱ nangi Galilea. 29'Ba Pedro kitsure: ―Nisi ngatsi'i sichaja kjuamakjainre, an bi sichajaa̱. 30'Ba Jesús kitsingojore: ―'Ba fa xinkixira̱ nga ndekuini nistjenbi, kionga kje kji'ndajín chaxicha xi majóni ndiya, ji je ján ndiya kisji nga bi xutana̱ kuáin. 31Tunga Pedro tojo 'ba= kitsu ngisa: ―Nisi tsa kueyakora̱, bi xia̱n tsa bi xutari kuán. 'Ba 'ba= kitsu ngatsi'i xutare ngayeje. 32'Ba jaskan echu jngu nga'nde xi Getsemaní 'mi. ―Tetsubo nga'e yejerañu an tefikjakuaa̱ Na'enchana ―kitsure Jesús xutare. 33'Ba Jesús kiko Pedro, Santiago 'ba ko Juan, 'ba 'etuts'inre nga 'ñu ba kis'ere 'ba 'ñu kuafore. 34'Ba kitsure xutare: ―Kjuaba kitsejin inimana̱ joni tsa kui xi je sik'enna̱. Tetsubo nga'e, 'ba tetsubachun. 35'Ba 'batsa'en Jesús kiji ngubare, 'ba kio tsak'ejña tsindi 'nda t'anangiu, 'ba tsi'are Na'enchana tsa ku̱an kjua'at'axinre chu̱ba̱ nga kjua'a kjuanima. 36Kionga Jesús tifako Na'enchana tsu: ―Abbá Na'en, ji xi mari ña'an yeje tsajmi; tik'ejñat'axinnaa̱ kjuanimabi, tunga ngatjama jotsa'en mejénri ji, 'ba bi jotsa'en mejénna̱ an. 37'Ba jaskan Jesús jendiba ngani ña tjindu xutare, 'ba kjiyufe nga echu; 'ba kitsure Pedro: ―Simón, ¿a tetsjujñafe=ni? ¿A nijnguú chu̱ba̱ kichukjuari nga tsikenichin? 38Tetsubachun 'ba chja'a_ru kjuanda Na'enchana, tuxi bi xut'ayakoninú. Inimanu je tijñanda=, tunga yojonu inda ngisa. 39'Ba kio Jesús kikjako ngani Na'enchana, 'ba ndekuini en kinchja ngani. 40'Ba kionga jendiba ngani nde, je kjiyufe ngani xutare ngat'a nijño inya'bechja tuxkun. 'Ba bi nde beni mé= xi singojore. 41'Ba 'batsa'en, ja'e ngani Jesús xi majánni ndiya, 'ba kitsure: ―¿A tojo tetsjujñafe=ñu 'ba tenikja'aya=ñu? Ngat'e nde, je ja'e chu̱ba̱ nga Ki'ndire Xuta xi'iun ku̱angantsjare xuta je. 42Tisetjion, tangian nde. Chutsijon, je ndiba tiña xi singantsjana̱ an. 43'Ba nde sa'e= tinchjani Jesús kionga tukjia'a ja'e Judas, jngu xutare xi tejó, 'ba ja'e ne nkjin xuta xi kitsikasen nchja ngakure na'miu, ko chjine kjuatexuma 'ba ko xuta chinga. 'Ba xutankjiun kicha= ko ya= ya'a nga ja'e. 44'Ba Judas ja'ba je inya'a titjun nchjabiu nga kitsure: ―Kui xi k'uendsu'aa̱, kui=biu; nda tjindubo nga kueko. 45'Ba kionga ja'e, tu Jesús fani kitsitiñat'are. ―Na'en ―kitsure 'ba 'endsu'a. 46'Ba kio xutankjiun kitsuba'ñu Jesús. 47Tunga jngu xutare Jesús xi sejña kio ts'axje kichare 'ba tsatet'a ñojon chu'ndare na'mi titjun. 48'Ba Jesús tsiningiyare xutankjiun: ―¿Ánñu ko kicha ko ya kich'añu nga ja'echja'anuu̱, joni tsa jngu chacheje kuáa̱n? 49Nyujun nyujun tsakatejñajinntsjai_nuu̱ nga yakuya ngajin ndetsinre ningu, 'ba niñajanni kjindubanuu̱. Tunga 'bi tjima tuxi k'uetjusunni jotsa'en kua'indut'a enre Na'enchana. 50'Ba ngatsi'i xutare Jesús tsanga 'ba kitsik'ejña tajngu. 51Tunga jngu chana'en xi tjenngire, tu jngu najñu ts'atjijunre yojore, 'ba kui xi kitsuba nchjabiu; 52tunga chana'enbiu kitsuntjin najñure, 'ba tu tsanga kjisti=. 53'Ba 'batsa'en kichani Jesús ngixkun na'mi titjun; 'ba kio kuañajan ngatsi'i ngakure na'miu, tse'e xuta chingo 'ba ko tse'e chjine kjuatexumo. 54'Ba Pedro kjin kitjenngini Jesús ka'nda ngandetsin ndaba na'mi titjun, 'ba nchja xi tsikuenda kio tsik'ejñajinre. 'Ba kio kitsi'isure yojore t'a ndi'u. 55'Ba kiongakure na'miu 'ba ngatsi'i xuta xo tsangisjai jngu xuta xi skaninejere Jesús, tuxi sjani en nga kjuinik'en; tunga bi kuasjaire. 56Ngat'a ninga nkjin xi inyakaninere en ndesu Jesús, bi kjimangusun enre. 57'Ba yak'a tsikinya nduju 'ba kiskaninere en ndesu, nga inyatsu: 58―Ji̱n kjinu'ya_ri̱ nga kitsu xutabi: “An sikixuya=ña̱ ningubi xi tu xuta kitsinda, 'ba ján nixtjin skjenitjen ngañaa̱ jngu xi bi xuta tsinda.” 59Tunga ninga 'ba= tsa'en kjimangusun enre. 60'Ba kio na'mi titjun tsisetjen ngamasenre ngatsi'i, 'ba tsiningiyare Jesús: ―¿A tumé singuaje ngat'are mé= xi inyakaninejeri? 61Tunga Jesús xiu tsik'ejña, 'ba nijnguú en kitsingojo. 'Ba na'mi titjun tsiningiya nganire: ―¿A ji= ni Cristo, xi Ki'ndire Na'enchana? 62'Ba Jesús kitsingojo: ―Jun, an= ña̱. 'Ba xia=ñu Ki'ndire Xuta xi'iun nga tijña ngate kixire Na'enchana xi tjinre kjua'ñu, 'ba nga yufi kjuendibajinni ngank'aa. 63'Ba kio na'mi titjun 'ejnda najñure tuxi kji'yanire nga 'ñu ch'o kis'ere inimare, 'ba kitsu: ―¿Jótsa'en ku̱achjen ngisana xi skaninejere? 64Je kjinu'yo nga ch'o kitsu ngat'a tse'e Na'enchana xutabi; ¿jó mixun? 'Ba ngatsi'i kuangusun enre nga Jesús tjinre je 'ba nga tjinnere kueya. 65'Ba yak'a nchjabiu 'etuts'inre nga 'etiajunre Jesús, 'ba 'e'mo nkjain 'ba ye'ere. ―Ji xi profeta 'mi_ri yojori, 'ba t'innii̱, ¿'yá= xi ye'eri nganda'e nde? ―kitsure. 'Ba nchja xi tsikuenda kio nkjain Jesús tso'ojin. 66'Ba nga Pedro tijña ngi ni'yo, ja'e jngu chjun chu'ndare na'mi titjun; 67'ba kionga chjunbiu tsabe Pedro nga t'a ndi'u tijña nga titsi'isure yojore, kitsure nga kiskutsejen'a: ―Ji 'ba=nde Jesús tse'e Nazaret tsikitjajmekue ngayeje. 68Tunga Pedro 'e'mota'en yojore, nga kitsu: ―Junjun. Bi 'bexkua̱n, 'ba bi mankjinna̱ mé= xi tesji. 'Ba Pedro 'etjuuni kio 'ba kiji ña tijña xuntja ngandetsin. 'Ba kio kiski'nda jngu chaxicha. 69'Ba chjun chu'ndabiu tsabe ngani Pedro 'ba 'etuts'inre nga ye'ere nijmi xuta xi yak'a: ―Kui xutabi jngu xi tsak'ajmeko jmibiu. 70Tunga Pedro nde 'e'mota'en ngani yojore. 'Ba sangutjun, xuta xi tjindu kio nde 'ba= kitsu nganire: ―Kjuakixi= nga Jesús tsikitjajmetjenngi_ri, ngat'a Galilea tsiji ngayeje. 71'Ba 'batsa'en Pedro 'etuts'inre nga ch'o kitsu, nga kitsik'axki ngat'are Na'enchana: ―Bi 'bexkua̱n xuta xi te'mi_ru ―kitsu. 72'Ba ndekuini chubabiu kiski'nda ngani xi majóni ndiya chaxicho. 'Ba kio Pedro ja'etsjenre mé= xi ja'ba je kitsu'inre Jesús nga kitsure: “Kionga kje kji'ndajín chaxicha xi majóni ndiya, ji je ján ndiya kisji nga bi xutana̱ kuáin.” 'Ba kionga Pedro ja'etsjenre enbi, kiski'nda.

will be added

X\