SAN MARCOS 13

1'Ba kionga Jesús 'etjuni ngajin ndetsinre ningu, jngu xutare kitsure: ―¡Na'en, chutsejen, á tuku kunni ni'ya ya'ebi 'ba ko ndiojo ya'e xi kuandani! 2'Ba Jesús kitsingojore: ―¿A techutsejen'a=ni ni'ya ya'e xi 'bi kun? Ngu nijnguú ndiojo nde s'e̱nduxjonenire xinkjin. kuixungi yeje. 3'Ba jaskan kiji tjenngi tse'e Ya Olivo, xi tijña ngubare ningu. 'Ba Jesús tsik'ejña, 'ba Pedro, Santiago, Juan, 'ba ko Andrés tsiningiyat'axinre: 4―'Ba t'innii̱, ¿kjia'á nga 'bi ku̱an, 'ba mé= chu̱ba̱ xi s'e̱ kionga je k'uetjusun yeje kibi? 5'Ba Jesús 'etuts'inre nga kitsure: ―Chutsejen_ru yojonu, nga tu'yá ngat'ejñunu. 6Ngat'a ne nkjin xi kjua'e ko ja'enna̱ 'ba kuetsu: “An= ña̱ xi Cristo”; 'ba nkjin xuta k'uejñure. 7'Ba kionga jun kjuinu'yo nga i nga jaan tjin kjuachan, 'ba kionga xuta kue'e nijmi kjuachan xi tjima, bi kun, ngat'a tjinne=re nga 'ba ku̱an; tunga kje kjuejin ngasun'ndebi ya'a. 8Ngat'a naxinanda skjanko kja'e naxinanda, 'ba chikun skjanko kja'e chikun; 'ba ne nkjin nga'nde s'e̱ chon, 'ba ko kjindia. Ngayéjebi tu kui= xi sa'e 'betuts'inre kjuanima xi s'e̱. 9'Nde jun chutsejenni_ru yojonu; ngat'a ngixkun xutaxa= kuinikasennu, 'ba kuajanu ngaya ni'ya sinagoga. 'Ba nga tu ngat'a tsa'an= nini ngixkun chikun 'ba ngixkun rey kuekision, tuxi sikixiñu ngat'a tsa'an. 10Ngu tjinnere kjuinikja'axtiuya farani titjunre enre Na'enchana ngatsi'i naxinanda xi tjin. 11'Ba kionga xuta kjua'ekja'anu 'ba nga ngixkun xutaxa singantsjanu, bi nikjo mé= en xi kuixun. Tusa tixun mé= en xi kua'enu kui chubabiu; ngat'a bi jun kjuinukjuo, tu Isennixtjintsjere Na'enchana xi kuinchja. 12'Ba xi nts'e fo singantsja nts'e nga kjuinik'en, 'ba xi na'en ma singantsja ki'ndire; 'ba xi ki'ndi ma ndekui skjankoni xichare 'ba sa'en nga kjuinik'en. 13'Ba tu ngat'ana̱= nini ku̱astike tsi'inu xuta; tunga xi xukjuakore ka'nda nga̱ kjuet'a, kui xi k'uangi. 14Kjua'e xi ch'otjin xi sa'en nga tu jaan xiare nga'ndetsjere Na'enchana, 'ba xio nga sejña ña bi 'bakore nga sa̱sen ¿'ba xi ti'bexkiya kui enbi ngatamankjinre?, kui nixtjinbiu ngatsi'i xi tjindu nangi Judea ngatanga ña tjin nindu. 15'Ba ngatsi'i xi tjindu ngatsja ndaba, bi ngat'etukajen nga kjua'as'en ndaba tuxi kjua'ekja'ani mé= xi tjinre; 16'ba xi ngijña titsa'exa, bi ngatjendiba ndaba tuxi kjua'ekja'ani najñure. 17¡Nimaxunini yanchjin xi titsuya'more asa inyatsikaki ki'ndire kui nixtjinbiu! 18Chja'a_ru jun Na'enchana nga bi nixtjinre nch'an nga 'ba ngatjama; 19ngat'a 'ñu tsé kjuanima s'e̱ kui nixtjinbiu joni xi kje nisañajanni 'yare, 'ndani nga̱ Na'enchana kitsinda kui ngasun'ndebi ka'nda nganda'e, 'ba xi niñajani nde s'e̱ni. 20'Ba tsa Na'enchana bi sichuba kui nixtjinbiu, tu'yá k'uangi; tunga je kitsichuba nixtjinbiu Na'enchana nga tu kjuanda tse'e xuta xi je kiskja'ajin. 21Kui nixtjinbiu tsa tjin xi kuetsunu: “Chutsijon, nga'e tijña Cristo”, asa kuetsunu: “Chutsijon, ngajaan tijña”, bi ngatamakjainnu. 22Ngat'a nkjin= kjua'e xi Cristo kuetsure yojore tunga bi kui ni. 'Ba kjua'e xi profeta kuetsure yojore tunga bi kui ni; 'ba kui sa'en nkjin chu̱ba̱ ko kjuakun tuxi k'uejñunire xuta, 'ba tsa ku̱an, ka'nda xi je Na'enchana kiskja'ajin. 23Tunga chutsejen_ru yojonu jun ngat'a je 'ba texintitjun_nuu̱ ngayejebi. 24Tunga kui nixtjinbiu, kionga je kjua'a kjuanimabiu, s'e̱ jñu tsu'biu, 'ba na'enso bi nde sjani ndi'ire, 25'ba niñu kuixungini ngank'aa, 'ba nga'ñu xi tjin ngank'aa kjuatse. 26'Ba kio xiare Ki'ndire Xuta xi'iun, nga tjindibajin yufi ko 'ñu tsé kjua'ñu 'ba ko kjuaje. 27'Ba kio sikasen ankjelere, nga sikinyaku xuta xi je kiskja'ajin ngayéje ngasun'ndio, ka'nda nga'nyukjinre ngasun'ndebi 'ba ka'nda nga'nyukjinre ngank'aa. 28Ngatjamanu kjuakusun ngat'a tse'e ya higo: Kionga je 'betju nganire nts'en tjiare yo, 'ba kja'e xka 'betju nganire, je 'yo nga nixtjinre chundaba matiña. 29'Ba nde 'ba= tsa'ennire, kionga je xio nga 'ba tjima, ngatja'yo nga Ki'ndire Xuta xi'iun je sejñaxtiu xuntja ni'ya. 30'Ba xinkixi_nuu̱, nga k'uetjusun yeje mé= xi texia̱n kionga kje fesunjín xuta xi tjin nganda'e. 31Ngank'aa 'ba ko t'anangiu kjuet'a, tunga enna̱ bi kjuet'a. 32Tunga mé= nixtjin 'ba mé= chuba nga 'ba ku̱an, tu'yá be, ninga ankjele xi tjindu ngank'aa, 'ba ninga Ki'ndire Na'enchana. Tu Na'enchana sani xi be. 33'Ba kui= kjuañu, tetsubachunñu, 'ba nda tikuendo yojonu, ngat'a bi 'yo kjia'á=ñu nga 'bi ku̱an. 34Joni jngu xuta xi je mejen kuaje kja'e naxinanda, 'ba kionga 'betju ndaba tsike'nda xuta chu'ndare nga ngatatsikuenda ndaba, 'ba nga jngu jngu chu'ndare jngu xa tsjare, 'ba tsure chu'ndare xi tsikuenda xuntja ni'yo nga ngat'ejñakun. 35'Ba kui= kjuañu tetsubachunñu, ngat'a bi 'yo kjia'á= nga kjua'e xi naire ni'yo, a nga tjima'ña=, a nga masen nistjen=, a kio=nga kji'nda chaxicha, asa kio=nga je tjis'e isen. 36Tetsubachun, tuxi bi tetsjujñafeñu kionga tukjia'a kjua'e xi naire. 37Mé xi texin_nuu̱ jun, 'ba= xin tsi'i_ra̱: Tetsubachun ―kitsu Jesús.

will be added

X\