SAN MARCOS 12

1'Ba Jesús 'etuts'inre nga 'ejña kjuakusun: ―Jngu xuta 'entje tsujmi ntje xi uva 'mi, 'ba 'ench'are; 'ba kiskju'ngi jngu nga'nde ña sits'iungi uva, 'ba kiskjenitjen jngu torre nk'a tuxi sikuenda yejeni. 'Ba jaskan kitsikeyare nangiu nchja xi mare tsa'exako uva, 'ba kui xin kiji. 2'Ba kionga echu chanre tu, kui kitsikasen jngu chu'ndare tuxi kueki'anire nchjabiu chan xi 'bakore. 3Tunga nchjabiu kitsuba chu'ndabiu 'ba ye'ere, 'ba tu tjejen ntsja nga kitsikasen. 4'Ba kio xi naire nangiu kitsikasen ngani ngijngu chu'ndare; tunga nchjabiu kitsi'onre nindaku chu'ndabiu, 'ba ch'o kitsure. 5'Ba kja'e kitsikasen ngani, 'ba kibi kjinik'en. 'Ba jaskan nkjin chu'ndare kitsikasen; tjin xi kisatere 'ba yak'a xi kjinikjesun. 6'Ba tu ngijngu xuta tijña ngisare, kui xi ki'ndire fa, xi 'ñu mejénre. 'Ba xi fet'ani kui kitsikasen, nga kitsikja'etsjen: “Nchjabiu skuekun= ki'ndina̱.” 7Tunga nchja xi tsa'exako uva kitsure xinkjin: “Kibi= xi sa̱ku yejere tsajmi xi tjinre na'enre; tusa sik'ian, tuxi tsajan ku̱anni mé= xi sakure.” 8'Ba 'batsa'en kitsuba, 'ba kitsik'en 'ba kiskanikja'a t'axin yojore ña tjintje tsujmi ntje uvabiu. 9'Ba, ¿jó mixun jun? ¿Mé= xi sa'en xi naire nangiu? Ngu kjua'etsikjesun nchjabiu, 'ba kja'e xuta sikeyare nangiu. 10¿A kje 'bexkiyajíun enre Na'enchana? Nga tsu: Ndiojo xi chjine xjo ts'axjengi, kui= xi je kuánni ndiojo titjun. 11Na'enchana xi 'bi kitsa'en, 'ba tu makun=na ña nga 'ya. 12'Ba kio xuta titjun kuamejénre kitsuba Jesús, ngat'a be= nga Jesús 'ejña kjuakusunbi ngat'a tse'e kui. Tunga tsakjunke xutankjiun, 'ba kitsik'ejña tajngu Jesús 'ba kiji. 13'Ba kjinikasen ña tijña Jesús yak'a nchja fariseo 'ba ko xutare Herodes, tuxi sikinchjani Jesús en xi ku̱an kuangini. 14'Ba kui nchjabiu ja'etsure: ―Ji na'en, ji̱n 'ya=ni nga kjuakixi= xi sji nga bi tu enre xuta 'mini_ri 'ba nga bi tu isenre xuta 'mini_ri ngayeje, ngat'a bakuye nga ko kjuakixi ndiyare Na'enchana. ¿A tixa'nde asa bi tixa'nde nga k'uechjintjai_ra ña xuta ngakure Romano? ¿A k'uechji=ña, asa bi k'uechja? 15Tunga Jesús be=ni kjuajó nkjainre nchjabiu, 'ba kitsure: ―¿Ánñu chen te'bejñaninuu̱? Jngu ton ndenario ndekonu, tuxi skutsejenni_ra̱. 16'Ba ja'echanire jngu ton, 'ba Jesús kitsure: ―¿'Yá= tse'e isen xi kjit'a nga'e, 'ba 'yá= tse'e ja'en xi kua'indut'a? 'Ba nchjabiu kitsingojo: ―Tse'e xuta ngaku Romano=. 17'Ba kio Jesús kitsure: ―Ngu ta'e_ru xuta ngaku Romano xi kui tse'e, 'ba ta'e_ru Na'enchana xi tse'e kui. 'Ba tu kiskutsejenkun= nchjabiu jotsa'en kitsingojo ngani Jesús. 18'Ba kio yak'a nchja saduceo ja'ekun Jesús. Kui= nchjabiu tsu nga mik'en bi nde fa'ayanire; 'ba tsiningiyare Jesús: 19―Ji na'en, 'ba tsa'en kitsi'indu xujunna Moisés: “Tsa jngu xi'in xi je tsixanko chjun kueya, 'ba tsa bi kis'ekore ki'ndi, jngu nts'e xuta xi k'ion kuixanko ngani chjun k'anbiu tuxi sjanire ki'ndi nts'e xi k'ion.” 20Ngu jngu ndiya kis'e yatu nchja xi nts'e mani. Xi ma titjun tsixan, tunga k'en 'ba bi kis'ere ki'ndi. 21'Ba kio xi majóni tsixanko ngani chjunbiu, tunga 'ba nde k'en ngani ngayeje 'ba bi kis'e nganire ki'ndi; 'ba nde 'ba=nde kuán ngani ko xi majánni. 22'Ba nga yatu 'ba= kuán tsi'ire, nijnguú kis'ere ki'ndi. 'Ba jaskan 'ba nde k'en chjunbiu ngayeje. 23Ngu, nixtjin nga kjua'aya nganire xuta, ¿'yá= tse'e ku̱an chjunbi ngat'a ngayatu tsixanko? 24'Ba Jesús kitsingojore: ―Jun tjijñunu, ngat'a bi 'yo mé= xi kua'indut'a enre Na'enchana ninga kjua'ñure Na'enchana. 25Kionga mik'ion kjua'ayare, bi nde kuixanni ninga bi nde sikixanni ki'ndi nistire, ngu joni ankjele xi tjindu ngank'aa ku̱an. 26Tunga ngat'are nga kjua'aya nganire xuta, ¿a kje 'bexkiyajíun xujun xi kitsi'indu Moisés ngat'a tse'e ya na'ya xi tjitijin ndi'i? Kionga Na'enchana kitsure Moisés: “An= ña̱ na'enre Abraham, na'enre Isaac 'ba ko tse'e Jacob.” 27'Ba Na'enchana bi na'enre mik'en kuán, tu tse'e sani xi tjindukun; 'ba kui= kjuañu ne 'ñu titsujñuninu ―kitsu Jesús. 28'Ba ja'e jngu chjine kjuatexuma, 'ba kjint'e nga nchjabiu inyafoyanire xinkjin, 'ba kionga je tsabe nga Jesús nda kitsingojore, kitsitiñat'are Jesús 'ba tsiningiyare: ―Ngajinre ngayéje kjuatexuma, ¿ñáre̱ kjuatexuma xi ngisa tjun tijña? 29'Ba Jesús kitsingojore: ―Kjuatexuma xi tijña titjun yejere ngayéje, kui xi tsu: “Tasen ñojon, xuta naxinanda Israel, xi Naina kui xi Na'enchana mani xi tu jngututu ma sani. 30Timején Na'enchana xi Na'enri ko ngayéje inimari, ko ngayéje yojori, ko ngayéje kjuafa'etsjenri 'ba ko ngayéje nga'ñuri.” 31'Ba kjuatexumabi kui= xi majóni: “Timején xingi jotsa'en nimején yojori.” Tsajain kja'e kjuatexuma xi ngisa tjun tijña tu'bani nga ko kibi. 32'Ba chjine kjuatexuma kitsure: ―Jun nde, na'en, 'ba= tjin. Kjuakixi= xi sji, nga tu jngututu mani Na'enchana, 'ba nga nde tsajainni xi kja'ere. 33'Ba nga ña simijían Na'enchana ko ngayéje inimana, ko ngayéje kjuafa'etsjenna, 'ba ko ngayéje nga'ñuna, 'ba nga simijían xingia jotsa'en nimijáan yojona, kui= xi ngisa chjire tu'bani ko ngayéje kjuatjo xi ngasun altar ti. 34'Ba kionga Jesús tsabe nga chingabiu nda kitsingojo, kitsure: ―Bi kjin teni_ri ña batexuma Na'enchana. 'Ba ni'yá nde manikakun nga miningiya ngisare. 35'Ba kionga tibakuya Jesús ngajin ndetsinre ningu, tsiningiya: ―¿Ánñu chjine kjuatexuma tsuni nga ntjere David ndibani Cristo? 36Ngu ndekuini David kitsu, kionga Isennixtjintsjere Na'enchana kitsikinchja: Na'enchana kitsure Na'enna̱ an: “Teni ngate kixina̱, ka'nda nga̱ xi bi nda ya'ari ngi ndsakui sik'endaa̱.” 37'Ba ¿jótsa'en Cristo ntjere David kjuendibani, nga ndekuini David na'enna̱ tsure? 'Ba xutankjiun tsja tjinre nga inyabasen ñojonre Jesús. 38'Ba Jesús kitsu ngisa nga yakuya: ―Chutsejen_ru yojonu ngat'a tse'e chjine kjuatexuma, ngu matsjare 'betsuma ko najñu nduju 'ba matsjare nga ko kjuaxuta nikja'ayare ngajin ndetsin. 39'Ba matsjare nga 'bendusun yaxile xi tjun inya ni'ya sinagoga 'ba nga'nde xi ngisa nda chun kja'ajin nga jngu s'i, 40'ba kui xi kja'are ni'yare yanchjin k'an 'ba, tuxi k'ue'mota'en yojore, 'ñu tsé fako Na'enchana. Kui kjua ne tsé kjuanima kjua'axtiuni. 41Jngu ndiya Jesús tsek'ejña ngankjain nkjin kaxa ña xinya ton chje nga tikutsejen jótsa'en inyaminya tonre xuta kio. 'Ba 'ñu tsé ton inyaminya nkjin xuta nyina. 42'Ba kio ja'e jngu chjun k'an xi ni̱ma̱ 'ba 'eya ngaya jngu kaxabiu jó ton xkua xi chuba kjiya. 43'Ba kio Jesús kinchjare xutare 'ba kitsure: ―'Ba xinkixi_nuu̱ nga kui chjun k'an nimabi ngisa= tsé kitsja tu'bani ko ngatsi'i xi 'eya ton kaxa ton chjebi. 44Ngu ngatsi'i tu kui xi 'bangire tsja, tunga chjunbi, ngajin kjuanimare, je kitsja yeje xi machjenre nga k'uejñakun.

will be added

X\