SAN MARCOS 11

1Kionga je matiñare naxinanda Jerusalén, echu ña tjindu Betfagé ko Betania, nga'nde xi tjindut'are tjenngi tse'e Ya Olivo. 'Ba jaskan Jesús kitsikasen jó xutare. 2'Ba kitsure: ―Tangiun nga'nde xi tijña nguba kio, 'ba kionga kuitjas'ion, xiañu jngu ki'ndi burru xi tjita'ñu, xi kje nisa 'yajín 'bejñakjare. Chjundo 'ba ndeko. 3'Ba tsa 'yá xi skuiningiyanu ánñu 'ba teña'anñu, “Na'ennaxu sichjen 'ba ta'axu sja nganiri”, t'in_ru. 4'Ba kiji xutare nde, 'ba tsabe jngu ki'ndi burru xi sejñaya ndiyo, tjita'ñut'a jngu xuntja ni'ya, 'ba kiskjenda. 5'Ba yak'a xi tjindu kio tsiningiyare: ―¿Mé= xi teño'on? ¿Ánñu ki'ndi burru techjundañú? 6'Ba kui kitsingojo jotsa'en kitsure Jesús; 'ba kitsa'e'ndere nga kiko. 7'Ba 'batsa'en ja'ekore Jesús ki'ndi burru, 'ba yasunre tjiutsanga chajare 'ba Jesús tsak'ejñakjare. 8'Ba 'ñu nkjin xuta bayuju tjiutsanga chajare ngaya ndiyo, 'ba yak'a xi tsatet'a tjiare ngijña 'ba yayuju ndiyo. 9'Ba 'ñu kiski'ndaya xuta xi tjentitjun, 'ba ko xi tjenngire, nga inyatsu: ―¡Ngatjas'e kjuaje! ¡Ngatatsichikunta'en Na'enchana kui xi ndibani ngat'are ja'enre! 10¡Ngatatsichikunta'en kjuatexumare xi ndiba, kjuatexuma tse'e xuta chingana David! ¡Ngatjas'e kjuaje ngank'aa! 11'Ba Jesús ja'e naxinanda Jerusalén, 'ba ja'as'en ña ma ndetsin ningu; 'ba kionga je kiskutsejenndaire ngayéje xi tjin, 'etju ngani, ngat'a je kuangixun. 'Ba kiji Betania ko ngatejó xutare. 12'Ba kionga kuanyujun, kionga je 'etjuni Betania, Jesús kuabojore. 13'Ba kjin tsabe jngu ya higo xi tjinre xka; 'ba kitsitiñat'are tuxi skueni tsa tjinre tu. Tunga kionga echu ña sejña yabiu, tumé kisakure, tu suba xka= ngat'a bi nixtjinre tu higo ya'a. 14'Ba 'batsa'en kitsure ya higobiu: ―Niñajan nde ngatakjineni turi xuta. 'Ba xutare kjint'e mé= xi kitsu. 15'Ba kionga ja'e naxinanda Jerusalén, Jesús ja'as'en ña ma ndetsinre ningu 'ba 'etuts'inre nga ts'axje xi inyabateña tsajmi kio 'ba ko xi inyabatse. Tso'otsakjan yamixare xi tsik'antjaiyare ton xuta, 'ba ko xi inyabateña nise xi paloma 'mi; 16'ba ni'yá nde kitsja'ndenire nga kjua'axtiu ko tsajmi ña ma ndetsinre ningu. 17'Ba yakuya, nga kitsu: ―Enre Na'enchana tsu: “Ni'yana̱ kui= xi ku̱an ni'ya kioña xuta xi tjin ngasun'ndebi ma fakona̱”, tunga ngijore chacheje kjiño'on jun nga'ndebi. 18'Ba kionga kjint'e enbi, ngakure na'miu 'ba ko xuta chjine kjuatexuma tsangisjai jótsa'en ku̱an sik'enni Jesús, ngat'a ne inyatsakjunre. Ngu ngatsi'i xuta kutsejenkun jotsa'en bakuya kui. 19'Ba kionga je kuajñu, Jesús ko xutare 'etjuni naxinanda Jerusalén. 20'Ba nga tajñu nga kuanyujun, ja'at'a tiñare ya higobiu 'ba tsabe nga je kixi ka'nda jamare. 21'Ba kio Pedro ja'etsjenre mé= xi kuán, 'ba kitsure Jesús: ―Na'en, chutsejen, je kixi ya higo xi ch'o kik'in_ri. 22'Ba Jesús kitsingojo: ―Ngatamakjainnu ngat'a tse'e Na'enchana. 23Kjuakixi= xi texin_nuu̱, nga tu'yañu xi kuetsure nindubi: “Chjunitjen yojori, 'ba chanikja'ajin yojori ndachikun”, ku̱an jotsa'en nga kuetsure tsa bi jó ján kuaja inimare nga makjainre nga ku̱an jotsa'en nga titsu. 24Kui kjuañu 'ba xinni_nuu̱ nga ngayéje xi jun xjo'o nga xuko Na'enchana, ngatamakjainnu nga je kisakunnu, 'ba sakunu. 25'Ba kionga techuko Na'enchana, tichat'a_ru xingiu tsa mé= xi tjinnu ko kui, tuxi Na'enchana xi tijña ngank'aa 'ba nde sichat'aninu jenu ngayeje. 26Tunga tsa bi sich'at'a_ru xuta xi ch'o tsikonu, 'ba=nde bi sichat'anu jenu Na'ennu. 27'Ba jaskan Jesús ko xutare ja'e ngani naxinanda Jerusalén. Yejerañu Jesús tsu'ba ña ma ndetsinre ningu, kitsitiña ngakure na'miu, ko xuta chjine kjuatexuma 'ba ko xuta chingare naxinando, 28'ba tsiningiyare: ―¿Mé= kjua'ñu xi tjinri nga 'bi teñe'en? 'Ba ¿'yá xi kitsjari kjua'ñu nga ma 'bi teñe'en? 29'Ba Jesús kitsingojore: ―'Ba nde skuiningiya_nuu̱ tu jngusa tsajmi ngayeje; tingojonu, 'ba an 'ba xin_nuu̱ mé= kjua'ñu tjinna̱ nga 'bi tsa'aa̱n. 30¿'Yá= xi kitsikasen Juan Bautista nga ja'ekatenda, a Na'enchana asa xuta=? Tingojonu. 31'Ba kui jonijmiko xinkjin: ―Tsa “Na'enchana kitsikasen” kuixan, kui kuetsu=na “¿'Ba ánñu bi kuakjainninu ngat'a tse'e?” 32'Ba ¿jó kuixan tsa xuta kitsikasen? Ngat'a kitsakjunke xuta naxinando, ngu ngatsi'i kuakjainre nga Juan kuán jngu profeta. 33'Ba 'bitsa'en kitsingojore Jesús: ―Bi 'yee̱. 'Ba 'batsa'en Jesús kitsingojo: ―'Ba ninga an bi 'ba xin_nuu̱ mé kjua'ñu tjinna̱ nga 'bi tsa'aa̱n.

will be added

X\