SAN LUCAS 9

1'Ba kio Jesús 'eku xutare xi tejó 'ba kitsjare nga'ñu ko kjua'ñu tuxi ku̱an ko'oxjeni ngayéje kuya isennixtjin xi bi nda 'ba tuxi sindani chi'in xi kunre xuta. 2Kitsikasen nga kueke'e nijmi jótsa'en Na'enchana kuatexuma 'ba nga sinda xi inyafesun. 3'Ba kitsure: ―Tumé ch'o ngaya ndiyo: ninga yanise, ninga chitsa, ninga niñuxtila, ninga ton, ninga jó nga najñu. 4'Ba nituñare ni'ya xi kuitjas'ion, kio tetsubo ka'nda nga k'uetju ngañu nangibiu. 5'Ba tsa tjin nangi ña bi stukja'atjo, tusa t'etju kio 'ba t'etsujmio chojore ndsakú, joni jngu chu̱ba̱ nga tjinre je xuta xi tjindu kio ―kitsu Jesús. 6'Ba 'batsa'en nchjabiu 'etju 'ba kiji ngayéje naxinanda ki'ndi xi tjin kio. Inyatsikja'axtiuya en ndare Na'enchana 'ba inyatsinda xi inyafesun. 7'Ba xutaxa Herodes kjint'e ngayéje xi titsa'en Jesús, 'ba bi be mé= xi sikja'etsjen. Ngat'a yak'a kitsu nga Juan je ja'aya nganire ngajinre mik'en, 8'ba yak'a kitsu nga profeta Elías je ja'e ngani, 'ba yak'a kitsu nga je ja'aya nganire ngajinre mik'en jngu profeta xi tsik'ejña nixtjin kuatse jan. 9Tunga Herodes kitsu: ―An 'exa nga kitisin Juan. Tunga, ¿'yá= kibi xi nt'ia̱ en ngat'a tse'e? ―kitsu Herodes 'ba kuamejénre skue Jesús. 10'Ba kionga je ja'e ngani nchja chinga apóstol, ye'e yejere nijmi Jesús mé= xi kitsa'en. 'Ba Jesús kikot'axin suba nchjabiu jngu nga'nde xi tiñare naxinanda xi Betsaida 'mi. 11Tunga kionga xuta tsabe ña kiji, kitjenngi. 'Ba Jesús nda kiskjebetjo xutabiu 'ba yakuyare ngat'are jótsa'en batexuma Na'enchana 'ba kitsinda xi inyafesun. 12'Ba kionga je tjimangixun, xutare xi tejó kitsitiñat'are 'ba kitsure: ―Tusa tikixant'ai xuta, meni ngatafitsikja'aya 'ba ngatafikangisjai xichine naxinanda ki'ndi ko nga'nde xi tjindundai nga'e, ngat'a kui nga'ndebi tumé tjin. 13Tunga Jesús kitsure: ―Tusa ta'e_ru jun xi skine. 'Ba kui kitsingojo: ―Tunga tu ón chi niñuxtila kich'ee̱ 'ba jó chi tjiuti. ¿Asa mejénri nga kuekindai xichine ngat'are ngatsi'i xutankjiun? 14Ngu ónru mi mani nchja xi inya kio. Tunga Jesús kitsure xutare: ―'Ba t'in_ru nga ngat'endustin xki yachute. 15'Ba xutare kitsik'etjusun 'ba kitsik'endu ngatsi'i. 16'Ba 'batsa'en Jesús kiskjebe nga ón niñuxtila ko ngojó tjiutiu. 'Ba kiskutsejen ngank'aa 'ba kitsjare kjuanda Na'enchana ngat'are kui, 'ba kitsixkua 'ba kitsjare xutare, tuxi kui sika'bisunnire xuta. 17'Ba ngatsi'i kiskine ka'nda nga̱ nda kitsere. 'Ba 'eku xkuare niñuxtila xi ts'angi, 'ba tejó nisin kuán. 18Jngu nixtjin kionga Jesús tifakot'axin Na'enchana, 'ba xutare tjinduko, 'ba 'batsa'en tsiningiyare: ―¿Jó tsu xuta nga 'yá= ña̱ an? 19'Ba xutare kitsingojo: ―Tjin xi tsu nga Juan Bautista= ni. 'Ba yak'a tsu nga Elías= ni, 'ba yak'a tsu nga je ja'aya nganire ngajinre mik'en jngu profeta xi tsik'ejña nixtjin kuatse jan. 20'Ba Jesús tsiningiyare: ―'Ba jun, ¿jó mixun nga 'yá= ña̱ an? 'Ba Pedro kitsingojore: ―Ji= ni Cristo xi tse'e Na'enchana. 21Tunga Jesús 'ñu 'enere xutare nga ni'yá ngate'ere nijmi kibi. 22'Ba kitsure xutare: ―Ki'ndire Xuta xi'iun tjinnere nga ne tse kjuanima kjua'axtiu. 'Ba kjui'naxjengi ngat'are xuta chingare naxinando, ko xi ngakure na'mi 'ba ko chjine kjuatexuma, 'ba kjuinik'en, tunga xi majánni nixtjin kjua'aya nganire ngajinre mik'en. 23'Ba kio jako ngatsi'i xuta, 'ba kitsure: ―Tsa tjin xi mejénre ku̱an xutana̱, ngatatsichiyajin yojore 'ba nyujun nyujun ngatja'anijin krure 'ba ngatjandetjenngina̱. 24Ngat'a xi mejénre sik'angi yojore, sichaja; tunga xi sichaja yojore tu kjuana̱ ni, kui= xi sik'angi. 25Ngat'a, ¿mé= xi sa'enire xuta tsa sa'en ngayéje xi tjin ngasun'ndio, 'ba tsa sikjekjua asa sichaja yojore? 26Ngat'a tsa tjin xi ku̱asubare ngat'ana̱ 'ba ko ngat'are enna̱, 'ba=nde Ki'ndire Xuta xi'iun ku̱asubare ngat'a tse'e kui xutabiu kionga kjua'e ngani ko kjuajere, ko kjuaje xi tse'e Na'enchana ko xi tse'e ankjele tsje. 27'Ba xinkixi_nuu̱ nga yak'a xi inya nga'e bi kjuesun 'nda nga̱ skue jótsa'en batexuma Na'enchana. 28Jinru nixtjin jaskan nga je 'batsa'en jako, Jesús kikot'axin Pedro ko Juan 'ba ko Santiago 'ba tsijin jngu nindu nga kikjako Na'enchana. 29'Ba yejerañu tifako Na'enchana, isenre nkjain Jesús ts'antjaiya 'ba se 'na kis'e najñure 'ba 'ñu tiba kuán. 30'Ba jó xuta kuatsejen xi inyafako nijmi Jesús, Moisés ko Elías. 31'Ba kitse ngandaire kjuajere Na'enchana 'ba inyafo nijmi ngat'are kjuabeya xi Jesús tjinnere nga sijngu naxinanda Jerusalén. 32'Ba Pedro 'ba ko xinkjin 'ñu nijnare, tunga tsik'endukun 'ba tsabe kjuajere Jesús 'ba ngojó xuta xi inya ko kui. 33'Ba kionga ngojó xutabi je inyaminyat'axinre Jesús, Pedro kitsure: ―Na'en, ¡á ndani nga nga'e tetsuba! Tusa sindai̱ ján ni'ya chi, jngu xi tsiji, jngu xi tse'e Moisés 'ba jngu xi tse'e Elías. Tunga Pedro bi be mé= xi titsu. 34'Ba yejerañu tinchja Pedro, jngu yufi ja'etsink'ianre kui ko nchja xi inyako, 'ba kitsakjun kionga ja'anere yufibiu. 35'Ba ngajin yufibiu kjinu'yare jngu jnda xi kitsu: ―Kui=bi xi ki'ndina̱ xi kiskja'ajia̱n. Tasen ñojon_ru kui. 36'Ba kionga je kjinu'yare jndabiu, tsabe nga Jesús tsik'ejña tajngu. 'Ba xiu tsik'endu nchjabiu ngat'are kibiu, 'ba kui nixtjinbiu ni'yá ye'ere nijmi ngat'are mé= xi tsabe. 37Nga kuanyujun, kionga jendejen nindu, 'ñu nkjin xuta ja'ekja'aya ndiya Jesús. 38'Ba kio jngu xuta xi tjenjinre xutankjiun 'ñu kinchja 'ba kitsure Jesús: ―Maestru, 'bets'ara̱ nga chutsejen'achi ki'ndina̱. Ngat'a tu kui jngututu ki'ndi xi tjinna̱. 39Jngu isennixtjin xi bi nda kjebere 'ba tsa'en nga kji'ndaya 'ba 'betsujmeyare ka'nda nga 'betju ndaxu ts'a. 'Ñu ch'o tsiko 'ba bi mejénre suntjin. 40'Ba je ka'bets'a_ra̱ xutari nga k'uaxje isennixtjin xi bi ndo, tunga bi kuánre. 41'Ba Jesús kitsingojo: ―¡Xuta xi tjin nganda'e tsajainre kjuamakjainjín 'ba xtankoni! ¿Kjia'á= 'nda tjinnere nga kuatejñajin_nuu̱ 'ba xukjuako_nuu̱? Ndekona ki'ndiri nga'e. 42'Ba kionga chana'enbiu titsitiñat'are Jesús, isennixtjin xi bi ndo kiskanikja'at'a t'anangiu 'ba se 'etsujmeya=re. Tunga Jesús jatiko isennixtjin xi bi ndo 'ba kitsinda chana'enbiu 'ba kitsja nganire na'enre. 43'Ba ngatsi'i niki kuakunre kjuajere Na'enchana. 'Ba yejerañu ngatsi'i xuta inyamakunre mé= xi Jesús tsa'en, 'bi kitsure xutare: 44―Nda tasen ñojon mé= xi xin_nuu̱. Ki'ndire Xuta xi'iun ku̱angantsja xuta. 45Tunga xutare bi kuankjinre mé= xi tsure, ngat'a bi kitsa'e'ndere nga ku̱ankjinre. 'Ba tsakjun nga mi'are Jesús nga ngatatsuyare kibiu. 46'Ba kio xutare 'etuts'inre nga josiko xinkjin 'ba jonijmi ngat'are 'yá= xi ngisa nk'a ku̱an ngajinre. 47Tunga Jesús kuankjinre mé= xi inyatsikja'etsjen inimare nchjabiu, 'ba kiskjebe jngu ki'ndi chi 'ba kitsik'ejñat'are yojore. 48'Ba kitsure: ―Xi skjebetjo ki'ndibi ngat'a tsa'an, an kjebetjona̱. 'Ba xi skjebetjona̱ an, 'ba=nde kjebetjo xi kitsikasenna̱. Kui kjuañu xi ngisa tumé chjire manu, kui= xi ngisa nk'a. 49'Ba Juan kitsure: ―Maestru, kji'yee̱ jngu xi 'baxje isennixtjin xi bi nda nga ko ja'enri. Tunga kik'echja'nde_ri̱, ngat'a bi jngu xi tjenkona ña. 50'Ba Jesús kitsingojore: ―Bi 'bechja'nde_ru, ngat'a xi bi stikena, ña= basekona. 51'Ba kionga je matiña nixtjin nga Jesús tjinnere nga kuenijin ngani ngank'aa, 'ñu ye'e kakun nga kiji naxinanda Jerusalén. 52'Ba kitsikasentitjun yak'a nchja xi tjenngire. 'Ba nchjabiu kiji jngu naxinanda chi xi tijñajinre nangi Samaria, tuxi kikajnginire nga'nde ña ku̱an sikja'aya Jesús. 53Tunga xuta xi tjin kio, bi kiskjebetjo, ngat'a be= nga Jesús 'ñu mejénre kuaje naxinanda Jerusalén. 54'Ba kionga xutare Santiago 'ba ko Juan kjint'e ngat'are kibi, kitsure Jesús: ―Na'en, ¿a mejénri nga kuixii̱n nga ngat'etukajen ndi'i ngank'aa, tuxi sikjeni xutabi? 55Tunga Jesús kitsiku'beya 'ba kitsuyare nchjabiu. 56'Ba sa'e kiji kja'e naxinanda chi. 57Yejerañu inyafi ndiyo, jngu xuta kitsure Jesús: ―Na'en, an kjuitjenngira̱ nituña nga k'uin. 58'Ba Jesús kitsure: ―Tjiuba xi tjin ngi ngijño tjinre ngijo ña fikinyatjo, 'ba tjiunise xi tutjen ngank'aa tjinre ndaba. Tunga Ki'ndire Xuta xi'iun, tsajainre nga'nde ña ku̱an sikja'aya nindaku. 59'Ba 'batsa'en kitsu nganire ngijngu xuta: ―Ndetjenngina. Tunga xutabiu kitsingojore: ―Na'en, ta'e'ndena nga titjunfara kuik'eyanijia̱n na'enna̱. 60'Ba Jesús kitsingojore: ―T'ejñe mik'ion nga kui ngat'eyanijin mik'en xinkjin. Tunga ji t'in, 'ba t'e nijmi nga je tibatexuma Na'enchana. 61'Ba ngijngu kitsure: ―Na'en, kuitjenngira̱, tunga titjunfara ta'e'ndena nga kuitsikixant'aa̱ xi tjindu ni'yana̱. 62'Ba Jesús kitsingojore: ―Xi titsuba kicha xi bakjan nangiu 'ba kutsejen ngastun, tumé chjire ña batexuma Na'enchana.

will be added

X\