SAN LUCAS 8

1'Ba jaskan kibi, Jesús tsak'ajme ngayéje naxinanda ya'e ko naxinanda chi xi kio tjin, 'ba kitsikja'axtiuya en nda xi tsuya jótsa'en batexuma Na'enchana. 'Ba tjenko nga tejó apóstoles 2'ba ko yak'a yanchjin ngayeje xi kitsinda ngat'are chi'in xi kunre 'ba ko xi ts'axjejinre isennixtjin xi bi nda. Tjenjinre yanchjinbiu María xi 'ba nde Magdalena 'mi, xi 'etukajinre yatu isennixtjin xi bi nda, 3ko Juana, chjunre Chuza, xuta xi tsa'exat'are rey Herodes, ko Susana 'ba ko nkjin ngisa yanchjin xi tsakaseko nga kitsja mé= xi tjinre. 4'Ba 'ñu nkjin xuta jendibani kja'e kjuanga naxinanda tuxi ja'ekinya ñojonnire Jesús. 'Ba Jesús yakuyare jngu kjuakusun 'ba kitsu: 5―Jngu xuta kiji nga kikjejndi xujmare. 'Ba kionga tikjejndi, masen tsixundai ndiyo. 'Ba tsikisenne. 'Ba ja'e tjiunisio 'ba kiskine xujmabiu. 6'Ba ngimasen xujmare tsixujin ndiojo ña bi tse nangi tjin. 'Ba kionga xujmabiu kiska, kixi tu kjuare nga bi 'nyi'nde. 7'Ba ngijngu ka'a xujma tsixu ngajin na'ya. 'Ba na'yo xi ñatjen kuantjeko bi kitsja'ndere nga nda kuacha xujmabiu. 8Tunga ngijngu ka'a tsixu ña nda nangi 'ba kuantje 'ba nda chan kitsja, ka'nda jngu ciento xujma nga jngu tu. Kibi kitsu Jesús, 'ba kitsu ngisa ko jnda xi 'ñu: ―Xi tjin ñojon, ngatasen ñojon. 9'Ba kionga xutare tsiningiyare jó tsunire kjuakusunbiu, 10Jesús kitsure: ―Jun je kitsa'e'ndenu nga ku̱ankjinnu mé= xi 'mo tijña ngat'are ña batexuma Na'enchana. Tunga xuta xi yak'a, fakoña̱ nga ko kjuakusun, meni ninga skutsejen bi skue, 'ba ninga kuasen ñojon bi ku̱ankjinre. 11'Ba Jesús kitsu: ―'Bi= tsunire kjuakusunbiu. Xujmo, jo=ni enre Na'enchana. 12Xujma xi tsixundai ndiyo, jo=ni xuta xi nt'e ion tunga ndiba chanayiu nga kja'axin en xi je tijñajin inimare xutabiu, tuxi bi ku̱akjainnire 'ba k'uangi. 13'Ba xujma xi tsixu ngajin ndiojo, jo=ni xuta xi nt'e ion 'ba tsja tsa'en kjebe. Tunga bi 'ñu tjinre jama. Tu chuba nixtjin makjainre, 'ba kionga chut'ayako, tsichaja kjuamakjainre 'ba basent'axin. 14'Ba xujma xi tsixu ngajin na'yo, jo=ni xuta xi nt'e ion, tunga jotsa'en tifa'a nixtjiun, 'ñu tsikja'etsjen ngat'are tsajmi xi tjinre ngasun'ndebi 'ba mejénre kjuanyino ko kjuatsja xi tjinre. 'Ba ngayéje kibi bi tsja'nde nga nda ku̱acha ion ngajin inimare xutabiu, 'ba bi tsja chan ya'a. 15Tunga xujma xi tsixu ña nda nangi, jo=ni xuta xi nda 'ba kixi tijña inimare. Nt'e enre Na'enchana 'ba 'bejñatjo ngajin inimare. Ko kjuatsejnda tsja chan xi nda, ngat'a kixi sejña. 16'Ba Jesús kitsure ngayeje: ―Tsajain xi baka jngu ndi'i 'ba 'benere jngu tsajmi asa ngi'ndere jngu nachan 'bejña. Tusa nga nk'a chun 'bejña, tuxi matsejennire xuta xi fa'as'en ni'yo. 17Ngat'a ngayéje xi tijña'mo nganda'e, kjua'e nixtjin nga k'uetukatsejen. 'Ba ngayéje xi bi matsejen nganda'e, kjua'e nixtjin nga xiare 'ba s'e̱jñatsejen. 18'Ba meni, nda tjinu'yo. Ngat'a xi tjinre, ngisa= tse kua'ere. Tunga xi tsajainre, ka'nda mé= xi tse'e tsure stukja'are. 19'Ba kio nare ko nts'e Jesús ja'ekun, tunga bi kuán echu ka'nda ña kui tijña, ngat'a kitse xutankjiun. 20'Ba tu nijmi= kik'ere Jesús: ―Nari ko nts'é ngandetsian inya 'ba mejénxure skueri. 21Tunga Jesús kitsingojo: ―Tu'yañu xi basen ñojon enre Na'enchana 'ba tsik'etjusun, kui= xi nana̱ ko xi nts'ia̱. 22Jngu nixtjin Jesús kitsure xutare: ―Tjian xingunda ndachikun. 'Ba 'batsa'en ja'as'en jngu barku 'ba kiji. 23'Ba yejerañu nga inyafa'axtiunda, Jesús kis'efe. 'Ba kio kuanjin ndachikun jngu ntjo'ñu, 'ba nando tifa'as'enntjai barku. 'Ba je stiungijndiu tsakaiñu. 24'Ba 'batsa'en kitsikja'are Jesús, 'ba kitsure: ―¡Na'en, na'en! ¡Je tetiungijndia! 'Ba Jesús tsisetjen 'ba jatiko ntjo ko tsindiure ndachikun. 'Ba kis'exiu ntjo 'ba jña kuachun. 25'Ba Jesús kitsure xutare: ―¿Ánñu bi chunni_nuu̱? 'Ba xutare kitsakjun 'ba kuakunre 'ba tsiningiyare xinkjin: ―¿Yá= tsé xutabi nga ka'nda ntjo ko ndachikun tsik'etjusunre nga fako? 26'Ba kio echu nangire xuta Gerasa. Kui nangibi tijña xingunda ndachikun, ngankjain nangi Galilea. 27'Ba kionga Jesús 'etukajen barku, kitsitiñat'are jngu xuta xi kio tse'e 'ba xi tjindujinre isennixtjin xi bi nda. Xi je nda'e bi nde bajani najñu ninga bi nde 'bejñayani ni'ya. Tusa ngajin tsju 'bejña. 28'Ba kionga tsabe Jesús, tsakasenkunch'int'are nga 'ñu kiski'ndaya, 'ba kitsu: ―Ji Jesús, Ki'ndire Na'enchana xi tijña ngank'aa, ¿mé= xi tjinri ngat'a tsa'an? Te'bets'ara̱ nga bi ba'enaa̱ kjuanima. 29'Ba kitsu isennixtjin xi bi nda, ngat'a Jesús je 'exare nga ngat'etukajinre xutabiu. Je nkjin ndiya isennixtjin xi bi nda batexuma ngajin yojore xutabiu, 'ba nisi s'e'ñu tsjan tsjan ndsaku ko ntsja 'ba xuta tsikuenda, tunga xutabiu kjejntsu mé= xi s'e'ñukonii̱, 'ba isennixtjin xi bi nda fiko nga'nde t'axin. 30'Ba kio Jesús tsiningiyare: ―¿Jó 'miri? 'Ba kui kitsingojo: ―Legión 'mina̱. 'Bi kitsu ngat'a 'ñu nkjin isennixtjin xi bi nda tjindujinre. 31'Ba isennixtjin xi bi nda 'ets'are Jesús nga bi ngatatsikasen nga'nde ña ba'entsjaire̱ kjuanima. 32'Ba kio tiñare nindu 'ñu nkjin tjiuchinga inyakjen ngijña. 'Ba 'batsa'en isennixtjin xi bi nda 'ets'are Jesús nga ngatatsja'ndere nga ngatja'as'en ngajinre kui, 'ba Jesús kitsja'ndere. 33'Ba isennixtjin xi bi nda 'etukajinre xutabiu 'ba ja'as'enjinre tjiuchingo. 'Ba tjiuchingo tsangatsanga jenya ka'nda ndachikun 'ba kio kitiungijndiu. 34'Ba kionga xi inyatsikuenda tjiuchingo tsabe mé= xi kuán, tsanga 'ba kike'ere nijmi xuta xi tjin naxinando ko xi tjindundai ngandaire. 35'Ba xuta kikutsejenre mé= xi kuán. 'Ba kionga echu ña tijña Jesús, tsabe xuta xi 'etjujinre isennixtjin xi bi nda nga tijñat'a ndsaku Jesús nga je yaja ngani najñure 'ba nga je nda tjin nganire. 'Ba kio kitsakjun. 36'Ba xi tsabe mé= xi kuán, ye'ere nijmi xuta xi yak'a jótsa'en kuanda xuta xi tjindujinre isennixtjin xi bi nda tsakaiñu. 37'Ba ngatsi'i xuta xi tse'e nangi Gerasa 'ets'are Jesús nga ngatji kio, ngat'a 'ñu kitsakjun. 'Ba 'batsa'en Jesús ja'as'en barku 'ba kiji ngani xingunda ndachikun. 38'Ba xuta xi je 'etjujinre isennixtjin xi bi nda 'ets'are nga kuetjenngi Jesús. Tunga Jesús bi kitsja'ndere 'ba kitsure: 39―Tusa t'in ngani ni'yari 'ba t'e nijmi ngayéje xi Na'enchana je kitsa'en ngat'a tsiji. 'Ba 'batsa'en xutabiu kiji 'ba ye'e yejere nijmi ngatsi'i xi tjindu ngajin naxinando mé= xi kitsa'en Jesús ngat'a tse'e. 40Kionga Jesús je ja'e ngani xingunda ndachikun, xutankjiun tsja tsa'en kiskjebetjo, ngat'a ngatsi'i inyakuyare. 41'Ba kio ja'e jngu xuta xi Jairo 'mi, xi ngakure ni'ya sinagoga. Kui xutabi tsakasenkunch'int'a ndsaku Jesús 'ba 'ets'are nga ngatji ndaba, 42ngat'a ki'ndi chjun jngututure xi tjinre tejó nu je mejen kueya. 'Ba yejerañu Jesús tifi, xutankjiun xi tjenngire 'ñu inya'be'nyu'ñundaire. 43'Ba ngajinre xutankjiun tjenjinre jngu chjun xi kuatejó nu 'bakjanre jin. 'Ba je kitsikjeya ngat'are chjineki ngayéje xi tjinre, 'ba nijnguú kuánre kitsinda. 44Kui chjunbiu kitsitiñat'a ngastun Jesús 'ba kitsiko ndai najñure, 'ba ta'a kitikjayare jiun. 45'Ba Jesús tsiningiya: ―¿'Yá= xi kitsikona̱? 'Ba kionga tu'yá kitsikixiya, Pedro kitsure: ―Na'en, xutankjiun inya'be'nyu'ñuri 'ba inyatsunginiñari. 46Tunga Jesús kitsu ngani: ―Tjin= xi kitsikona̱, ngat'a tsejen kuánna̱ nga 'etjujin kjua'ñu ngajinna̱. 47'Ba kionga chjunbiu tsabe nga bi ku̱an k'uejña'mo, niki 'ñu= titsakjun nga ja'ekasenkunch'int'are Jesús. 'Ba ngixkun ngatsi'i xuta kitsuya mé= kjua kitsikoni najñure Jesús 'ba jótsa'en ta'a kuanda. 48'Ba Jesús kitsure: ―Ji, ki'ndina̱, tu ngat'are kjuamakjainri nga je kuandai. Ngatjas'eri kjuaxiu. T'inrandai. 49'Ba kionga Jesús tinchja ngisa, ja'e jngu xuta xi jendibani ndaba xi ngakure ni'ya sinagoga 'ba 'bi kitsure: ―Je k'en ki'ndiri. Bi nde minyasiyani_ri maestru. 50Tunga kionga Jesús kjint'e enbiu, kitsure xi ngaku: ―Bi kuin. Tu ngatamakjain saniri ngat'are Na'enchana 'ba ku̱anda ki'ndiri. 51'Ba kionga echu ndaba xi ngaku, Jesús bi kitsja'nde nga kja'e kjua'as'enko ngisa ngaya ni'yo, tu Pedro sani ko Juan ko Santiago ko na'enre 'ba ko nare ki'ndi chjunbiu. 52Ngatsi'i xuta xi kuañajan kio inyakji'nda 'ba kjima'onre ngat'are ki'ndi chjunbiu. Tunga Jesús kitsure: ―Bi chi'ndo. Ni'ndichiu bi kjijñak'en; tu tikijñafe sani. 53'Ba ngatsi'i tu tsejnuke=, ngat'a be= nga je kjijñak'en. 54'Ba 'batsa'en Jesús kitsuba ntsja ki'ndi chjunbiu 'ba 'ñu kinchja nga kitsure: ―Ni'ndichi, tisetjen. 55'Ba kui ja'aya nganire 'ba ta'a tsisetjen. 'Ba Jesús 'exa nga ngata'ere xichine. 56'Ba xichare ki'ndi chjunbiu niki kuakunre, tunga Jesús 'exa nga ni'yá ngate'ere nijmi mé= xi kuán.

will be added

X\