SAN LUCAS 5

1'Bi kuán kionga Jesús sejñandai ndachikun tse'e Genesaret, xutankjiun ti'be'nyu'ñu kui tuxi kjuint'eni enre Na'enchana. 2'Ba Jesús tsabe jó barku xi kjiyundai ndachikun, 'ba xi tsuba tjiuti kio 'etukajenni nga yane na'ya tire. 3'Ba Jesús ja'as'en jngu barkubiu, xi tse'e Simón, 'ba tsi'are nga ngatatsikjinchire ngando. 'Ba tsik'ejña ngaya barku, 'ba 'nda kio yakuyanire xuta. 4'Ba kionga je jet'are nga yakuya, kitsure Simón: ―T'inkue barku ña ngisa nanga nando, 'ba kio chanikja'ajiun na'ya tinu tuxi sa̱kuninu tjiuti. 5'Ba Simón kitsingojore: ―Na'en, je kaña'axai̱ tsa'a nistjen 'ba nijnguú kaxuntsjai. Tunga mé ji 'ba te'minaa̱, skanikja'ajinfara̱ na'yo. 6'Ba kionga nchjabiu je 'ba kitsa'en, 'ñu nkjin tjiuti kixuntsja ka'nda na'yo je mejen kitijnda. 7'Ba 'batsa'en tu chuba= kitsa'enre nchja xinkjin xi tjinduya barku xi ngijngu, tuxi kjua'ekasekoni. 'Ba nchjabiu jendiba, 'ba 'ñu kitsitse ngojó barkubiu 'ba tu ngichuba kichaja ngisare nga stiungijndiu. 8Nga tsabe kibi, Simón Pedro tsakasenkunch'in ngixkun Jesús, 'ba kitsure: ―Tisent'axinnaa̱ Na'en, ngat'a jngu= ña̱ xuta je. 9'Bi kitsu Simón ngat'a kui ko ngatsi'i xi tjenko kuakunre tu kjuare nga 'ñu nkjin tjiuti kitsuba. 10'Ba nde kjimare Santiago ko Juan, ki'ndire Zebedeo, xi ñatjen tsa'exa Simón. Tunga Jesús kitsure Simón: ―Bi kuin. 'Ndani nganda'e bi tjiuti k'uekui, tusa xuta k'uekui xi ngat'a tsa'an. 11'Ba kionga je ja'eko barku ña je nangi, 'endu yeje xi tjinre 'ba kitjenngi Jesús. 12'Ba kionga Jesús tijña jngu naxinanda chi, ja'e jngu xuta xi 'ñu kunre chi'in fe'ndujun. 'Ba nga tsabe Jesús, kitsikindi 'nda t'anangiu 'ba 'ets'are: ―Ji na'en, tsa mejénri, ku̱an sitsejunnaa̱ nga xja'axinnaa̱ chi'in xi kunna̱. 13'Ba meni Jesús kitsure nga yanere ntsja xi tji'mio: ―Mejénna̱. Ngatamatsje ngani. 'Ba ndekuini chubabiu kitjuxinre chi'in fe'ndujun xi kunre xutabiu. 14'Ba Jesús 'enere xutabiu: ―Tu'yá 'be_ri nijmi. Tu t'in sani 'ba tikaku_ri yojori na'miu. 'Ba t'ikue kjuatjo xi baku nga je kuatsjejin jotsa'en kitsu Moisés, tuxi 'batsa'en skuekixini xuta nga je kuanda ngani. 15Tunga ngisa 'ñu nu'yare ngat'a tse'e Jesús, 'ba 'ñu nkjin xuta mañajan tuxi kuasen ñojonnire 'ba tuxi kui sindani chi'in xi kunre. 16Tunga Jesús fi nga fikjako Na'enchana nga'nde t'axin. 17'Ba jngu nixtjin nga Jesús tibakuya, 'ba nde kio tjindu yak'a nchja fariseo ko yak'a chjine kjuatexumo xi jendibani ngayéje naxinanda chi tse'e Galilea, xi tse'e Judea, 'ba ko naxinanda Jerusalén. 'Ba kjua'ñure Na'enchana kis'ejñatsejen ngajinre Jesús nga tsinda xi sefesun. 18'Ba kio ja'e yak'a xuta xi kjiyare kuxta jngu xi bi ma fi. 'Ba mejénre kjua'as'enko ni'yo tsakai 'ba sikajña ngixkun Jesús. 19Tunga bi masjaire jótsa'en kjua'as'enni, tu kjuare xutankjiun. 'Ba 'batsa'en tsijin ngasun nk'a ni'yo, 'ba ts'axjextiu jngu ka'a ña kisate ni'yo, 'ba kio ts'ajenni ko kuxtare xi tji'mio ngamasenre xutankjiun 'ba kitsikajña ngixkun Jesús. 20'Ba kionga Jesús tsabe kjuamakjainre nchjabiu, kitsure xi tji'mio: ―Je kuachat'ari jeri amiguna̱. 21'Ba 'batsa'en chjine kjuatexumo 'ba ko xuta fariseo 'etuts'inre nga 'bitsa'en kitsikja'etsjen: “¿'Yá= kibi xi bi bekun Na'enchana nga 'batsa'en tinchja? Tu Na'enchana sa xi mare nichat'are jere xuta.” 22Tunga Jesús tsabe mé= xi inyatsikja'etsjen, 'ba tsiningiyare: ―¿Ánñu 'batsa'en nikja'etsjenñu jun? 23Ñáre xi ngisa bi na'enre kuixan: ¿A nga kuixan: “Je kuachat'ari jeri”? ¿Asa nga kuixan: “Tisetjen 'ba titjajme”? 24Tunga mejénna̱ nga xio nga Ki'ndire Xuta xi'iun tjinre kjua'ñu kui ngasun'ndebi nga sichat'a je. 'Ba 'batsa'en kitsure xi bi ma fiu: ―Ji xinra̱, tisetjen, chjube kuxtari 'ba t'in ni'yari. 25'Ba ngixkun xutankjiun ta'a tsisetjen xi tji'mio 'ba kiskjebe kuxta xi kjijñayaa̱ tsakai, 'ba titsichjire Na'enchana nga kiji ngani ndaba. 26'Ba ngatsi'i kuakunre 'ba kitsichjire Na'enchana, 'ba niki inyatsakjun= nga 'bi kitsure xinkjin: ―Kjuakun xi kjuakixi= kji'ya nganda'e. 27Jaskan nga je kuán kibi, Jesús 'etju 'ba tsabe jngu xuta xi kjebechjintjai tsajmi ngat'are Roma xi Leví 'mi. Tijña nga'nde ña tjubechjintjai tsajmi. 'Ba Jesús kinchjare 'ba kitsure: ―Ndetjenngina. 28'Ba 'batsa'en Leví tsisetjen, 'ejña yeje xi tjinre 'ba kitjenngi Jesús. 29'Ba ts'axje jngu s'i je ndaba ngat'are Jesús; 'ba ko 'ñu nkjin xi kjebechjintjai tsajmi ngat'are Roma, ñatjen ko kja'e ngisa xuta, tjindut'ako yamixo. 30Tunga xuta fariseo ko chjine kjuatexumo xi tujngu mako xinkjin josiko xutare Jesús, 'ba kitsure: ―¿Ánñu ko xuta xi tjinre je 'ba ko xi kjebechjintjai tsajmi ñatjen ninchjakoniñu 'ba 'yukoñu? 31'Ba Jesús kitsingojore: ―Xi nda bi chjineki machjenre, tu kui sani xi sefesun. 32Bi xuta xi kixi ja'ekinchja_ra̱, tu kui sani xi tjinre je, tuxi sik'antjaiyani kjuafa'etsjenre 'ba kjua'e ngani ngixkun Na'enchana. 33'Ba 'batsa'en nchjabiu kitsure Jesús: ―Xutare Juan 'ba ko xi tse'e nchja fariseo ne kjit'a 'bendu kjindia 'ba fako Na'enchana, tunga xi tsiji tu kjenntsjai 'ba 'bintsjai. 34'Ba Jesús kitsingojore: ―¿A ku̱an jun sik'endu kjindio xuta xi kjinikjint'e jngu s'i kjuabixan yejerañu xi xi'iun tijñajin ngisare? 35Tunga kjua'e jngu nixtjin kionga stukja'are xi xi'iun, 'ba kionga kjua'e nixtjinbiu, kio=nga k'uendu kjindia. 36'Ba nde 'ejñare kui kjuakusunbi: ―Ni'yá batet'achi jngu xutji xatse tuxi k'uextiuyani jngu xutji chinga. Ngat'a tsa 'ba sa'en, tsikjekjua= xutji xatsio; 'ba nde najñu xatse chu bi nda fa'akjare ko xi chingo. 37'Ba nde ni'yá minya binu xatse jngu tjiuxin chinga. Ngat'a binu xatsio k'uetijnda tjiuxin chingó, 'ba binu titsen 'ba kjuekjua tjiuxiun ngayeje. 38'Ba kui= kjuañu binu xatse xinyani tjiuxin xatse. 39'Ba tsajain xi 'bi binu xi je chinga 'ba sa'e jaskan ku̱amejénre xi xatse, ngat'a tsu: “Xi je chinga ngisa nda 'yu.”

will be added

X\