SAN LUCAS 4

1'Ba Jesús, kitse ngajinre Isennixtjintsjere Na'enchana, 'etjujin ndaje Jordán, 'ba Isennixtjintsjio kiko nga'nde t'axin. 2'Ba kio tsik'ejña yachan nixtjin, 'ba chanayiu kiskut'ayako. 'Ba nimé kiskine kui nixtjinbiu ngayeje, 'ba jaskan kuabojore. 3'Ba 'batsa'en chanayiu kitsure: ―Tsa kjuakixi nga Ki'ndire Na'enchana kuáin, 'ba sji nga kui ndiojobi ngatjama niñuxtila. 4'Ba Jesús kitsingojore: ―'Ba=tsa'en kua'indut'a enre Na'enchana: “Bi tu niñuxtila xi k'uendukunnire xuta, tusa machjenre ngayéje enre Na'enchana.” 5'Ba 'batsa'en chanayiu kiko ngani jngu nindu nk'a, 'ba ngutjun fani yakure ngayéje naxinanda xi tjin ngasun'ndio. 6'Ba kitsure: ―Sja'ndera̱ nga kuatexumari ngayéje naxinandabi ko ngayéje kjuachan xi tjinre. Ngat'a an je kitsa'ena̱ 'ba ku̱an sja_ra̱ tu'ya xi mejénna̱. 7Tsa kuisenkunch'int'anaa̱ nga sichjinaa̱, tsiji ku̱an ngayéje tsajmibiu ―kitsu chanayiu. 8'Ba Jesús kitsingojore: ―'Ba=tsa'en kua'indut'a enre Na'enchana: “Tichji_ri Na'enchana xi Nairi, 'ba tu kui tajngu ti'axat'a_ri.” 9'Ba 'batsa'en chanayiu kiko Jesús naxinanda Jerusalén 'ba kiko nga'ndere ningu ña ngisa nk'a. 'Ba kitsure: ―Tsa kjuakixi nga Ki'ndire Na'enchana kuáin, tikintjaingi yojori nga'e. 10Ngat'a 'ba=tsa'en kua'indut'a enre Na'enchana: Na'enchana k'uexare ankjelere nga sikuendari. 11Ko ntsja subanginiri, tuxi nijnguú ndiojo satengini ndsakui. 12'Ba Jesús kitsingojore: ―'Ba nde tsa'en tsu ña kua'indut'a enre Na'enchana: “Bi chut'ayakuai Na'enchana, xi Nairi.” 13'Ba kionga chanayiu bi nde kuasjainire jótsa'en skut'ayako ngisa Jesús, tsakasent'axinre ka'nda nga ku̱an skut'ayako ngani. 14'Ba Jesús ja'e ngani nangi Galilea nga kitse ko kjua'ñure Isennixtjintsjere Na'enchana, 'ba ngatsi'i xuta xi tjindu tiñare kio nchja nijmi ngat'a tse'e. 15'Ba Jesús bakuya xki ni'ya sinagoga xi kio tjin, 'ba ngatsi'i nk'a kitsik'ejña. 16'Ba Jesús ja'e ngani naxinanda Nazaret ña kuachinga. 'Ba jotsa'en ntsjai nga xutu ja'as'en ni'ya sinagoga, 'ba tsakasen nduju nga 'exkiya enre Na'enchana. 17'Ba kika'ere nga 'exkiya enre Na'enchana xi kitsi'indu profeta Isaías. 'Ba nga je kiskjendaya, kuasjaire nga'nde ña tsu: 18Isennixtjintsjere Na'enchana tijña ngajinna̱, ngat'a je 'ejñat'axinna̱ tuxi xi ni̱ma̱ sikja'axtiuyani_ra̱ en xi nda. Na'enchana je kitsikasenna̱, tuxi kue'eni_ra̱ nijmi xuta xi tjindu'ñu nga ku̱andai, 'ba nga skjex'angia̱ tuxkun xi ka, 'ba nga sik'ejñandaa̱ xi tji'yaton; 19'ba nga k'ueya nijmi_ra̱ xuta nga nganda'e kuakutsejen Na'enchana kjuandare. 20'Ba kui kitsik'atjijun ngani xujun 'ba kitsjare xi tsikuenda xujunre ni'ya sinagoga 'ba tsik'ejña ngani. 'Ba ngatsi'i xi kio tjindu tu kui fa ni kiskutsejen'a. 21'Ba Jesús 'etuts'inre nga kinchja 'ba kitsure: ―Nganda'e fa je kuajngu enre Na'enchana kionga teminya ñojon. 22'Ba ngatsi'i nda nchja ngat'a tse'e Jesús 'ba tu inyakutsejenkun ngat'are en nda xi 'betju ts'a, 'ba tsure xinkjin: ―¿A bi tsa xutabi xi ki'ndire Kuse? 23'Ba Jesús kitsure: ―'Ba ku̱an tsa k'uinnu jo tsu en chingabi xi tsu xuta: “Chjineki, tinda tajngui yojori”, 'ba 'ba nde: “Ti'en nga'e xi nangiri fa ngayéje xi kjinu'yee̱ nga kjiñe'en Capernaum.” 24'Ba Jesús kitsu ngisa: ―'Ba xinkixi_nuu̱ nga nijnguú profeta nda chjubetjo ña nangire fa. 25'Ba kjuakixi nga 'ñu nkjin yanchjin k'an tjin naxinanda Israel nixtjinre profeta Elías, kionga kis'echja ngank'aa 'ba ján nu masen bi tsa'a 'ba 'ñu tsé kjindia kis'e ngayéje nangire Israel ngayeje. 26Ninga 'ba kuán, Elías bi kjinikasen ngat'are yanchjin k'anbiu xi tse'e naxinanda Israel, tusa kjinikasen ngat'are jngu xi tse'e Sarepta, naxinanda xi tijña tiñare naxinanda Sidón. 27'Ba nde nixtjinre profeta Eliseo, 'ñu nkjin xi sefe'ndujun tjin naxinanda Israel ngayeje. Tunga nijnguú kuanda ngat'are kui, tu Naamán sani, xi tse'e nangi Siria ―kitsu Jesús. 28'Ba kionga kjint'e enbi, ngatsi'i xi tjinduya ni'ya sinagoga, 'ñu kuastire. 29'Ba tsisetjen 'ba tso'oxjejin naxinando Jesús, 'ba kiko 'nda ña tjenjen chun nindu ña kuandasun naxinandare, tuxi kio sikintjaingini. 30Tunga Jesús ja'ajin masenre xutankjiun 'ba kiji. 31'Ba Jesús kiji Capernaum, naxinanda xi tijñajinre nangi Galilea. 'Ba nga nixtjin nga nikja'aya yakuyare xuta enre Na'enchana. 32'Ba tu kuakunre xuta jotsa'en yakuyare, ngat'a en xi nchja tjinre kjua'ñu. 33'Ba ngaya ni'ya sinagoga tijña jngu xuta xi tijñajinre isennixtjin xi bi nda xi kitsu nga kiski'ndaya: 34―Ji Jesús tse'e Nazaret, ¿mé= xi tjinri ngat'a tsajain? ¿A ja'enikixuya=ni̱? 'Beña̱ 'yá= ni ji. Ji= ni xuta tsjere Na'enchana. 35Tunga Jesús jatiko isennixtjinbiu 'ba kitsure: ―¡Xiu teni, 'ba t'etukajin_ri xutabi! 'Ba 'batsa'en isennixtjiun kiskanikja'a t'anangiu xutabiu ngamasenre ngatsi'i xi yak'a, 'ba bi kitsi'onre nga 'etju ngajinre. 36'Ba ngatsi'i xuta tu kuakun=re 'ba tsure xinkjin: ―¿Mé= en kibi? Xutabi tjinre kjua'ñu ko nga'ñu nga 'bexare isennixtjin xi bi nda nga k'uetju, 'ba 'betju. 37'Ba kji'yare ngat'a tse'e Jesús ngayéje nga'nde xi tjindundai kio. 38'Ba Jesús tsisetjen 'ba 'etju ni'ya sinagoga 'ba kiji ndaba Simón. 'Ba nanyi'yare Simón 'ñu tji'me nga kunre chi'in nt'ai, 'ba kichja'are Jesús nga kuaseko. 39'Ba Jesús tsik'ejña tsindinere chjunbiu 'ba jatiko chi'in nt'o, 'ba kitjuxinre, 'ba ta'a fani tsisetjen 'ba kitsikjén xuta xi echukun. 40'Ba kionga je kintjai tsu'biu, ngatsi'i xuta xi tjinre xi inyafesun xi kunre kja'e kjuanga chi'in, ja'ekore Jesús. 'Ba Jesús yanere ntsja nga jngu jngu xi inyafesun, 'ba kitsinda. 41'Ba nde nkjin xuta xi 'etjujinre isennixtjin xi bi nda xi kitsu nga kiski'ndaya: ―¡Ji= ni xi Ki'ndire Na'enchana! Tunga Jesús fatiko 'ba bi kitsja'ndere nga kuinchja, ngat'a be= nga kui xi Cristo. 42'Ba nga je kis'e isen, Jesús 'etjujin naxinando, 'ba kiji jngu nga'nde t'axin. 'Ba xutankjiun tsangisjai. 'Ba kionga echu ña kui tijña, kuamejénre sik'ejña'ñu, tuxi bi kuajeni. 43Tunga Jesús kitsure: ―'Ba=nde tjinnere nga sikja'axtiuya_ra̱ kja'e naxinanda en nda xi tsu nga Na'enchana je kuatexuma nganda'e. Ngat'a tu kui xa kjinikasennina̱. 44'Ba 'batsa'en Jesús kiji nga kitsikja'axtiuya enre Na'enchana xki ni'ya sinagoga xi tjin nangire xuta Judío.

will be added

X\