SAN LUCAS 23

1'Ba ngatsi'i xutaxa tsisetjen 'ba kiko Jesús ngixkun Pilato, gobernador tse'e Roma. 2'Ba nga je tjindu ngixkun, 'etuts'inre nga kiskaninejere, 'ba kitsu: ―Kui xutabi kja'e ndiya tifiko naxinandani̱. Titsu nga tichja'nde nga s'e̱chjire xuta titjun César mé= xi machjintjai, 'ba nde titsu nga kui xi Cristo, jngu rey ngayeje. 3'Ba Pilato tsiningiyare Jesús: ―¿A ji= ni reyre xuta judío? 'Ba Jesús kitsingojore: ―Ji je 'ba kisji. 4'Ba kio Pilato jako xi ngakure na'miu ko xutankjiun, 'ba kitsure: ―Nime je sakuna̱ ngat'are xutabi. 5Tunga nchjabiu a tu si kitsu: ―Jotsa'en kui tibakuya timinyasiyare xutankjiun ngayéje nga'nde xi tjin nangi Judea. 'Etuts'inre nangi Galilea 'ba ka'nda nga'e je ja'e nga 'ba titsa'en. 6'Ba kionga Pilato kjint'e kibi, tsiningiya tsa Jesús jngu xuta tse'e Galilea kuán. 7'Ba kionga kik'inre nga Jesús ndibani nangi Galilea, ña batexuma Herodes, 'batsa'en kitsikasen Jesús ngixkun Herodes, xi 'ba nde tijña naxinanda Jerusalén kui nixtjinbiu. 8'Ba kionga Herodes tsabe Jesús, 'ñu tsja kuánre, ngat'a je nda'e mejénnire skue. Ngat'a nkjin ndiya kjint'e ngat'a tse'e Jesús, 'ba mejénre skue nga kui sa'en jngu kjuakun. 9'Ba tsé tsiningiyare, tunga nijnguú en kitsingojo Jesús. 10'Ba 'ba nde kio inya xi ngakure na'miu ko chjine kjuatexuma nga 'ñu inyakaninejere Jesús. 11'Ba 'batsa'en Herodes ko chasoldadure joni tsajmi xi tumé chjire kitsiko Jesús. 'Ba tsejnuke nga kitsikaja jngu najñu xi tsja kji'i joni xi baja rey, 'ba kitsikasen nganire Pilato. 12'Ba kui nixtjinbiu Herodes ko Pilato, xi nganda'eñu stike xinkjin tsakaiñu, 'etuts'inre nga nda tsaka'a xinkjin. 13'Ba meni Pilato 'eñajan xi ngakure na'miu ko xutaxa 'ba ko xutankjiun, 14'ba kitsure: ―Jun ja'ekonuu̱ xutabi. Temixun nga timinyasiyare xutankjiun. 'Ba ngixkún je tsiningiya_ra̱, 'ba bi kisakuna̱ tsa tjinre je xutabi ngat'are ngayéje xi tefangiu. 15Ninga Herodes bi kisakut'are je. Kui kjua kitsikasen nganina xutabi. Ngu, je te'yo nga tumé kitsa'en xutabi xi 'bakore nga kueya. 16'Bamani, k'uexaa̱ nga s'e̱re 'ba sa'e suntjia̱n. 17'Ba xki nu xki nu nga s'i pascua, Pilato tjinnere nga tsik'ejñandai jngu xuta xi kjiyuya nduya. 18Tunga tu jngu kitsa'en jndare xutankjiun nga kiski'ndaya, 'ba kitsu: ―¡Ngatjanik'en xutabiu! ¡Tik'ejñandainii̱ Barrabás! 19Barrabás kis'eya nduya, ngat'a ngajin naxinanda Jerusalén kiskjanko nchja xi tse'e Roma, 'ba kitsik'en jngu xuta. 20'Ba Pilato mejénre nga sik'ejñandai Jesús, kui kjua jako ngani xutankjiun. 21Tunga xutankjiun ngisa 'ñu kiski'ndaya, 'ba kitsu: ―¡Tjat'ai kru xutabiu! ¡Tjat'ai kru xutabiu! 22'Ba xi majánni ndiya Pilato jako ngani, 'ba kitsure: ―Ngu, ¿mé= kjua xi ch'otjin kitsa'en xutabi? Nimé tisakuna̱ xi 'bakore nga kueya. 'Bamani, k'uexaa̱ nga s'e̱re 'ba sa'e suntjia̱n. 23Tunga xutankjiun ngisa 'ñu si kitsa'en nga tsi'are Pilato nga k'uet'a kru Jesús, ka'nda nga kjinisinre. 24Kui kjua Pilato kitsjani enre nga k'uetjusunre mé= xi inyami'a. 25'Ba meni kitsik'ejñandai xuta xi xutankjiun ja'ajin, xuta xi kjiya nduya ngat'a kiskjanko nchja xi tse'e Roma 'ba kitsik'en jngu xuta. 'Ba kitsingantsja Jesús, tuxi sikoni jotsa'en mejénre xutankjiun. 26'Ba kionga Jesús inyafikat'a kru, kitsuba jngu xuta xi tse'e nangi Cirene, xi Simón 'mi, xi ngijña tjindibani. Kui xi kitsika'anijin kru, 'ba kitjenngi Jesús. 27'Ba nde nkjin xuta tjenngire ko yanchjin xi inyakji'ndantjai Jesús ngat'a kjima'onre. 28Tunga kitsiku'be Jesús 'ba kiskutsejen'a yanchjinbiu, 'ba kitsure: ―Jun yanchjin Jerusalén, bi an chi'ndantjainuu̱. Tusa chi'ndo ngat'a tsojon 'ba ngat'a tse'e ki'ndinu. 29Ngat'a kjua'e= nixtjin nga 'bi kuetsu xuta: “Ndaxure yanchjin xi 'ndi, xi niñajanni kis'eya'more ninga bi kitsikaki ki'ndi.” 30'Ba kio kuetsure nindu: “Tixuneni.” 'Ba kuetsure tjengiu: “T'e'moni.” 31Ngat'a tsa 'bi mata'en ya xkjuen, ngisa= tu ku̱ata'en kionga je kixi ―kitsu Jesús. 32'Ba tjenko nchjabiu jó nchja ch'okun xi 'ba nde k'uet'ako kru Jesús. 33'Ba kionga je echu nga'nde xi Nindaku Mik'en 'mi, kio yat'a kru Jesús ko ngojó nchja ch'okunbiu. Jngu ngate kixire 'ba jngu ngate skjunre. 34'Ba Jesús kitsu: ―Na'en, tichat'a_ri, ngat'a bi be mé= xi inyatsa'en. 'Ba chasoldadu kitsiskaya najñure Jesús, tuxi xianire 'yá= xi k'uakore 'ba sika'bire xinkjin. 35'Ba kio inya xutankjiun nga inyakutsejen'a. 'Ba ka'nda xutaxa inyatsisubare Jesús, 'ba kitsu: ―Kui xutabi kitsik'angi xuta xi kja'ere. Ngatatsik'angi tajngu yojore nganda'e tsa kjuakixi nga kui xi Cristo xi Na'enchana ja'ajin. 36'Ba chasoldadu 'ba nde inyatsisubare Jesús ngayeje. Kitsitiñat'are 'ba kitsjare binu san. 37'Ba inyatsure: ―Tsa ji xi reyre xuta judío, tik'angi tajngui yojori. 38'Ba nde kis'et'a ngasun nk'a ku Jesús jngu yate xi tsu: “Kui=bi xi reyre xuta judío.” 39'Ba jngu xuta ch'okun xi ñatjen kjit'ako kru Jesús, 'bitsa'en ch'o kitsure: ―Tsa ji xi Cristo, tik'angi tajngui yojori 'ba 'ba nde tik'anginii̱ ji̱n. 40Tunga xi ngijngu jatiko xutabiu, 'ba kitsure: ―¿A bi kunye Na'enchana, ninga ndekuini kjuanima temitja'axtiuni? 41'Ba tjin= ndiyare nga temitja'axtia kjuanima ña, ngat'a 'ba fa ni tsa'en te'bechja jo kjiña'an. Tunga kui xutabi tumé xi ch'otjin kitsa'en. 42'Ba sa'e jako Jesús, 'ba kitsure: ―Jesús, tikja'etsjen ngat'a tsa'an kionga je kuatexumai. 43'Ba Jesús kitsure: ―Kjuakixi= xi xinra̱, nga nganda'e kuenikonaa̱ ngank'aa, nga'nde ña nda chun. 44'Ba kionga je mején nyusen nixtjinbiu, kuajñu ngayéje ngasun'ndio ka'nda nga̱ chuba ján nga kuangixun. 45'Ba tsu'biu bi nde kji'yanire. 'Ba masen kitijndajen najñu xi kitjenchja nga'nde xi 'ñu tsje tse'e ningu. 46'Ba Jesús 'ñu kiski'ndaya, 'ba kitsu: ―Na'en, ngaya ndsai te'bejñaa̱ inimana̱. 'Ba nga je 'ba kitsu, k'en. 47'Ba kionga xi ngakure chasoldadu Romano tsabe mé= xi kuán, kitsichjire Na'enchana, 'ba kitsu: ―Kjuakixi= nini nga kui xutabi jngu xuta xi kixi. 48'Ba kionga ngatsi'i xutankjiun xi kio kuañajan nga inyakutsejen'a, tsabe mé= xi kuán, 'ñu kjimabare nga kiji ngani ndaba. 49Tunga ngatsi'i xuta xi bexkun Jesús kjin inya nga inyakutsejen mé= xi tjima. 'Ba 'ba nde kio inyajinre yanchjin xi jendetjenngi 'nda nga 'etju nangi Galilea. 50'Ba kio tijña jngu xutaxa xi Kuse 'mi xi Arimatea tse'e, naxinanda xi tijña ngajinre nangi Judea. Xi nda xuta 'ba kixi fiko yojore ngixkun Na'enchana. 51Xi 'ba nde tikuyare nixtjin nga kuatexuma Na'enchana 'ba xi bi tijngu kakun jo tsa'en joyare xutaxa xi yak'a 'ba nga jo kitsa'en. 52'Ba kui kikun Pilato 'ba tsi'are yojore Jesús. 53'Ba kionga je ts'ajent'a kru, yaxtejun jngu najñu tjibe 'ba yajñaya jngu tsju xi kitju'ngi jngu naxi, ña nisa'yajín s'eyanijin. 54Kui nixtjinbiu xuta judío inya'benda xi skine s'i pascua, 'ba je ti'betuts'inre nixtjin nga nikja'aya. 55'Ba yanchjin xi tjenko Jesús 'nda nangi Galilea kiji 'ba tsabe tsju, 'ba kiskutsejen jótsa'en kis'ejña yojore Jesús. 56'Ba jendiba ngani ndaba 'ba 'enda nanda xi ixi jen ko tsajmi xi nda jen. 'Ba yanchjinbiu kitsikja'aya nixtjin nga nikja'aya, jotsa'en tsu kjuatexumo.

will be added

X\