SAN LUCAS 22

1'Ba je matiña s'i pascua, kionga xuta judío kjine niñuxtila xi tsajainre na'yu san. 2'Ba xi ngakure na'miu 'ba ko chjine kjuatexuma inyamangisjai ndiya jótsa'en ku̱an sik'en Jesús, ngat'a tsakjunke xutankjiun. 3'Ba chanayi Satanás ja'as'enjin inimare Judas xi 'ba nde Iscariote 'mi, jngu xi tejó xutare Jesús. 4'Ba kui kikun xi ngakure na'miu ko xi ngakure chasoldadu xi tsikuenda ningu, 'ba jonijmiko nchjabiu ngat'are jótsa'en ku̱an singantsjare Jesús. 5'Ba nchjabiu kuatsjare 'ba 'endako Judas nga sjare ton. 6'Ba Judas kuakjainre 'ba 'etuts'inre nga tsangisjai mé= fa chu̱ba̱ xi ngisa nda nga singantsja Jesús kionga bi skue xutankjiun. 7'Ba je ja'e nixtjin nga xuta judío kjine niñuxtila xi tsajainre na'yu san, 'ba nga tsik'en chutsanga tse'e s'i pascua. 8'Ba Jesús kitsikasen Pedro ko Juan, 'ba kitsure: ―Tangink'endo xichine tse'e s'i pascua, meni nga ñatjen sinchjaña. 9'Ba nchjabiu tsiningiyare: ―¿Ña=ñu mejénri nga kuek'endai xi xina? 10'Ba Jesús kitsure: ―Kionga kuitjas'ion ngajin naxinando, kio skajiun jngu xuta xi jngu nisa nanda ya'a. Tangintjengiu 'nda ni'ya ña kui kjua'as'en, 11'ba 'bi t'in_ru xi naire ni'yo: “Maestru tsuri: ¿Ñáre nga'ndeñu nga kuakjenkua̱ xutana̱ kionga kuechji jñii̱ s'i pascua?” 12'Ba kio kui kuakunu jngu nga'nde teya xi je tijñanda 'ba xi ngank'are ni'yo tijña. Kio t'endo xi xina. 13'Ba xutare kiji 'ba 'ba fa tsa'en kuasjaire jotsa'en ja'ba je kitsure Jesús. 'Ba kio 'enda xi skine jñu s'i pascua. 14'Ba kionga je echu chu̱ba̱ nga kuakjen, Jesús ko apóstoles tsik'endut'a yamixo. 15'Ba Jesús kitsure: ―¡A tu 'ñu= mejénna̱ nga ñatjen skinaa̱ ko jun xichine tse'e s'i pascuabi, kionga kje fa'axtiujía̱n kjuanima! 16Ngat'a 'ba xin_nuu̱ nga bi nde skineña̱ xi tse'e s'i pascua 'nda nga̱ ku̱ajngu jó tsunire s'iu ña batexuma Na'enchana. 17'Ba 'batsa'en kiskjebe chutsinbiu 'ba kionga je kitsjare kjuanda Na'enchana, kitsu: ―Chjubio kibi 'ba tika'bisun_ru xingiu. 18Ngat'a xin_nuu̱ nga bi nde binu k'uiña̱ ka'nda nixtjin nga kuatexuma Na'enchana. 19'Ba jaskan kiskjebe niñuxtilo 'ba kionga je kitsjare kjuanda Na'enchana, kitsijoya 'ba kitsjare xutare, nga titsu: ―Kui=bi xi yojona̱, xi singantsja nga kueya nga tu kjuanda tsojon. 'Ba ti'on, tuxi kjua'etsjenninu ngat'a tsa'an. 20'Ba kionga je tsakjen, 'ba nde kiskjebe chutsinbiu, nga titsu: ―Kui chutsinbi xi bakutsejen kjua xatse xi ti'bendakoni Na'enchana ko xutare ngat'are jinna̱ xi titsen nga tu kjuanda tsojon nga s'e̱nda kjuo. 21Tunga nganda'e, xuta xi singantsjana̱ 'ba nde tijñat'akona̱ yamixabi. 22Ngat'a 'ba= ku̱anre Ki'ndire Xuta xi'iun jotsa'en kis'enda ngat'are kui, tunga ¡nimaxuni xuta xi singantsja kui! ―kitsu Jesús. 23'Ba 'batsa'en xutare 'etuts'inre nga tsiningiyare xinkjin 'yá= xi singantsja. 24'Ba kio xutare josiko xinkjin ngat'are 'yá= xi ngisa tjun tijña ngajinre. 25Tunga Jesús kitsure: ―Rey xi batexuma naxinanda xi bi judío 'ñu batexumare xutare. 'Ba nchja xi tjinre xa mejénre nga xuta kuetsure nga nda inyatsa'en. 26Tunga ngajinnu bi 'ba ku̱an. Tusa xi ngisa tjun tijña ngajinnu ngatatsa'en yojore joni tsa kui xi ngisa ki'ndi. 'Ba xi batexuma ngatatsa'en yojore joni tsa kui xi chu'ndare xi yak'a. 27Ngu, ¿'yá= xi ngisa tjun tijña? ¿A xi 'bejñat'a yamixo nga kjine=, asa chu'nda xi 'beya xichine=? ¿A bi tsa xi 'bejñat'a yamixo? Tunga an tejñajin_nuu̱ joni chu'ndanu. 28Jun bi kjinikumanuu̱ kionga kichut'ayakona̱. 29Kui kjua sjani_nuu̱ kjua'ñu nga kuatexumo, jotsa'en kitsjana̱ Na'enna̱, 30tuxi sinchjañu 'ba s'iuñu t'a yamixana̱ ña kuatexumaa̱, 'ba kuetsubasun yaxile ña si'an_ru kjua ntjere xuta Israel xi tejó ka'a mani. 31'Ba Jesús kitsu: ―Simón, chanayi Satanás tsi'akjua nga k'uetsujmeyanu joni ko trigo. 32Tunga an je 'etsa_ra̱ Na'enchana ngat'a tsiji, tuxi bi sichajani kjuamakjainri. 'Ba kionga kjua'e ngani ngixkua̱n, tisekue nts'é tuxi kixi kuinyantsjaini. 33'Ba Simón kitsure: ―Na'en, tjijngu takua̱n nga kjuikora̱ nduya 'ba ka'nda kueyakora̱. 34'Ba Jesús kitsure: ―Pedro, an xinra̱, kionga kje kji'ndajín chaxicha nixtjin nganda'e, ji je ján ndiya kisji nga bi xutana̱ kuáin. 35'Ba sa'e tsiningiyare xutare: ―Kionga kitsikasen_nuu̱ 'ba kixin_nuu̱ nga bi x'o chitsa, ninga ton ninga jnde, ¿a tjin= xi kichajanu? 'Ba nchjabiu kitsure: ―Tumé kichajani̱. 36'Ba Jesús kitsu nganire: ―Tunga nganda'e, xi tjinre chitsa, ngataba'a. 'Ba nde ngataba'a tonre. 'Ba xi tsajainre kicha, ngatateña najñu ndujure 'ba ngatatsejngu. 37Ngu 'ba xin_nuu̱, nga tjinnere nga k'uetjusun enbi xi kua'indut'a enre Na'enchana ngat'a tsa'an: “'Ba kui xi 'ba nde kis'exkijinre xuta ch'okun.” Ngat'a ngayéje xi kua'indut'a ngat'ana̱ tjinnere nga k'uetjusun. 38'Ba nchjabiu kitsure: ―¡Na'en, nga'e tjindu jó kicha! 'Ba Jesús kitsu ngani: ―Je kuán nde. 39'Ba sa'e Jesús 'etju 'ba kiji tjenngi Ya Olivo jotsa'en ntsjai. 'Ba nde xutare kitjenngi ngayeje. 40'Ba kionga je echu kio, Jesús kitsure: ―Chja'a_ru kjuanda Na'enchana, tuxi bi xut'ayakoninú. 41'Ba kitsikjint'are jo kji'i ma chanikja'a jngu ndiojo. 'Ba kio tsakasenkunch'in 'ba jako Na'enchana, 42'ba kitsure: ―Na'en, tsa mejénri k'uejñat'axinnaa̱ kui kjuanimabi, t'ejñat'axinnaa̱. Tunga bi ngatjama jotsa'en an mejénna̱, tusa jotsa'en ji mejénri. 43'Ba kuatsejen jngu ankje xi jendibajenni ngank'aa nga ja'etsjare nga'ñu. 44'Ba kionga ne tse kjuanima tifa'axtiu Jesús, ngisa 'ñu jako Na'enchana, 'ba nandubare tsixu t'anangiu joni tinre jin xi tsiña. 45'Ba kionga je jet'are nga tifako Na'enchana, tsisetjen 'ba jendiba ngani ña tjindu xutare. 'Ba kjiyufe nga echu ngat'a je kitsikjejndare kjuabo. 46'Ba Jesús kitsure: ―¿Ánñu tetsjujñafeñu? Tisetjion 'ba chja'a_ru kjuanda Na'enchana, tuxi bi xut'ayakoninú. 47'Ba yejerañu tinchja Jesús, nkjin xuta ja'e. 'Ba Judas xi jngu xutare Jesús xi tejó tjentitjunre xutankjinbiu. Kui kitsitiñat'are Jesús 'ba 'endsu'a. 48'Ba Jesús kitsure: ―Judas, ¿a ningantsjani Ki'ndire Xuta xi'iun ko jngu ndsu'a? 49'Ba kionga xutare xi inyandaire Jesús tsabe mé= xi tjima, tsiningiyare: ―Na'en, ¿a kicha= kuixkjankoni̱? 50'Ba jngu xutare xi s'ejña kio yajare chu'ndare na'mi titjun, 'ba tsatet'a ñojon kixi. 51Tunga Jesús kitsu: ―Je kuán nde. Bi 'ba ño'on. 'Ba kitsiko ñojon chu'ndabiu, 'ba kitsinda. 52'Ba sa'e Jesús jako xi ngakure na'miu ko xi ngakure chasoldadure ningu 'ba ko nchja chingare naxinando xi ja'etsuba, 'ba kitsure: ―¿Ánñu ko kicha ko ya kich'añu nga ja'echja'anuu̱, joni tsa jngu chacheje kuáa̱n? 53Nyujun nyujun tsakatejñajinntsjai_nuu̱ nga yakuya ña ma ndetsinre ningu, 'ba niñajanni kjindubanuu̱. Tunga tsojon horabi, kionga xi jñu batexuma. 54'Ba sa'e nchjabiu kitsuba Jesús 'ba kiko ndaba na'mi titjun. 'Ba Pedro kjin tjenngire. 55'Ba ngamasenre ngandetsin ni'yabiu nchjabiu 'etse ndi'i 'ba tsik'endundaire, 'ba Pedro 'ba nde tsik'ejñajinre ngayeje. 56'Ba kio jngu chjun chu'nda tsabe kui nga tijñat'a ndi'u, 'ba nda kiskutsejen'a, 'ba kitsu: ―Kui xutabi 'ba=nde tsak'ajmeko Jesús. 57Tunga Pedro 'e'mota'en yojore nga kitsu: ―Na, bi 'bexkua̱n xutabiu. 58'Ba sangutjun, ngijngu xuta tsabe ngani, 'ba kitsure: ―Ji 'ba=nde makue nchjabiu ngayeje. Tunga Pedro kitsu: ―Junjun, na'en, bi makua̱. 59'Baru tsa jngu hora jaskan ngani, ngijngu xuta 'ñu si kitsu: ―Kjuakixi= nga Jesús tsak'ajmetjenngi, ngat'a 'ba=nde Galilea tse'e ngayeje. 60Tunga Pedro kitsu ngani: ―Na'en, bi 'bia̱ mé= xi te'mi_ri. 'Ba ndekuini chubabiu, yejerañu Pedro tinchja, ta'a kiski'nda jngu chaxicha. 61'Ba 'batsa'en Na'enna Jesucristo kitsiku'be 'ba kiskutsejen'a Pedro, 'ba kio Pedro ja'etsjenre en xi ja'ba je kitsure: “Kionga kje kji'ndajín chaxicha nixtjin nganda'e, ji je ján ndiya kisji nga bi xutana̱ kuáin.” 62'Ba sa'e Pedro 'etju nga'ndebiu, 'ba 'ñu kiski'nda. 63'Ba xi inyatsikuenda Jesús inyabejnuke 'ba inyabajare. 64'Ba 'e'mo tuxkun, 'ba miningiyare: ―Ji xi profeta 'mi_ri yojori, 'ba t'innii̱, ¿'yá= xi yajari nganda'e nde? 65'Ba kitsure nkjin kuya en ch'otsu. 66'Ba kionga je kis'e isen, kuañajan nchja chingare naxinando ko xi ngakure na'miu 'ba ko chjine kjuatexuma, 'ba kiko Jesús ña mañajan ngatsi'i xutaxa judío. 'Ba kio tsiningiyare: 67―'Ba t'innii̱, ¿a ji= ni xi Cristo? Tunga Jesús kitsure: ―Tsa xin_nuu̱ nga kui= ña̱, bi ku̱akjainnu. 68'Ba tsa skuiningiya_nuu̱, bi singojonuu̱ ninga bi kjuinuntjinnuu̱. 69Tunga ba'anire nganda'e Ki'ndire Xuta xi'iun k'uejña ngate kixire Na'enchana xi 'ñu tse kjua'ñu tjinre. 70'Ba sa'e ngatsi'i tsiningiyare: ―¿A jixu xi Ki'ndire Na'enchana kuáin? 'Ba kui kitsure: ―Jún= suba je 'ba temixun. 71'Ba meni nchjabiu kitsu: ―¿A machjen ngisana xuta xi kuetsu mé= xi kitsa'en? Ña= suba je kjinu'ya en xi kitsu.

will be added

X\