SAN LUCAS 21

1'Ba kionga Jesús kiskutsejen, tsabe xuta nyina xi inyaminya tonre ngaya kaxa xi tse'e ton chje. 2'Ba nde tsabe jngu chjun k'an ni̱ma̱ xi 'eya kaxa tse'e ton chje jó ton xkua xi chuba kjiya. 3'Ba Jesús kitsu: ―Kjuakixi= xi xin_nuu̱ nga kui chjun k'an nimabi ngisa= tse kitsja tu'bani ko ngatsi'i xi yak'a. 4Ngu ngatsi'i xi yak'a tu kui xi 'bangire kitsja, tunga chjunbi, ngajin kjuanimare, je kitsja yeje xi machjenre nga k'uejñakun. 5'Ba yak'a xutare inyanchja ngat'a tse'e ningu, jótsa'en tsjatsa'en kjiña'axako ndiojo xi tsjakun, 'ba nde ko tsajmi tsjakun xi tiba'e kjuatjore Na'enchana. Tunga Jesús kitsu: 6―Kjua'e= nixtjin nga ngayéje kibi xi jun techutsejen'o kjuekjua. Kuixungi yeje 'ba nijnguú nde ndiojo s'e̱nduxjonenire xinkjin. 7'Ba 'batsa'en nchjabiu tsiningiyare: ―Maestru, ¿kjia'á nga 'bi ku̱an? 'Ba ¿mé= chuba xi s'e̱ kionga je k'uetjusun yeje kibi? 8'Ba Jesús kitsu: ―Tikuendo yojonu nga tu'yá ngat'ejñunu. Ngat'a ne nkjin xuta kjua'e xi ja'enna̱ sichjen, 'ba kuetsu: “An= ña̱ xi Cristo”, 'ba: “Nixtjinbiu je matiña ya'a.” Tunga bi mangintjenngiu kui. 9'Ba kionga jun kjuinu'yo nga tjin kjuachan 'ba nga tsajain kjuaxiu ngajinre naxinanda xi tjin, bi kun, ngat'a tjinne=re nga tjun 'ba ku̱an, tunga kje fa'ejín nixtjin nga kjue ngasun'ndebi ya'a. 10'Ba Jesús kitsu ngisare: ―Naxinanda skjanko kja'e naxinanda, 'ba chikun skjanko kja'e chikun. 11'Ba nga i nga jaan s'e̱ chon xi ne 'ñu ko kjindia 'ba ko chi'in xi 'ñu. 'Ba ku̱atsejen ngank'aa chuba ya'e 'ba ko mé= xi kuinyakunre xuta. 12Tunga kionga kje majín ngayéje kibi, jun titjun subanu xuta 'ba sjenngikenu. Singantsjanu ngaya ntsja xi ngakure ni'ya sinagoga 'ba sikja'as'ennu nduya. 'Ba tu ngat'a tsa'an= nini kuekonu ngixkun rey 'ba ngixkun gobernador. 13'Ba kionga 'ba kuato'on, sa̱ku'ndenu nga k'ue_ru nijmi nchjabiu ngat'a tsa'an. 14'Bi tsa'en tikja'etsjion nga bi tjinnere nga k'uendatitjun jó kuixun tuxi kuinyakoñu yojonu. 15Ngat'a an sja_nuu̱ en ko kjuankjin kakun jótsa'en kjuinukjuo meni nga xuta xi stikenu bi sa'ennu kionga xuko. 16'Ba ka'nda xichanu ko nts'io ko xingiu 'ba ko xuta xi nda ya'anu singantsjanu 'ba yak'a xi tjin ngajinnu kjuinik'en. 17'Ba tu ngat'ana̱= nini ku̱astike tsi'inu xuta. 18Tunga nijnguú ntsja ku cha̱ja. 19¡Kixi tinyo 'ba bi nikje_ru kakún, tuxi k'uangiñu! 20'Ba kionga xio nga chasoldadu k'uetinstunndaire naxinanda Jerusalén, ngatja'yo nga je kuatiña nixtjin nga kjuekjua. 21'Ba kui nixtjinbiu, xi tjindu nangi Judea ngatanga ña tjin nindu, 'ba xi tjindu ngajin naxinanda Jerusalén ngat'etju naxinando, 'ba xi tjindu ngijñaa, bi nde ngatjendiba ngisani ngajin naxinando. 22Ngat'a kui nixtjinbiu sakure chjire xuta ngat'are mé= xi bi nda kitsa'en, tuxi 'batsa'en ku̱ajngu yejeni xi kua'indut'a enre Na'enchana. 23¡Nimaxunini yanchjin xi kui nixtjinbiu tji'yamore ki'ndi 'ba xi inyatsikaki ki'ndire! Ngat'a tse kjuanima xi s'e̱ ngasun'ndio, 'ba kjuastire Na'enchana kjua'enere naxinandabi. 24'Ba tjin xi kjuinuñare kicha, 'ba yak'a tji'ñu nga kuechani ngayéje nangi xi tjin. 'Ba xuta xi bi tse'e Israel kuinyane naxinanda Jerusalén 'nda nga̱ ku̱ajngu nixtjin xi kika'e'ndere nga kuatexuma. 25'Ba s'e̱re chu̱ba̱ tsu'biu, so 'ba ko niñu. 'Ba nga'e, t'anangiu, ngayéje naxinanda 'ñu sa̱kjun 'ba bi skue mé= xi sikja'etsjen ngat'a tse'e jotsa'en 'ñu kjuane ndachikun 'ba jotsa'en 'ñu kuaje nk'a tsindiure nando. 26'Ba xuta kueyaya nga sa̱kjun kionga skue mé= xi ku̱ata'en ngasun'ndio, ngu ka'nda nga'ñu xi tjin ngank'aa steya. 27'Ba kio xiare Ki'ndire Xuta xi'iun, nga tjindibajin yufi ko 'ñu tsé kjua'ñu 'ba ko kjuaje. 28'Ba kionga k'uetuts'inre nga 'ba ku̱an, tinyo 'ba chutsijon ngank'aa, ngat'a je matiña nixtjin nga ku̱ando ―kitsu Jesús. 29'Ba Jesús 'ba nde 'ejña jngu kjuakusun, 'ba kitsu: ―Chutsejen'o ya higo ko nituñare ya xi tjin. 30Kionga je 'betuts'inre nga 'betjure nts'en, je 'yo nga nixtjinre chundaba matiña. 31'Ba nde 'ba= tsa'ennire kionga xio nga je 'ba tjima, ngatja'yo nga je matiña nixtjin nga kuatexuma Na'enchana. 32Kjuakixi= xi xin_nuu̱ nga ku̱ajngu yeje kibi kionga kje fesunjín xuta xi tjin nganda'e. 33Ngank'aa 'ba ko t'anangiu kjuet'a, tunga enna̱ bi kjuet'a. 34Tikuendo yojonu, 'ba bi ba'e'ndio tsa sitajajin inimanu mé= xi ch'otjin joni kjuach'i ko kjuamafo ngat'a tse'e mé= xi mejénre yojonu asa mé= xi tjin ngasun'ndio. Ngat'a tsa 'ba si'on, kionga kjua'e nixtjinbiu, ta'a skanenu joni jngu chen. 35'Ba= tsa'en kui nixtjinbiu kjuendibanere ngatsi'i xuta xi tjin ngasun'ndio. 36Kui kjua tetsubandañu jun, 'ba chukontsjo Na'enchana, meni nga s'e̱ninu nga'ñu nga kuiyu ngayéje kjuanima xi ku̱an, 'ba nga kixi kuinyo ngixkun Ki'ndire Xuta xi'iun ―kitsu Jesús. 37'Ba nyujun nyujun Jesús yakuya ña ma ndetsin ningu, 'ba nga majñu fitsikja'aya tjenngi xi Ya Olivo 'mi. 38'Ba ngatsi'i xuta tajñu tajñu ja'e ña ma ndetsin ningu nga fa'ekasen ñojonre Jesús.

will be added

X\