SAN LUCAS 20

1Jngu nixtjin yejerañu Jesús tibakuya ña ma ndetsinre ningu 'ba titsikja'axtiuyare xuta en ndare Na'enchana, kitsitiñat'are xi ngakure na'miu ko chjine kjuatexuma 'ba ko xuta chingare naxinando, 2'ba kitsure: ―'Ba t'innii̱. ¿Mé= kjua'ñu xi tjinri nga 'bi teñe'en? 'Ba ¿'yá xi kitsjari kjua'ñu nga ma 'bi teñe'en? 3'Ba Jesús kitsingojore: ―'Ba nde an skuiningiya_nuu̱ jngu tsajmi. 'Ba tingojonu. 4¿'Yá= xi kitsikasen Juan Bautista nga ja'ekatenda, a Na'enchana, asa xuta=? 5'Ba nchjabiu jonijmiko xinkjin nga 'bi kitsu: ―Tsa kuixan nga Na'enchana kitsikasen, kui kuetsu=na: “Ngu, ¿ánñu bi kuakjainninu mé= xi kitsu Juan?” 6'Ba tsa kuixan nga xuta kitsikasen, ngu ngatsi'i xuta kue'ena ndiojo nga sik'enna, ngat'a makjainre nga Juan jngu profeta kuán. 7'Ba 'bitsa'en kitsingojore Jesús: ―Bi 'yee̱ 'yá= xi kitsikasen. 8'Ba 'batsa'en Jesús kitsu nganire: ―'Ba ninga an bi 'ba xin_nuu̱ mé kjua'ñu xi tjinna̱ nga 'bi tsa'aa̱n. 9'Ba Jesús 'etuts'inre nga 'ejñare jngu kjuakusun xutankjiun, 'ba kitsu: ―Jngu xuta 'entje uva. 'Ba kitsikeyare nangiu nchja xi mare tsa'exako uva 'ba kui kjin kiji, 'ba 'ñu tsé ts'andayare. 10'Ba kionga echu chanre tu, xi naire nangiu kitsikasen jngu chu'ndare, tuxi kueki'anire nchjabiu nga sjare tu xi 'bakore. Tunga nchjabiu ye'ere chu'ndabiu 'ba tu tjejen ntsja nga kitsikasen. 11'Ba kio xi naire nangiu kitsikasen ngani ngijngu chu'ndare; tunga nchjabiu 'ba nde ye'e nganire chu'ndabiu, 'ba ch'o kitsiko 'ba tu tjejen ntsja nga kitsikasen. 12'Ba xi naire nangiu kitsikasen ngani ngijngu chu'ndare, tunga nchjabiu 'ba nde kitsi'on nganire chu'ndabiu 'ba ts'axje. 13Tuchan xi naire nangiu 'bi kitsu: “¿Mé= xi sa'aa̱n? Tusa sikasia̱n ki'ndi xi 'ñu tjona̱. 'Ba ku̱an kionga nchjabiu skue ki'ndina̱, skuekun.” 14Tunga kionga nchjabiu tsabe nga titsitiñat'are ki'ndire xi naire nangiu, 'bi kitsure xinkjin: “Kui=bi xi xuntsja yeje xi tjinre na'enre. Tusa sik'ian, tuxi tsajan ku̱anni mé= xi xuntsja.” 15'Ba meni nchjabiu kikot'axin nga'nde ña tjintje uva ki'ndire xi naire nangiu 'ba kitsik'en. 'Ba mani, xi naire nangiu, ¿Mé= xi siko nchjabiu? 16Ngu kjua'etsikjesun nchjabiu 'ba kja'e xuta sikeya nganire nga'nde ña tjintje uva ―kitsu Jesús. 'Ba kionga xuta xi inya kio kjint'e kibi, kitsu: ―¡Niñajanni 'ba ngatjama! 17Tunga Jesús kiskutsejen'a nchjabiu 'ba kitsure: ―Ngu, ¿jó tsunire en xi kua'indut'a enre Na'enchana? Ngat'a 'bitsa'en kua'indut'a: “Ndiojo xi nchja chjine xjo ts'axjengi, kui= xi je kuánni ndiojo titjun.” 18'Ba tu'yañu xi skasun ndiojobiu, niki ku̱axkua. 'Ba xi kuijennere ndiojobiu, niki ku̱axi ―kitsu Jesús. 19'Ba ndekuini chubabiu xi ngakure na'miu 'ba ko chjine kjuatexuma kuamejénre kitsuba Jesús, ngat'a be= nga Jesús 'ejña kjuakusunbi ngat'a tse'e kui, tunga kitsakjunke xutankjiun. 20'Ba kjinikasen ña tijña Jesús yak'a nchja, tuxi kiskutsejen'monire. Kui xi kitsimaña yojore nga nda xuta kitsu, tuxi sa'enni nga Jesús kuetsu jngu en xi bi 'ba tjin, 'ba 'batsa'en ku̱an singantsjare gobernador tse'e Roma. 21'Ba kui nchjabiu kitsure: ―Maestru, 'ya=ni ji̱n nga kjuakixi= xi sji ko xi bakuye 'ba nga bi kabi ñe'en kjua xuta. Tusa ko kjuakixi bakuye ndiyare Na'enchana. 22¿A tixa'nde asa bi tixa'nde nga k'uechjintjai_ra ña xuta ngakure Romano? ¿A k'uechji=ña, asa bi k'uechja? 23Tunga Jesús be= kjuamañare nchjabiu, 'ba kitsure: 24―Takunu jngu ton denario. ¿'Yá= tse'e isen xi kjit'a nga'e, 'ba 'yá= tse'e ja'en xi kua'indut'a tonbi? 'Ba nchjabiu kitsingojo: ―Tse'e xuta titjun César. 25'Ba Jesús kitsure: ―Ngu, ta'e_ru César mé= xi kui tse'e, 'ba ta'e_ru Na'enchana mé= xi tse'e kui. 26'Ba nchjabiu bi kuán kitsa'en nga Jesús kuetsu jngu en xi bi 'ba tjin ngixkun xutankjiun. Tusa kuakunre en xi kitsingojo Jesús 'ba xiu tsik'endu. 27'Ba kio yak'a nchja saduceo ja'ekun Jesús. Kui nchjabiu tsu nga mik'en bi nde fa'ayanire; 'ba ja'ekiningiyare Jesús, 'ba kitsure: 28―Maestru, 'bitsa'en kitsi'indu xujunna Moisés: “Tsa jngu xi'in xi je tsixanko chjun kueya, 'ba tsa bi kis'ekore ki'ndi, jngu nts'e xuta xi k'ion kuixanko ngani chjun k'anbiu tuxi sjanire ki'ndi nts'e xi k'ion.” 29Ngu, tsik'endu yatu nchja xi nts'e mani. Xi matitjun tsixan; tunga k'en, 'ba bi kis'ere ki'ndi. 30'Ba chjunbiu tsixanko ngani xi majóni, xi 'ba nde k'en, 'ba bi kis'ere ki'ndi ngayeje. 31'Ba chjunbiu tsixanko ngani xi majánni ngayeje, 'ba 'ba kitsa'en ngatsi'i xi yak'a. Ngayatu jesun, 'ba bi kis'ere ki'ndi. 32'Ba jaskan 'ba nde k'en chjunbiu ngayeje. 33'Bamani, nixtjin nga kjua'aya nganire xuta ngajinre mik'en, ¿'yá= tse'e ku̱an chjunbi? Ngat'a ngayatu tsixanko. 34'Ba Jesús kitsure: ―Xuta xi tjin nixtjin nganda'e bixan 'ba tsikixan ki'ndire. 35Tunga xuta xi Na'enchana sa'enre kjua nga 'bakore nga k'uendukun nixtjin xi sa'e ndiba, xi kjua'aya nganire ngajinre mik'en, kui= xi bi nde kuixanni 'ba bi nde sikixanni ki'ndire, 36ngat'a bi nde ku̱an kueyani. Tusa k'uendu jotsa'en tjindu ankjele, 'ba ki'ndire Na'enchana ku̱an, ngat'a ja'aya nganire ngajinre mik'en. 37Tunga ngat'a tse'e nga kjua'aya nganire xuta, ka'nda Moisés 'ba nde 'ejñatsejen nga kjua'aya nganire xuta ngajinre mik'en, kionga kitsi'indu ngat'a tse'e ya na'ya xi titijin ndi'i. Ngat'a 'bitsa'en kitsure Na'enchana: “Na'enre Abraham ko Na'enre Isaac 'ba ko Na'enre Jacob.” 38'Ba Na'enchana bi na'enre mik'en kuán, tu tse'e sani xi tjindukun. Ngat'a ngixkun Na'enchana tjindukun= ngatsi'i xuta. 39'Ba kio yak'a chjine kjuatexuma kitsu: ―'Ba= tjin mé= xi sji, maestru. 40'Ba bi nde mani kakun nga miningiya ngisare Jesús. 41'Ba 'batsa'en Jesús tsiningiyare: ―¿Ánñu tsuni xuta nga ntjere David ndibani Cristo? 42Ngat'a ndekuini David 'bitsa'en kitsi'indut'a xujun Salmos: Na'enchana kitsure Xuta chingana̱: “Teni ngate kixina̱ 43ka'nda nga̱ xi stikeri ngi ndsakui sik'endaa̱.” 44Ngu, ¿jótsa'en Cristo ntjere David kjuendibani, nga ndekuini David “Xuta chingana̱” tsure? 45'Ba yejerañu ngatsi'i xuta inyaminya ñojon, Jesús jako xutare, 'ba kitsure: 46―Tikuendo yojonu ngat'a tse'e chjine kjuatexuma. Ngu, matsjare 'betsuma nga baja najñu nduju 'ba matsjare nga ko 'ñu tsé kjuaxuta nikja'ayare ngajin ndetsin. 'Ba matsjare nga 'bendusun yaxile xi tjun inya ni'ya sinagoga 'ba nga'nde xi ngisa nda kja'ajin nga jngu s'i. 47'Ba kui xi kja'are ni'yare yanchjin k'an, 'ba sa'e 'ñu tsé fako Na'enchana meni xuta xi kja'ere kuetsuni: “Ne nda xuta.” Kui kjuañu xutabiu ne tsé kjuanima kjua'axtiuni.

will be added

X\