SAN LUCAS 16

1'Ba Jesús jako xutare 'ba 'bi kitsure: ―Tsik'ejña jngu xuta nyina xi kis'ere jngu ngakure chu'nda xi tsikuenda tsajmire. 'Ba kik'inre nga chu'ndabiu titsikje mé= xi tjinre. 2'Ba meni kinchjare chu'ndabiu 'ba kitsure: “¿Ánñu 'ba tsuni en xi tent'ia̱ ngat'ari? Tikasennaa̱ kuendare xa xi teñe'en, ngat'a bi nde ji sikuendani mé= xi tjinna̱.” 3'Ba 'bitsa'en kitsikja'etsjen chu'ndabiu: “¿Mé= xi sa'aa̱n nganda'e nde? Ngat'a naina̱ tikja'ana̱ xana̱. Bi xukjuakona̱ tsa kuakjaa̱n nangiu, 'ba ku̱asuba=na̱ tsa ton skui'asaa̱n. 4Je 'bia̱ mé= xi sa'aa̱n, tuxi s'e̱nina̱ amigu xi skjebetjona̱ ndaba, kionga xja'ana̱ xana̱.” 5'Ba meni kinchjare nga jngu jngu nchja xi tjenre tse'e naire. 'Ba tsiningiyare xi tjun ja'e: “¿Jó tjin tjenri tse'e naina̱?” 6'Ba xutabiu kitsingojore: “Jngu sientu barril aseti.” 'Ba chu'ndabiu kitsure: “Jun'ún xujun xi kua'indut'a xkire mé= xi tjenri 'ba tenifani 'ba tu yachute t'et'asai.” 7'Ba sa'e 'bi kitsu nganire kja'ere: “'Ba ji, ¿jó tjin tjenri?” 'Ba xutabiu kitsu: “Jngu sientu kuxta trigo.” 'Ba chu'ndabiu kitsu ngani: “Jun'ún xujunbi xi kua'indut'a xkire mé= xi tjenri. Tusa tu yachute ko kate t'et'asai.” 8'Ba xi naire tsabexkun nga chu'nda ch'okunbiu tjinre kjuamaña nga 'ba kitsa'en. Ngat'a xuta xi bi xutare Na'enchana ngisa= tse kjuamaña tjinre nga 'bendako kjua xinkjin nga ko mare xutare Na'enchana. 9'Ba an xin_nuu̱ ―kitsu Jesús―. Tichjon kjuanyina xi tjin ngasun'ndebi, tuxi ngatjas'eninu xuta xi nda kua'anu. 'Ba 'batsa'en, kionga kjue kjuanyino, s'e̱ xi skjebetjonu nga'nde xi bi fet'a. 10Xi kixi fiko nga tsik'etjusun mé= xi ichi, kui= xi 'ba nde kixi fiko nga tsik'etjusun mé= xi tse. 'Ba xi bi kixi fiko nga tsik'etjusun mé= xi ichi, kui= xi 'ba nde bi kixi fiko nga tsik'etjusun mé= xi tse. 11'Bamani, tsa bi kixi kueko nga sikuendo kjuanyina xi tjin ngasun'ndebi, ¿'yá= xi sja'ndenu nga sikuendo kjuanyina xi kjuakixikjin? 12'Ba tsa bi kixi kueko nga sikuendo xi kja'e tse'e xuta, ¿'yá= xi sjanu xi tsojon ku̱an? 13Nijngu chu'nda ma tsa'exat'are jó nai. Ngat'a jngu xi ku̱astike 'ba xi ngijngu simején, asa jngu xi kixi sa'exat'are 'ba xi ngijngu siton. Kui kjuañu bi ku̱an si'axat'ani_ru Na'enchana ko kjuanyino. 14Tunga xuta fariseo, xi 'ñu mejénre ton, tsejnuke Jesús kionga kjint'e ngayéje kibi. 15'Ba kio Jesús jako xuta fariseo, 'ba kitsure: ―Jún= xi nda 'naxjio yojonu ngixkun xuta, tunga Na'enchana be= jotsa'en tjindu inimanu. Ngat'a xi nda 'baxje xuta, kui= xi 'baxjengi Na'enchana. 16Mé xi kua'indut'a kjuatexumo ko mé= xi yakuya nchja chinga profeta yatexuma ka'nda nixtjin nga ja'e Juan Bautista. 'Ba ch'anire kui nixtjinbiu tis'eya nijmi nga Na'enchana xi tibatexuma, 'ba ngatsi'i xuta inya'benere yojore nga mejénre kjua'as'en ña batexuma. 17Tunga ngisa bi na'en tjin nga xaja nangibi ko ngank'aa nga ko mare nga xaja jngu letrachi tse'e kjuatexuma. 18Tu'yañu xi sik'ejña chjunre 'ba k'uejñako kja'e chjun, kui= xi tsa'ent'are kjuachajngi chjunre. 'Ba xi k'uejñako ngani chjun xi kitsik'ejña xi'inre, kui= xi 'ba nde tsa'ent'are kjuachajngi. 19Tsik'ejña jngu xuta nyina xi baja najñu xi 'ñu chji ko najñu xi tsjakun, 'ba nyujun nyujun 'baxje s'i xi 'ñu nda ma ―kitsu Jesús―. 20'Ba nde kio tsik'ejña jngu xuta ni̱ma̱ xi Lázaro 'mi, xi kitsejunre tse 'ba xi fajñaxtiu xuntja ndaba xuta nyino. 21Kui xuta ni̱ma̱biu 'ñu kitsu kakun nga skine t'ia xi bixungi ngi yamixare xuta nyino, 'ba ka'nda tjiunaño fa'ekumajun tsere. 22'Ba 'ba kuán nga k'en xuta ni̱mo̱ 'ba ankjele kiko nga'nde ña tijña Abraham. 'Ba 'ba nde k'en xuta nyino ngayeje 'ba kis'eyanijin. 23'Ba kionga xuta nyino tifa'a kjuanima nga'nde ña fa'axtiu kjuanima xuta 'ba ña bi 'boya ndi'i, kiskutsejennk'a 'ba kjin tsabe Abraham 'ba nga Lázaro tijñat'are. 24'Ba meni 'ñu kinchja, 'ba kitsure Abraham: “Ji na'en Abraham, ngatja'animari ngat'ana̱. T'ikasen Lázaro nga ngatatsika'nyi tjunchi najma ntsja 'ba ngatja'etsika'nyi najenna̱, ngat'a ne 'ñu fefa'aa̱ kjuanima nga'e ngajin ndi'ibi.” 25Tunga Abraham 'bi kitsure: “Ki'ndina̱, tikja'etsjen nga tsja tsa'en tsikeni ngasun'ndio, 'ba Lázaro ja'a kjuanima. Tunga nganda'e tisakure kjua'ñukakun nga'e, 'ba ji temitjaxti kjuanima. 26'Ba ndaire kibi, jngu xanga jñu xi 'ñu je tikijña ngamasenna. 'Ba meni xi tjindu nga'e xi mejénre kuaje jan bi ma fa'axtiu. 'Ba nde xi tjindu jan bi ma fa'axtiu nga kjua'e nga'e ngayeje.” 27'Ba sa'e xuta nyino kitsu nganire: “Ngu, te'bets'ara̱, na'en, nga tikasenchi Lázaro ndaba na'enna̱, 28ngat'a ón mani nts'ia̱. Ngatjike'ere nijmi, tuxi bi ko kui kjua'eni nga'nde kibi ña fa'axtiu kjuanima xuta.” 29Tunga Abraham kitsure: “Nts'é tjinre kjuatexumare Moisés ko xujun xi kitsi'indu nchja chinga profeta. Kui ngatate sinre.” 30'Ba xuta nyino kitsu nganire: “Junjun, na'en Abraham. Tunga tsa tjin xi kjua'aya nganire ngajinre mik'en 'ba kuekun nts'ia̱, sik'antjaiya kjuafa'etsjenre 'ba kjua'e ngani ngixkun Na'enchana.” 31Tunga Abraham kitsingojore: “Tsa bi inyabatesinre mé= xi kitsi'indu Moisés ko nchja chinga profeta, 'ba nde bi ku̱akjainre nisi tjin xi kjua'aya nganire ngajinre mik'en.”

will be added

X\