SAN LUCAS 13

1'Ba kui nixtjinbiu kio inya xi ye'ere nijmi Jesús mé= xi kuata'en yak'a xuta xi tse'e Galilea. Xutabiu inyatsa'en tjiuba xi kjuatjo tse'e Na'enchana. 'Ba Pilato 'exa nga kjinik'en xutabiu. 'Ba kio ts'atjijinre jinre tjiuba ko xi tse'e xutabiu. 2'Ba Jesús kitsu: ―¿A nikja'etsjenñu nga 'ba kuata'en xutabiu kui kjua ngisa tse je tjinnire nga ko mare ngatsi'i xuta xi yak'a xi tse'e Galilea? 3An xin_nuu̱ nga junjun ―kitsu Jesús―. 'Ba jun, tsa bi sik'antjaiyo kjuafa'etsjennu 'ba kjua'e ngañu ngixkun Na'enchana, 'ba=nde tsa'en kueyo ngatsi'u ngayeje. 4'Ba ngat'a tse'e xi tjio'on ján jesun kionga torre tse'e Siloé kiskanere, ¿a nikja'etsjenñu nga 'ba kuánre xutabiu kui kjua ngisa tse je tjinnire nga ko mare ngatsi'i xuta xi yak'a xi tse'e naxinanda Jerusalén? 5An xin_nuu̱ nga junjun. 'Ba jun, tsa bi sik'antjaiyo kjuafa'etsjennu 'ba kjua'e ngañu ngixkun Na'enchana, 'ba=nde tsa'en kueyo ngatsi'u ngayeje. 6'Ba Jesús 'ejña kjuakusunbi, 'ba kitsu: ―Jngu xuta tjintjejinre jngu ya higo ngajin ña tjintjere uva, 'ba kikutsejenre tsa yabiu je yajare tu higo, tunga nijnguú kuasjaire. 7'Ba meni jako xuta xi tsikuenda ña tjintjere uva, 'ba kitsure: “Je ján nu tjinre nga fa'ekangisjaa̱ ture ya higobi, 'ba nijnguú masjaina̱. Tichasin, ngat'a tu kjuatjo= titsikjengi nga'ñure nangiu.” 8'Ba xi tsikuenda ña tjintjere uva kitsingojore: “Na'en, ta'e'ndena nga ngatasen ngisa nubi. Kuakjanndai_ra̱ tuts'in 'ba kuinyangi_ra̱ nangi jma. 9'Ba tsa sja tu nu xi ndiba, nda tjin. Tunga tsa bi sja, ku̱an stisun.” 10Jngu nixtjin nga nikja'aya, Jesús tibakuya enre Na'enchana ngaya jngu ni'ya sinagoga. 11'Ba kio tijña jngu chjun xi kuatjio'on ján nu tjinre nga tji'me. Jngu isennixtjin xi bi nda kitsitsitinre 'ba bi nde ma basen kixini. 12'Ba kionga Jesús tsabe chjunbiu, kinchjare 'ba kitsure: ―Na, je kuandai ngat'are chi'in xi kunri. 13'Ba Jesús yanere ntsja chjunbiu, 'ba ndekuini chubabiu tsakasenkixi ngani 'ba 'etuts'inre nga kitsichjire Na'enchana. 14Tunga xi ngakure ni'ya sinagoga kuastire, ngat'a Jesús kitsinda chjunbiu nga nixtjin nga nikja'aya. 'Bi kitsu nga jako xuta: ―Jon nixtjin tjin nga ma ña'axa. Ngu kui nixtjinbiu ndibo nga ku̱ando, 'ba bi nixtjin nga nikja'aya. 15'Ba Jesús kitsingojore: ―¡Xuta xi jó nkjon! ¿A bi chjundo tjiuba xi tjinnu nga nixtjin nga nikja'aya, nga menik'iu nanda? 16'Ba chjunbi xi ntjere Abraham kuán, xi je tjio'on ján nu tjinre nga chanayi Satanás tjita'ñure nga kitsja chi'inre, ¿a bi machjen nga xjunda ninga tsa nixtjin nga nikja'aya? 17'Ba kionga Jesús je kitsu kibi, kuasubare ngatsi'i xuta xi stike. Tunga ngatsi'i xutankjiun kuatsja yeje kjuakun xi Jesús tsa'en. 18'Ba kio Jesús kitsu: ―¿Mé= xi mangusun ña batexuma Na'enchana? 'Ba ¿mé= xi singusunkuaa̱? 19Jo=ni jngu xujma mostaza xi kiskjebe jngu xuta 'ba 'entje ngijñare. 'Ba kuank'a xujmo 'ba jngu ya kuán, 'ba tjiunise xi tutjen ngank'aa ja'etsinda'a ndaba tjiare yo. 20'Ba Jesús kitsu ngani: ―¿Mé= xi singusunkuaa̱ ña batexuma Na'enchana? 21Jo=ni na'yu sanre niñuxtila xi kiskjebe jngu chjun 'ba kitsik'atjijinko 'ñu tsé na'yu. 'Batsa'en tsijin ngayéje na'yu. 22'Ba kionga Jesús tifi naxinanda Jerusalén, ja'axtiu naxinanda ya'e ko naxinanda chi nga tibakuya enre Na'enchana. 23'Ba jngu xuta tsiningiyare: ―Na'en, ¿a chuba mani xi k'uangi? 24'Ba Jesús kitsure: ―T'e_ru kakún nga kuitjas'ion xuntja xkju. Ngat'a xinkixi_nuu̱ nga ne nkjin mani xi ku̱amejénre kjua'as'en kio, tunga bi ku̱anre. 25'Ba kionga xi naire ni'yo kuisetjen 'ba k'uechja xuntjo, jun xi tenyo ngandetsian sikjanio xuntjo, 'ba kuixun: “Na'en, chju'inii̱ xuntjo.” Tunga kui kuetsunu: “Bi 'bexkun_nuu̱. Bi 'bia̱ ñá tsojon.” 26'Ba kio kuixun: “Ñatjen kjininchja 'ba kji'ya, 'ba ngaya ndiyani̱ kikakuye enre Na'enchana.” 27Tunga 'bi kuetsunu: “Je 'ba kixin_nuu̱ nga bi 'bexkun_nuu̱ 'ba bi 'bia̱ ñá tsojon. Tinyat'axiun ngatsi'u, jun xi ch'o kjiño'on.” 28Kio xi'ndo 'ba kuijndo nde'ñú nga xio Abraham ko Isaac ko Jacob 'ba ko ngatsi'i nchja chinga profeta xi tjindu ña batexuma Na'enchana. 'Ba jun, xin kjuinik'endunu. 29'Ba kjuendibani xuta nituña nga'ndeñu 'ba k'uendut'a yamixa xi kjijña ña batexuma Na'enchana. 30'Ba chutsijon, tjin xuta xi jaskan ma nganda'e xi tjun ku̱an, 'ba tjin xuta xi tjun ma nganda'e xi jaskan ku̱an. 31'Ba ndekuini chubabiu yak'a xuta fariseo ja'ekun Jesús, 'ba kitsure: ―T'etji nga'e 'ba xin t'in, ngat'a Herodes mejénre sik'enri. 32'Ba Jesús kitsure: ―'Bi tangink'in_ru xuta mañabiu: “Chutsejen, nganda'e 'ba nyujunni k'uaxjia̱ isennixtjin xi bi nda 'ba sindaa̱ xuta, 'ba xi majánni nixtjin kjuet'ana̱.” 33Tunga tjinnere nga janda kjuia̱ nganda'e ko nyujunni 'ba ko jngini, nga tefia̱ naxinanda Jerusalén. Ngat'a bi ku̱an kueya xin naxinanda jngu profeta. 34¡Jun xuta tse'e Jerusalén, xi nik'ion nchja chinga profeta 'ba 'be_ru ndiojo xuta xi nikasennu! ¡A tu nkjin ndiya kuamejénna̱ nga sik'enduku_nuu̱ jotsa'en tjiuxa'ndo nga 'bendungits'u ki'ndire, tunga bi kuamejénnu! 35Ngu nganda'e, je kjuinikumare ni'yanu. 'Ba an 'ba xin_nuu̱ nga bi nde xianinu ka'nda nga kuixun: “¡Ngatjatsichikunta'en Na'enchana xi ndiba ngat'are ja'enre!”

will be added

X\