SAN LUCAS 12

1'Ba kionga 'ñu nkjin mi xuta je kuañajan ka'nda inya'be'nyu'ñu xinkjin, Jesús 'etuts'inre nga xutare tjun jako, 'ba kitsure: ―Tikuendo yojonu ngat'a tse'e kjuajó nkjainre xuta fariseo. Bi 'ba ngatjamo jo ma na'yu san nga tsisan xinkjin kionga 'batjijinre. 2Ngat'a tsajain xi 'mo tijña xi bi xiare, 'ba tsajain xi tijña'mo xi bi s'ejñatsejen. 3Kui kjuañu, ngayéje xi tsixun ña jñu, nga nixtjin kjuinu'yare. 'Ba ensen xi kik'in_ru xingiu, ka'nda ngatsja ni'ya xi'ndaya nga kjuinu'yare. 4'Ba jun amiguna̱, xin_nuu̱ nga bi kun_ru xi tu yojo mare tsik'en, 'ba jaskan tumé nde tsiko ngisani. 5Tusa xin_nuu̱ 'yá= xi kjuikuncho. Tjikuncho xi jaskan nga tsik'en yojo, tjinre kjua'ñu nga tsikasen nga'nde ña fa'a kjuanima xuta 'ba ña bi 'boya ndi'u. Jun, kui= xi tjikuncho. 6¿A bi sateña ón tjiunise ki'ndi nga tu jó sa ton xkua? Tunga Na'enchana nijnguú tjiunisebiu chiyajinre. 7'Ba ka'nda ngayéje ntsjare nindakú tjixkire kui. Kui kjuañu bi kunñu, ngat'a jun ngisa= chji_ru nga ko mare nkjin tjiunise. 8'Ba xin_nuu̱, ngatsi'i xi sikixiya ngixkun xuta nga tsa'an, 'ba=nde Ki'ndire Xuta xi'iun sikixiya ngixkun ankjelere Na'enchana nga tse'e ngayeje. 9Tunga tsa tjin xi bi sikixiya ngixkun xuta nga tsa'an, 'ba=nde bi sikixiyaa̱ ngixkun ankjelere Na'enchana nga tsa'an ngayeje. 10'Ba ngatsi'i xi ch'o kuetsure Ki'ndire Xuta xi'iun, ku̱achat'are. Tunga xi ch'o kuetsure Isennixtjintsjere Na'enchana, bi nde ku̱achat'anire. 11'Ba kionga kuechaninu nga ku̱annu kjua ni'ya sinagoga asa ngixkun chikun asa ngixkun xutaxa, bi nikjo ngat'are jótsa'en kjuinukjuantjo yojonu asa mé= en xi kuixun. 12Ngat'a kui chubabiu Isennixtjintsjere Na'enchana kuakuyanu mé= en xi machjen nga kuixun ―kitsu Jesús. 13'Ba kio jngu xuta xi sejñajinre xutankjiun kitsure: ―Maestru, 'ba t'in_ri nts'ia̱ nga ngatakjanyakona̱ mé= xi 'ejña na'enni̱. 14Tunga Jesús kitsure: ―Na'en, ¿'yá= xi kitsja xana̱ nga juez ku̱an ngajinnu, asa jngu xuta xi kuakjanya mé= xi tjinnu? 15'Ba kitsu ngisare xuta xi kio inya: ―Chutsijon 'ba tikuendo yojonu. Bi nimijion mé= xi tjinre xuta xi yak'a. Nisi 'ñu nkjin tsajmi tjinre jngu xuta, bi tsajmire xi sik'ejñakunre. 16'Ba Jesús 'ejñare jngu kjuakusun, 'ba kitsu: ―Kis'e jngu xuta nyina xi 'ñu nda chan kitsja nangire. 17'Ba 'bitsa'en kitsikja'etsjen: “¿Mé= xi sa'aa̱n? Ngat'a tsajainna̱ nga'nde ña k'uejñatjaa̱ chan xi kisakuna̱.” 18'Ba 'batsa'en xutabiu kitsu: “Kui=bi xi sa'aa̱n. Sikixuyaa̱ ni'ya ña minyatjaa̱ chan, 'ba kja'e xi ngisa= 'ñu ya'e sinda ngañaa̱. 'Ba kio kuinyatjaa̱ channa̱ 'ba ko ngayéje xi tjinna̱. 19'Ba sa'e xin_ra̱ yojona̱: Ne tsé tsajmi inyatjona̱, 'ba nkjin= nu ku̱anre. Sikja'aya 'ba kuechia 'ba s'ia 'ba sitsjakua ngasun'ndio.” 20Tunga Na'enchana kitsure: “Xuta xtan, kui nistjenbi kueye. 'Ba xi inyatjori, ¿'yá= tse'e ku̱an?” 21'Ba= mare xuta xi nga'e ngasun'ndio 'bendutjo kjuanyina, tunga ni̱ma̱= nini ngixkun Na'enchana ―kitsu Jesús. 22'Ba sa'e kitsure xutare: ―Kui kjuañu 'ba xin_nuu̱ nga bi nikjo ngat'are mé= xi machjennu nga kuetsubachun nga'e ngasun'ndebi, mé= xi xino. 'Ba nde bi nikjo ngat'are mé= xi machjenre yojonu, mé= najñu xi xojo. 23Ngat'a kjuabenichunnu, kui= xi ngisa chjire nga ko mare xichine. 'Ba yojonu, kui= xi ngisa chjire nga ko mare najñu. 24Chutsejen_ru kjuakusun ngat'a tse'e tjiundia. Kui bi 'bentje, ninga bi minyaku chan, 'ba nde tsajainre ni'ya ña minyatjo xichinere. Tunga Na'enchana tsikjén. 'Ba jun, ¿a bi ngisa chji_ru nga ko mare tjiunisio? 25'Ba ninga tsa 'ñu sikjo ngat'anu, bi ku̱annu k'uetjun_ru ngijngu nda ngisa kjuabenichunnu. 26Ngu tsa bi manu ña'an mé= xi ichi, ¿ánñu mafoninu ngat'are tsajmi xi yak'a? 27Chutsejen_ru kjuakusun ngat'a tse'e jotsa'en mank'a naxu. Bi tsa'exa 'ba bi tsinda nachjun. Tunga an xin_nuu̱ nga ninga rey Salomón xi ngisa 'ñu nyina kuán nixtjin kuatse jan, bi 'ba kun najñu tsakaja joni naxu. 28Tsa Na'enchana tsja tsikun naxu xi tjin nganda'e ngijña 'ba xi nyujunni kuiti, ¿a bi ngisa sjanu najñu xi xojo jun xi ngisa 'ñu chji_ru nga ko mare naxu? ¡Jun xi chuba makjainnu! 29'Ba mani, bi nikjo nga kuinyisjo mé= xi xino asa mé= xi s'iu. 30Ngat'a ngatsi'i xuta xi tjin ngasun'ndio mangisjai tsajmibi, 'ba Na'ennu je be nga machjennu tsajmibiu. 31Tusa tinyisjo nga si'on jotsa'en mejénre Na'enchana ña batexuma, 'ba sakunu ngayéje tsajmibi ya'aniñu. 32'Ba Jesús kitsure: ―Jun xi ki'ndi chutsangana̱ xin_nuu̱, bi kun. Ngat'a Na'ennu tsja tjinre nga tsja'nde nga kuatexumako ña tibatexuma. 33Tateño mé= xi tjinnu 'ba ta'e_ru xuta ni̱ma̱. Tsa 'ba si'on, sakunu chitsa xi bi machinga, 'ba ko kjuanyina xi bi fet'a ngank'aa, ña chacheje bi ma fechu ninga tjiuxabi bi ma tsikjekjua. 34Ngat'a ña tijña kjuanyinanu, 'ba=nde kio tijña inimanu. 35Chojo najñunu tuxi tetsubandañu 'ba nda titikoni ndi'inu. 36'Ba ngatjamo joni chu'nda xi inyakuyare xi naire xi ndaba kjuabixan kafi, meni kionga xi naire kjua'e ngani ndaba 'ba sikjane xuntja ni'ya, chu'ndabiu ta'a skje'ire. 37Ndaxure chu'nda xi tjindukun kionga kjua'e xi naire. Kjuakixi= xi xin_nuu̱ nga xi naire k'uekungi najñu tjiare 'ba sik'endut'a yamixare nga k'ueyare xichine. 38Ndaxure chu'ndabiu, tsa tjindukun kionga kjua'e xi naire, ninga tsa masen nistjen asa tsa je tjis'e isen. 39Ngatja'yo kibi: Tsa xuta xi tse'e ni'yo be jó fa chun kjua'e chacheje ndaba, bi sja'ndere nga chachojo kuakjanngi ndaba. 40'Ba=nde tetsubandantsjo jun ngayeje, ngat'a Ki'ndire Xuta xi'iun kjua'e kionga jun bi techuya_ru. 41'Ba Simón Pedro tsiningiyare Jesús: ―Na'en, kjuakusunbi xi te'bejñanii̱, ¿a tu ji̱n= kik'innii̱, asa ngatsi'i xuta? 42'Ba Na'enna Jesucristo kitsure: ―¿'Yá= ngakure chu'nda xi kixi fiko xare 'ba xi nkjin kakun, kui= xi naire sik'enda nga kui xi sjare xichine chu'nda xi yak'a nga chubare fa? 43¡Ndaxure chu'nda xi 'ba titsa'en kionga kjua'e naire! 44'Ba xinkixi_nuu̱ nga naire sik'enda ngayéje xi tjinre. 45Tunga tsa chu'ndabiu 'bitsa'en sikja'etsjen: “Naina̱ k'uandaya=ngisare nga kjua'e”, 'ba sa'e kuajare chu'nda ko yanchjin chu'nda xi yak'a, 'ba kuakjen 'ba k'ui 'ba ku̱ach'i; 46'ba nixtjin nga bi skuyare 'ba chu̱ba̱ xi bi be, kjua'e ngani naire chu'ndabiu. 'Ba naire 'ñu sikja'a kjuanima 'ba ngusun siko joni xuta xi bi makjainre ngat'a tse'e Na'enchana. 47'Ba chu'ndabiu xi be mé= xi mejénre xi naire tunga bi 'bejñanda ninga bi tsik'etjusun mé= xi mejénre xi naire, nkjin ndiya s'e̱re. 48Tunga chu'nda xi bi be mé= xi mejénre xi naire 'ba kitsa'en mé= xi machjen nga ku̱anre kjua, kui= xi chuba ndiya s'e̱re. Kui xi tse kitsa'ere, tse xja'are; 'ba nde kui xi tse kuangantsja, 'ba=nde ngisa tse xja'are. 49An ja'ek'ets'ia̱ ndi'i xi tsitsje ngasun'ndio 'ba 'ñu mejénna̱ nga kuiti tsakaiñu ―kitsu Jesús―. 50Tunga tjinnere nga kjua'axtia̱ jngu kjuanima xi ne 'ñu, 'ba 'ñu tjimafona̱ ka'nda nga kjua'e nixtjin nga k'uetjusun kibiu. 51¿A nikja'etsjenñu nga kjuaxiu ja'ek'ejñaa̱ ngasun'ndebi? Xin_nuu̱ nga junjun, tusa ja'ekakjanyaa̱ xuta. 52Ngat'a ch'anira nganda'e tsa ón mani xuta xi tjinduya ngaya jngu ni'ya, kuakjanya: xi ján mani skjanko xi jó mani, 'ba xi jó mani skjanko xi ján mani. 53Jó ya s'e̱. Xi na'en ma ku̱astike ki'ndi xi'inre; 'ba xi ki'ndi xi'in ma ku̱astike na'enre; xi na ma ku̱astike ki'ndi chjunre; xi ki'ndi chjun ma ku̱astike nare; xi nachi'ya ma ku̱astike kja'ndare; 'ba xi kja'nda ma ku̱astike nachi'yare. 54'Ba Jesús 'ba nde kitsure xutankjiun: ―Kionga 'yo nga ndiba yufi, mixun: “Kua'a tsi”, 'ba 'ba ma. 55'Ba kionga tsejen manu jngu ntjo sje, mixun: “Ku̱asje”, 'ba 'ba ma. 56¡Xuta xi jó nkjon! Mankjinnu mé= xi matsejen ngank'aa ko t'anangiu. Tunga, ¿ánñu bi kjimankjinninu xi tis'ejñatsejen nixtjin nga tetsuba? 57Bi machjen nga jngu juez kuetsunu mé= xi kixi ngixkun Na'enchana ―kitsu ngisa Jesús―. 58Kionga ji ko xi tibangiri temangiu ngixkun xutaxa, t'endakue kjua yejerañu nga tjenko ngisai ngaya ndiyo, tuxi bi kuekoniri ngixkun juez. Ngat'a tsa ngixkun juez kuekori, xi juez singantsja nganiri ngaya ntsja xi tsikuenda nduyo 'ba kui kuayari nduyo. 59'Ba xinra̱ nga bi k'uetji kio ka'nda nga k'uechji ngayéje ton xi tjenri.

will be added

X\