SAN LUCAS 11

1Jngu nixtjin Jesús tifako Na'enchana jngu nga'nde; 'ba kionga je jet'are, jngu xutare kitsure: ―Na'en, takuyanii̱ jotsa'en chukua Na'enchana, jotsa'en Juan yakuyare xutare. 2'Ba Jesús kitsure: ―Kionga xuko Na'enchana, tixun: Na'en, ngatja'yakun ja'enri. Ngatjama nga'e jngu nga'nde xi batexumai. 3Ta'enii̱ niñu xi nyujun nyujun machjenni̱. 4Tichat'anii̱ jeni̱, ngat'a ji̱n 'ba nde nichat'a_ri̱ ngatsi'i xi ch'o tsikoni̱. 'Ba bi ba'e'nde nga xut'áyakoni̱. 5'Ba Jesús 'ba nde kitsu ngisa ngayeje: ―Tsa tjin ngajinnu jngu xi ngamasen nistjen kjua'ekun amigure 'ba 'bi kuetsure: “Amigu, tikeyana ján niñuxtila, 6ngat'a ja'ekunna̱ jngu amiguna̱ xi kjin jendibani 'ba tsajainna̱ xi sja_ra̱ xi skine.” 7Tsa 'ba sa'en, xuta xi ngijngu xi tijña ngaya ndaba singojore: “Bi nistinaa̱. Je tichja xuntjo, 'ba an ko ki'ndina̱ je tetsju yijii̱. Bi nde ma bisetjenña̱ nga sjara̱ mé= xi techja'anaa̱.” 8An xin_nuu̱, ninga tsa bi kuisetjen nga sjare mé= xi timi'are xutabiu ngat'a amigure mani, tunga kuisetjen= ngat'a 'ñu si'a titsa'en xutabiu, 'ba sjare ngayéje xi machjenre. 9'Ba an 'ba nde xin_nuu̱ ngayeje: Chjo'o, 'ba Na'enchana sjanu. Tinyisjo, 'ba ku̱asjainu. Tikjanio xuntjo 'ba stju'inu. 10Ngat'a ngatsi'i xi mi'a, kui= xi xuntsja. 'Ba xi mangisjai, kui= xi masjaire. 'Ba xi tsikjane xuntjo, kui= xi tju'ire. 11¿A tjin ngajinnu jngu na'en xi tu tjiuye sjare ki'ndire, kionga skui'are tjiuti? 12'Ba tsa chjo skui'are, ¿a tu chanuya sjare? 13Tsa ka'nda jun xi ch'okun manu ba'e_ru xi nda ki'ndinu, jófa ni Na'ennu xi tijña ngank'aa ngisa sjare Isennixtjintsjere xuta xi skui'are ―kitsu Jesús. 14'Ba jngu nixtjin Jesús ti'baxje jngu isennixtjin xi bi nda xi kitsini̱má jngu xuta, 'ba kionga isennixtjin xi bi ndo je 'etjukajinre xutabiu, kuán kinchja ngani. 'Ba xutankjiun 'ñu kuakunre. 15Tunga tjin yak'a xi 'bi kitsu: ―Xutabi ma 'baxje isennixtjin xi bi nda ngat'a Beelzebú xi ngakure isennixtjin xi bi ndo kitsjare kjua'ñu. 16'Ba tuxi skut'ayakoni Jesús, kja'e xuta tsi'are nga sa'en jngu kjuakun xi kuakutsejen nga Na'enchana kitsikasen. 17Tunga Jesús be= mé= xi inyatsikja'etsjen nchjabiu, kui kjua kitsunire: ―Joni nituñare nangi ña batexuma jngu rey. Tsa skjanko xinkjin xuta xi tjin kio, ndekui sikjekjuani mé= xi tjin nangire. 'Ba tsa xuta xi tjin ngaya jngu ni'ya ku̱astike xinkjin, ngu bi tsé ku̱anre. 18'Ba nde 'ba= tsa'enni ngat'are chanayiu. Tsa ndekuini Satanás k'uaxjeni yojore, ¿jótsa'en tsé xukjuanire nga kuatexuma? 'Ba texia̱n, ngat'a temixun=ñu nga chanayi Beelzebú kitsjana̱ kjua'ñu tuxi ma 'baxjeñaa̱ isennixtjin xi bi nda. 19'Ba tsa kjua'ñure chanayi Beelzebú te'baxjekoña̱ isennixtjin xi bi nda, jotsa'en nga temixun, ¿'yá= tse'e kjua'ñu xi 'baxjekoni isennixtjin xi bi nda xi tjennginu? Ngu ndekui nchjabiu bakutsejenni nga bi kixi tetsubo. 20Tunga tsa kjua'ñure Na'enchana te'baxjekoña̱ isennixtjin xi bi nda, kui xi tsunire nga je ngajinnu tijña kjua'ñure Na'enchana nga tibatexuma. 21'Ba kionga jngu xuta xi 'ñu taja tjindare yojore ko kicha nga titsikuenda ndaba, ngu, tu'yá ku̱an siko mé= xi tjinre. 22Tunga tsa ngijngu xi ngisa 'ñu taja nga ko mare kui kjua'e 'ba sa'enre, kjua'are kicha xi tjima'ñut'a kakun xutabiu, 'ba kuekja'a mé= xi tjin ngaya ndaba, 'ba kuakjanya. 23Xi bi an makona̱, kui= xi stikena̱. 'Ba xi bi minyakona̱, kui= xi 'betsojoba. 24'Ba kionga jngu isennixtjin xi bi nda 'betukajinre jngu xuta, 'bajmesun nga'nde kixi nga mangisjai nga'nde ña ku̱an sikja'aya. 'Ba kionga bi masjaire, tsu: “Tusa kjui ngaña̱ ni'yana̱ ña 'etjuña̱.” 25'Ba kionga fa'e ngani, be nga je kis'echa 'ba je nda chun nga fa'as'en ngani. 26'Ba kio fikja'a ngiyatu isennixtjin xi bi nda xi ngisa ch'okun ngisa nga ko mare kui, 'ba ngatsi'i fa'as'enjinre xutabiu. 'Ba xutabiu ngisa ch'okun ma nga ko mare ngatitjunre. 27Yejerañu Jesús titsu kibi, jngu chjun xi s'ejñajinre xutankjiun kitsu nga kiski'ndaya: ―¡Ndaxure chjun xi kitsjari kjuabenichun 'ba kitsikakiri! 28'Ba Jesús kitsingojore: ―Tusa, ¡ndaxure xi basen ñojon enre Na'enchana 'ba tsik'etjusun! 29'Ba kionga je ngisa 'ñu inyamañajan ngisa xuta, Jesús 'etuts'inre nga kitsu: ―Xuta xi tjin nganda'e ch'okun. Inyami'a nga skue jngu kjuakun, tunga tu kui= xi kuánre xuta chinga profeta Jonás nixtjin kuatse jan, tu kui sani kjuakunbiu xi s'ejñatsejenre. 30Ngat'a jotsa'en kuánre Jonás kis'ejñatsejen kjua'ñure Na'enchana ngajinre naxinanda Nínive, 'ba=nde mé= xi ku̱anre Ki'ndire Xuta xi'iun s'e̱jñatsejen kjua'ñure Na'enchana ngajinre xuta xi tjin nganda'e ngayeje. 31'Ba reina xi yatexuma nangi Sabá 'ba=nde kuisetjen ko xuta xi tjin nganda'e, kionga kjua'e nixtjin nga ku̱anre kjua ngasun'ndio. 'Ba kui= xi skanineje xuta xi tjin nganda'e, ngat'a 'ñu= kjin jendibani nga ja'ekasen ñojon kjuafa'etsjenre Salomón. Tunga xi tijña nga'e ngisa= je ngisa nga ko mare Salomón. 32'Ba xuta xi tsik'endu Nínive kuisetjen ko xuta xi tjin nganda'e, kionga kjua'e nixtjin nga ku̱anre kjua ngasun'ndio. 'Ba kui= xi skanineje xuta xi tjin nganda'e, ngat'a kitsik'antjaiya kjuafa'etsjenre 'ba ja'e ngani ngixkun Na'enchana kionga Jonás kitsikja'axtiuyare enre Na'enchana. Tunga xi tijña nga'e ngisa= je ngisa nga ko mare Jonás. 33Tsajain xi baka jngu ndi'i 'ba 'bejña'mo asa 'bejñangi jngu kaxa. Tusa 'bejña nk'a, tuxi kuatsejennire xuta xi kjua'as'en ni'yo. 34'Ba tuxkuin jo=ni jngu ndi'i xi tsitsejenre yojori. 'Ba mani, tsa tuxkuin nda, ngayéje yojori matsejenre. Tunga tsa tuxkuin bi nda, ngayéje yojori tjijñu=re. 35Chutsejen_ri nga ndi'i xi tjin ngajinri bi xi jñu ngatjama. 36'Bamani, tsa ngayéje yojori tjinre ndi'i 'ba nimé xi jñu tjin, ku̱atsejenntsjai joni jngu ndi'i xi 'ñu ti nga tsitsejenri ―kitsu Jesús. 37'Ba kionga Jesús je jet'are nga kinchja, jngu xuta fariseo kitsikjint'e nga kuekakjenko ndaba. 'Ba Jesús ja'as'en ndaba xutabiu 'ba tsik'ejñat'a yamixo. 38'Ba xuta fariseo tu 'ba= kuánre, kionga tsabe nga Jesús bi yanejun titjun ntsja nga kuakjen jo tsu kjuachingare. 39'Ba Na'enna Jesucristo kitsure: ―Jun xi xuta fariseo kuon, jun jo=ni tasa ko tiba xi tu ngasun nk'are jejun, tunga kitse ngajin kjuafa'etsjennu kjuacheje ko kjuach'okun. 40¡Xuta xtan! ¿A bi 'yo nga xi kitsa'en ngandetsiun, ndekui kitsa'enni ngaya? 41Tunga ta'e kjuatjo_ru xuta ni̱ma̱ xi tjin ngajin inimanu, 'ba 'batsa'en ku̱atsjekjinñu ngixkun Na'enchana. 42¡Nimaxuni ngat'anu xuta fariseo! Ngat'a ninga ba'e_ru Na'enchana diezmore ngayéje kuya tsujmi ntje xi tsjare jnda xi chine joni menta ko ruda, tunga nichiyajinñu nga kixi kuon ngixkun Na'enchana 'ba nga s'e̱nu kjuanimejenre Na'enchana. Ki=bi xi tjinnere si'on tsakaiñu, 'ba bi sichiyajiun nga si'on xi yak'a. 43¡Nimaxuni ngat'anu xuta fariseo! Ngat'a 'ñu matsjanu nga 'betsubasun yaxile xi inyatitjun ni'ya sinagoga, 'ba 'ñu matsjanu nga nda nite'ndanu ngajin ndetsin ngayeje. 44¡Nimaxuni ngat'anu! Ngat'a jun jo=ni tsju xi bi 'yare, xi xuta minyane ninga bi be ―kitsu Jesús. 45'Ba 'batsa'en jngu chjine kjuatexuma kitsure: ―Na'en, nga 'ba sji, 'ba=nde ch'o mani ji̱n ngayeje. 46'Ba Jesús kitsu: ―¡Nimaxuni ngat'anu jun ngayeje chjine kjuatexuma! Ngat'a nika'anijinñu xuta ch'a xi bi xukjuakore. Tunga jun, nijnguú najma ndso niko. 47¡Nimaxuni ngat'anu! Ngat'a jun nindo tsjure nchja chinga profeta xi xuta chinganu kitsik'en. 48'Ba 'batsa'en bakukixiu nga tjijngu kakún jo kitsa'en xuta chinganu. Ngat'a kui kitsik'en nchja chinga profeta 'ba jun nindo tsjure. 49Kui kjuañu Na'enchana xi mankjinre ngayéje xi tjin 'bi kitsuni: “Sikasen_ra̱ nchja chinga profeta ko apóstol xutabiu, 'ba yak'a xi sik'en 'ba yak'a xi sjenngike.” 50'Ba Na'enchana sijere kuenda xuta xi tjin nganda'e ngat'are jin xi 'esten ngatsi'i nchja chinga profeta ka'nda nga kuanda ngasun'ndio 'ba ka'nda nganda'e. 51Ch'anira jinre Abel, ka'nda tse'e Zacarías xi kjinik'en ngamasen ndetsin 'nda ña tijña altar ko ningu. Kui kjua xinni_nuu̱ nga sijere kuenda xuta xi tjin nganda'e ngat'are ngayéje kibiu. 52¡Nimaxuni ngat'anu jun chjine kjuatexuma! Ngat'a je kjinitsojon llave xi kje'ikoni xuntja ña tijña kjuafa'etsjen. Tunga ni jun bitjas'ion ninga bi ba'e'nde_ru xuta xi mejénre kjua'as'en ―kitsu Jesús. 53'Ba kionga Jesús kitsu kibi, 'ñu kuastire chjine kjuatexumo ko xuta fariseo. 'Ba tsaka'anire nixtjinbiu nga 'et'asire Jesús 'ba tsiningiyare ngat'are nkjin kuya tsajmi. 54'Ba kiskutsejenxinre tsa Jesús kuinchja jngu en xi bi 'batjin, tuxi ku̱an kuangini.

will be added

X\