SAN LUCAS 10

1'Ba jaskan kibi, Na'enna ja'ajin ngiyachute ko kan jó xuta xi kja'ere ngayeje, 'ba jojó jojó kitsikasentitjun ngayéje naxinanda 'ba nga'nde ña tjinnere kuaje kui. 2'Ba kitsure nchjabiu: ―Xuta xi tjin, jo=ni jngu tsujmi ntje xi 'ñu tse, tunga chuba mani chu'nda. 'Ba 'batsa'en tsu'ba chja'a_ru xi tse'e tsujmi ntjio, nga ngatatsikasen ngisa chu'nda tuxi k'ueñajanni. 3Tangiun jun 'ba tenijin kakun nga an tetsikasen_nuu̱ joni chutsanga ngajinre tjiundsejen. 4Bi ch'o ton, ninga chitsa, ninga jnde. 'Ba bi bisen'ñu nga site'nda_ru xuta ngaya ndiyo. 5'Ba kionga kuitjas'ion jngu ni'ya, tite'ndatitjun 'ba tixun: “Ngatjas'e kjuaxiu ni'yabi.” 6'Ba tsa tjin kio xuta xi bakinre nga s'e̱re kjuaxiu, kui sakure kjuaxiu xi tebo'o. Tunga tsa bi bakinre, ku'beya nganinu kjuaxiu xi tebo'o. 7'Ba janda tetsubo kui ni'yabiu, 'ba chino 'ba t'iu mé= xi kua'enu. Ngu xi tsa'exa bakin=re̱ nga sakure chjire. Bi xki ni'ya mangiun. 8'Ba kionga kuitjas'ion jngu naxinanda, tsa tjin kio xuta xi nda skjebetjonu, chino mé= xi k'ueyanu. 9'Ba tindo xuta xi inyafesun kio 'ba 'ba t'in_ru: “Je tijña tiñanu jun ña batexuma Na'enchana.” 10Tunga tsa kuitjas'ion jngu naxinanda 'ba xuta xi tjin kio bi nda skjebetjonu, tangiun ngaya ndiyo 'ba t'in_ru: 11“Ka'nda chojore naxinandanu xi je tsakajun ndsakui̱, 'betsujmee̱ joni jngu chu̱ba̱ ngat'a tsojon. Tunga ngatja'yo kibi, nga je tijña tiña ña batexuma Na'enchana.” 12'Ba xin_nuu̱. Kionga kjua'e nixtjin nga ku̱anre kjua ngasun'ndio, kui naxinandabiu ngisa= tse kjuanima kjua'axtiu nga ko mare naxinanda Sodoma. 13¡Nimaxuni ngat'anu jun, xi Corazín tsojon! ¡'Ba nimaxuni ngat'anu jun, xi Betsaida tsojon! Ngat'a tsa xuta xi tse'e Tiro ko xi tse'e Sidón tsabe kjuakun xi kuán ngajinnu, jeru nda'e kitsik'antjaiyani kjuafa'etsjenre 'ba ja'e ngani ngixkun Na'enchana. 'Ba tsakaja najñu kjue 'ba tsik'endujin chojo nga'i tuxi kuakuni nga ba tjinre ngajin inimare. 14Tunga nixtjin nga ku̱anre kjua ngasun'ndio, ngisa= tse kjuanima kuitjaxtiu nga ko mare xuta xi tse'e naxinanda Tiro ko xi tse'e naxinanda Sidón. 15'Ba jun xi Capernaum tsojon, tsa manu nga stjunitjion ka'nda ngank'aa, tusa Na'enchana sik'etukajennu ka'nda nga'nde ña kjua'a kjuanima xuta 'ba ña bi 'boya ndi'i. 16'Ba kitsu nganire xutare: ―Xuta xi basen ñojonnu, an basen ñojonna̱. 'Ba xi tsikasent'axinnu, an tsikasent'axinna̱. 'Ba xi tsikasent'axinna̱, tsikasent'axiin xi kitsikasenna̱. 17'Ba 'ñu tsja inyamare nchja xi yachute ko kan jó nga ja'e ngani. 'Ba kitsure Jesús: ―Na'en, ka'nda isennixtjin xi bi nda tsik'etjusunni̱ kionga nukjuai̱ ja'enri. 18'Ba Jesús kitsure: ―Jun. Ngu tsa'bia̱ nga chanayi Satanás kiska joni ndi'i cho'on nga jendibani ngank'aa. 19An je kitsjanu kjua'ñu xi ngisa 'ñu tu 'bani ko xi tjinre xi stikenu. Ku̱an kuiyunio tjiuye ko chanuya, 'ba tumé ku̱an si'onnu. 20Tunga bi ngatjamatsjanu tsa isennixtjin xi bi ndo tsik'etjusun ennu. Tusa ngatjamatsjanu nga je ja'ennu kua'indut'a ngank'aa. 21'Ba ndekuini chubabiu Jesús kitsejinre kjuatsja xi jendibani ngat'are Isennixtjintsjere Na'enchana 'ba kitsu: ―An tetsjara̱ kjuanda, Na'en, Na'en xi tse'e ngank'aa 'ba ko t'anangiu. Ngat'a kik'ejñatsejen_ri xuta xi bi mare xujun mé= xi kik'ejña'mo_ri xuta nkjin kakun 'ba xi mankjinre mé= xi tjin. Jun, Na'en, ngat'a 'ba=tsa'en kuatsjari. 22Ngayéje xi tjin je kitsingantsjana̱ Na'enna̱. 'Ba tu'yá be 'yá= ni Ki'ndiu, tu Na'en sani xi be. 'Ba tu'yá be 'yá= ni Na'en, tu Ki'ndiu sani xi be. 'Ba xuta xi mejénre kuakutsejenre Ki'ndiu 'yá= xi Na'en, kui= xi skuexkun Na'en. 23'Ba kio Jesús kitsiku'beya 'ba kiskutsejen'a xutare 'ba 'bi kitsut'axinre: ―Ndaxure xi be mé= xi jun te'yo. 24Ngu an xin_nuu̱ nga 'ñu nkjin profeta ko rey xi kis'e nixtjin kuatse jan kuamejénre tsabe mé= xi te'yo nganda'e, tunga bi tsabe. 'Ba kuamejénre yasen ñojon mé= xi tenu'yo nganda'e, tunga bi kjint'e. 25Jngu nixtjin jngu chjine kjuatexuma tsisetjen tuxi skut'ayakoni Jesús, 'ba tsiningiyare: ―Maestru, ¿mé= xi tjinnere nga sa'aa̱n tuxi s'e̱nina̱ kjuabenichun xi bi fet'a? 26'Ba Jesús kitsingojore: ―¿Mé= xi kua'indut'a kjuatexuma? ¿Mé= xi 'bexkiye? 27'Ba chjine kjuatexuma kitsingojo: ―“Timején Na'enchana xi Na'enri ko ngayéje inimari, ko ngayéje yojori, ko ngayéje nga'ñuri 'ba ko ngayéje kjuafa'etsjenri.” 'Ba: “Timején xingi jotsa'en nimején yojori.” 28'Ba Jesús kitsure: ―Je nda kjiniguaje. Tsa si'en kibi, s'e̱=ri kjuabenichun. 29Tunga chjine kjuatexuma mejénre yaku nga kixi sejña ngixkun Na'enchana, 'ba tsiningiya nganire Jesús: ―'Ba ¿'yá= xi xingia̱? 30'Ba 'batsa'en Jesús kitsingojore: ―Jngu xuta 'etju naxinanda Jerusalén nga tifijenya ndiya xi fi Jericó. 'Ba yak'a nchja cheje kisatejin, 'ba kui kiskjebe ka'nda najñu xi yaja 'ba ye'ere ka'nda nga kitsik'enya, 'ba kiji. 31'Ba tu kio fa, jngu na'mi jendibajen ndiyabiu ngayeje, tunga kionga tsabe xuta xi kio tikijña, ja'a xi ngijngu ngatere ndiyo. 32'Ba nde ja'e nga'ndebiu jngu xuta levita ngayeje. 'Ba kionga tsabe xuta xi kio tikijña, ja'a xi ngijngu ngatere ndiyo. 33Tunga jngu xuta xi tse'e Samaria xi tifa'a ndiyabiu ja'e ña tikijña kui, 'ba kionga tsabe, ja'animare. 34'Ba kitsitiñat'are 'ba kitsikire ña onre ko aseti 'ba ko binu, 'ba yaxtejun najñu. 'Ba kitsik'ejñakjare tjiunaxin xi tjenko 'ba kiko ni'ya ña tsikja'aya xuta xi xin inyafi, 'ba kio kuakuenda. 35Nga kuanyujun, kionga je tifi xuta xi tse'e Samaria, ts'axje jó ton denario 'ba kitsjare xuta xi tse'e ni'yo, 'ba kitsure: “Tikuendachi xutabi. 'Ba ngayéje xi sikjeya ngisai, kionga kjua'e ngañaa̱ k'uechjira̱.” 36Nda tjin tsu'ba ―kitsu Jesús―. ¿Ñáre ngaján nchjabi mari ji nga xinkjin xuta xi kisatejin chacheje? 37'Ba kui kitsu: ―Xuta xi ja'animare kui. 'Ba Jesús kitsu ngani: ―T'in 'ba 'ba nde ti'en ngayeje. 38'Ba Jesús janda kiji 'ba echu jngu naxinanda chi. 'Ba kio jngu chjun xi Marta 'mi kiskjebetjo ngaya ndaba. 39'Ba Marta tjin jngu ndichja xi María 'mi, xi tsik'ejñat'a ndsaku Jesús nga tibasen ñojonre mé= xi titsu. 40Tunga Marta, bi tjima'are ngat'are xa xi tjin i tjin janre. 'Ba kitsitiñat'are Jesús, 'ba kitsure: ―Na'en, ¿a bi techutsejen nga ndichjaa̱ ti'bene tajnguna̱ ngayéje xo? 'Ba t'in_ri nga ngatasekochina̱. 41Tunga Jesús kitsingojore: ―Marta, tjimafo=ri 'ba tjimandusinri ngat'are 'ñu nkjin tsajmi xi teñe'en. 42Tunga tu jngu sani xi 'ñu machjen, 'ba María ja'ajin kui, 'ba tu'yá kjua'are.

will be added

X\