SANTIAGO 1

1An, Santiago, xi tetsa'exat'a_ra̱ Na'enchana ko Na'enna Jesucristo, tetsikasen_nuu̱ kjuate'nda jun xi jendibañu nga tejó ntje xi xuta Israel, xi tetsubo ngajin nangi xi bi tse'e Israel. 2Jun nts'ia̱, 'ñu tsja t'e_ru kakún kionga chut'ayakonu nga ndibanio nkjin kuya kjuana'en. 3Ngu 'yañu kibi, nga manu bitjaxtiu nga chut'ayakonu ngat'are kjuamakjain xi tjinnu, 'ba=tsa'en ngisa manu nga chukjuanu tume xi mato'on. 4Tunga ta'e'nde_ru kjuachukjuabiu xi sakunu nga kui xi ngatatsijngukjin xa xi tsa'en ngajin inimanu, tuxi s'e̱jñandakjinñu, ku̱akixikjiun, 'ba tumé cha̱t'anu. 5'Ba tsa tjin ngajinnu xi chajat'are kjuankjin kakun, ngatami'are Na'enchana. 'Ba kui sjare, ngat'a niki tsjafani=re xi machjenre ngatsi'i xuta 'ba bi jan be kakun. 6Tunga xi skui'are tsajmi Na'enchana tjinne=re nga ku̱akjainre 'ba bi jó ján kuaja inimare. Ngu xi jó ján baja inimare, jo=ni tsindiure ndachikun xi fiko i fiko jan ntjo. 7Xi 'ba sa'en, tumé ngatakuya nga sa̱kure tsajmi ngat'are Na'enchana, 8ngat'a jó= tsikja'etsjen 'ba niñajanni tsikjet'a xi kui 'betuts'inre. 9Nts'ia xi ni̱ma̱ kuán, kui xi tsja ngatjas'ere, ngat'a Na'enchana nk'a ts'axje. 10'Ba tsja ngatjas'ere xi xuta nyina kuán, ngat'a Na'enchana ts'axjenima. Ngat'a xuta xi nyina chaja joni naxu xi tjin ngijña. 11Kionga 'betju tsu'biu 'ba 'ñu sje ma ndabare, tsixi ngijño, 'ba jenngi naxure, 'ba chaja isenre xi tsja kji'i. 'Ba 'ba=nde tsa'en xaja xi xuta nyina kuán ngajinre xa xi titsa'en. 12Ndaxure xuta xi tichjukjuakore nga tichut'ayako, ngat'a nga je nda kjua'axtiu nga tichut'ayako, sa̱ku=re kjuabenichun. Kui chjibiu xi kitsuyatitjun Na'enchana nga sjare xuta xi tsimején. 13Tsa tjin xi chut'ayako nga sa'en xi bi nda, bi ngatatsikja'etsjen tsa Na'enchana xi 'batsa'en tikut'ayako. Ngu niñajanni tsu inimare Na'enchana nga sa'en xi bi nda, tsa xi bi nda skut'ayako kui, ninga bi kut'ayako xuta tsa tuxi sa'enni xi bi nda ngayeje. 14Tusa chut'ayako nga jngu jngu xuta nga tsu inimare kjuach'o xi tjin, 'ba 'batsa'en xi mejénre fiko 'ba 'bonachare. 15'Ba nga tojo mejénre mé= xi tsu inimare, kio= ndibanire je. 'Ba kionga je matse jio, kio= ndibanire kjuabeya. 16Nts'ia̱ xi tsimijaa̱n, bi ch'onacha_ru yojonu. 17Ngayéje kjuanda xi ba'ena 'ba nga jngu jngu kjuatjo xi tsjekjin xi sakuna, ngank'aa ndibanire. Xi tsjana Na'enchana xi kitsa'en ngayéje xi tsitsejen ngank'aa. Na'enchana bi 'bantjaiya, 'ba bi fa'a joni nk'ian. 18Kui xi 'batsa'en kuamejénre nga ki'ndire kitsa'enna nga kitsjana enre xi kjuakixi, tuxi ku̱anña xi ngisa tjun tijña ngajinre ngayéje xi kui kitsa'en. 19T'ejin kakún kibi, nts'ia̱ xi tsimején_nuu̱. Nga jngu jngu xuta ngat'endundantsjai nga kuinya ñojon, nga bi kitsa ngatinchja 'ba nga bi ta'a ngatjamastire. 20Ngat'a kjuastiu bi basekona nga ña'an xi kixi tjin ngixkun Na'enchana. 21'Bamani, t'ejño ngayéje xi jndi tjin ngixkun Na'enchana ko tsajmi ch'o xi 'ñu tjin. Ti'naxjenimo yojonu nga chjubio en xi kis'entjejin inimanu. Xi tjinre kjua'ñu nga sik'anginu. 22Tunga tik'etjusun=ñu ion, ngat'a tsa tu kuinya ñojonso 'ba bi sik'etjusun, ndejun tech'onacha_ru yojonu. 23Xi tu minya ñojon sa ion 'ba bi tsik'etjusun, jo=ni jngu xuta xi kutsejenya jngu chutsin nga kutsejenre yojore. 24'Ba kionga 'ba titsa'en, tjibe= jó= kji'i yojore. Tunga nga siku'be, ta'a chiyajinre jó= kji'i. 25Tunga xuta xi tu kui fa kutsejenre kjuatexuma xi niki kjuakixi, xi tsindaina, 'ba tsik'etjusun xi tsu 'ba bi chiyajinre xi basen ñojon, kui= xi ku̱achikunta'en ngat'are xi titsa'en. 26Tsa tjin xi tsu nga bekun Na'enchana, tunga bi kunre ts'a jótsa'en nchja, kui xi 'bejñure yojore 'ba bi chjire jotsa'en bekun Na'enchana. 27Tunga nga bisekua ki'ndi xi x'an ko yanchjin k'an xi inyafa'a kjuanima, 'ba nga bi nijndikua yojona ko kjuach'o xi tjin ngasun'ndio, 'ba=tsa'en nga tsje 'ba nda 'yakuan Na'enchana xi Na'enna mani.

will be added

X\