HEBREOS 7

1Ngat'are Melquisedec, kui xi kuán rey nangi Salem 'ba 'ba nde na'mi xi tse'e Na'enchana xi tijña ngank'aa. Kionga ja'e ngani Abraham jaskan nga kitsa'enre nchja xi rey xi kiskjanko, Melquisedec kikja'aya ndiya 'ba kitsichikunta'en. 2'Ba Abraham kitsjare jngu yá xi te ya ka'a tjinre ngayéje xi kitsa'en. Ja'en Melquisedec, kui xi tsunire “rey xi tjinre kjuakixi.” 'Ba rey xi tse'e Salem, kui xi tsunire “rey xi tjinre kjuaxiu.” 3Tumé kua'indut'a ngat'are na'enre ko nare 'ba ko ntje xi jendibani Melquisedec, ninga nga kitsin 'ba ninga nga k'en. Jo=ni Ki'ndire Na'enchana 'ba tojo na'mi ka'nda ngantsjai nixtjin. 4Chutsijon á tsa'en jeni Melquisedec. Ka'nda xuta chingana Abraham kitsjare jngu yá xi te ya ka'a tjinre ngayéje xi kitsa'en nga kiskjanko nchja xi rey. 5'Ba=tsa'en kua'indut'a kjuatexumare Na'enchana nga na'mi xi ndibanire ntjere na'mi Leví tjinnere nga skjebe chjire naxinando jngu yá xi te ya ka'a tjinre ngayéje xi sakure, ninga xinkjin mani 'ba tu jngu ntjere Abraham ndibanire ngayeje. 6Tunga Melquisedec xi bi ntjere na'mi Leví ndibanire, kui xi kisakure jngu yá xi te ya ka'a tjinre ngayéje xi kisakure Abraham 'ba kitsichikunta'en Abraham, xuta xi Na'enchana ja'ba je kitsuyatitjunre mé= xi sjare. 7'Ba 'ba= tjin nga ngisa je ngisa xi tsichikunta'en nga ko mare xi nichikunta'en. 8Ngat'are na'mi xi kjebechjire naxinando, 'ba=nde tu xuta xi 'me. Tunga enre Na'enchana be'ekixifani nijmi ngat'are Melquisedec nga jo=ni tsa tijñakun ngisa. 9'Ba ma mixan nga na'mi xi ndibanire ntjere Leví xi kjebechji nganda'e 'ba nde 'echjire jngu yá Melquisedec kionga Abraham kitsjare jngu yá. 10Ngat'a ninga kje tsiín Leví, jo=ni tsa tijñajin ngajin yojore Abraham nixtjin nga ja'ekja'aya ndiya Melquisedec. 11'Ba xuta xi tse'e Israel kika'ere kjuatexumare Na'enchana nga tjinre xa Aarón, na'mi xi ndibanire ntjere Leví. Tunga bi kuajngunire xare na'mibiu nga kitsitsjekjin xuta. Kui= kjua kuachjenni nga ja'eni kja'e na'mi xi kitsa'exare joni xi tse'e Melquisedec 'ba bi joni xi tse'e Aarón. 12Ngu, nga 'bantjaiya xare na'mi, 'ba=nde tjinnere nga nik'antjaiya kjuatexumo ngayeje. 13Ngat'a xi nchjani enre Na'enchana, xi kua'ere xa joni xi tse'e Melquisedec, kui xi ndibanire kja'e ntjere xuta xi tse'e Israel, ña kje nisajnguú na'mi 'betukajin. 14Ngat'a 'yare nga Na'enna Jesucristo jendibani ntjere Judá, 'ba ngat'a tse'e ntjebiu tumé kitsu Moisés nga kinchja ngat'are na'miu. 15'Ba ngisa= nda s'ejñatsejen nga kjuakixi= mé= xi temixan, ngat'a jngu na'mi xatse xi joni Melquisedec je ja'e. 16Bi kitsa'exare jotjin kjuatexuma xi tsuya nga ntje chinga kjuendibanire na'miu. Tusa kitsa'exare ngat'a tjinre kjua'ñu nga tijñakun ka'nda ngantsjai nixtjin. Ngat'a bi ma nikje. 17Ngu 'ba=tsa'en nikixiya ña kua'indut'a ngat'a tse'e: Jngu= ni na'mi ka'nda ngantsjai nixtjin. 'Ba 'batjin xari joni xi tse'e Melquisedec. 18'Bamani, kitukja'axin kjuatexuma chingó xi tse'e na'miu, ngat'a bi kis'ere kjua'ñu 'ba bi tsakasekona. 19Ngat'a nimé kitsitsjekjin kjuatexumo. Tunga nganda'e tjinna jngu kjuachuya xi ngisa= nda. Ngat'are kui tenitiñat'a_ra Na'enchana. 20'Ba Na'enchana kitsika'anijin yojore nga k'uetjusun ion nga kitsja xare Jesucristo nga na'mi ku̱an. Bi 'ba kuán nga kika'e xare na'mi xi yak'a. 21Tunga ngat'are Jesucristo, Na'enchana kitsika'anijin yojore. Ngu 'ba=tsa'en kua'indut'a ña 'ba kik'inre: Kitsika'anijin yojore Na'enchana 'ba bi jó sa'en enre. Ji jngu na'mi kuáin ka'nda ngantsjai nixtjin. 22'Ba 'batsa'en ngat'are Jesús Na'enchana 'endakokjua xuta xi tse'e, 'ba ngisa= nda kjua xatsebi nga ko mare xi chingo. 23'Ba ne nkjin kuán na'mi xi yak'a, ngat'a kjuabeyo bi kitsja'ndere nga kuendujuko xare. 24Tunga kui, bi kjuet'a xare ngat'a tijñakunntsjai. 25Kui kjua manire tsik'angintsjai xuta xi tsitiñat'are Na'enchana tu ngat'are xare, ngat'a tijñakunntsjai ngantsjai nixtjin 'ba 'bets'antjaintsjai xuta xi tse'e. 26Ngat'a jo=ni na'mi titjunbi xi machjenna, jngu xi tsje, xi bi tjinre kjuach'o, xi bi jndi, xi kji'naxjet'axin ngajinre xuta xi tjinre je 'ba kjinikijin ngank'aa. 27Kui bi joni na'mi titjun xi yak'a. Bi tjinnere nga nyujun nyujun sja chje ngat'are jere 'ba jaskan ngat'are jere naxinando. Ngat'a jngu ka'a fani kitsja chje, nga kitsingantsja yojore. 28Ngu kjuatexumo tsja xare joni na'mi titjun xuta xi indakjua. Tunga jaskan nga je kitsja Na'enchana kjuatexumo, 'ba=tsa'en kitsika'anijin yojore nga kitsja xare Ki'ndire xi tsjatsa'en kis'endakjin ka'nda ngantsjai nixtjin.

will be added

X\