HEBREOS 6

1'Bamani, bi kuinyajinña ngajinre mé= xi tjun kisakuyana ngat'are Cristo, tusa tangin ndujukua xi tse'e Cristo xi sakuyare xuta chinga. Bi nde siku'bekun ngisaña xi tjun, xi tsu jó kji'i machjen nga sik'antjaiya kjuafa'etsjenna 'ba nga k'uejñat'axian mé= xi ña'an xi fikona kjuabeya, 'ba nga ku̱akjainna ngat'a tse'e Na'enchana. 2Bi nde machjenninu nga sa̱kuya ngisanu ngat'are kjuasatenda, 'ba nga nts'ia fane_ra ndsa, 'ba nga kjua'aya nganire xuta ngajinre mik'en nga ku̱anre kjua nixtjin xi fet'ani. 3K'uenda kibiu 'ba kuekondaja, tsa Na'enchana tsja'ndena. 4Ngat'a ngat'are xuta xi je kitsa'ere kjuanda nga ku̱ankjinre xi tse'e Na'enchana, 'ba kitsitsjako xi tsjana Na'enchana, 'ba kisakut'are Isennixtjintsjere Na'enchana, 5'ba kitsitsjajin en ndare Na'enchana ko kjua'ñu xi s'e̱ nixtjin xi sa'e ndiba, 6tunga tsa kja'e ndiya skja'ajin xi je kiskut'a ngayéje kibiu, bi nde s'e̱ni jótsa'en nga ku̱an ku̱axatse ngani tuxi sik'antjaiyani kjuafa'etsjenre 'ba kjua'e ngani ngixkun Na'enchana. Ngat'a tu kuenda tse'e= tibat'a ngani kru Ki'ndire Na'enchana 'ba titsja'nde nga k'uejnucha ngani. 7Ngat'a xuta xi janda makjainre, jo=ni nangi xi 'bingi tsi xi kjit'a ba'anere 'ba tsjare chan xi machjenre xuta xi tsa'exasun nangiu, 'ba Na'enchana tsichikunta'en. 8Tunga ngat'are xuta xi kja'e ndiya kjebe, jo=ni nangi xi 'ba nde ba'anere tsi 'ba tusa na'ya ko na'yantsje tsja. Tumé chjire nangiu ya'a, 'ba tu je tsajmi xi bi nda ngixkun Na'enchana. 'Ba tu kuiti= ngisa. 9Tunga ngat'are jun nts'e xi nimejée̱n, ninga tsa 'batsa'en tenukjuai̱, tunga be=re takui̱n nga jun sa̱kunu xi ngisa nda ngisa, xi tjenko kjua'bangi. 10Ngat'a Na'enchana kixi= tsikona 'ba bi chi̱yajinre mé= xi kjiño'on 'ba jótsa'en kikakutsijion nga nimijíon kui, nga kjiña'axat'a_ru xuta tsje xi tse'e, jo teño'on ka'nda nganda'e. 11Tunga mejénni̱ nga nga jngu jnguu jun kuakutsejenntsjo nga teño'on xi nda nga ko fa inimanu ka'nda ngantsjai nixtjin, tuxi k'uetjusunkjinni xi techuya_ru. 12Bi mejénni̱ tsa tse'é kuon. Tusa chjungi_ru xuta xi inyamakjainre 'ba xi inyas'ere kjuaje kakun 'ba kui= kjua inyaxuntsjani xi kitsuyatitjun Na'enchana nga sjare. 13Nga Na'enchana kitsuyatitjun ngat'are mé= xi sjare Abraham, ndekuini Na'enchana kitsika'anijin yojore ngat'are xi kitsu. Ngat'a tsajain xi ngisa je ngisa xi ku̱an sjare enre. 14'Ba kitsu Na'enchana: “Kjuakixi= nga sichikunta'enra̱ 'ba 'ñu= nkjin sa'aa̱n ki'ndiri.” 15'Ba ko kjuatsejnda kiskuya Abraham 'ba kisakure xi kitsuyatitjun Na'enchana nga sjare. 16Nga xuta 'benda jngu kjua, tsja enre ngat'are xuta xi ngisa je ngisa nga ko mare kui. 'Ba tsa tjinkore kjua xinkjin, tsja enre ngat'are xuta xi ngisa je ngisa nga ko mare kui 'ba 'batsa'en s'enda tume kjuañu. 17'Ba ngat'are Na'enchana, nga kitsuyatitjun mé= xi sja, kuamejénre nga k'uejñatsejenfare xuta xi xuntsja tsajmibiu nga niñajanni jó sa'en enre. Kui kjua 'ba nde kitsjani enre ngat'are kui fa kionga kitsuyatitjun mé= xi sja. 18Ngojó en xi kitsu Na'enchana bi ma 'bantjaiya, 'ba bi ma 'bonacha Na'enchana nga nchja. 'Ba 'batsa'en ña xi temangint'ia tuxi kuasekonina nga sakuna kjua'ñu kakun nga xun_ra ngat'are xi techuya nga sjana Na'enchana. 19Nga 'batsa'en techuya ngat'are Na'enchana, jo=ni kicha le'ba xi chanikja'ajin ngajin ndachikun, xi fajña'ñunire barku. Ngat'a nga techuya_ra mé= xi xuntsja, kui xi tsa'en nga s'ejngu inimana 'ba 'ñu tsikinyana. 'Ba fikona ka'nda nga'nde xi 'ñu tsje, nga'nde xi tijña ngastun najñu xi tjenchja ngamasenre ningu xi kjijña ngank'aa. 20Ngat'a ja'as'en Jesús nga'ndebiu ngat'ana nga kijititjunna. Xi kuán na'mi titjun ka'nda ngantsjai nixtjin nga kitsa'ere xa joni xi tse'e Melquisedec.

will be added

X\