HEBREOS 3

1'Bamani, nts'ia̱ xi tsjio xi 'ba nde kinchjanu Na'enchana, tsjatsa'en tikja'etsjion ngat'are Cristo Jesús. Nikixiya ngat'are kui nga kui xi kjinikasen 'ba xi na'mi titjunna. 2Xi kixi tsakasen ngixkun xi kitsja xare, jotsa'en Moisés 'ba nde kixi kiko xare ngajinre ngatsi'i xuta xi tse'e Na'enchana. Xuta xi tse'e Na'enchana, jo=ni jngu ni'ya. 3'Ba ngisa= je ngisa kjuaje xi 'bakore Jesús nga ko mare xi 'bakore Moisés, jotsa'en ngisa je kjuaje sakure xuta xi tsinda jngu ni'ya nga ko mare kjuaje xi sakure ni'yo. 4Niñare ni'ya xi tjin tjin= xi tsinda, tunga Na'enchana kitsinda ngayéje xi tjin. 5'Ba Moisés kuán jngu chu'nda xi kixi kiko xare ngajinre ngatsi'i xuta xi tse'e Na'enchana, xuta xi ndaba Na'enchana mani. Kui xi kitsuyakixi ngat'are xi jaskan kuetsu Na'enchana. 6Tunga ngat'are Cristo xi Ki'ndi kuán, kui xi kixi= fiko xare nga batexumare ndaba Na'enchana. 'Ba ni'yo, kuiña ña nganda'e, tsa tojo kixi kuinyajian mé= xi chun_ra 'ba xi tsja mana, ngat'a techuya_ra mé= xi sjana Na'enchana. 7Kui kjuañu jotsa'en kua'indut'a xi tsu Isennixtjintsjere Na'enchana: Tsa nganda'e kjuinu'yo jndare, 8bi taja ño'on inimanu, joni xuta xi 'ejñat'axin enna̱, nixtjin nga kiskut'ayakona̱ nangi t'axin. 9Kio kiskut'ayakona̱ xuta chinganu nga skue mé= xi sa'aa̱n, nisi yachan nu tsabe mé= xi kitsa'aa̱n. 10Kui kjua kuastikeña̱ xutabiu, 'ba 'bi kixia̱n: “Ngantsjai nixtjin bi kixi tjindu inimare, 'ba bi mejénre k'uetsumaya ndiya xi tsa'an.” 11Ngajin kjuastina̱ 'ba fa kixinkixia̱, nga niñajanni kjua'as'en xutabiu nga'nde ña sikja'aya xuta xi tsa'an. 12Tikuendo yojonu nts'ia̱, nga tu'yá ngatjas'e ngajinnu xi bi kixi tjin inimare, xi bi makjainre 'ba sikasent'axinre Na'enchana xi tijñakun. 13Tusa nyujun nyujun ti'ñu kakun xingiu yejerañu “nganda'e” 'mi, tuxi tu'yá xi tjin ngajinnu k'onachanire je 'ba taja k'uejña inimare. 14Ngat'a tsa janda kixi kjuinyajian ka'nda nixtjin xi fet'a nga xun_ra jotsa'en 'nda ngatitjunre, sakuna mé= xi tse'e Cristo. 15Ngat'a fako ngisana enre Na'enchana ña 'batsa'en kua'indut'a: “Tsa nganda'e kjuinu'yo jndare, bi taja ño'on inimanu joni xuta xi 'ejñat'axin enna̱.” 16¿'Yá= xuta xi kjint'e enre Na'enchana, tunga 'ejñat'axin? ¿A bi ngatsi'i xuta xi 'etjuko Moisés nangi Egipto? 17¿'Ba 'yá= xuta xi Na'enchana kuastike yachan nu? ¿A bi xi kiskjeje, xi kis'endu mik'en yojore nangi t'axin? 18'Ba kionga 'ba fa kitsukixi Na'enchana nga: “Niñajanni kjua'as'en xutabiu nga'nde ña sikja'aya xuta xi tsa'an”, ¿'yá= xi 'ba kitsure nga 'ba kitsu? ¿A bi tu ngat'are xuta xi bi kitsik'etjusun enre? 19'Ba 'ba=tsa'en 'yaña nga bi kuán ja'as'en ngat'a bi kuakjainre.

will be added

X\