HEBREOS 10

1Ngat'a kjuatexumare Moisés, kui= xi tu nk'ianre tsajmi nda xi sa'e ndiba, 'ba bi fa kui tsajmi xi ndo. Kui kjua kjuatexumo niñajanni mare tsitsjekjin xuta xi xki nu tsitiñat'are Na'enchana nga tsjantsjai ndekuini chje. 2Ngat'a tsa jngu ndiyara matsje xuta xi 'batsa'en tsichjire Na'enchana, bi nde jndi s'e̱ni kjuafa'etsjenre 'ba bi nde sjani chje. 3Tusa chje xi tsja, kui= xi tsikja'etsjenyare xki nu nga tjinre je. 4Ngat'a jinre tjiundija ko xi tse'e natendsu bi mare kja'axin je. 5'Bamani, kionga Cristo ja'e ngasun'ndio, 'bi kitsu: Bi kjinimején tjiuba xi nik'en ko chje. Tusa kik'ejñandanaa̱ jngu yojo. 6Bi kuatsjari tjiuba xi ti, ninga xi nik'en nga s'echjintjai ngat'are je. 7'Ba kio kixia̱n: “Nga'e tesiaa̱n, ja'e=ña̱ tuxi sik'etjusunña̱ xi ji mejénri, Na'en, jotsa'en kua'indut'a enri ngat'ana̱.” 8'Bi kitsu titjun nga kinchja: “Bi kjinimején ninga bi kuatsjari tjiuba xi nik'en ko chje ko tjiuba xi ti 'ba ko xi nik'en nga machjintjai ngat'are je.” 'Ba kitsu, ninga tsa 'batsa'en kua'indut'a kjuatexumo nga tjinnere nga sja xuta tsajmibiu. 9'Ba jaskan kitsu ngisa: “Nga'e tesiaa̱n. Ja'e=ña̱ tuxi sik'etjusunña̱ xi ji mejénri.” 'Ba 'batsa'en 'ejñat'axinni xi tjun, tuxi 'ejñani xi majóni kjua. 10'Ba ngat'a kitsik'etjusun Jesucristo mé= xi mejénre Na'enchana, kui= kjua je matsjeña nga jngu ndiya sa kitsingantsja yojore joni chje. 11'Ba ngatsi'i na'mi nyujun nyujun tsik'etjusun xare. Nkjin ndiya tu jngusa xa tsa'en nga tsja chje, chje xi niñajanni mare kja'axin je. 12Tunga Cristo jngu ndiya sani ka'nda ngantsjai nixtjin kitsja jngu sa chje ngat'are je, 'ba kio kik'ejña ngate kixire Na'enchana. 13'Ba kio tijña nga tikuya 'nda nga Na'enchana sik'endungi ndsaku xuta xi stike. 14Jngu sani chje kitsja tuxi kitsikixikjinni ka'nda ngantsjai nixtjin xuta xi kjinitsje. 15'Ba Isennixtjintsjere Na'enchana tsuyakixina nga 'ba tsu: 16Kui= kjuabi xi k'uendakua̱ xutabiu, nga kjuet'a nixtjinbiu, titsu Na'enchana. K'uejñaa̱ kjuatexumana̱ ngajin inimare, 'ba nde si'indut'a ngajin kjuafa'etsjenre. 17'Ba bi nde sikja'etsjenyaña̱ jere ko kjuach'ore. 18'Ba kionga nichat'a je, bi nde machjenni nga nik'en ngisa tjiuba ngat'are je. 19'Bamani nganda'e nts'ia̱, ngat'are jinre Jesús= tjinna kjua'ñukakun nga bitjas'ian nga'nde xi ngisa tsje. 20Ngat'a Jesús kiskjex'ana jngu ndiya xatse xi fi ña kuetsubachan, ndiya xi fa'axtiuni najñu xi tjenchja nga'nde xi ngisa tsje. Ngat'a kitsingantsja yojore, je kitju'i ndiyabiu. 21'Ba tjin=na jngu na'mi je xi batexuma ni'yare Na'enchana. 22Kui kjua sitiñat'ani_ra Na'enchana nga koni nga kixi tjin inimana 'ba nga bi jó kji'i kjuamakjainna. Ngat'a je kuatsje inimana 'ba bi nde jndi tjinni kjuafa'etsjenna, 'ba je kjinichunre yojona ko nanda tsje. 23Bi jó ján kjua kakuan. Tusa kixi kuinyajian mé= xi nikixiya nga techuya_ra, ngat'a Na'enchana sik'etjusun mé= xi tsuyatitjun nga sa'en. 24kuinyisjai ndiya_ra jótsa'en nga kuisekua xingia nga s'e̱ngisana kjuanimejen 'ba nga si'an ngisa xi nda. 25Bi k'uejña kibiu nga janda ku̱añajankua= xingia, jo inyatsa'en yak'a. Tusa si'ñu kakunkaña xingia, 'ba ngisa 'ba si'an ngisa ngat'a te'yaña nga je tifechutiña nixtjin nga kjua'e Na'enna Jesús. 26Ngat'a tsa 'ya nga je nini xi teña'an 'ba janda 'ba si'an ngisa, ninga tsa je kji'ya xi kjuakixi, bi nde tjinngi sani chje xi ku̱an s'e̱chjintjai jena. 27Tu techuyakun ngisa_ra nixtjin kun nga ku̱an kjua, kionga ko ndi'i xi 'ñu sikjekoni Na'enchana xuta xi stike. 28'Ba xi bi kuakjainre nga sik'etjusun kjuatexumare Moisés, kjinik'en nga ni'yá ja'animare ngat'are kui, koni enre tsa jó asa ján xuta xi kuetsuyakixi je xi kitsa'en. 29'Ba tsa 'batsa'en 'ñu kun tjinni kjuatexumo, ¿jó= kuata'en xi tibasene Ki'ndire Na'enchana? ¿Jó= kuata'en xi tu kjuatjo tjimare jin xi 'endakoni Na'enchana kjua xatse xi 'enda, jin xi kitsitsjeni xuta xi 'ba titsa'en? ¿Jó= kuata'en xi ch'otsa'en nchja ngat'are Isennixtjintsje xi tsja kjuandare Na'enchana? 'Ñu= tse kjuanima xi sa̱kure xi 'ba titsa'en. 30Ngu 'yaña nga 'ba kitsu Na'enchana: “An= ña̱ xi singuajaa̱, an k'uechji_ra̱ xuta mé= xi 'bakore.” 'Ba 'ba nde kitsu: “Na'enchana sa'enre kjua naxinandare.” 31¡Á tsa'en kunni nga ngaya ntsja Na'enchana xi tijñakun ska̱ya xuta! 32Tikja'etsjen_ru yojonu nixtjin kuatse jan, nga kuakjain titjunninu ngat'are Na'enna. 'Ñu= kixi tsikinyo nga kichukjuakonu kjuanima xi tsitjaxtiu. 33Sa'ba ch'o kik'innu 'ba ch'o kjinikonu ngixkun naxinando, 'ba sa'ba tsikiseko xingiu kionga ndekuini tsajmi kuata'en. 34'Ba nde ja'animanu xi kjiyuya nduya, 'ba kjinikjon nga kichja'anu xi tjinnu. Tsja kuánnu nga 'ba kuato'on, ngat'a 'yañu nga ngank'aa tjinnu xi ngisa nda ngisa xi bi fe. 35'Bamani bi nikje_ru kakún, ngat'a tse chji xi sa̱kunu tsa bi sichojo ngat'are mé= xi techuya_ru. 36'Ba= tjinni nga ska̱konu xi temato'on, tuxi ku̱an si'anñu xi mejénre Na'enchana 'ba 'batsa'en sa̱kunu xi kitsuyatitjun nga sja. 37Ngat'a 'batsa'en kua'indut'a enre Na'enchana: Xi tjinni nga kjua'e ichi ichi chaja ngisare nga kjua'e, bi nde k'uandayanire. 38Xuta kixi xi tsa'an k'uejñakun tu ngat'are nga makjainre. Tunga tsa siku'be ngani ngastun, bi nde tsja s'e̱nina̱ ngat'are kui. 39Tunga ña, bi xuta xi fini ngastun kuáan xi fi ña cha̱jaa̱. Tusa makjainna ngat'a tse'e Na'enna 'ba 'batsa'en 'bangiña.

will be added

X\