GÁLATAS 5

1Cristo kitsindaina tuxi ku̱andaiña. Kui kjua kixi tinyañu 'ba bi nde ba'e'ndeñu nga chu'nda kuon. 2Tasen ñojon. An Pablo texin_nuu̱. Tsa kua'e'ndio nga kuon circuncidar, tuxi ku̱akixiñu ngixkun Na'enchana, tumejín chjire ngat'anu mé= xi kitsa'en Cristo. 3'Ba fa xin ngani_ra̱ ngatsi'i xi ku̱an circuncidar. Kui xi tjinnere sik'etjusun ngayéje xi kua'indut'a kjuatexumo. 4Xi tjin ngajinnu xi inyamangisjai nga ku̱akixi ngixkun Na'enchana tu ngat'are nga sik'etjusun kjuatexumo, je tsikinyat'axinre Cristo 'ba bi nde tjindujinni kjuandare Na'enchana. 5Tunga ngat'a tsajan, tijñajinna Isennixtjintsjere Na'enchana 'ba techuya=ña nga ku̱akixia̱ ngixkun Kui tu ngat'are nga makjainna ngat'a tse'e Cristo. 6Tu jngu je ma ko Cristo Jesús 'ba bi nde chjinire tsa kuáan circuncidar asa bi kuáan circuncidar. Tu kui xi chjire nga makjainna ngat'a tse'e Cristo 'ba nga nda chare kjuamakjainna ngat'are jotsa'en nimijáan xingia. 7Nda= tsiketsubo nga titjunre tsakaiñu. ¿'Yá= xi 'echja'ndenu nga bi nde tenik'etjusunñu xi tjinre kjuakixi? 8En xi tenik'etjusun nganda'e, bi ndibanire ngat'are Na'enchana xi kinchjanu. 9Jo tsu xuta: “Jngu stinchi na'yu san tsisan ngayéje na'yure niñuxtilo.” 10'Ba be=re takuaa̱n ngat'are Na'enna Jesús nga bi kja'etsa'en sikja'etsjion. Tunga ngat'are xi bi nga'nde inyatsik'ejña kjuafa'etsjennu, tu'yañu xi 'ba inyatsa'en, kui xi kuanejere Na'enchana. 11Tunga an nts'ia̱, tsa tebe'e ngisaa̱ nijmi nga chjire nga ku̱an circuncidar xuta, ¿ánñu tojo tjenngikenina nchjabiu? Tsa 'batsa'en tetsikja'axtiuyaa̱, bi nde ch'o ku̱anire nchjabiu nga tjinnere nga k'uangi ngat'are Cristo xi kis'et'a kru. 12Nchja xi bi inyatsik'ejña nga'nde kjuafa'etsjennu, xi mejénre nga kuichat'o yojonu, ¡tusa ngatatet'akjin yojore kui! 13Jun nts'ia̱, Na'enchana kinchjanu tuxi ku̱andaiñu. Tunga ninga ndai_ru yojonu, bi ño'on xi mejénre yojonu. Tusa tatesin_ru xingiu tu ngat'are nga tijñajinnu kjuanimejen. 14Ngat'a ngayéje xi kua'indut'a kjuatexumo tu jngu ma sani nga ko kibi: “Timején xingi jofatsa'en nimején yojori.” 15Tunga tsa nde jun xinejun xinet'añu xingiu, chutsejen_ru yojonu tsa 'ba si'on, tsa chjen nde jun sikjeñu xingiu. 16Kui kjua xinni_nuu̱. Tetsubo jotsa'en titsja ndiyanu Isennixtjintsjere Na'enchana, tuxi bi sik'etjusunñu xi mejénre yojonu. 17Ngat'a xi mejénre yojona, kui xi bi mejénre Isennixtjintsjere Na'enchana. 'Ba xi Isennixtjintsjio mejénre, kui xi bi mejénre yojona. Ngojó 'batsa'en kjanko xinkjin, tuxi bi si'anñu xi mejénnu. 18Tunga tsa Isennixtjintsjere Na'enchana titsja ndiyanú, tsu=nire nga bi nde ngi kjuatexumo tetsubañu. 19Bi na'enre nga 'yare nga tjin xi tsik'etjusun xi mejénre yojore. Tsa'en kjuachajngi, tsa'en xi jndi ngixkun Na'enchana, 'ba 'ñu tsiskako yojore, 20'ba bekun na'en xi ntsja xuta kuandani, 'ba tsa'en kjua'benda, mastike xinkjin, 'ba fosi, maxinre, 'ba mastire, nk'a 'baxje tajngu yojore, 'ba bakjanya yojore, makut'axinko xinkjin, 21'ba mejénre nga s'e̱re xi tjinre xuta xi kja'ere, mach'i, 'ba 'ñu mach'i nga 'baxje s'i 'ba sa'e tsa'enjun tsa'ent'a. Ngayéje tsajmibi ko kja'e ngisa tsajmi joni kibi, kui xi tsa'en xuta xi tsik'etjusunre xi mejénre yojore. 'Ba xin_nuu̱ nganda'e jo kixin_nuu̱ nga titjunre. Xuta xi 'ba inyatsa'en, kui xi bi kjua'as'en ña batexuma Na'enchana. 22Tunga nga tetsuba jotsa'en baku ndiyana Isennixtjintsjere Na'enchana, s'ena kjuanimejen, kjuatsja, kjuaxiu, 'ba ko kjuatsejnda. 'Ba bisekua xingia, nda xuta ma, 'ba kixi nik'etjusan xi nda, 23nimakjua ña'an yojona, 'ba 'bech'osuba_ra yojona xi tjin. Ngat'are ngayéje tsajmibi tsajain kjuatexuma xi 'bech'ona nga 'ba si'an. 24'Ba xuta xi tse'e Cristo Jesús, kui xi joni tsa je yat'a kru yojo jere xi mejénre tsajmi ch'o xi tjin ngasun'ndio 'ba xi matsjakonire. 25Tsa kjuakixi nga ngat'are Isennixtjintsjere Na'enchana tetsubakunña nganda'e, ngu, 'ba nde kua'e'nde_ra nga Isennixtjintsjio xi ngataku ndiyana. 26Bi nk'a kjui'naxjia yojona, bi si'an nga nde ña sistini_ra xingia, 'ba bi ngatjamaxinkakuan.

will be added

X\