EFESIOS 4

1'Bamani, an xi tekjiyaa̱ nduya ngat'a tetsa'exat'a_ra̱ Na'enna Jesucristo te'bets'a_nuu̱ nga kixi tangiko yojonu, jotsa'en tjinni nga sa'en xuta xi Na'enchana kinchjare. Ngat'a Na'enchana kinchjanu. 2Nima 'naxjo yojonu 'ba ngatjas'enu kjuanima kakún. Ngatjas'enu kjuatsejnda 'ba ngatakakokañanu xingiu tu ngat'are kjuanimejen xi tijña ngajinnu. 3T'ene_ru yojonu nga tu jngu ngatjamantsjo ko xingiu, jotsa'en tsja ndiyanu Isennixtjintsjere Na'enchana, tuxi tu jngu kuetsubañu ko kjuaxiu. 4Ngatsi'a tu jngu yojo= maña, ndekuini Isennixtjin tjinna, 'ba kjinukjua=na ngayeje nga tu jngu sa xi xuya_ra. 5Jngu mani Na'en, tu jngu sani kjuamakjain, 'ba tu jngu sani kjuasatenda. 6Jngu mani Na'enchana xi Na'enna mani ngatsi'a, xi batexuma tsi'ina 'ba tsa'exajin tsi'ina 'ba tijñajin tsi'ina. 7Tunga nga jngua jngua ja kisaku ja kisaku=na kjuanda jotsa'en kitsika'bina Cristo. 8Kui kjua 'batsa'en kua'indut'ani enre Na'enchana: Nga tsijin ngank'aa, kiko nkjin xi 'endu'ñu, 'ba xutare kisakure mé= xi kika'ere. 9'Ba ¿mé= xi tsunire nga tsijin? Ngu tsunire nga tjun jendejen 'nda t'anangiu. 10'Ba xi jendejen, kui xi nde tsijin ngani ngisa ts'axtiure ngank'aa, tuxi k'uejñajinnire 'ba ko kjuatexumare sitsekjinkjinni ngayéje xi tjin. 11'Ba kuifa ni suba kitsjare kjua'ñu nga tjin xi ku̱an apóstol 'ba ko profeta. 'Ba nde kitsja kjua'ñure nga tjin xi sikja'axtiuya en ndare Na'enchana, nga tjin xi sja ndiyare xi makjainre ngat'a tse'e kui 'ba nga tjin xi kuakuya ion. 12'Ba 'batsa'en kitsik'endunda xi makjainre ngat'a tse'e kui, tuxi sa'exat'anire 'ba tuxi sakunga'ñu ngisanire yojore Cristo, 13ka'nda nga kjuecha nga tu jngu ku̱an ngatsi'a ngat'are mé= xi makjainna 'ba ngat'are mé= xi 'ya ngat'are Ki'ndire Na'enchana. 'Ba 'batsa'en ku̱acha joni xuta xi je tjinre kjuafa'etsjen ka'nda nga ku̱angusunkua Cristo nga tjijngua 'ba nimé nde chaja ngisanina. 14'Ba bi nde ku̱anña joni tsajmi xi fiko i fiko jan ntjo, joni nisti ki'ndi xi tsisinre tume xi bakuya xuta 'ba ta'a tsjenngire kjuamañare xuta ndesu xi mangisjai jótsa'en 'bonachare xuta. 15Tusa xuba nijmia xi kjuakixi ngat'a nimejénña xingia, 'ba 'batsa'en ku̱acha ngajinre Cristo xi nindaku yojo. 16'Ba ngat'are kui ngayéje yojo tu jngu ma sa, 'ba nda tsuba'ñu xinkjin ngayéje ka'a xi tjinre. 'Ba tsa ngayéje ka'a nda inyatsa'exa, ngayéje yojo ngisa= nda ku̱acha 'ba saku nga'ñure nga tjindujin kjuanimejen. 17Kui kjua 'ba xinni_nuu̱ 'ba nga ko ja'enre Na'enna Jesús tebe'e_nuu̱ nijmi nga bi nde 'batsa'en betsubañu jotsa'en tjindu xuta xi bi makjainre ngat'a tse'e Na'enna, xi tuxkia tsajmi tsikja'etsjen. 18Kui tu tijñu kjuafa'etsjenre 'ba tjindut'axinre kjuabenichun xi tsja Na'enchana, ngat'a kitsitaja= inimare 'ba bi nde mankjinnire xi tse'e Na'enchana. 19Bi nde tjinnire kjuasuba, 'ba je= kitsingantsjare yojore ngat'are xi ch'o. Bi nde 'bech'onire yojore nga tsa'en ngayéje kuya je xi tsijndi ngixkun Na'enchana. 20Tunga jun, bi kui xi kisakuyanu ngat'are Cristo, nga 'ba si'on. 21Ngat'a je kjinu'yo ngat'are Cristo 'ba kisakuyanu xi tse'e, ngat'a xi kjuakixi= tijña ngajinre Jesús. 22T'ejñat'axiun jotsa'en tsiketsubo nixtjin kuatse jan. 'Ba nde t'ejñat'axiun inima chinganu xi kitsa'en je xi kjinikjekjua tu ngat'are xi kuatsjanu nga kis'ejñunu. 23Tjinnere nga sixatse ngañu inimanu ko kjuafa'etsjennu. 24Tixatsio yojonu joni tsa najñu xatse chojo. Ngat'a Na'enchana kitsixatse ngani inimanu, tuxi ku̱anñu jo kji'i kui, jotsa'en kixi 'ba tsje kjuakixire. 25'Bamani, bi nde en ndesu nukjuañu. Tusa en kixi chuko xingiu, ngat'a tu jngu yojo= maña ngatsi'a. 26Nga ku̱astinu, bi je ño'on nga kua'e'ndio nga kjuastibiu kuatexumanu. Bi nisti_ru yojonu ba'a nixtjin, 27ninga bi ba'e'nde_ru chanayiu. 28Xi tsa'en cheje bi nde ngatatsa'en ngisani. Tusa ngatatsa'exa 'ba ngatatsichjen ntsja nga sa'en mé= xi nda, tuxi 'batsa'en ku̱an kuasekoni xuta xi machjenre tume tsajminu. 29Nimé en ch'o tsu ngat'etju ndsu'bo. Tusa chuba nijmiu en xi nda tsu xi sjare nga'ñu xi machjenre xuta, tuxi sa̱kunire kjuachikunta'en xuta xi kjuint'e ennu. 30Tumé ño'on xi sibare Isennixtjintsjere Na'enchana. Kui xi kitsa'enu tuxi xianire nga jun xutare Na'enchana kuon nga kjua'e nixtjin nga k'uangikjiun. 31'Naxjejin yojo inimanu kjuasticha, ko kjuakjon 'ba ko kjuastijndo. Bi nukjuasi'o, bi ch'o 'mi_ru xingiu, 'ba bi ch'o niko xingiu ngat'are tume tsajminu. 32Tusa nda tikokaño xingiu 'ba ngatjas'enu kjuanima kakun. Tichat'a_ru xingiu jotsa'en Na'enchana kitsichat'anu ngat'are Cristo.

will be added

X\