HECHOS 9

1'Ba yejerañu Saulo, janda tjiminyakunre xuta xi makjainre ngat'a tse'e Na'enna Jesús nga mejénre sik'en. Kui kjuañu kikunni na'mi titjun 2'ba tsi'are xujun xi tsjare kjua'ñu, tuxi ku̱an kuajeni ni'ya sinagoga xi tjin naxinanda Damasco 'ba kio kuangisjai xuta xi fitjenngi ndiya xi yakuya Jesús, a xi xi'in= asa xi yanchjin, tuxi kuekoni nduyare naxinanda Jerusalén. 3Tunga kionga tifiya ndiyo 'ba je echutiñare naxinanda Damasco, tukjia'a tsa'na ngandaire Saulo jngu ndi'i xi ndibani ngank'aa. 4'Ba Saulo kiska t'anangiu 'ba kjint'ere jngu jnda xi kitsu: ―Saulo, Saulo, ¿ánñu an tjenngichaninaa̱? 5―¿'Yá= ni ji, Na'en? ―kitsu Saulo. ―An= ña̱ Jesús xi tjenngiche ―kitsu xi jako―. 6Tisetjen 'ba titjas'en naxinando. 'Ba kio k'uinri mé= xi tjinnere nga si'en. 7'Ba nchja xi tjenko Saulo tu tsikinyajma, ngat'a kjint'ere jndo tunga tu'yá tsabe. 8'Ba kio Saulo tsisetjen, tunga kionga kiskje'i tuxkun bi nde kuatsejennire. 'Ba 'batsa'en kjinduba ntsja 'ba kichani naxinanda Damasco. 9'Ba ján nixtjin tsik'ejña ka. Tumé kiskine 'ba tumé kits'i. 10'Ba naxinanda Damasco tijña jngu xuta xi Ananías 'mi, xi makjainre ngat'a tse'e Jesús. Kui xi ngaya nijñare kuatsejenre Na'enna. ―¡Ji Ananías! ―kitsure. ―Nga'e tejñaa̱, Na'en ―kitsingojo Ananías. 11―Tisetjen 'ba t'in ndiya xi Ndiya Kixi 'mi ―kitsu Na'enna―. 'Ba nga kjuechi ndaba Judas, chjaningiye ngat'are jngu xuta xi Saulo 'mi xi Tarso tse'e. Nganda'e fa tifakona̱. 12'Ba ngajin nijñare kuatsejenre nga jngu xuta xi Ananías 'mi fa'as'en ña tijña 'ba banere ntsja tuxi ku̱atsejen nganire. 13Kionga Ananías kjint'e enbi, kitsu: ―Ji Na'en, ne nkjin xuta ja'ba be'ena̱ nijmi ngat'a tse'e xutabi 'ba ngat'are ngayéje kjuach'o xi je kitsiko xuta tsjeri xi tjindu naxinanda Jerusalén. 14'Ba nganda'e je ja'e nga'e nga ya'a xujun xi tsjare kjua'ñu xi kitsjare xi ngakure nchja na'mi, tuxi kuekoni nduya ngatsi'i xi makjainre ngat'a tsiji. 15Tunga Na'enna kitsure: ―T'in. Ngat'a an je ja'ajia̱n kui xutabiu nga kui xi kue'ere nijmi ngat'ana̱ ngajinre xuta xi bi tse'e Israel 'ba ngixkun nchja ngaku titjun 'ba ngajinre xuta xi Israel tse'e. 16'Ba an kuaku_ra̱ jó kji'i tse kjuanima kjua'a ngat'are ja'enna̱. 17'Ba kio Ananías kiji 'ba ja'as'en ni'ya ña tijña Saulo 'ba yanere ntsja. ―Ji nts'ia̱ Saulo ―kitsure―, Na'enna Jesús xi kuatsejenri ngaya ndiya ñá jendibani ji, kitsikasenna̱ tuxi ngatamatsejen nganiri 'ba nga ngatjatse ngajinri Isennixtjintsjere Na'enchana. 18'Ba tukjia'a 'etukangini tuxkun Saulo tsajmi xi jokun tjiutsje, 'ba ta'a kuatsejen nganire. 'Ba 'batsa'en tsisetjen= 'ba kisatenda. 19Nga je tsakjen, kisaku nganire nga'ñu, 'ba jó ján nixtjin tsik'ejñajinre xuta xi makjainre ngat'a tse'e Jesús xi tjindu Damasco. 20'Ba ta'a Saulo 'etuts'inre nga kitsikja'axtiuyare enre Na'enchana xuta xi tjindu ni'ya sinagoga nga kitsu nga Jesús= xi Ki'ndire Na'enchana. 21Ngatsi'i xi kjint'ere tu 'ba= kuánre 'ba kitsu: ―¿A bi tsa kibi xi tjenngike xutare naxinanda Jerusalén xi makjainre ngat'a tse'e Jesús? ―kitsure xinkjin―. ¿A bi tsa 'ba nde kui xa ja'eni nga'e, tuxi subani xuta 'ba kuekoni ngixkun ngakure nchja nijmi? 22Tunga Saulo tu ngisa= 'ñu kua'ñukakun 'ba 'ejñatsejen nga Jesús= xi Cristo. 'Ba 'batsa'en 'ejñujin kjuafa'etsjenre xuta judío xi tjindu Damasco. 23Kionga je ja'a nkjin nixtjin, nchja judío joyanire tuxi sik'enni Saulo. 24Tunga Saulo kik'ere nijmi mé= xi joyanire. Nga nixtjin ko nga nistjen nchjabiu kiskun'nda Saulo xuntja ña 'betjuni naxinando, tuxi sik'enni. 25'Ba 'batsa'en xuta xi makjainre ngat'a tse'e Na'enna Jesús tsakaseko Saulo. 'Ba ngajñu 'eya jngu nisinya 'ba ts'ajenntjai xjo xi tjinch'andainire naxinando. 26Kionga Saulo echu naxinanda Jerusalén, kuamejénre nga kuañajanko xuta xi makjainre ngat'a tse'e Jesús. Tunga ngatsi'i tsakjunre, ngat'a bi makjainre nga 'ba nde kui makjainre ngat'a tse'e Jesús. 27'Ba kio Bernabé kiko Saulo ngixkun nchja chinga apóstol 'ba ye'ere nijmi nga Saulo tsabe Na'enna ngaya ndiyo, 'ba nga Na'enna jako, 'ba nga Saulo kitsikja'axtiuya enre Jesús ko kjua'ñu naxinanda Damasco. 28'Ba 'batsa'en Saulo tsik'ejña naxinanda Jerusalén 'ba tsak'ajmeko nchja chinga apóstol. 'Ba kinchja ngat'are Na'enna ko kjua'ñukakun. 29Saulo jako nijmi 'ba josiko xuta judío xi nchja en griego. Tunga nchjabi tsangisjai ndiya jótsa'en ku̱an sik'enni kui. 30Kionga xuta xi makjainre ngat'a tse'e Na'enna Jesús kjint'e kibi, kiko Saulo naxinanda Cesarea 'ba kio kitsikasen ngani Tarso. 31'Ba 'batsa'en bi nde kitsjenngichani xuta xi fi ningu xi tjindu ngayéje nangi Judea ko nangi Galilea 'ba ko nangi Samaria. 'Ñu kuakjain ngisare ngat'a tse'e Na'enna 'ba tsakjunke Na'enna nga tsik'endu, 'ba Isennixtjintsjere Na'enchana tsakaseko nga 'ñu kuankjin ngisa. 32'Ba Pedro tsu'bakun xuta xi fi ningu xi tjindu xki nga'nde, 'ba nde ja'ekun xuta xi makjainre ngat'a tse'e Na'enna Jesucristo xi tjindu naxinanda Lida. 33'Ba kio tsabe jngu xuta xi Eneas 'mi, xi kuajin nu tjinre nga kjijñasun nachan, ngat'a bi ma fi. 34'Ba Pedro kitsure: ―Ji Eneas, Jesucristo titsindari nganda'e. Tisetjen 'ba tjandai nachanri. 'Ba ndekuini chubabiu Eneas tsisetjen. 35'Ba ngatsi'i xuta xi tjindu naxinanda Lida ko Sarón tsabe nga tsisetjen Eneas 'ba 'batsa'en kuakjainre ngat'a tse'e Na'enna Jesús. 36'Ba naxinanda xi Jope 'mi tsik'ejña jngu chjun xi makjainre ngat'a tse'e Jesús xi Tabita 'mi, ja'en xi tsunire Dorcas nga en griego. Kui chjunbiu ngantsjai kitsa'en mé= xi nda 'ba kitsjare xuta ni̱ma̱ mé= xi machjenre. 37Kui nixtjinbiu kisate chi'in 'ba k'en, 'ba jaskan nga je jejun yojore, kis'ejña ngank'a ni'yare. 38'Ba naxinanda Jope tijñat'a tiñare Lida, 'ba kionga xuta xi makjainre ngat'a tse'e Jesús kjint'e nga kio tijña Pedro, kitsikasen jó xuta nga 'ets'are: ―Bi nik'andaye. Ndechunfanichinii̱. 39'Ba Pedro tsisetjen 'ba kiko nchjabiu. Kionga je echu Jope, xuta xi tjindu kio kiko ngank'a ni'ya ña kjijña yojore xi k'ion. Ngatsi'i yanchjin k'on ja'et'are Pedro nga inyakji'nda 'ba inyabakure xutjire 'ba ko kja'e ngisa najñu xi kitsinda Dorcas kionga tijñakun ngisa. 40'Ba kio Pedro ts'axje ngatsi'i xi tjindu kio, 'ba tsakasenkunch'in nga jako Na'enna, 'ba kiskutsejen'a yojore xi k'ion 'ba kitsu: ―Ji Tabita, tisetjen. 'Ba kiskje'ingi tuxkun chjunbiu, 'ba kionga tsabe nga kio tijña Pedro, tsik'ejñakixi. 41Pedro kiskjebe ntsja chjunbiu 'ba kitsikisetjen. Jaskan kinchjare xuta xi makjainre ngat'a tse'e Na'enna Jesús ko yanchjin k'on, 'ba yakure nga chjunbiu je tijñakun ngani. 42'Ba ngatsi'i xuta xi tjindu Jope kjint'e mé xi kuán 'ba 'ñu nkjin xuta kuakjainre ngat'a tse'e Na'enna Jesucristo. 43'Ba nkjin nixtjin tsik'ejña Pedro naxinanda Jope, ndaba jngu xuta xi Simón 'mi xi tsa'exako tjiuxin.

will be added

X\