HECHOS 6

1Kui nixtjinbiu kionga je kjimankjín xuta xi makjainre ngat'a tse'e Jesús, 'batsa'en xi nchja en griego kitsik'axki xi nchja en hebreo. Kitsu nga bi nda inyasatesinre yanchjin k'an xi tjin ngajinre nga nyujun nyujun kji'ba'bisunre xi chine. 2'Ba nga tejó nchja chinga apóstol kinchjare ngatsi'i xuta xi makjainre ngat'a tse'e Na'enna Jesús. ―Ji̱n tjinnere nga sikja'axtiuyee̱ enre Na'enchana. 'Ba bi nda tjin tsa k'uejñee̱ nga sikja'axtiuyee̱ ion tuxi kuatesinnii̱ yamixo ―kitsure―. 3'Ba kui kjuañu jun, nts'ia̱ xian, tinyisjaijiun ngajinnu yatu nchja xi nda 'yaxkun, xi kjitse ngajinre Isennixtjintsjere Na'enchana 'ba ko kjuankjin kakun, tuxi s'e̱nenire xabi. 4'Bamani ji̱n, janda xukuai̱ Na'enchana 'ba janda sikja'axtiuyee̱ enre. 5'Ba 'batsa'en ngatsi'i kuakjainre mé= xi kitsu nchja chinga apóstol 'ba kiskja'ajin nchjabi: Esteban, jngu xi 'ñu makjainre 'ba xi kjitse Isennixtjintsjere Na'enchana ngajinre, ko Felipe, Prócoro, Nicanor, Timón, ko Parmenas 'ba ko Nicolás xi Antioquía tse'e. Kui xutabi xi bi judío, tunga je nda'e makjainnire ngat'a tse'e Na'enchana. 6'Ba jaskan kui nchja xi yatu ja'echani ngixkun nchja chinga apóstol, 'ba nchja chinga apóstol tsi'are kjuanda Na'enchana ngat'are kui 'ba yanere ntsja. 7'Ba kinduju enre Na'enna, 'ba xuta xi makjainre ngat'a tse'e Jesús 'ñu nkjin kjima naxinanda Jerusalén, 'ba nkjin nchja na'mi kuakjainre ngayeje. 8'Ba mani Esteban, 'ñu kjinichikunta'en ngat'are Na'enchana. 'Ba ko kjua'ñure Na'enchana kitsa'en kjuakun ko chu̱ba̱ ya'e xi yakutsejen kjuajere Na'enchana ngajinre xuta naxinando. 9Tunga jngu nixtjin yak'a xuta xi tse'e ni'ya sinagoga xi Chu'nda xi Je Kjinik'endundai 'mi, 'ba yak'a xuta xi Cirene tse'e, ko xi Alejandría tse'e, 'ba ko yak'a xi jendibani nangi Cilicia ko nangi Asia 'etuts'inre nga josiko Esteban. 10Tunga bi kuán kitsa'enre Esteban, ngat'a Isennixtjintsjere Na'enchana kitsjare kjuankjin kakun nga kinchja. 11'Ba 'batsa'en 'echjire yak'a nchja, tuxi kuetsuni nga kjint'ere nga Esteban ch'o kitsu ngat'a tse'e Moisés 'ba ngat'a tse'e Na'enchana. 12'Ba 'bitsa'en kjinistire xuta naxinando ko nchja chinga 'ba ko nchja chjine kjuatexumo. 'Ba kitsuba Esteban 'ba kiko ña mañajan xutaxa titjun. 13'Ba ja'echani nchja xi kinchja en ndesu nga kitsu: ―Kui xutabi ch'o tsu ngantsjai ngat'a tse'e ningutsjebi 'ba ngat'a tse'e kjuatexumo. 14Kjinu'yee̱ nga kitsu nga Jesús xi Nazaret tse'e sikixuya ningubi 'ba nga sik'antjaiya kjuachinga xi 'ejñana Moisés. 15'Ba ngatsi'i xutaxa xi kio tjindu kiskutsejen'a Esteban 'ba tsabe nga jo kji'i nkjain ankje.

will be added

X\