HECHOS 5

1Tunga jngu xuta xi Ananías 'mi nde yateña jngu xu'ba. 'Ba chjunre Safira 'mi. 2Kui xi 'ejñat'axin jngu ka'a ton xi jotjin kika'ere xu'bare 'ba xi ngijngu ka'a ja'etsjare nchja chinga apóstol. 'Ba nde tsabe chjunre mé= xi kitsa'en ngayeje. 3'Ba kio Pedro kitsure: ―Ji Ananías, ¿ánñu chanayiu ja'as'enjinni inimari, nga en ndesu te'mi_ri Isennixtjintsjere Na'enchana nga kichjube jngu ka'a ton jotjin kika'eri xu'bari nga kikateñe? 4Kionga kje bateñajín xu'bo, ¿a bi tsa tsiji? 'Ba kionga je kikateñe, ¿a bi je tsiji ton? ¿Ánñu 'batsa'en kjinikja'etsjenni nga 'ba kjiñe'en? Na'enchana xi kik'in_ri en ndesu, bi xuta. 5Kionga kjint'e enbi, Ananías je mik'en nga kiska t'anangiu. 'Ba a tu 'ñu kitsakjun ngatsi'i xuta xi kjint'e mé xi kuán. 6'Ba kio ja'e jó ján nchja nisti 'ba yaxtejun najñu yojore, 'ba 'etjuko nga kik'eyanijin. 7Jánru hora jaskan, ja'e chjunre Ananías xi bi be mé xi kuán. 8'Ba kio Pedro tsiningiyare: ―'Ba t'inna ¿a 'bi= tjin kich'o xu'banu nga kikateño? ―Jun, 'ba= tjin kikateñanii̱ ―kitsingojo Safira. 9―¿Ánñu kaminya'añu xingiu nga mejénnú xut'ayako Isennixtjintsjere Na'enchana? ―kitsu Pedro―. Nchjanisti xi tjindu ngastun xuntjo kui= xi kik'eyanijin xi'inri, 'ba nganda'e nde, ji kuekori. 10'Ba ndekuini chubabiu je mik'en chjunbiu nga kiskat'a ndsaku Pedro. 'Ba kionga ja'as'en nchja nistibiu, tsabe nga je kjijñak'en chjunbiu 'ba 'etjuko nga kik'eyanijint'are xi'inre. 11'Ba niki 'ñu kitsakjun ngatsi'i xi makjainre ngat'are Jesús 'ba ko ngatsi'i xuta xi kjint'e kibi. 12'Ba nchja chinga apóstol nkjin kjuakun ko chu̱ba̱ xi yakutsejen kjuajere Na'enchana kitsa'en ngajinre naxinandabiu, 'ba ngatsi'i tu jngu kitsa'en kjuafa'etsjenre 'ba kuañajan ngini'ya xi Ngini'yare Salomón 'mi. 13'Ba xuta xi yak'a bi kua'ñukakun nga kuañajanjinre xuta xi makjainre ngat'a tse'e Jesús, tunga naxinandabiu nda kinchja ngat'a tse'e. 14'Ba kuankjin ngisa xuta, xi xi'in ko yanchjin, xi ja'e ngisa ngajinre xuta xi makjainre ngat'a tse'e Na'enna Jesús. 15'Ba ka'nda ngaya ndiyo kikani xuta xi inyasefesun xi kitsikayusun nijña ko nachan, tuxi kionga kjua'ani Pedro ninga tu nk'ianre kjua'anere xi inyafesun. 16'Ba nde ja'e nkjin xuta naxinanda xi tjindu ngandaire naxinanda Jerusalén nga ja'eko xinkjin xi inyasefesun 'ba ko xi tjindujinre isennixtjin xi bi nda, 'ba ngatsi'i kuanda. 17'Ba 'batsa'en a tu 'ñu kuaxinre na'mi titjun ko ngatsi'i xi mako xi nchja saduceo kuán. 18'Ba kitsikasen nchja xi kitsuba nchja chinga apóstol 'ba kiskanis'en ngaya nduyare naxinando. 19Tunga ngajñu jngu ankjere Na'enchana kiskjex'a xuntja nduyo 'ba ts'axje nchjabiu 'ba 'bi kitsure: 20―Tangiun, tanginkinya nduju ña ma ndetsinre ningu 'ba t'e_ru nijmi xuta naximando ngayéje en xi tse'e kjuabenichun xatsebi. 21'Ba 'batsa'en kitsik'etjusun nchja chinga apóstol en xi kik'inre. 'Ba nga kuanyujun, ja'as'en ña ma ndetsinre ningu 'ba yakuya. 'Ba ndekui chubabiu ja'e na'mi titjun 'ba ko nchja xi mako nga'nde ña mañajan xinkjin. 'Ba kio kitsikjint'e ngatsi'i nchja ngakure xuta xi Israel tse'e 'ba 'exa nga kuechja'a ngaya nduyo nchja chinga apóstol. 22Tunga kionga nchja xi tsikuenda ningu echu nduyo, bi kuasjaire nchja chinga apóstol. 'Ba 'batsa'en jendiba ngani nga ja'eke'e nijmi. 23―Tichja tsjan tsjan xuntja nduyo nga echii̱. 'Ba chasoldadu xi kio inyatsikuenda inyaxtiu xuntjo. Tunga kionga kichju'i, tu'yá kji'yee̱ ngaya ―kitsu. 24Kionga kjint'e enbi, na'mi titjun ko nchja na'mi ngaku 'ba xi ngakure chasoldadu xi tsikuenda ningu, ka'nda bi nde beni mé= xi sikja'etsjen 'ba tsiningiyare xinkjin jótsa'en kjuechukjet'ani kjuabi. 25Tunga jngu xuta 'ba ja'etsure: ―Jun, na'en, nchja xi kichanis'ion nduya tsakaiñu ña ma ndetsinre ningu= inya 'ba inyabakuyare xuta naxinando. 26'Ba 'batsa'en nchja xi tsikuenda ningu 'ba ko xi ngakure kiji 'ba ja'eko ngani nchja chinga apóstol. Tunga bi kitsi'onre ngat'a tsakjun tsa ndiojo kue'ere xuta naxinando. 27Kionga ja'eko, kitsikinya ngixkun xutaxa xi kuañajan kio. 'Ba kio na'mi titjun tsiningiyare: 28―¿A bi je 'ba kik'inkixiri̱ nga bi nde ku̱an kuakuyañu ngat'are xutabiu? 'Ba ¿mé= xi teño'on jun? ―kitsure―. Ngatsi'i xi tse'e Jerusalén be mé= xi tebakuyo, 'ba mejénnú nga ji̱n xaninenii̱ kjuabeyare xutabiu. 29―Tjinnere nga Na'enchana titjun sik'etjusun_ri̱ nga ko mare xuta ―kitsingojo Pedro 'ba ko nchja chinga apóstol xi yak'a―. 30Na'enre xuta chingana kitsikja'aya nganire Jesús, xi jun kjinik'ent'o kru. 31Na'enchana kitsjare kjuaje 'ba kitsik'ejña ngate kixire. Kui= xi xuta titjun nganda'e 'ba xi tsik'angi xuta tuxi sjanire kjuanichat'a xuta xi Israel tse'e kionga tsik'antjaiya kjuafa'etsjenre 'ba fa'e ngani ngixkun Na'enchana. 32Ji̱n= xi tenikixiyee̱ ngat'are kibi 'ba 'ba nde Isennixtjintsjere Na'enchana ngayeje, Isennixtjin xi Na'enchana tsjare xuta xi tsik'etjusunre. 33Kionga kjint'e enbi xutaxabiu, niki 'ñu kuakjanre, ka'nda kuamejénre sik'en nchja chinga apóstol. 34'Ba 'batsa'en tsakasen nduju ngajinre nchjabiu jngu xuta fariseo xi Gamaliel 'mi, jngu chjine kjuatexuma xi 'yaxuta ngat'are ngatsi'i xuta naxinando. Xi 'exa nga kjui'naxje ngutjun nchja chinga apóstol. 35―Jun na'en naxinanda Jerusalén ―kitsure xutaxa xi yak'a―, nda chusun_ru mé= xi siko kui xutabi. 36Ngat'a jo kuán nganda'eñu, isetjen jngu xuta chinga xi Teuda 'mi. 'Ba kui kitsure yojore jngu xuta xi 'ñu chjire, 'ba ñujunru sientu nchja kitjenngi. Tunga Teuda kjinik'en 'ba ngatsi'i xi kitsjenngire kitsojoba. 'Ba kio jet'a yeje. 37'Ba jaskan ngani, nixtjin nga tukja'aya xki xuta naximando, isetjen Judas xi Galilea tse'e, 'ba kitsa'en nga nkjin xuta kitjenngire. Tunga 'ba nde kui kjinik'en ngayeje 'ba ngatsi'i xi kitsjenngire kitsojoba. 38'Bamani, sja_nuu̱ jngu kjuafa'etsjen nganda'e: Ngat'ejño nchjabiu 'ba tumé nde nikonu. Ngat'a tsa tu tse'e sa xuta xi tsikja'etsjen 'ba xi tsa'en nchjabiu, kjuet'a. 39Tunga tsa tse'e Na'enchana, bi ku̱an sikase'ñu. Chutsejen_ru yojonu tsa tu Na'enchana= nini xi tebixkjankoñu. 40'Ba 'batsa'en xutaxabiu kuakjainre mé= xi kitsu Gamaliel. Kinchjare nchja chinga apóstol 'ba yajare 'ba 'echja'ndere nga bi nde kuinchja ngisani ngat'a tse'e Jesús. Jaskan kitsik'endundai ngani. 41'Ba nchja chinga apóstol 'etukajinre xutaxabiu 'ba 'ñu tsja titsubare, ngat'a Na'enchana je kitsja'ndere nga kjua'a kjuanima tu kjuare ja'enre Jesús. 42'Ba ngantsjai nixtjin ña ma ndetsinre ningu 'ba xki ni'ya janda bakuya 'ba kitsikja'axtiuya ngat'a tse'e Jesucristo.

will be added

X\