HECHOS 4

1'Ba Pedro ko Juan tojo inyafako xuta naxinandabiu kionga ja'e nchja na'miu ko xi ngakure xi tsikuenda ningu 'ba ko nchja saduceo. 2Kui 'ñu kjimastire, ngat'a Pedro ko Juan inyabakuyare xuta naxinandabiu 'ba inya'be'ere nijmi nga ngat'are Jesús nga je kis'ejña kusun nga kjua'aya nganire xuta ngajinre mik'en. 3'Ba 'batsa'en kitsuba 'ba kiskanis'en nduya ka'nda nixtjin nga kuanyujun, ngat'a je kuangixun kui nixtjinbiu. 4Tunga xuta xi kjint'e mé= xi kinchja Pedro ko Juan, nkjin kuán xi kuakjainre ngat'a tse'e Jesús. Ónru mi kuán nchja xi kuakjainre. 5'Ba 'ba kuán nixtjin nga kuanyujun, xutaxare naxinando ko nchja chingare naxinando 'ba ko nchja chjine tse'e kjuatexuma kuañajan naxinanda Jerusalén. 6'Ba nde ja'e Anás xi na'mi titjun, Caifás, Juan, ko Alejandro, 'ba ko ngatsi'i nchja xi xinkjin nchja na'mi ngaku. 7'Ba 'batsa'en kichja'a Pedro ko Juan 'ba kjinikinya ngamasenre nchjabiu tuxi xjaningiyanire. ―¿Mé= kjua'ñu xi tjinnu nga nindo xuta? ―kitsu nchja xabiu―. ¿'Yá= xi ti'bexanu nga 'ba teño'on? 8'Ba 'batsa'en kinchja Pedro nga kitse ngajinre Isennixtjintsjere Na'enchana 'ba kitsure: ―Jun xutaxa ko nchja chingare naxinanda Israel, 9nganda'e techjaningiyanii̱ ngat'are kjuanda xi kuán ngat'a tse'e jngu xuta xi bi ma fi'in 'ba jótsa'en kuandanire. 10Ngatja'yo ngatsi'u 'ba ko ngatsi'i xuta naxinanda Israel nga ja'enre Jesucristo xi Nazaret tse'e xi jun kjinik'ent'o kru 'ba xi Na'enchana kitsikja'aya nganire, ngat'are kui kuandani xuta xi sejña nduju ngixkún nga'e. 11Kui Jesús, ndiojo xi tsabeton nchja chjinexjo tunga je ndiojo titjun kuán. 12Tsajain ngisa xi mare tsik'angi xuta, ngat'a Na'enchana bi kja'e kitsikasen ngisa ngasun'ndebi xi nga ko ja'enre ku̱an sik'anginina. 13'Ba 'batsa'en kuakunre xutaxabiu, kionga kjint'e nga 'batsa'en ko kjua'ñu kakun kinchja Pedro ko Juan 'ba tsabe nga tuxkia xuta= kuán 'ba xi bi kiskut'aya. Tsabexkun nga kui xi ja'ba je tsek'etsumako Jesús. 14Tunga bi kuán jo kitsure ngat'a inyabe nga xuta xi kuanda sejñat'are nchjabiu. 15'Ba 'batsa'en 'exare nga ngat'etjujin ña kuañajan, 'ba xutaxabiu joyanire xi jngu= xi jngu. 16―¿Mé= xi sikua nchjabi? ―kitsu―. Ngat'a ngatsi'i xuta xi tjindu naxinanda Jerusalén je be kjuakun xi kitsa'en, 'ba bi ku̱an k'ue'ma. 17Tusa kuinyakun_ra, tuxi tu'yá nde kuetsuyanire ngat'are ja'enre Jesús 'ba tuxi bi nde kuajenduju ngisani enre ngajinre xuta naxinando. 18'Ba 'batsa'en kinchja nganire nchjabiu 'ba inyakunre nga bi nde kuinchjani ninga bi nde kuakuyani ngat'are ja'enre Jesús. 19Tunga Pedro ko Juan 'bi kitsu nga kitsingojore xutaxabiu: ―Chusun_ru mé= xi nda tjin ngixkun Na'enna ―kitsure―. ¿A jun= xi sik'etjusunri̱ asa Na'enchana? 20Ngat'a bi ku̱an xiu kuetsubai̱ ngat'are mé= xi kji'yee̱ 'ba kjinu'yee̱. 21'Ba 'batsa'en xutaxabiu inyakun ngisare, tunga kitsik'endundai. Bi kisaku ndiyare jótsa'en sikja'a kjuanima, ngat'a ngatsi'i xuta naxinando kitsichjire Na'enchana ngat'are mé xi kuán. 22Ngu xuta xi kuanda ngat'are kjuakunbi, ts'axtiu yachan nure. 23Kionga je kjinik'endundai Pedro ko Juan, ta'a kikun xuta xi yak'a xi makjainre ngat'a tse'e Na'enna Jesucristo 'ba ye'ere nijmi ngayéje xi kitsure nchja na'mi ngaku ko nchja chingare naxinando. 24'Ba kionga xuta xi yak'a kjint'e kibi, ngatsi'i tujngu kitsa'en kjuafa'etsjenre nga jako Na'enchana 'ba kitsu: ―Ji Na'en, ji xi kjiñe'en ngank'aa, t'anangiu ko ndachikun 'ba ko ngayéje xi kio tjin. 25Ngat'are Isennixtjintsjeri kjinikinchje David xuta chingani̱. Kui xi 'ba nde kitsa'exat'ari 'ba kjinikinchje: ¿Ánñu inyakjanni naxinanda xi tjin ngasun'ndebi? ¿Ánñu xuta foyanire tsajmi xi tsajain ndiyare? 26Tsik'endunda nga skjan nchja rey xi tjin ngasun'ndebi, 'ba xutaxabiu kuañajan tuxi k'uendani kjua xi bi nda tjin ngat'are Na'enchana 'ba ko Cristore. 27Ngat'a kjuakixi= nga naxinandabi rey Herodes ko Poncio Pilato kuañajanko xuta xi Israel tse'e 'ba ko xi bi tse'e Israel 'ba 'enda kjua xi bi nda tjin ngat'are Jesús xi Ki'ndi tsjeri xi kjiñe'en nga Cristo kuán. 28'Ba 'batsa'en kitsik'etjusun nchjabiu ngayéje mé= xi kjini'indutitjin 'ba xi kichusun_ri nga tjinnere nga ku̱an. 29'Ba nganda'e, ji Na'en, chutsejen'ai mé= xi mejénre sikoni̱ nchjabiu 'ba ti'en nga xutari ngatatsikja'axtiuya en xi tsiji ko kjua'ñukakun. 30Tsejen ngatamare xi sefesun kjua'ñuri, 'ba ngat'are ja'enre Jesús, Ki'ndi tsjeri, ngatjama kjuakun 'ba ko chu̱ba̱ xi kuaku kjuajeri. 31'Ba kionga je jet'are nga jako Na'enna, nga'nde ña kuañajan jatse; 'ba Isennixtjintsjere Na'enchana ja'e ngajinre ngatsi'i, 'ba kitsikja'axtiuya enre Na'enchana ko kjua'ñukakun. 32'Ba ngatsi'i xi kuakjainre ngat'a tse'e Jesús jngu kitsa'en inimare ko kjuafa'etsjenre. Ni'yá tsu tsa tu kui tajngu tse'e mé= xi tjinre. Tusa tu jngu je kitsikjenko xinkjin mé= xi tjinre. 33'Ba ko 'ñu tse kjua'ñu nchja chinga apóstol kitsikja'axtiuya nga ja'aya nganire Na'enna Jesús, 'ba Na'enchana 'ñu kitsichikunta'en ngatsi'i. 34'Ba ngajinre xutabiu tsajain xi na'en chunre, ngat'a ngatsi'i xi tjinre tsa xu'ba asa ni'ya bateña 'ba fa'eko ton jotjin ba'ere. 35'Ba nchja chinga apóstol fa'etsjare, 'ba kui bakjanyare ngatsi'i xuta jotsa'en machjenre nga jngu jngu. 36'Ba tsik'ejña jngu xuta lebita xi kitsin nangi Chipre xi Kuse 'mi, xi nchja chinga apóstol Bernabé kitsure nga ja'en skare. (Kui ja'en xi tsunire: Xi tsja kjuaje kakun.) 37'Ba Bernabé yateña jngu xu'ba xi tjinre 'ba ja'etsjare nchja chinga apóstol ton xi kuachjinire.

will be added

X\