HECHOS 3

1Jngu nixtjin nga chuba ján nga kuangixun, Pedro ko Juan kiji ningu, ngat'a kui= chubabiu nga xuta xi tse'e Israel fako Na'enchana. 2'Ba kio tijña jngu xuta xi bi ma fi 'ndani nga kitsin. Xi nyujun nyujun nik'ejñaxtiu xuntja ningu xi Nda Kji'u 'mi, tuxi skui'a kjuatjonire ton xuta xi fa'as'en ña ma ndetsinre ningu. 3'Ba kionga xutabiu tsabe Pedro ko Juan nga inyafa'as'en ña ma ndetsinre ningu, tsi'akjuatjore ton. 4'Ba 'batsa'en Pedro ko Juan kiskutsejen'a xutabiu. 'Ba Pedro kitsure nga jako: ―Chutsejen'anii̱. 5'Ba 'batsa'en xutabiu kiskutsejen'a nga kiskuya nga kua'ere ton. 6Tunga Pedro kitsure: ―Tsajainna̱ ton xi plata ninga ton xi oro ni, tunga mé= xi tjinna̱ sjara̱. Nga koni nga ja'enre Jesucristo xi Nazaret tse'e, tisetjen 'ba titjajme. 7'Ba 'batsa'en Pedro kitsuba ntsja kixi xutabiu nga kitsikisetjen, 'ba ta'a kisaku nga'ñure ndsaku ko ngisin ndsaku xutabiu. 8'Ba se kiskjink'a nga tsisetjen, 'ba tsak'ajme. 'Ba 'batsa'en ja'as'enko Pedro ko Juan ña ma ndetsinre ningu. Tsu'ba 'ba tikjink'akoni 'ba titsichjire Na'enchana. 9Ngatsi'i xuta tsabe nga tsu'ba 'ba nga titsichjire Na'enchana, 10'ba tu 'ba= kuánre 'ba kitsakjun ngat'are mé xi kuánre xutabiu. Ngat'a bexkun nga kui xutabiu xi 'bejña nga mi'a ton ngantja ningu xi Nda Kji'u 'mi. 11Xuta xi kuanda, bi nde titsuntjint'ani Pedro ko Juan. 'Ba 'batsa'en ngatsi'i xuta inyamakunre 'ba kuañajan ña inya nchjabiu ngini'ya xi Ngini'yare Salomón 'mi. 12'Ba kionga Pedro tsabe kibi, jako naxinando, 'ba kitsure: ―Jun xuta naxinanda Israel, ¿ánñu tjimakunninu kibi? ¿'Ba ánñu techutsejen'aninii̱ joni tsa kjua'ñu tsaja̱i̱n 'ba tsa ngat'a nga 'ñu 'yakui̱n Na'enchana, tsa kui kjua kuán kjinik'ajmeni̱ kui xutabi? 13Na'enre xuta chingana Abraham ko Isaac ko Jacob, kui= xi kitsjare kjuaje Ki'ndire. Kui Jesús xi jun kjiningantsjo 'ba kji'yaton ngixkun Pilato, kionga kui kuamejénre nga sik'ejñandai. 14Tunga jun kji'yatonñu xuta tsje 'ba xi kixi. Tusa tsikixun nga jngu xuta xi kitjenre mik'en kika'enu. 15'Ba 'batsa'en kjinik'ion kui xi tsik'endukun xuta. Tunga Na'enchana kitsikja'aya nganire 'ba ji̱n= xi tenikixiyee̱ kibi. 16Ngat'a makjainni̱ ngat'are Jesús, kui= kjua ngat'are ja'enre Jesús kitsa'e nga'ñure xutabi xi te'yo 'ba 'yaxkun. Ngat'a makjainni̱ ngat'are Jesús, kui= kjua xutabi kuandakjinni ngixkun ngatsi'u. 17'Ba nganda'e, nts'ia̱ xian, 'be=ña̱ nga bi 'yo mé= xi kjiño'on. 'Ba nde xutaxanu bi be mé= xi kitsa'en. 18Tunga 'ba=tsa'en Na'enchana kitsik'etjusun mé= xi kitsuyatitjun kionga kitsikinchja ngatsi'i profeta, nga Cristo tjinnere kjua'a kjuanima. 19Kui kjuañu tik'antjaiyañu kjuafa'etsjennu 'ba ndiba ngañu ngixkun Na'enchana, tuxi sichat'aninu jenu. Tsa 'ba si'on, Na'enchana sjanu nixtjin nga ku̱an sikja'ayo 20'ba sikasennu Jesús, kui xi kitsa'e titjunre xa nga ku̱an Cristonu. 21Jesucristo tjinnere nga k'uejña ngank'aa nganda'e, ka'nda nga kjua'e nixtjin nga s'e̱nda ngani ngayéje xi kitsu Na'enchana nixtjin kuatse jan, jotsa'en kitsikinchja profeta tsjere. 22Jotsa'en kitsu Moisés nixtjin kuatse jan: “Na'enchana, kui= xi Na'ennu. Kui xi sikasennu jngu profeta xi k'uetjujin ngajinnu, jotsa'en kitsikasenna̱. Tasen ñojon ngayéje mé= xi kuetsunu, 23ngat'a tu'yañu xi bi kuasen ñojonre profetabiu, kui= xi kjui'naxjejin ngajinre xuta naxinando.” 24'Ba Samuel 'ba ko ngatsi'i profeta xi jaskan kis'e 'ba=nde kinchja ngat'are nixtjinbi. 25'Ba tsojon= ku̱an mé= xi kinchja profeta, 'ba tu kjuanda tsojon nga Na'enchana 'endako kjua xuta chinganu, kionga 'ba kitsure Abraham: “Ngatsi'i naxinanda xi tjin ngasun'ndebi ku̱achikunta'en ngat'are ntje xi s'e̱ri.” 26Kionga Na'enchana kitsikja'aya nganire Ki'ndire, jun= titjun kitsikasennu, tuxi sichikunta'enninu 'ba meni nga jngu jngu xi tjin ngajinnu k'uenduni tsajmi xi ch'otjin.

will be added

X\