HECHOS 22

1―Jun nts'ia̱ 'ba jun na'en xian, tasen ñojon mé= xi xin_nuu̱ nganda'e nga kuinchjantjaa̱ yojona̱ ―kitsu. 2Kionga xuta kjint'e nga en hebreo tifako Pablo, ngisa xiu tsik'endu. 3―An= ña̱ jngu judío ―kitsu Pablo―. Kitsia̱n naxinanda Tarso, naxinanda xi tijñajinre nangi Cilicia, tunga naxinandabi kuachaa̱. Nda yakuyana̱ Gamaliel jotsa'en tijña kjuatexumare xuta chingana. 'Ba 'ba fa tsa'en 'ñu 'bekua̱n Na'enchana jo ño'on jun ngatsi'u nganda'e. 4Kitsjenngikia̱ xuta xi fitjenngi ndiya xatsere Jesús, ka'nda kuamejénna̱ nga kjuinik'en. 'Ba kiskjefia̱ 'ba kiskanis'ia̱n nduya a xi'in asa yanchjin. 5Na'mi titjun ko ngatsi'i nchja chingare naxinando ku̱an sikixiya ngat'are mé= xi texia̱n. Kui xi kitsjana̱ xujun xi sikasen_ra̱ xutana xi tjindu naxinanda Damasco. Kui xujunbiu kitsjana̱ kjua'ñu nga kikangisjaa̱ kio xuta xi makjainre ngat'a tse'e Jesús, tuxi kjua'ekoña̱ nga'e Jerusalén nga kjuinikja'a kjuanima. 6Tunga yejerañu, kionga tefia̱ ndiyo 'ba nga je kuatiñat'a_ra̱ naxinanda Damasco, 'baru tsa nyusen, tukjia'a tsa'nandaina̱ jngu ndi'i je xi jendibani ngank'aa. 7'Ba kiskaa̱ t'anangiu 'ba kjint'e_ra̱ jngu jnda xi kitsuna̱: “Saulo, Saulo, ¿ánñu tetsjenngichaninaa̱?” 8'Ba 'batsa'en tsiningiya_ra̱: “¿'Yá=ni ji, Na'en?” 'Ba 'bi kitsuna̱: “An= ña̱ Jesús xi Nazaret tse'e xi ji tetsjenngiche.” 9'Ba nchja xi tjenkona̱, tsabe ndi'u 'ba kitsakjun, tunga bi kjint'ere jnda xi jakona̱. 10'Ba an kixin_ra̱: “¿Mé= xi mejénri nga sa'aa̱n, Na'en?” 'Ba Na'enna kitsuna̱: “Tisetjen 'ba t'in naxinanda Damasco. Kio 'ba k'uin yejeri mé= xi tjinnere nga si'en.” 11'Ba 'batsa'en nchja xi tjenkona̱ tsikinyangi tjiana̱ nga kikona̱ naxinanda Damasco, ngat'a kjua'ñure ndi'u kitsikana̱. 12'Ba kio tijña jngu xuta xi Ananías 'mi xi 'ñu bekun Na'enchana jotsa'en kua'indut'a kjuatexumare Moisés. Nda nchja ngat'are kui ngatsi'i xuta judío xi kio tjindu. 13Kui xi ja'ekunna̱ 'ba kitsitiñat'ana̱ nga kitsuna̱: “Ji nts'ia̱ Saulo, ngatamatsejen nganiri.” 'Ba ndekuini chubabiu kuán kiskutsejen'a kui. 14'Ba Ananías kitsuna̱: “Na'enre xuta chingana kiskja'ajinri, nga ji xi ku̱ankjinri mé= xi mejénre 'ba nga xie Xuta xi kixi ngixkun Na'enchana 'ba nga kjuinu'ye jndare. 15Ngat'a ji xi k'uikue enre ngayéje ngasun'ndio 'ba sikixiya_ri ngatsi'i xuta ngat'are mé= xi kji'ye 'ba kjinu'ye. 16'Ba nganda'e bi nde chuya ngisani. Tisetjen 'ba ngasatendai. Tanejin jeri nga kjuinukjue ja'enre Na'enchana.” 17'Ba 'batsa'en ja'e ngañaa̱ naxinanda Jerusalén. 'Ba kionga tefakua̱ Na'enchana ngaya ningu, kitsa'ena̱ joni jngu chini. 18'Ba tsa'bia̱ Na'enna Jesús, 'ba 'bi kitsuna̱: “Tikitsai nga t'etjufani ngajin naxinanda Jerusalén, ngat'a nchjabiu bi kuatesinre en xi k'uinya_ri ngat'ana̱.” 19'Ba 'bi kixin_ra̱: “Ji Na'en, kui nchjabiu be= nga xki ni'ya sinagoga kiskjefia̱ nga kiskanis'ia̱n nduya 'ba yaja_ra̱ xuta xi makjainre ngat'a tsiji. 20'Ba kionga kjinik'en Esteban, xi kitsikixiya ngat'a tsiji, an kio fa tesiaa̱n nga tjijngukakua̱n mé xi kuán, ka'nda kitsikuenda=ña̱ najñure nchja xi kitsik'en.” 21Tunga Na'enna Jesús 'bi= kitsuna̱: “T'in, ngat'a an kjin tetsikasenra̱ nga k'uinchin xuta xi bi judío.” 22'Ba xuta naxinando 'ndasani enbiu yasen ñojon, tunga kio 'etuts'in nganire nga si'a kitsa'en: ―¡Tusa ngat'en xuta xi 'ba kji'u! ―kitsu―. ¡Bi machjen tsa k'uejñakun! 23'Ba janda inyakji'ndaya 'ba inyakanikja'a najñure 'ba inya'betsojojin isen chojo. 24Kui kjuañu xi ngakure chasoldadu 'exani nga xanis'en Pablo ngaya ña 'bendu chasoldadu, 'ba 'exa nga s'e̱re, tuxi kuetsuyani ánñu 'batsa'en inyakji'ndayani xutankjiun ngat'are. 25Tunga kionga je tji'ñure tuxi kuajanire, Pablo tsiningiyare chasoldadu xi kio tjinre xa: ―¿A ma se'ere jngu xuta romano xi kje ña'anjínre kjua? ―kitsure. 26Kionga chasoldadubiu kjint'e kibiu, kikun xi ngakure. ―Chutsejen_ri yojori mé= xi si'en, ngat'a kui xutabi jngu= xuta romano ―kitsure. 27'Ba 'batsa'en xi ngakure chasoldadu kitsitiñat'are Pablo 'ba tsiningiyare: ―'Ba t'ínna, ¿a ji= ni jngu xuta romano? ―kitsure. ―Jun ―kitsu Pablo. 28―'Ñu tse ton kis'engina̱ an nga kuán jngu xuta romano ―kitsu xi ngakure chasoldadu. ―Tunga an, kui= ña̱ 'nda nga kitsia̱n ―kitsu ngani Pablo. 29Kui kjuañu ta'a tsikinyat'axinni nchja xi kuajare Pablo tsakaiñu, 'ba ka'nda xi ngakure chasoldadu kitsakjun kionga tsabe nga jngu xuta romano= nini xi 'eta'ñu. 30Nga kuanyujun, xi ngakure chasoldadu kuamejénre nga nda skue ánñu nchja judío inyabangini Pablo. Kui kjuañu kiskjendani na'ñu kicha xi tjí'ñukonire 'ba 'exa nga ku̱añajan nchja ngakure na'miu 'ba ko ngatsi'i nchjaxa judío. 'Ba 'batsa'en ts'axje Pablo 'ba kitsikasen ngixkun nchjabiu.

will be added

X\