1 Kionga je kjinik'endii̱ nts'ia, 'batsa'en tsitjas'ee̱n jngu barku 'ba tjen ndiya tsangi̱n isla xi Ko 'mi. Nga kuanyujun echii̱ naxinanda Rodas, 'ba jaskan echii̱ naxinanda Pátara. 2 Naxinanda Pátara kisakuni̱ kja'e barku xi tifi nangi Fenicia, kui xi tsijña_ri̱ 'ba tsangi̱n. 3 Nga jaskan nga kji'yee̱ isla xi Chipre 'mi, tsitjat'a_ri ngate skjunni̱ nga tsangi̱n nangi Siria. 'Ba 'batsa'en echii̱ naxinanda Tiro, ngat'a kio tjinnere stjujee̱n ch'are barku. 4 'Ba kionga je kiskajii̱n xuta xi makjainre ngat'a tse'e Na'enna Jesucristo xi kio tjindu, yatu nixtjin kuánni̱ ko kui. Nts'iabiu kitsure Pablo nga bi ngatji naxinanda Jerusalén, ngat'a Isennixtjintsjere Na'enchana yakutsejenre mé= xi ku̱an. 5 Kionga je ja'a nixtjinbiu, 'etjunii̱ kio 'ba kikaniya ndiyani̱ ngatsi'i xi xi'in ko xi yanchjin 'ba ko ki'ndi nistire 'nda nga 'etjujii̱n naxinando. 'Ba ngandai ndachikun tsikinyakunch'ii̱n 'ba kichukue̱ Na'enchana. 6 Jaskan nga je kjinikixant'ai̱ xingii̱, ji̱n tsitjas'ee̱n barku, 'ba kui kiji ngani ndaba. 7 Barkubiu 'etjukonii̱ naxinanda Tiro 'ba tsangi̱n naxinanda Tolemaida. Kjinite'nda_ri̱ nts'ia xi tjindu kio 'ba jngu nixtjin kuankoni̱. 8 Nga kuanyujun 'etjii̱ kio 'ba echii̱ naxinanda Cesarea. 'Ba 'batsa'en tsanginketsubai̱ ndaba Felipe. Kui xi 'ba nde tsikja'axtiuya en ndare Jesús, 'ba 'ba nde tjinre xa ngajinre nchja xi yatu mani xi baseko nchja chinga apóstol. 9 Felipe tjinre ñujun ki'ndi yanchjin xi xungu, xi yanchjin profeta kuán. 10 Je nkjin nixtjin tjinre nga kio tetsubai̱ kionga ja'eni nangi Judea jngu profeta xi Agabo 'mi. 11 Kui xi ja'ekunni̱ 'ba ja'akja'a tjiuxinjndere Pablo 'ba 'et'a'ñu ntsja ko ndsaku 'ba kitsu: ―Isennixtjintsjere Na'enchana tsu nga 'bitsa'en k'uet'a'ñu xuta xi naire tjiuxinjndebi nchja judío xi tjindu naxinanda Jerusalén. 'Ba singantsjare nchja xi bi tse'e Israel. 12 Kionga je kinu'yee̱ kibi, ji̱n ñatjen ko xuta xi kio tjindu kik'ets'a_ri̱ Pablo nga bi ngatji naxinanda Jerusalén. 13 ―¿Ánñu techi'ndañu 'ba tenibanu? ―kitsu Pablo―. Ngat'a tjijngukakua̱n nga bi tsa tu set'aña̱, 'ba=nde nga kueya naxinanda Jerusalén ngat'are Na'enna Jesús. 14 Kionga bi kuán kjini'indai̱ inimare Pablo, tumé nde kik'inni_ri̱. ―Ngatjama jots'en mejénre Na'enchana ―tu kik'in ngisa_ri̱. 15 Jaskan kibi tsiketsubandai̱ 'ba tsangi̱n naxinanda Jerusalén. 16 Kikoni yak'a nchja xi makjainre ngat'a tse'e Jesucristo xi naxinanda Cesarea tse'e. 'Ba tsekue̱ ndaba jngu xuta xi isla Chipre tse'e xi Mnasón 'mi, xi je nda'e kuakjainnire ngat'a tse'e Jesús. Kui xi kitsja'ndeni̱ nga kuetsubai̱ ndaba. 17 Kionga echii̱ naxinanda Jerusalén, tsja tsa'en kiskjebetjoni̱ nts'ia. 18 Nga kuanyujun Pablo ko ji̱n tsanginchii̱n Santiago. 'Ba kio tjindu ngatsi'i nchja chingare ningu nga echii̱. 19 'Ba 'batsa'en Pablo kitsite'ndare nchjabiu 'ba tsjafani tsa'en ye'ere nijmi ngayéje mé= xi Na'enchana kitsa'en ngajinre xuta xi bi judío ngat'are xa xi kitsjare Na'enchana. 20 Kionga nchjabiu kjint'e enbi, kitsichjire Na'enchana 'ba kitsure Pablo: ―Ji nts'e, je 'yee̱ nga nkjin mi mani xuta judío xi je makjainre ngat'a tse'e Jesús, 'ba ngatsi'i 'ñu bekun kjuatexumo. 21 'Ba je kik'ere nijmi ngat'a tsiji nga tebakuya_ri ngatsi'i xuta judío xi tjindujinre xi bi judío nga ngat'ejñat'axin kjuatexumare Moisés, 'ba nga te'mi_ri nga bi sa'en circuncidar ki'ndire 'ba nga bi sik'etjusun kjuachingana. 22 Ngu, ¿mé= xi ma ña'anre? Ngu kjuint'e= xutabiu nga je ja'e nga'e. 23 Kui kjuañu ngisa= ndani nga 'bi si'en: Nga'e tjindujinni̱ ñujun nchja xi sik'etjusun jngu en xi je 'endako Na'enchana. 24 T'ikue 'ba titsjekue yojori ngixkun Na'enchana. T'echjintjai tuxi nchjabiu k'uejun yejeni ntsja ku. 'Batsa'en ngatsi'i xuta skue nga 'ba nde ji tenik'etjusin kjuatexumo 'ba nga bi kjuakixi mé= xi kjint'e ngat'a tsiji. 25 'Ba xuta xi bi judío xi je makjainre ngat'a tse'e Jesús, ji̱n je kjinikasen_ri̱ jngu xujun ngat'are mé= xi kichubayani_ri̱. 'Ba kik'in_ri̱ nga bi ngatakjine tsajmi xi kitsa'ere joni chje na'en xi ntsja xuta kuandani, 'ba nga bi jin ngatakjine 'ba nga bi ngakjine yojore tjiuba xi kjindusin, 'ba nga bi ngatatsa'en kjuachajngi. 26 'Ba 'batsa'en Pablo kiko ngañujun nchjabiu 'ba nga kuanyujun kitsitsjeko yojore ngixkun Na'enchana. Jaskan ja'as'en ningu tuxi kuetsuni kjia'á=ñu kjuet'a nga sitsje yojore 'ba kjia'á=ñu tjinnere nga kjua'eko chjere nga jngu jngu. 27 Kionga je mején kjuet'a xi mayatuni nixtjin xi machjen nga tsitsje yojore xuta ngixkun Na'enchana, yak'a nchja judío xi jendibani nangi Asia tsabe Pablo ngaya ningu. 'Ba 'batsa'en kitsa'en kjuasi ngajinre ngatsi'i xuta naxinando 'ba kitsuba Pablo 28 nga 'ñu kiski'ndaya: ―¡Jún na'en xi Israel tse'e, tisekonii̱! ―kitsu―. Kui xutabi tuchuña tsu'ba nga tibakuya tsi'ire xuta nga bi chjire xutana ko kjuatexumare Moisés 'ba ko ningubi. Ka'nda ja'as'enko nchja xi bi judío nga'e nga kitsijndi nga'nde tsjebi ngixkun Na'enchana. 29 'Ba kitsu nchjabiu ngat'a ja'ba je tsabe Trófimo, xi jngu xuta xi naxinanda Éfeso tse'e, kionga tjenko Pablo ngajin naxinando. 'Ba nchjabiu kitsikja'etsjen nga Pablo ja'as'enko xutabiu ngaya ningu ngayeje. 30 'Ba 'batsa'en si'a kitsa'en ngatsi'i xuta naxinando 'ba tu mangatsanga ja'e xuta. Kitsuba Pablo 'ba kiskjefe nga ts'axje ningu 'ba ta'a 'echja xuntjare ningu. 31 'Ba xuta naxinando je mején sik'en Pablo, kionga xi ngakure chasoldadu romano echure en nga si'a inyatsa'en ngatsi'i xuta xi naxinanda Jerusalén tse'e. 32 Kui xi ta'a 'eñajan chasoldadu 'ba tsangatsanga ña kuañajan xuta naxinando. Kionga xuta tsabe nga xi ngaku 'ba ko chasoldadu ndiba, bi nde yajanire Pablo. 33 'Ba 'batsa'en xi ngakure chasoldadu kitsitiña, kitsuba Pablo 'ba 'exa nga seta'ñu ko jó na'ñu kicha. Jaskan tsiningiyare 'yáñu kui 'ba mé= xi kitsa'en. 34 Tunga tu kja'e kjuanga kitsu xutankjiun, 'ba bi kuankjinre xi ngakure chasoldadu mé= xi tjima, ngat'a si'a inyatsa'en xuta. Kui kjuañu 'exani nga kueko Pablo ña 'bendu chasoldadu. 35 Kionga echu escalónre ña 'bendu chasoldadu, tjinnere tsaka'anijin Pablo, ngat'a 'ñu kjan inyamare xuta naxinando. 36 Ngat'a 'ñu nkjin xuta inyakji'ndaya: ―¡Ngat'en xutabiu! ―inyatsu nga tjenngire. 37 Kionga je xanis'en Pablo ña 'bendu chasoldadu, 'bi kitsure xi ngakure: ―¿A ku̱an kjuakongutjunra̱? ―¿A mari nukjua en griego? ―kitsu xi ngakure chasoldadu―. 38 ¿A bi tsa ji ni xi nangi Egipto tse'e xi je nda'e 'etuts'innire jngu kjuachan nga kuastike chikunre Roma 'ba kiko nangi t'axin ñujun mi nchja xi tsikjesun xuta? 39 ―An= ña̱ jngu xuta judío ―kitsu Pablo―. Kitsia̱n naxinanda Tarso, naxinanda je xi tijñajinre nangi Cilicia. Temi'ara̱, ta'e'ndechinaa̱ nga kjuakua̱ xutankjiun. 40 'Ba kionga je kitsa'e'ndere, Pablo tsakasen ndujusun escalón 'ba kiskjenitjen ntsja tuxi sik'exiuni xuta. 'Ba kionga je xiu tsik'endu, en hebreo jakoni.
