HECHOS 20

1Kionga naxinando je tsik'enduxiu, Pablo 'eñajan xuta xi makjainre ngat'a tse'e Na'enna Jesucristo 'ba kitsjare kjua'ñukakun 'ba kitsubakja. Jaskan, kitsikixant'a 'ba kiji nangi Macedonia. 2'Ba ja'a xki nga'nde xi kio tjin 'ba 'ñu 'enere xuta xi makjainre ngat'a tse'e Jesús nga jako. Jaskan echu nangi Grecia 3kioña tsik'ejña ján sa. 'Ba kionga je mején kjua'as'en barku xi kueko nangi Siria, kjint'e en nga nchja judío je joyanire nga ch'o siko kui. 'Ba kui= kjuañu 'endiya nga kuaje ngani ndiya xi fini nangi Macedonia. 4Kui nchjabi xi tjenko Pablo, xi Sópater xi jngu xuta xi naxinanda Berea tse'e xi ki'ndire Pirro, Aristarco ko Segundo (nchja xi naxinanda Tesalónica tse'e), Gayo xi naxinanda Derbe tse'e, Timoteo, ko Tíquico 'ba ko Trófimo (nchja xi nangi Asia tse'e). 5Kui nchjabi kitsjentitjun 'ba kiskuyani̱ naxinanda xi Troas 'mi. 6Yejerañu ji̱n, jaskan nga je ja'a s'i kionga chine niñuxtila xi tsajainre na'yu san, tsijñee̱ jngu barku 'ba 'etjii̱ naxinanda Filipos. Xi ma'ónni nixtjin echutjenngii̱ naxinanda Troas, ña ts'andayani̱ yatu nixtjin. 7Nixtjin xi 'betuts'inre semana kuañejee̱n nga kuakjanyee̱ niñuxtila. Pablo yakuyare xuta xi makjainre ngat'a tse'e Jesús, ngat'a nixtjin nga ku̱anyujun k'uetju kio. 'Ba kindujuko enre 'nda masen nistjen. 8'Ba nkjin ndi'i inyati ngank'a ni'ya ña kuañejee̱n. 9'Ba jngu chana'en xi Eutico 'mi tijñaxtiu ventano. Kui xi kuanijñare kionga tsé kindujuko enre Pablo. Kionga je 'ñu tikijñafe, kintjainngi 'nda piso xi majánni, 'ba je mik'en nga kichjunitjen. 10'Ba 'batsa'en Pablo 'etukajen= 'ba tsik'ejña tsindinere chana'enbiu 'ba kitsubakja. ―Bi kun, ngat'a tijñakun ―kitsu Pablo. 11'Ba 'batsa'en kinijin ngani. Yakjanya niñuxtila 'ba kiskine, 'ba jaskan Pablo kindujuko ngani enre nga jako xuta ka'nda nga kis'e isen, 'ba 'batsa'en kiji. 12'Ba chana'enbiu nde, je tijñakun nga kiko xuta ndaba, 'ba ngat'are kibiu ngatsi'i ngisa tsja kis'ere kakun. 13Ji̱n tsangintitjii̱n ko barku 'nda naxinanda Asón, ña ku̱añejee̱n ko Pablo. Ngat'a 'batsa'en kui je 'endakoni̱, ngat'a kuamejénre nga ndiya t'anangi kuajeni. 14'Ba kionga Pablo kiskajii̱n naxinanda Asón, tsijin barku 'ba tsangi̱n naxinanda xi Mitilene 'mi. 15'Etjuni̱ kio 'ba nga kuanyujun tsitjai̱ isla xi Quío 'mi, 'ba xi majóni nixtjin echii̱ isla xi Samos 'mi. Kjinikja'ayee̱ naxinanda Trogilio 'ba nga kuanyujun echii̱ naxinanda Mileto. 16'Ba 'ba kjiñe'ee̱n ngat'a Pablo bi kuamejénre nga kuaje ndiya xi fi naxinanda Éfeso, tuxi bi k'uandayanire nga'nde xi tjin nangi Asia. Ngat'a maxatire nga kjuechu naxinanda Jerusalén, ngat'a mejénre k'uejña kio kionga k'uetju s'i pentecostés. 17Tunga kionga echii̱ naxinanda Mileto, Pablo kitsikasen en nga kinchjare nchja chingare ningu naxinanda Éfeso. 18'Ba kionga ja'e nchjabiu, Pablo kitsure: ―'Yañu jotsa'en tsakatejñajin_nuu̱ ngatsi'u 'nda nixtjin nga titjun ja'eña̱ nga'e nangi Asia. 19Tetsa'exat'a_ra̱ Na'enchana nga 'ñu ts'axjenimaa̱ yojona̱, 'ba kiski'ndaa̱ nga on kuánre inimana̱ mé= xi joyata'enna̱ nchja judío. 20Tunga bi yejent'ia_ra̱ nga ye'e_nuu̱ nijmi mé= xi nda ngat'anu. Yakuya_nuu̱ ngixkun xuta ko ngaya ni'yanu. 21Je 'ba kixinkixi_ra̱ xuta judío ko xuta griego nga tjinnere nga sik'antjaiya kjuafa'etsjenre 'ba kjua'e ngani ngixkun Na'enchana 'ba ku̱akjainre ngat'a tse'e Na'enna Jesucristo. 22'Ba nganda'e tefia̱ naxinanda Jerusalén nga tetsik'etjusun_ra̱ Isennixtjintsjere Na'enchana. 'Ba bi 'bia̱ mé= xi ku̱ata'aa̱n ngajaan. 23Tunga ngayéje nga'nde ña fia̱ tsuyatitjunna̱ Isennixtjintsje nga nduya ko kjuanima tikuyana̱. 24Tunga bi mafona̱ ngat'are kjuabenichunna̱. Bi 'ñu chjire kibiu ngat'a tsa'an. Tu jngu tsajmi xi mejénna̱, mejénna̱ nga ko kjuatsja kjuechukjet'a mé= xi tetsa'aa̱n 'ba sijnguaa̱ xa xi kitsjana̱ Na'enna Jesús, nga xinkixia̱ ngat'are en ndare xi 'bejña chuya kjuandare Na'enchana. 25'Ba be=re takuaa̱n nga bi nde xianinuu̱ ngatsi'u jun xi ja'ekun_nuu̱ 'ba kitsikja'axtiuya_nuu̱ nga Na'enchana xi batexuma. 26'Bamani, nixtjin nganda'e tebe'eyakixi_nuu̱ nijmi nga bi an tjinna̱ je, tsa tjin xi cha̱ja. 27Ngat'a tumé 'ejña'mo_nuu̱. Je kixin_nuu̱ ngayéje mé= xi mejénre Na'enchana. 28'Bamani, chutsejen_ru yojonu 'ba tikuendo ngatsi'i xuta xi makjainre ngat'a tse'e Na'enna Jesucristo. Ngat'a Isennixtjintsjere Na'enchana kitsja xanu nga jun xi sikuendo ningure Na'enna Jesús, xi ko jinre tsatseni. 29Ngat'a 'be=ña̱ kibi. Jaskan nga kjuia̱, kjua'e ngajinnu nchja xi mejénre sichaja xuta xi makjainre ngat'a tse'e Na'enna Jesucristo, jotsa'en tjiundsejen ngajinre chutsanga. 30'Ba ka'nda ngajinnu s'e̱ xi kuakuya en xi bi kjuakixi, tuxi xuta xi makjainre ngat'a tse'e Na'enna kuetjenngini. 31Kui kjuañu tikuendañu yojonu. Tikja'etsjion nga ján nu, nga nixtjin 'ba nga nistjen, bi kitsikja'ayaa̱ nga ko ndaxkua̱n jakoya_nuu̱ nga jngu jngu. 32'Ba nganda'e, nts'ia̱ xian, ngaya ntsja Na'enchana tetsike'nda_nuu̱. Ngatasekonu en xi nchja ngat'are kjuandare Na'enchana, kui enbiu xi ku̱anre sjanu kjua'ñu ngixkun Na'enchana 'ba sjanu mé= xi sa̱kure ngatsi'i xuta tsjere Na'enchana. 33Bi kuamejénna̱ tsa sitsa'aa̱n ton xi plata ni ninga xi oro ni ninga najñu xi tse'e kja'e xuta. 34Jun 'yañu jotsa'en kitsa'exaa̱ tuxi kisakunina̱ mé= xi kuachjena̱ 'ba nde mé= xi kuachjenre xi tjenkona̱. 35Ngantsjai 'ejña kusun_nuu̱ nga 'batsa'en tjinnere si'axa, tuxi kuisekoña xuta xi tsajainre mé= xi machjenre. Tikja'etsjion enre Na'enna Jesús xi tsu: “Ngisa= nda ni nga kua'a tu'banire nga kua'ena.” 36Kionga je 'ba kitsu Pablo, tsakasenkunch'in 'ba ñatjen ko ngatsi'i jako Na'enchana. 37'Ba ngatsi'i kiski'nda nga kitsubakja 'ba 'endsu'a Pablo. 38'Ñu kuabare xutabiu ngat'are en xi kitsu Pablo nga bi nde skue ngisanii̱. 'Ba kikaniya ndiya ka'nda ña kijña barku.

will be added

X\