HECHOS 2

1Kionga ja'e nixtjinre s'i Pentecostés, ngatsi'i xi makjainre ngat'a tse'e Jesús tu jngu nga'nde kuañajan. 2'Ba tukjia'a janeya ngank'a jo ma nga 'ñu fa'a ntjo, 'ba janeya ni'ya ña tjinduya. 3'Ba kuatsejen ngasun nindaku nga jngu jngu xutabiu kitsojosunre tsajmi xi jo kun najenre ndi'i. 4'Ba ngatsi'i kitse ngajinre Isennixtjintsjere Na'enchana. 'Ba 'batsa'en 'etuts'inre nga kinchja kja'e kuanga en jotsa'en nga Isennixtjintsje kitsjare nga kuinchja. 5'Ba kui nixtjinbiu tjindu naxinanda Jerusalén nchja judío xi bekun Na'enchana, xi jendibani ngayéje nangi xi tjin ngasun'ndebi. 6'Ba kuañajan ngatsi'i xutankjiun nga kjint'e si'a xi janeya, 'ba bi be mé= xi sikja'etsjen, ngat'a nga jngu jngu inyant'ere enre. 7'Ba tu 'ba= kjimare 'ba kjimakunre nga tsiningiyare xinkjin: ―¿A bi tsa xuta xi Galilea tse'e ngatsi'i xi 'batsa'en inyanchja? ―kitsure xinkjin―. 8¿Jótsa'en nga tenu'yani_ra nga inyanchja en xi mana nga jngu jngua? 9Ngat'a tjindujinna nga'e xuta xi nangi Partia tse'e, xuta xi Media tse'e, xuta xi Elam tse'e, xuta xi ndibani nangi Mesopotamia, Judea, Capadocia, Ponto, Asia, 10Frigia, Panfilia, Egipto ko nga'nde xi tjin nangi Libia xi tiñare naxinanda Cirene 'ba ko xuta xi jendibani naxinanda Roma. 11Tjin xi nchja judío 'ba tjin xi bi judío tunga makjainre ngat'a tse'e Na'enchana. Tjin xuta xi Creta tse'e 'ba ko xuta árabe. 'Ba ngatsi'a tenu'ya_ra nga enna inyatsuyani xutabi kjuaje xi tsa'en Na'enchana. 12'Ba ngatsi'i kuakunre 'ba bi be mé= xi sikja'etsjen. ―¿Jó tsunire kibi? ―kitsure xinkjin. 13―Ch'i=ni nchjabiu ―kitsu yak'a xi tu tsejnuke. 14'Ba 'batsa'en Pedro tsakasen nduju ko nchja apóstol xi ngitejngu, 'ba 'ñu kinchja nga kitsure xuta naxinando: ―Jun nchja judío ko ngatsi'u xi tetsubo naxinanda Jerusalén, ngatja'yo 'ba tasen ñojon mé= xi xin_nuu̱. 15Bi ch'i nchjabi jotsa'en tenikja'etsjion, ngat'a sa'e= chuba ñajan nga tajñu. 16Kui=bi xi kitsutitjun xuta chinga profeta Joel: 17'Bi= ku̱an nixtjin xi fet'ani, sja_ra̱ Isennixtjinna̱ ngatsi'i xuta, kitsu Na'enchana. Ki'ndi xi'innu 'ba ki'ndi yanchjinnu kuinchja ngat'ana̱ joni jngu profeta, 'ba nchja nistinu s'ejñatsejenre mé= xi tijña'mo, 'ba nchja chinganu kua'ere chini xi kjuakixi. 18Kui nixtjinbiu sja_ra̱ Isennixtjinna̱ nchja chu'ndana̱ 'ba ko yanchjin chu'ndana̱. 'Ba kuinchja ngat'ana̱ joni jngu profeta. 19Sa'aa̱n kjuakun ngank'aa 'ba chu̱ba̱ xi kuakutsejen kjuajena̱ t'anangiu, 'ba s'e̱ jin ko ndi'i 'ba ko ni'ndi xi yufi ni. 20Tsu'biu ku̱ajñu 'ba na'enso ini ku̱an joni jin, kionga kje fa'ejín nixtjin nga kjua'e Na'enna, nixtjin xi je 'ba xi tjinre kjuaje. 21'Ba k'uangi ngatsi'i xi kuinchja ja'enre Na'enna. 22'Bamani jun na'en xi Israel tsojon, tasen ñojon mé= xi xin_nuu̱. Jesús xi Nazaret tse'e, kui jngu xuta xi Na'enchana yaku chuya ngajinnu. Ngat'a Na'enchana kitsjare kjua'ñu nga kitsa'en ngajinnu kjuaje ko kjuakun ko chuba xi yakutsejen kjua'ñure Na'enchana jotsa'en jun nda 'yo. 23Kui Jesús xi kuangantsja, jotsa'en tjun kitsikja'etsjen 'ba kuamejénre Na'enchana 'ndani nga 'etuts'inre. 'Ba jun kjindubo 'ba kjinik'ion, kionga kjiningantsjo ngaya ntsja nchja ch'okun tuxi s'et'ani kru. 24Tunga Na'enchana kitsikja'aya nganire 'ba 'ejñat'axinre kjua'onre kjuabeya, ngat'a kjuabeya bi kuánre kitsik'ejña'ñu. 25Ngat'a 'ba kitsu David nga kinchja ngat'are Jesús: Tsa'bia̱ nga Na'enna ngantsjai tijña ngixkuaa̱n. Ngat'a ngate kixina̱ sejñat'a, kui kjua bi kjuatseni inimana̱. 26Kui kjuañu kuatsjanire inimana̱, 'ba en xi tsja tsu 'etjuni ndsu'baa̱, 'ba ka'nda yojona̱ tikuyare nga sa̱kure mé= xi nda. 27Ngat'a bi sikumanaa̱ nga'ndere mik'en, 'ba bi kua'e'nde tsa kjue'ndu Xuta Tsje xi tsiji. 28Kikakutsejennaa̱ ndiya xi fi ña k'uendukun xuta, 'ba sitsenaa̱ kjuatsja nga kuatejñaa̱ ngixkuin. 29Jun nts'ia̱ xian, ma mixan ko kjuakixi ngat'are xuta chingana David nga k'en 'ba kis'eyanijin, ngat'a ka'nda nixtjin nganda'e tijñajin ngisana tsjure. 30Kui= xi jngu profeta kuán 'ba tsabe nga Na'enchana ja'ba je= kitsjare en ngat'are ja'enre nga ntje xi tse'e stjujin xi k'uejñasun nga'ndere ña batexuma rey. 31'Ba 'batsa'en David tsabe titjun mé= xi ku̱an 'ba kitsuya nga Cristo kjua'aya nganire, nga bi s'e̱jña nga'ndere mik'en, 'ba nga bi kjue'ndu yojore. 32Kui Jesús kibi xi Na'enna kitsikja'aya nganire, 'ba ngatsi'i ji̱n tenikixiyee̱ ngat'are kibi. 33Kui xi kitsa'ere kjuaje nga kjinik'ejña ngate kixire Na'enchana 'ba kisakure Isennixtjintsjere Na'enchana xi Na'enchana kitsuyatitjun nga sjare. 'Ba kui Isennixtjinbi xi titsikasen 'ba kui xi te'yo 'ba xi tenu'yo nganda'e. 34Ngat'a bi David xi tsijin ngank'aa, tunga 'ba= kitsu: Na'enchana kitsure Na'enna̱: “Teni ngate kixina̱, 35ka'nda nga xi stikeri ngi ndsakui sik'enda.” 36Kui kjua nda ngatja'yañu ngatsi'u xi Israel tse'e, nga Jesús xi jun kikjat'o kru, kui= xi Na'enchana kitsa'en Na'en 'ba Cristo ―kitsu Pedro nga kinchja. 37'Ba kionga kjint'e kibi nchja xi tjindu kio, ne ba kis'ere 'ba tsiningiyare Pedro ko nchja chinga apóstol xi yak'a: ―Jun nts'e xian, ¿mé= xi tjinnere nga si'ee̱n? 38'Ba Pedro kitsingojore: ―Tik'antjaiyo kjuafa'etsjennu 'ba ndiba ngañu ngixkun Na'enchana. 'Ba nga ko ja'enre Jesucristo ngatasatendo nga jngu jngu tuxi ku̱achat'anu jenu 'ba 'batsa'en Na'enchana sjanu Isennixtjintsjere. 39Ngat'a tsojon mé= xi kitsuyatitjun Na'enchana, 'ba tse'e ki'ndi nistinu, 'ba tse'e ngatsi'i xuta xi kjin tjindu, ngatsi'i xuta xi Na'enchana kuinchjare nga kjua'e ngat'are Kui. 40Kui enbi ko kja'e ngisa en xi kitsu Pedro nga kinchja 'ba nga 'enere xuta. ―T'etut'axin_ru kui xuta ch'okun xi tjin nganda'e ―kitsure. 41Kui kjua kisatendani xuta xi yatesinre en xi kitsu Pedro. Kui nixtjinbiu jánru mi xuta ja'e ngisa ngajinre xuta xi je kuakjainre ngat'a tse'e Jesús. 42Kjit'a yasen ñojon en xi bakuya nchja chinga apóstol, 'ba jngu kitsa'en xinkjin, 'ba kuañajan nga yakjanya niñuxtila xi kiskine, 'ba nga jako Na'enchana. 43Kuakunre ngatsi'i xuta, ngat'a nchja chinga apóstol kitsa'en nkjin kjuakun ko chuba xi yakutsejen kjuajere Na'enchana. 44'Ba ngatsi'i xuta xi makjainre ngat'a tse'e Jesús jngu kitsa'en yojore 'ba tujngu kitsichjenko xinkjin ngayéje mé= xi tjinre. 45Yateña nangire 'ba ko xi tjinre, 'ba kitsitsojosun ton ngajinre ngatsi'i xuta xi yak'a nga kitsjare jó tjin machjenre nga jngu jngu. 46Nyujun nyujun kuañajan ña ma ndetsinre ningu 'ba xki ni'ya yakjanya niñuxtila nga kiskineko xinkjin ko kjuatsja 'ba nga inda kjiyuju inimare. 47Kitsichjire Na'enchana, 'ba ngatsi'i xuta xi naxinando tse'e nda kinchja ngat'a tse'e. 'Ba nyujun nyujun Na'enchana kitsikasen ngisare ngajinre kui kja'e ngisa xuta xi inya'bangi.

will be added

X\