HECHOS 18

1'Ba 'batsa'en Pablo 'etjuni naxinanda Atenas 'ba kiji naxinanda Corinto. 2'Ba kio kiskajin jngu xuta judío xi Aquila 'mi, xi kitsin naxinanda xi Ponto 'mi. Kui xi sa'e chuba nixtjin ja'eni nangi Italia ko Priscila xi chjunre, ngat'a Claudio xi xuta titjunre xuta romano 'enere ngatsi'i xuta judío nga tjinnere nga k'uetjujin naxinanda Roma. 'Ba Pablo kikun xutabiu. 3'Ba kio tsik'ejñajinre 'ba kitsa'exako nga kitsinda ni'ya xi najñu ni, ngat'a tujngu xa mare ko xutabiu. 4'Ba ngantsjai nga xutu Pablo kikjako xuta ni'ya sinagoga 'ba 'ejñatsejenre xuta judío ko xuta griego nga kjuakixi= mé= xi tinchja. 5Kionga Silas ko Timoteo 'etju nangi Macedonia 'ba echu naxinanda Corinto, Pablo tu kui xa kitsa'en nga kitsikja'axtiuya enre Na'enchana 'ba kitsikixiyare xuta judío nga Jesús kui= xi Cristo. 6Tunga xuta judío kuastike Pablo 'ba ch'o kitsure. Kui kjua Pablo 'etsujmeni najñure, 'ba kitsure: ―Tsojon= je nga chojo. Bi an tjinna̱ je. 'Ba ba'anire nganda'e kjuikuan xuta xi bi judío. 7'Ba 'batsa'en 'etju kio 'ba kiji ndaba jngu xuta xi Ticio Justo 'mi, xi bekun Na'enchana 'ba ndaba kjijñat'a tiñare ni'ya sinagoga. 8'Ba Crispo, xi ngakure ni'ya sinagoga, ko ngatsi'i xinkjin kuakjainre ngat'a tse'e Na'enna Jesucristo. 'Ba nde nkjin xuta xi naxinanda Corinto tse'e kuakjainre 'ba kisatenda kionga kjint'e en xi titsikja'axtiuya Pablo. 9'Ba 'batsa'en Na'enchana jako Pablo nga nistjen joni jngu chini: ―Bi kuin ―kitsure―. Janda tikja'axtiuye ion 'ba bi 'bechje ndsu'bai. 10Ngat'a an tejñakora̱, 'ba tu'yá ku̱an si'onri. Ngat'a ne nkjin xuta tjinna̱ kui naxinandabi. 11'Ba Pablo tsik'ejña kio jngu nu masen nga yakuyare enre Na'enchana xuta xi naxinanda Corinto tse'e. 12Tunga nixtjin nga Galión batexuma nangi Acaya, xuta judío jngu kitsa'en kjuafa'etsjenre nga kuastike Pablo. 'Ba kiko nga'nde ña Galión 'benda kjua. 13―Kui xutabi tjimangane kjuatexumo ―kitsu―. Ngat'a kja'e tsa'en tibakuyare xuta nga tjinnere nga xiakun Na'enchana. 14Pablo je mején kuinchja tsakaiñu, tunga Galión jakotitjun xuta judío nga 'bi kitsure: ―Jun xuta judío, tsa te'minuu̱ ngat'are jngu kjua asa tsajmi xi 'ñu ch'otjin, an tjinnere nga k'uendaa̱ 'ba kuasen ñojon_nuu̱. 15Tunga kibi, kui xi tu ngat'are en ko ja'en 'ba ko ngat'are kjuatexumanu. Kui kjuañu jun t'endasubakoñu xingiu. Bi mejénna̱ k'uendaa̱ kjua ngat'are kibi. 16'Ba tso'oxje nchjabiu nga'nde ña 'benda kjua. 17'Ba 'batsa'en ngatsi'i xuta kitsuba jngu xuta Sóstenes 'mi, xi ngakure ni'ya sinagoga, 'ba nde kio ye'enire xutabiu nga'nde ña Galión 'benda kjua. Tunga Galión bi kitsisinre mé xi kuán. 18Pablo ts'andaya ngisare nkjin nixtjin nga tsik'ejñajinre nts'ia xi tjindu naxinanda Corinto. 'Ba jaskan nga je kitsikixant'a, ja'as'en jngu barku 'ba ñatjen ko Aquila 'ba ko Priscila kiji nangi Siria. 'Ba nga echu naxinanda Cencrea, Pablo 'ejun yeje ntsja ku, tuxi yaku chuyani nga titsik'etjusun jngu en xi kitsa'enko Na'enchana. 19Kionga echu naxinanda Éfeso, Pablo kitsik'endu Aquila ko Priscila 'ba ja'as'en ni'ya sinagoga, kioña jako xuta judío. 20'Ba xuta judíobiu 'ets'are nga nkjin nixtjin ngat'ejña ngisa, tunga Pablo bi kuakjainre. 21―Tsa Na'enchana mejénre, kjua'ekun ngani_nuu̱ ―kitsu nga kitsikixant'a. Jaskan tsijin jngu barku 'ba 'etjuni naxinanda Éfeso. 22Kionga echu naxinanda Cesarea, tsijin naxinanda Jerusalén tuxi sit'endanire xuta xi makjainre ngat'a tse'e Na'enna Jesús xi kio tjindu, 'ba jaskan kiji ngani naxinanda Antioquía. 23'Ba jaskan nga je ts'andayare jó ján nixtjin kio, 'etju nga ja'a xki nga'nde xi tjindu nangi Galacia 'ba ko nangi Frigia. Tsakaseko ngatsi'i xuta xi makjainre ngat'a tse'e Jesús jotsa'en kixi kuinya ngixkun Na'enchana. 24'Ba kui nixtjinbiu jngu xuta judío xi Apolos 'mi, xi kitsin naxinanda Alejandría, echu Éfeso. Kui xi jngu xuta xi tsja tsa'en tsikja'axtiuya 'ba 'ñu be xujun enre Na'enchana. 25Nda kisakuyare mé= xi tse'e Na'enna Jesús 'ba ko ngayéje kakun kinchja nga kixi yakuya ngat'are Jesús. Tunga bi nda mankjinre ngat'are nga satenda xuta, ngat'a kjint'e nga tu Juan yatenda xuta. 26'Ba 'batsa'en 'etuts'inre nga kinchja ko kjua'ñukakun ni'ya sinagoga. 'Ba kionga Aquila ko Priscila kjint'ere Apolos, kikot'axin 'ba ngisa nda kitsuyare ndiyare Na'enchana. 27Kionga Apolos kuamejénre nga kuaje nangi Acaya, nts'ia xi tjindu naxinanda Éfeso tsakaseko. Kitsi'indure jngu xujun xuta xi makjainre ngat'a tse'e Na'enna Jesús xi tjindu nangi Acaya, tuxi nda skjebetjoni Apolos. 'Ba kionga Apolos echu kio, tsakaseko 'ñu nkjin xuta xi ngat'are kjuandare Na'enchana je kuakjainre. 28Ngat'a ngixkun ngatsi'i xuta kitsuya ko kjua'ñukakun nga bi kjuakixi mé= xi tsu xuta judío. Yakuya mé= xi kua'indut'a enre Na'enchana 'ba 'batsa'en 'ejñatsejen nga Jesús xi Cristo.

will be added

X\