HECHOS 17

1Pablo ko nchja xi tjenko ja'a naxinanda Anfípolis ko naxinanda Apolonia, 'ba jaskan echu naxinanda Tesalónica kioña jngu ni'ya sinagogare xuta judío kjijña. 2Jotsa'en ngare Pablo, ja'as'en kio nga xutu. Ján nixtjin nga xutu jako nijmi xuta mé= xi kua'indut'a enre Na'enchana. 3Kitsuyare xuta 'ba 'ejñachuyare nga Cristo tjinnere nga kjua'a kjuanima 'ba nga kjua'aya nganire ngajinre mik'en. ―Ngat'are kui Jesús kibi xi tebe'enuu̱ nijmi nganda'e, kui= xi Cristo ―kitsure. 4Yak'a xuta xi kio tjindu kuakjainre 'ba ñatjen kuañajanjinre Pablo ko Silas. 'Ba 'ba nde ne nkjin xuta griego xi bekun Na'enchana kuakjainre 'ba nkjin yanchjin xi nda 'yaxkunre ngayeje. 5'Ba 'batsa'en kuaxinre xuta judío xi bi makjainre. Kui xi inya'a yak'a nchja ch'okun xi semaya ndiyo, tuxi ku̱añajanni nga sa'en kjuasi ngajin naxinando. 'Ba ja'ekjankjanxtiu xuntja ndaba Jasón nga inyamangisjai Pablo ko Silas, tuxi k'uaxjeni 'ba singantsjanire xuta naxinando. 6Tunga kionga bi kuasjaire, kiko kjua'ñu ngixkun nchjaxo Jasón ko yak'a nts'ia xi kio tjindu. 'Ba 'bi kitsu nga kiski'ndaya: ―Nchja xi inyatsa'en kjuasi ngayéje ngasun'ndio, kui= xi 'ba nde je ja'e nga'e ngayeje. 7'Ba Jasón kiskjebetjo nchjabiu ndaba. 'Ba ngatsi'i nchjabiu inyamangane kjuatexumare César 'ba inyatsu nga tjin ngijngu ngaku titjun xi Jesús 'mi ―kitsu. 8Kionga xuta naxinando 'ba ko nchjaxo kjint'e enbi, ka'nda bi be mé= xi sikja'etsjen. 9Tunga jaskan nga Jasón ko nchja xi yak'a 'echjintjai yojore, kitsik'endundai ngani. 10'Ba 'batsa'en ta'a nga je jñu, nts'ia kitsikasen Pablo ko Silas naxinanda xi Berea 'mi. Kionga echu kio, ja'as'en ni'ya sinagogare xuta judío. 11'Ba kui xuta judíobi xi ngisa nda kjuafa'etsjenre nga ko mare nchja xi naxinanda Tesalónica tse'e, 'ba tsja tsa'en inya ñojon en xi kinchja Pablo. Nyujun nyujun 'exkiya enre Na'enchana tuxi skueni tsa kjuakixi xi inya'mire. 12'Bamani, nkjin kuán xi kuakjainre, 'ba ngajinre xuta griego 'ba nde kuakjainre, nkjin yanchjin xi nda 'yaxkunre 'ba ko nkjin xuta xi'in ngayeje. 13Tunga kionga xuta judío xi tjindu naxinanda Tesalónica kjint'e nga Pablo 'ba nde titsikja'axtiuya enre Na'enchana naxinanda Berea ngayeje, ja'e kio 'ba 'ejña nganire kjuasi xuta naxinandabiu. 14Tunga ta'a nts'ia kitsikasen Pablo ngandai ndachikun, yejerañu Silas ko Timoteo tsik'endu ngisa naxinanda Berea. 15'Ba nchja xi kikaniya ndiya Pablo 'nda naxinanda Atenas jendiba ngani nga je kjint'e en xi kitsikasen Pablo, nga kuetsure Silas ko Timoteo nga ngatamañajant'a xati nganire. 16Kionga Pablo tikuya naxinanda Atenas nga kjuechu Silas ko Timoteo, 'ñu ba kuánre inimare nga tsabe nga ngajin naxinando kitse na'en xi ntsja xuta kuandani. 17'Bamani, ngaya ni'ya sinagoga jako xuta judío ko xi bi judío xi bekun Na'enchana, 'ba nyujun nyujun jako xi mañajan ña ma ndetsin. 18'Ba nde Pablo jako nijmi yak'a nchja nkjin kakun xi epicúreo 'mi ko yak'a xi estoico 'mi. ―¿Mé= xi mejénre kuetsuna nganda'e xutabi xi tuxkia nga mare en? ―kitsu yak'a. 'Ba kja'ere kitsu: ―Tibe'e=ru nijmi ngat'are kja'e na'en. 'Bi kitsu nchjabiu ngat'a Pablo titsikja'axtiuyare en ndare Jesús 'ba nga xuta kjua'aya nganire ngajinre mik'en. 19'Ba 'batsa'en nchjabiu kiko nga'nde xi Areópago 'mi 'ba tsiningiyare: ―¿A ku̱an xie̱ mé= en xatse xi tebakuyanii̱? ―kitsure―. 20Ngat'a techukonii̱ en xi kje nu'yajíi̱n. Kui= kjuañu mejénnini̱ xianii̱ jó tsunire kibiu. 21'Bi kitsu ngat'a ngatsi'i xuta xi Atenas tse'e ko xuta xi xin nangire xi kio tjindu, kui xi tu matsjare nchja nijmi asa minya ñojon jngu en xatse. 22'Ba 'batsa'en Pablo tsakasen nduju nga masenre nchja xi kuañajan nga'ndebiu xi Areópago 'mi 'ba 'bi kitsure: ―Jun, xi Atenas tsojon, ngu te'beña̱ nga jun ne 'ñu 'yakun na'en xi tjin ngasun'ndebi, 23ngat'a kionga tsu'baa̱ ngajin naxinandanu, tsa'bia̱ nga nkjin mani na'en xi 'yakun. 'Ba nde tsa'bia̱ jngu altar kioña 'bitsa'en kua'indut'a: “Ngat'are na'en xi bi 'yare.” 'Bamani, Na'en xi 'yakun xi bi 'yo, kui ngat'are tebe'enuu̱ nijmi. 24Kui Na'en xi kitsa'en ngasun'ndio ko ngayéje tsajmi xi tjinre 'ba kui= xi batexumare ngank'aa ko t'anangiu. Kui bi 'bejñaya ningu xi xuta tsinda. 25Bi machjenre tsa xuta kuatesinre. Tumé machjenre, ngat'a kui= xi tsja tsi'ina kjuabenichun 'ba ko ntjo xi chjujnda 'ba ko ngayéje tsajmi xi tjin. 26'Ba ngat'are jngu xuta kitsa'enni ngayéje naxinanda xi tjin ngasun'ndio 'ba 'enda nixtjin ko nga'nde ña k'uendu nga jngu jngu. 27'Bi kitsa'en meni nga ngatsi'i ku̱angisjaini Na'enchana, joni tsa tu ntsja tifini nga ku̱an ku̱asjaire, ninga bi kjin tijñana Na'enchana nga jngua jngua. 28Ngat'a tu ngat'are Na'enchana tetsubachunña 'ba niteya 'ba tjinna kjuabenichun, jotsa'en 'ba nde kitsu yak'a nchja nkjin kakun xi tjindu ngajinnu: “Ntjere Na'enchana ña.” 29'Bamani, tsa ntjere Na'enchana ña, bi tjinnere nga sikja'etsjian tsa 'ba kji'i Na'enchana joni na'en xi kuandakoni ton xi oro ni ko ton xi plata ni 'ba ko ndiojo. Kui tsajmi xi xuta 'benda jotsa'en nga mare 'ba jotsa'en tsikja'etsjen. 30Na'enchana tu ja'axtiunk'a mé= xi xuta kitsa'en nixtjin kuatse jan, ngat'a kje bejín. Tunga nganda'e tuñañu nga tjindu xuta, Na'enchana tifakoya ngatsi'i xuta nga sik'antjaiya kjuafa'etsjenre 'ba kjua'e ngani ngixkun Kui. 31Ngat'a Na'enchana je 'ejñare nixtjin kionga ko kjuakixi ku̱anre kjua xuta ngasun'ndebi. 'Ba xuta xi Na'enchana kitsja xare, kui= xi sa'enre kjua. Kui= xi kitsikja'aya nganire ngajinre mik'en 'ba 'batsa'en yakutsejenre ngatsi'i xuta nga kjuakixi= kibiu ―kitsu Pablo. 32Kionga nchjabiu kjint'e ngat'are nga kjua'aya nganire xuta ngajinre mik'ion, tjin xi tsejnuke Pablo. Tunga tjin yak'a xi kitsu: ―Mejénni̱ kuinu'ya nganii̱ ngat'are kibi kja'e nixtjin. 33'Ba 'batsa'en Pablo 'etjujin kio, 34'ba tjin yak'a xi kuakjainre, xi kitjenngi Pablo. Jngu xi Dionisio 'mi, xi 'ba nde mañajanko nchjabiu nga'nde xi Areópago 'mi, 'ba nde kuakjainre jngu chjun xi Dámaris 'mi 'ba ko yak'a ngisa.

will be added

X\