HECHOS 16

1'Ba 'batsa'en Pablo echu naxinanda Derbe ko naxinanda Listra. 'Ba kio tsabexkun jngu xuta xi makjainre ngat'a tse'e Jesucristo xi Timoteo 'mi. Nare Timoteo jngu chjun judío xi makjainre ngat'a tse'e Na'enna Jesús, tunga na'enre jngu xuta griego. 2'Ba nts'ia xi tjindu naxinanda Listra ko naxinanda Ikonio nda nchja ngat'are Timoteo. 3Pablo kuamejénre nga Timoteo kueko 'ba titjun kitsa'en circuncidar, tuxi bi ch'o ku̱anire xuta judío xi tjindu kui nga'ndebiu. Ngat'a ngatsi'i be= nga na'enre Timoteo jngu xuta griego kuán. 4'Ba xki nga'nde ña ja'a, kitsuyare xuta xi makjainre ngat'a tse'e Na'enna Jesús mé= xi 'enda ko xinkjin nchja chinga apóstol ko nchja chingare ningu xi tjindu naxinanda Jerusalén, tuxi sik'etjusunni. 5'Bamani, xuta xi makjainre ngat'a tse'e Na'enna Jesucristo 'ñu kuakjain ngisare 'ba xki nixtjin nkjin kuan ngisa. 6'Ba 'batsa'en Pablo ko nchja xi tjenko ja'a nangi Frigia 'ba ko nangi Galacia, ngat'a Isennixtjintsjere Na'enchana bi kitsja'ndere nga sikja'axtiuya enre Na'enchana nangi Asia. 7Kionga echu tiñare nangi Misia, nchjabiu kuamejénre nga kjua'as'en nangi Bitinia, tunga Isennixtjintsjere Jesús bi kitsja'nde nganire. 8Kui kjuañu tu ja'axtiu ndiya nangi Misia nga kiji naxinanda Troas. 9'Ba ngajñu, Pablo tsabe ngaya nijñare jngu xuta xi Macedonia tse'e xi sejña nduju 'ba titsu nga ti'bets'are: “Ndibai nangi Macedonia 'ba tisekonii̱.” 10'Ba kionga Pablo tsabe kibiu, ta'a tseketsubandai̱ nga kuangii̱n nangi Macedonia. Ngat'a kjinikja'etsjee̱n nga Na'enchana tinchjani̱ tuxi sikja'axtiuyani_ri̱ enre xuta xi kio tjindu. 11'Ba 'batsa'en tsijñee̱ barku xi 'etju naxinanda Troas, 'ba tsangin ndiyee̱ isla xi Samotracia 'mi, 'ba nga kuanyujun, echii̱ naxinanda xi Neápolis 'mi. 12'Ba 'etjii̱ kio 'ba tsangi̱n naxinanda Filipos, jngu naxinanda titjunre nangi Macedonia, kioña nkjin xuta xi Roma tse'e tjindu. 'Ba jó ján nixtjin ts'andayani̱ kio. 13Nga xutu 'etjii̱ ngajin naxinando 'ba tsangi̱n tiñare ña fa'a ndajio, kioña kjinikja'etsjee̱n nga xuta mañajan nga fako Na'enchana. Kio tsiketsubai̱ nga kik'inya_ri̱ ngat'are Na'enchana yanchjin xi kuañajan kui nga'ndebiu. 14'Ba jngu chjun xi Lidia 'mi, xi naxinanda Tiatira tse'e xi bateña najñu kuán xi chji, kui xi bekun Na'enchana 'ba tibasen ñojon ion. 'Ba Na'enchana kitsiko inimare nga ngisa nda yasen ñojon ngisare en xi tinchja Pablo. 15'Ba 'batsa'en ñatjen kisatenda chjunbiu ko xinkjin, 'ba 'ets'ani̱ nga kuetsubai̱ ndaba. ―Tsa kjuakixi nga tebixun nga makjainna̱ ngat'a tse'e Na'enna Jesús, jabiu ndeketsubo ni'yana̱ ―kitsuni̱ 'ba 'ñu 'eneni̱ nga kuetsubai̱ ndaba. 16'Ba 'bi kuán, kionga temangii̱n nga'nde ña xuta fako Na'enchana, kio kiskajii̱n jngu ki'ndi chjun xi chu'nda xi tijñajinre isennixtjin xi mare tsa'enxki. Xi naire ne tse ton jenre ngat'are mé= xi 'bejñatsejen kui ki'ndi chjunbiu nga tsa'enxki. 17Kui ki'ndi chjunbiu kitsjenngini̱ 'ba kiski'ndaya tjenngini̱: ―Kui jmibi xi chu'ndare Na'enchana xi 'ñu je, xi inyabaku ndiyanu jótsa'en k'uangiu ―kitsu. 18Nkjin nixtjin 'ba kitsa'en. Tuchan Pablo bi nde kichukjuakonire. Kitsiku'beya 'ba kitsure isennixtjin xi tijñajinre ki'ndi chjunbiu: ―Ko nga ja'enre Jesucristo texinra̱ nga t'etukajin_ri ki'ndi chjunbi. 'Ba ndekuini chubabiu isennixtjinbiu 'etukajinre ki'ndi chjunbiu. 19Tunga kionga xi naire tsabe nga bi nde ku̱an kuejen ngisanire ton, kitsuba Pablo ko Silas 'ba 'efe kjua'ñu ngixkun nchjaxo ña ma ndetsin. 20'Ba kitsikinya ngixkun nchja juez. ―Kui nchjabi xi nchja judío 'ba kjuasi inya'bejña naxinandana ―kitsu―. 21'Ba inyabakuya kjuachinga xi bi ma nik'etjusan ña 'ba ninga bi ma ña'an, ngat'a Roma= tsajan. 22'Ba 'batsa'en xuta naxinando kuastinere Pablo ko Silas, 'ba nchja juez 'exa nga ngat'axjere najñure nchjabiu 'ba nga ko ya ngatjas'enire. 23Jaskan nga je 'ñu nkjin ndiya yajare, kiskanis'en nduya 'ba 'exare xuta xi tsikuenda nduyo nga nda sikuenda nchjabiu. 24Kionga je kitsa'ere kjua'ñu xutabiu, kiko Pablo ko Silas 'ba kiskanis'en nga'nde ña ngisa 'mo chun nduyo, 'ba 'e'ñu tsjan tsjan ndsaku. 25Tunga joruni tsa masen nistjen, yejerañu Pablo ko Silas inyafako 'ba inyasekonire Na'enchana, 'ba xi yak'a xi tjindu nduyo inyaminya ñojonre, 26tukjia'a ja'a jngu chon xi niki 'ñu=, xi niki 'etsujmeyare xjo ngindere nduyo. 'Ba ndekuini chubabiu kitju'i ngayéje xuntjare nduyo, 'ba kitjunda ngayéje na'ñu kicha xi titsu'ñuni xi inya nduyo. 27Kionga xuta xi tsikuenda nduyo ja'are 'ba tsabe nga xuntjare nduyo tixa tete, ts'axje kichare nga mejénre sik'en yojore, ngat'a kitsikja'etsjen nga xi inya nduyo je 'etju. 28Tunga Pablo kiski'ndaya: ―Tumé nikue yojori, ngat'a nga'e= tetsubai̱ ngatsi'i ―kitsure. 29'Ba 'batsa'en xuta xi tsikuenda nduyo tsi'a jngu ndi'i 'ba tu mangatsanga ja'as'en ngaya 'ba niki tifatsekun= nga tsakasenkunch'int'are Pablo ko Silas. 30'Ba kio ts'axje ngojó 'ba tsiningiyare: ―Jun na'en ―kitsure―, ¿mé= xi tjinnere nga sa'aa̱n tuxi k'uangiña̱? 31―Ngatamakjainri ngat'a tse'e Na'enna Jesucristo, 'ba k'uangi=ni ji 'ba ko xingi ―kitsingojo Pablo ko Silas. 32'Ba jako ngat'are enre Na'enchana xutabiu 'ba ko ngatsi'i xi tjindu ndaba. 33'Ba ndekuini chubabiu ngajñu, xutabiu yanejun ña onre Pablo ko Silas, 'ba ta'a kui ko ngatsi'i xinkjin kisatenda. 34Jaskan kiko ndaba 'ba kitsikjén, 'ba ngatsi'i tsja kuánre nga kuakjainre ngat'a tse'e Na'enchana. 35Nga je kis'e isen, nchja juez kitsikasen chapolicia nga kuetsure xuta xi tsikuenda nduyo nga ngatasik'endundai Pablo ko Silas. 36'Ba 'batsa'en xuta xi tsikuenda nduyo kitsure Pablo en xi ja'ek'inre: ―Je nchja juez kitsikasen en nga k'uaxjenu ―kitsure―. Kui kjuañu t'etjuñu nganda'e 'ba ko kjuaxiu tangiun. 37Tunga Pablo kitsure nga jako chapolicia xi nchja juez kitsikasen: ―Ji̱n xuta tse'e Roma ni, 'ba ngixkun xuta naxinanda yajani̱ nga bi titjun kitsa'enni̱ kjua, 'ba kiskanis'enni̱ nduyo. ¿Ánñu nganda'e mejénnire k'uaxje'monini̱? ¡Junjun! Tusa kui suba ngatja'ek'axjeni̱. 38'Ba 'batsa'en nchjabiu kiji ngani nga kike'ere nijmi nchja juez mé= xi kitsu Pablo, 'ba nchja juez kitsakjun kionga kjint'e nga nchjabiu xuta romano= nini. 39Kui kjuañu ja'eki'anire kjuajetakun Pablo ko Silas, 'ba ts'axje 'ba 'ets'are nga ngat'etju ngajin naxinando. 40Kionga je 'etju nduyo, Pablo ko Silas kiji ndaba Lidia. 'Ba jaskan nga je tsabe nts'ia 'ba kitsjare kjua'ñukakun, kiji ngani.

will be added

X\