HECHOS 15

1Kui nixtjinbiu yak'a nchja xi jendibani nangi Judea echu naxinanda Antioquía 'ba 'etuts'inre nga yakuyare xuta xi makjainre ngat'a tse'e Jesucristo nga kitsure: ―Tsa bi si'on circuncidar jotsa'en bakuya kjuachingare Moisés, bi ku̱an k'uangiu. 2'Ba 'batsa'en jó ya kuán. 'Ba Pablo ko Bernabé 'ñu josiko nchjabiu. 'Ba 'batsa'en 'endako tsi'i xinkjin nga Pablo ko Bernabé ko yak'a nchja xi makjainre xi kio tse'e kuaje naxinanda Jerusalén kioña kjuako nijmi nchja chinga apóstol ko nchja chingare ningu ngat'are kjuabi. 3'Ba kio nchja xi kjinikasen 'etju 'ba ja'a nangi Fenicia ko nangi Samaria nga inyabe'e nijmi jótsa'en xuta xi bi judío kitsik'antjaiya kjuafa'etsjenre 'ba kuakjainre ngat'a tse'e Na'enchana. 'Ba ngatsi'i xi makjainre kio 'ñu kuatsjare nga kjint'e enbi. 4Kionga ja'e naxinanda Jerusalén, nchja chinga apóstol ko nchja chingare ningu 'ba ko ngatsi'i xi yak'a xi makjainre ngat'a tse'e Jesucristo kiskjebetjo, 'ba Pablo ko Bernabé ye'ere nijmi nchjabiu ngayéje mé= xi kitsa'en Na'enchana ko kui. 5Tunga yak'a nchja fariseo xi ja'ba kuakjainre ngat'a tse'e Jesús tsisetjen 'ba kitsu: ―Nchja xi bi judío tjinnere nga si'an circuncidar 'ba tjinnere nga k'uin_ra nga ngatatsik'etjusun kjuatexumare Moisés. 6'Ba 'batsa'en nchja chinga apóstol 'ba ko nchja chingare ningu kuañajan 'ba jako nijmi xinkjin ngat'are kjuabi. 7Kionga je tsé joyanire ngat'are kibiu, Pedro tsisetjen. ―Jun nts'ia̱ xian ―kitsure―, 'yañu nga je nda'eni Na'enchana ja'ajinna̱ ngajinnu, tuxi sikja'axtiuyani_ra̱ en ndare Jesús xuta xi bi judío, tuxi ku̱akjainnire. 8'Ba Na'enchana xi be inimare ngatsi'i yakutsejen nga 'ba nde kiskjebetjo xutabiu kionga kitsjare Isennixtjintsjere jotsa'en kitsjana ña. 9Bi kabi kitsa'en Na'enchana ngajinre xutabiu 'ba ngajinna. Tusa 'ba nde kitsitsje inimare tu ngat'are nga kuakjainre. 10'Bamani nganda'e, ¿ánñu techut'ayakoñu Na'enchana? ¿Ánñu mejénninu sika'anijinñu xuta xi makjainre ngat'a tse'e Jesús ch'a xi bi kichukjuakore xuta chingana 'ba ninga ña bi chukjuana nga ch'anijian? 11Ngat'a makjainna nga tu ngat'are kjuandare Na'enna Jesús k'uangia, jotsa'en 'ba nde k'uangi xutabiu. 12'Ba kio ngatsi'i xiu tsik'endu 'ba yasen ñojonre mé= xi kitsu Bernabé ko Pablo, jotsa'en Na'enchana kitsjare kjua'ñu nga kitsa'en kjuakun ko chu̱ba̱ xi yakutsejen kjuajere Na'enchana ngajinre xuta xi bi judío. 13'Ba kionga je jet'are nga kinchja Bernabé ko Pablo, 'batsa'en Santiago kinchja: ―Jun ntsía̱, tasen ñojonnu ―kitsu―. 14Je ye'ena nijmi Simón jótsa'en Na'enchana 'etuts'inre nga ja'animare xuta xi bi tse'e Israel 'ba ja'ajin ngajinre xutabiu jngu naxinanda xi 'ba nde tse'e ku̱an. 15'Ba ndekuinire xi kitsu nchja chinga profeta, kioña kua'indut'a: 16Jaskan kibi kjua'e ngañaa̱, 'ba sinda ngañaa̱ ndaba David xi je tsixuya, 'ba sindaxatse ngañaa̱ mé= xi je jetsun, 'ba skjenitjen ngañaa̱, 17tuxi xuta xi yak'a ku̱angisjaini Na'enchana ñatjen ko ngatsi'i naxinanda xi bi judío, xi je kinchja_ra̱ nga tsa'an ku̱an. 18'Ba 'ba kitsu Na'enchana xi 'ejñatsejen kibi 'ndani nganda'eñu. 19Kui kjua 'ba texinña̱ nga bi k'uejña_ra kjuana'en xuta xi bi tse'e Israel xi makjainre ngat'a tse'e Na'enna Jesucristo. 20Tusa si'indu_ra xujun xi kuetsure nga bi ngatakjine tsajmi xi kitsa'ere joni chje ngat'are na'en xi ntsja xuta kuandani 'ba nga bi ngatatsa'en kjuachajngi, 'ba nga bi ngatakjine yojore tjiuba xi kjindusin, 'ba nga bi jin ngatakjine. 21Ngat'a 'ndani nganda'eñu tjin xi tsikja'axtiuya kjuatexumare Moisés xki nga'nde, 'ba tjin xi 'bexkiya kjuatexuma ngantsjai nga xutu ngaya ni'ya sinagoga. 22'Ba 'batsa'en nchja chinga apóstol ko nchja chingare ningu 'ba ko ngatsi'i xi yak'a xi makjainre ngat'a tse'e Jesús joyare nga skja'ajin nchja xi sikasenko Pablo 'ba ko Bernabé naxinanda Antioquía. 'Exare Judas xi 'ba nde Barsabás 'mi 'ba ko Silas, kui nchjabiu xi ngaku ngajinre xuta xi makjainre ngat'a tse'e Jesús kio. 23'Ba 'bi tsu xujun xi kjinikasenko: “Ji̱n nchja chinga apóstol ko nchja chingare ningu tenikasen_ri̱ kjuate'nda nts'e xi bi judío xi tjindu naxinanda Antioquía ko nangi Siria 'ba ko nangi Cilicia. 24Kjinu'yee̱ nga tjin yak'a nchja xi nga'e kijinii̱, xi echutsistinu 'ba 'ejñujinnu ngat'are mé= xi makjainnu. Tunga bi ji̱n kik'exa_ri̱ nchjabiu. 25Kui kjuañu, jotsa'en ngusun kuái̱n, nga kuamejénni̱ nga kik'exa_ri̱ nchja xi tenikasenkue̱ Bernabé ko Pablo xi nimejée̱n. 26Kui xi bi nde mafonire tsa kueya ngat'are ja'enre Na'enna Jesucristo. 27'Ba 'bamani, tenikasee̱n Judas 'ba ko Silas, kui xi ndekuini en kjuakonu nga kuetsuyanu jo tsu xujun. 28Ngat'a Isennixtjintsjere Na'enchana 'ba ko ji̱n nda kuánni̱ nga tu kui ch'abi xi sika'anijinri̱, xi tjinnere nga sik'etjusun. 29Bi nde xineñu tsajmi xi kitsa'ere joni chje ngat'are na'en xi ntsja xuta kuandani, 'ba ninga jin, ninga yojore tjiuba xi kjindusin, 'ba bi si'on kjuachajngi. Tsa k'uendut'axiun kibi, nda si'on. Te'ndanu ngatsi'u.” 30'Ba 'batsa'en nchja xi kis'exare kiji 'ba echu naxinanda Antioquía. Kio kitsikjint'e ngatsi'i xi makjainre ngat'a tse'e Na'enna Jesús 'ba kitsingantsja xujun. 31Kionga xi makjainre ngat'a tse'e Na'enna Jesús 'exkiya xujun, kuatsjare ngat'are kjua'ñukakun xi tiba'ere. 32'Ba Judas ko Silas, kui xi 'ba nde nchja chinga profeta. Kui kjuañu jakoni nts'ia nga kitsjare kjua'ñukakun 'ba tsakaseko nga kixi kuinya ngixkun Na'enchana. 33Chuba nixtjin ts'andayare kio, 'ba 'batsa'en nts'ia kitsikasenku nganire nchja xi kitsikasen nga titjunre 'ba kitsure nga ngatas'ere kjuaxiu nga kitsikixant'a. 34Tunga Silas kuamejénre nga tsik'ejña kio. 35'Ba Pablo ko Bernabé tsik'endu naxinanda Antioquía nga yakuya 'ba kitsikja'axtiuya en ndare Na'enchana. 'Ba nkjin ngisa xi 'ba nde kitsa'en. 36Kionga je ja'a jó ján nixtjin, Pablo kitsure Bernabé: ―Tanginchun ngaña nts'ia xi tjindu xki nga'nde ña tu kjinikja'axtiuya enre Na'enchana, tuxi xiaña jótsa'en tjindu ―kitsure. 37Bernabé kuamejénre nga kueko Juan, xi 'ba nde Marcos 'mi, 38tunga Pablo kitsu nga bi nda tjin nga kueko xuta xi kitsik'endu nangi Panfilia 'ba nga bi kiko nduju xare. 39Kabi kuánre xinkjin 'nda nga kitsintjit'a xinkjin. 'Ba Bernabé kiko Marcos 'ba ja'as'en barku nga kiji isla xi Chipre 'mi. 40Yejerañu Pablo kiskja'ajin Silas 'ba, jaskan nga je kjinike'nda ngaya ntsja Na'enchana ngat'are nts'ia, 'etju. 41'Ba ja'a nangi Siria ko nangi Cilicia 'ba kitsjare kjua'ñukakun xuta xi makjainre ngat'a tse'e Na'enna Jesús xi kio tjindu.

will be added

X\