HECHOS 14

1'Ba 'bi kuán naxinanda Ikonio, Pablo ko Bernabé ñatjen ja'as'en ni'ya sinagogare xuta judío xi kio tjindu. Ngat'a ko kjua'ñukakun kitsikja'axtiuyare enre Na'enchana, kui kjua 'ñu nkjin xuta judío 'ba ko xi bi judío kuakjainnire ngat'a tse'e Na'enna Jesús. 2Tunga nchja judío xi bi makjainre ngat'a tse'e Jesús kitsikjanre xuta xi bi judío tuxi ch'otsa'en kitsikja'etsjenni ngat'are nts'ia. 3Nkjin nixtjin ts'andayare kio Pablo ko Bernabé 'ba ko kjua'ñukakun kinchja ngat'are Na'enna Jesús. 'Ba Na'enchana yaku chuya nga kjuakixi= en xi inyanchja nchjabiu ngat'are kjuandare, 'ba kitsjare kjua'ñu nga sa'en kjuakun 'ba ko chu̱ba̱ xi kuakuchuya kjuajere Na'enchana. 4Tunga naxinando tsakjanya. Tjin xi kuako xuta judío, 'ba tjin xi kuako nchja chinga apóstol. 5'Ba 'batsa'en nchja xi bi judío 'ba ko kui xi judío ngusun kuán xutaxare naxinando, tuxi ch'o sikoni 'ba kue'enire ndiojo nchja chinga apóstol. 6Tunga kionga nchja chinga apóstol kjint'e kibiu, tsanga 'ba kiji Listra ko Derbe, naxinandare nangi Licaonia, 'ba ko nga'nde xi tjindundai kio. 7'Ba nde kio kitsikja'axtiuya en ndare Jesús. 8Naxinanda Listra tsik'ejña jngu xuta xi bi ma fi ngat'a ni̱má ndsaku 'ndani nga kitsin. 9Kui xi tsik'ejña nga yasen ñojon mé= xi Pablo titsu. 'Ba Pablo kiskutsejen'a xutabiu 'ba tsabe nga makjainre nga ku̱anda. 10'Ba 'batsa'en 'ñu kinchja: ―Tisenkixi ―kitsure. 'Ba xutabiu jngu fani kiskjink'a nga tsakasen nduju 'ba tsak'ajme. 11'Ba kionga xuta naxinanda tsabe mé= xi kitsa'en Pablo, kiski'ndaya nga kinchja en tse'e Licaonia: ―Kui=bi na'en xi joni yojore xuta xi je 'etukajen ngajinna ―kitsu. 12Inyatsu nga Bernabé= na'en xi Zeus 'mi 'ba Pablo= na'en xi Hermes 'mi, ngat'a Pablo xi tinchja. 13'Ba xuta naxinando ko na'mi xi tsa'exat'are na'en Zeus kuamejénre nga sjare chje nchja chinga apóstol 'ba ja'eko tjiundija ko naxu tji'bi 'nda ngantja naxinando, ña tikijña ningure na'en Zeus. 14Tunga kionga Bernabé ko Pablo tsabe mé= xi tjima, 'ejndajen najñure 'ba tu mangatsanga kiji ngajinre xuta naxinando nga kiski'ndaya: 15―Jun na'en ―kitsure―, ¿ánñu 'bi teña'anñu? Ji̱n xuta= nii̱ xi 'ba nde kun joni jun. Tenikja'axtiuyanii̱ enre Na'enchana ngajinnu tuxi k'uejñañu xi teño'on, xi nimé chjire, 'ba kjua'e ngañu ngixkun Na'enchana xi tijñakun. Kui xi kitsa'en ngank'aa, t'anangiu ko ndachikun 'ba ko ngayéje xi kio tjin. 16Nixtjin kuatse jan Na'enchana kitsja'ndere nga jngu jngu naxinanda xi tjin ngasun'ndebi janda kuaje jo tsa'en mejénre. 17Tunga ninga 'ba tsa'en, jandarani kitsjare xuta mé= xi nda, tuxi yaku chuyanire yojore. Ngat'a kui xi tsikasenna tsi, 'ba tsjana chan xi nda, 'ba tsjana xi chine, 'ba tsitsejin inimana kjuatsja. 18Ninga Pablo ko Bernabé 'ba kitsu, na'en kuánre nga 'echja'ndere xuta naximando nga sjare chje. 19'Ba kio nchja judío xi jendibani naxinanda Antioquía 'ba ko naxinanda Ikonio, kui xi ja'etsitsa'en xuta naxinando. 'Ba ye'ere ndiojo Pablo, 'ba kionga je ye'ere ndiojo, kiskjefe ka'nda ngubare naxinando, ngat'a kitsikja'etsjen nga je k'en. 20Tunga kionga xuta xi makjainre ngat'a tse'e Jesús kuañajanndaire Pablo, kui tsisetjen 'ba ja'as'en ngani ngajin naxinandabiu. 'Ba nga kuanyujun, 'etjuni kio ko Bernabé 'ba kiji naxinanda xi Derbe 'mi. 21Kionga je kitsikja'axtiuya en ndare Jesús naxinanda Derbe ña 'ñu nkjin xuta kuakjainre, Pablo ko Bernabé kiji ngani naxinanda Listra ko naxinanda Ikonio 'ba ko naxinanda Antioquía. 22'Ba kio kitsjare kjua'ñukakun xuta xi makjainre ngat'a tse'e Jesús nga kixi kuinya ngixkun Na'enchana. 'Ba 'enere nga k'uetsubajin kakunntsjai ngayéje xi makjainre. 'Ba 'batsa'en 'ba nde kitsure: ―Tjinnere nga tse kjuanima kuitjaxtia 'ba 'batsa'en ku̱an kuitjas'enña ña batexuma Na'enchana. 23'Ba nde nga jngu jngu ningu xi tjin nga'ndebiu, Pablo ko Bernabé kitsja xare nchja chinga xi fi ningu. 'Ba kionga je jako Na'enchana ngat'are kui 'ba tsik'endu kjindiakoni, kitsik'endu nchja chingabiu ngaya ntsja Na'enchana, xi ja'ba je kuakjainre. 24'Ba kionga 'etjuni kio, ja'axtiu nangi Pisidia 'ba ja'e ngani nangi Panfilia. 25'Ba kionga je kitsikja'axtiuya enre Na'enchana naxinanda Perge, kiji naxinanda Atalia. 26'Ba kio ja'as'en jngu barku xi kiko naxinanda Antioquía, naxinanda xi tijñajinre nangi Siria, ña tjun Pablo ko Bernabé kjinike'nda ngaya ntsja Na'enchana, tuxi kui kuasekoni nga sik'etjusun xa xi tiba'ere, xi je kuajngu nganda'e. 27'Ba kionga ja'e naxinanda Antioquía, 'eñajan xuta xi makjainre ngat'a tse'e Jesús 'ba ye'ere nijmi ngayéje xi Na'enchana kitsa'enko kui 'ba jótsa'en Na'enchana kitsja'ndere xuta xi bi judío nga ku̱an ku̱akjainre ngayeje. 28'Ba Pablo ko Bernabé tsé tsik'enduko kio xuta xi makjainre ngat'a tse'e Jesús.

will be added

X\