HECHOS 13

1Ngajinre xuta xi makjainre ngat'a tse'e Na'enna Jesús xi tjindu naxinanda Antioquía kis'e nchja chinga profeta ko chamaestru: Bernabé, Simón xi 'ba nde Xuta xi Jma 'mi, Lucio xi Cirene tse'e, ko Manaén xi ñatjen kuacha ko Herodes xi yatexuma nangi Galilea, 'ba ko Saulo. 2Jngu nixtjin, yejerañu kuañajan nga inyatsichjire Na'enchana 'ba nga tjindu kjindia, kio Isennixtjintsjere Na'enchana kitsure: ―Tikinyat'axinnu Bernabé 'ba ko Saulo tuxi sa'enni xa xi sja_ra̱. 3'Ba 'batsa'en, jaskan nga jako ngisa Na'enchana 'ba tsik'endu kjindia, xuta xi makjainre ngat'a tse'e Jesús yanere ntsja Bernabé 'ba ko Saulo 'ba kitsikixant'a. 4'Ba 'batsa'en nchjabiu kjinikasen ngat'are Isennixtjintsjere Na'enchana 'ba kiji naxinanda Seleucia. 'Ba ja'as'en jngu barku xi kiko isla xi Chipre 'mi. 5'Ba kionga echu naxinanda Salamina, kitsikja'axtiuya enre Na'enchana ni'ya sinagogare xuta judío xi kio tjindu. 'Ba nde tjenko Juan ngayeje nga tibaseko. 6'Ba jaskan ja'axtiu ngayéje isla xi Chipre 'mi 'ba echu naxinanda Pafos. 'Ba kio kisatejin jngu xuta judío xi chatje'e kuán xi Barjesús 'mi. Kui xi jngu profeta kitsure yojore. 7'Ba Barjesús tjenko xuta titjunre nangi Chipre, xi jngu xuta nkjikakun xi Sergio Paulo 'mi. 'Ba kio xuta titjunbiu kinchjare Bernabé 'ba ko Saulo, ngat'a mejénre kuasen ñojon enre Na'enchana. 8Tunga kui chatje'ebiu, xi Elimas 'mi nga en griego, kui xi kuastike Bernabé 'ba ko Saulo. 'Ba kuamejénre nga 'echja'ndere nga xuta titjun ku̱akjainre ngat'a tse'e Na'enna Jesús. 9'Ba Isennixtjintsjere Na'enchana kitse ngajinre Saulo xi 'ba nde Pablo 'mi, 'ba kui kiskutsejen'a chatje'ebiu 10nga kitsure: ―¡Ji xi ch'onacha_ri xuta 'ba xi 'ñu ch'okuin! ¡Ji xi ki'ndire chanayi kuáin ngat'a 'ba teñe'en joni kui! ¡Ji xi stiche mé= xi tsje ngixkun Na'enchana! ¿A bi k'uejñe nga sitsitin ndiya kixire Na'enchana? 11'Ba nganda'e kjua'ñure Na'enchana sikja'ari kjuanima. Kueni ka= ni 'ba chuba nixtjin bi nde xiani tsu'biu ―kitsure. 'Ba tukjuan chatje'ebiu bi nde kuatsejennire 'ba kuajñure. Kitsiku'beya nga tsangisjai jngu xuta xi kuafengi. 12'Ba kionga xuta titjun tsabe mé xi kuán, kuakjainre ngat'a tse'e Na'enna Jesús, ngat'a kuakunre kionga kjint'e mé= xi yakuya nchja chinga apóstol ngat'are Na'enchana. 13'Ba kio Pablo 'ba ko nchja xi tjenko ja'as'en jngu barku. 'Etjuni naxinanda Pafos 'ba echu naxinanda Perge xi tijñajinre nangi Panfilia. 'Ba Juan kio kitsik'endu 'ba kui jendiba ngani naxinanda Jerusalén. 14Tunga Pablo ko nchja xi yak'a 'etjuni Perge 'ba kiji Antioquía, nga'nde xi tijñajinre nangi Pisidia. Nga nixtjin nga xutu ja'as'en ni'ya sinagoga xi kio tikijña 'ba tsik'endu. 15'Ba kionga je kis'exkiya xujun kjuatexumo ko xujunre nchja chinga profeta, nchja ngakure xuta ni'ya sinagoga kitsikjint'e: ―Jun nts'e xian ―kitsure―, tsa tjinnu mé= en xi sja nga'ñure xuta, 'ba t'in_ru nganda'e. 16'Ba 'batsa'en Pablo tsisetjen 'ba kiskjenitjen ntsja tuxi kuasen ñojonnire xuta. ―Jun nchja xi Israel tse'e ko xi bi tse'e Israel xi 'yakun Na'enchana, tasen ñojon ―kitsu―. 17Na'enre xuta naxinanda Israel kiskja'ajin xuta chingana 'ba jngu naxinanda je kitsa'en, kionga tjindu ngisa nangi Egipto, ña tu tsik'endut'a. Jaskan ko kjua'ñure ts'axje xuta chingana xi tjindu nangibiu 18'ba 'baru tsa yachan nu kichukjuakore nangi t'axin. 19'Ba kionga kitsikje yatu naxinanda ya'e xi tjin nangi Canaán, kitsjare xuta chingana nangibiu tuxi ku̱atse̱'e̱ni. 20'Ba ñujunru sientu masen nu ts'andayare. Jaskan kitsja xare nchja juez ka'nda nga echu nixtjinre xuta chinga profeta Samuel. 21'Ba jaskan naxinandana tsi'a jngu rey xi kuatexumare, 'ba Na'enchana kitsjare Saúl, ki'ndire Cis xi ntjere Benjamín. Kui xi yatexuma yachan nu. 22Jaskan Na'enchana ja'are xare Saúl 'ba kitsa'en nga David rey kuán. Ngat'are David= kitsuyakixi Na'enchana nga 'bi kitsu: “Je= kisakuna̱ David xi ki'ndire Isaí. Jngu xuta xi tsja mare inimana̱, xi sik'etjusun yeje jofatsa'en nga mejénna̱.” 23'Ba jngu xi ntjere David, kui xi Jesús, kui xi Na'enchana kitsikasen tuxi sik'angini xuta naxinanda Israel, jotsa'en ja'ba je kitsuyatitjun nixtjin kuatse jan. 24Kionga kje fa'ejín Jesús, Juan kitsikja'axtiuyare enbi ngatsi'i xuta xi Israel tse'e 'ba kitsure nga tjinnere nga sik'antjaiya kjuafa'etsjenre 'ba kjua'e ngani ngixkun Na'enchana 'ba satenda. 25Tunga, kionga je tifikjet'a xare Juan, kitsu: “Xi tenikja'etsjion nga 'yá= ña̱, bi kui kuán xi jun tjimankjinnu. Tunga jaskanre an ndiba jngu xi ka'nda an bi bakinna̱ nga skjendaa̱ na'ñu jndere.” 26Jún nts'ia̱ xian, xi ntjere Abraham ko jun xi bi tse'e Israel xi 'yakun Na'enchana, ña= kjinikasenna enbi xi tsik'angina. 27Ngat'a xuta naxinanda Jerusalén ko xutaxare bi kuankjinre 'yá= ni Jesús ninga bi kuankjinre mé= xi kua'indut'a xujunre nchja chinga profeta xi s'exkiya xki nixtjin nga xutu. 'Exa nga sik'en Jesús 'ba 'batsa'en kitsik'etjusun mé= xi kitsi'indu nchja chinga profeta. 28Ninga tumé kuasjaire ngat'are Jesús nga ku̱an sik'en, tunga tsi'are Pilato nga ngatatsik'en. 29'Ba nga je kitsik'etjusun nchjabiu ngayéje xi kua'indut'a enre Na'enchana ngat'are Jesús, ts'ajent'a kru 'ba kikanis'en tsju. 30Tunga Na'enchana kitsikja'aya nganire ngajinre mik'en. 31Nkjin nixtjin Jesús yakure yojore nchja xi 'etjukoni nangi Galilea 'ba kiko naxinanda Jerusalén. Nganda'e kui nchjabiu xi inyatsikixiya ngat'are Jesús ngajinre xuta naxinando. 32'Ba ji̱n 'ba=nde tenikja'axtiuyee̱ kui en ndabi, xi tsu ngat'are tsajmi xi Na'enchana kitsuyatitjunre xuta chingana nga sjare. 33Kui tsajmibiu xi Na'enchana je kitsik'etjusun ngat'a tsajan xi ntjere xuta chingana kuán, kionga kitsikja'aya nganire Jesús ngajinre mik'en. Jotsa'en kua'indut'a salmo xi majóni: “Ji= ni xi Ki'ndina̱. Nganda'e tsjara̱ kjuabenichun.” 34'Ba ja'ba je kitsja enre nga kitsikja'aya nganire ngajinre mik'en tuxi bi nde kjue'nduni yojore, ngat'a 'bi kitsu: “Sja_nuu̱ kjuanichikinta'en xi kjuakixi, xi kixinya titjun_ra̱ David.” 35Kui kjuañu 'ba nde tsa'en kua'indut'ani kja'e salmo: “Bi kua'e'nde nga kjue'ndu yojore Xuta tsjeri.” 36Ngat'a kjuakixi= nga David, nixtjin nga tsik'ejñakun, kitsa'exát'are Na'enchana. 'Ba kitsa'en mé= xi mejénre Na'enchana. Jaskan k'en 'ba kis'eyanijint'are xichare 'ba je'ndu yojore. 37Tunga bi je'ndu yojore xuta xi Na'enchana kitsikja'aya nganire ngajinre mik'en. 38'Bamani, jun nts'ia̱ ngatja'yo nga tu ngat'a tse'e Jesús= ku̱achat'anu jenu. 'Ba enbi xi nikja'axtiuyanu nganda'e. 39Kjuatexumare Moisés bi kuán kitsindainu jenu ngixkun Na'enchana. Tunga Jesús kui xi tsindaire jere ngatsi'i xuta xi makjainre ngat'are kui. 40Kui kjuañu chunni_ru yojonu tuxi bi jun ngatjendibaneñu mé= xi kitsi'indu nchja chinga profeta: 41Chutsijon, jun xi 'yaton, 'ba ngatamakunnu 'ba ngatabeyo. Ngat'a an tetsa'aa̱n jngu tsajmi nixtjin nga tetsuba ngiso, jngu tsajmi xi bi ku̱akjainnu, ninga tsa tjin xi kuetsuyanu. 42'Ba kionga Pablo ko Bernabé 'etjuni ni'ya sinagoga, xuta sinagoga 'ets'are nga sikja'axtiuya ngisare enbi nixtjin xutu xi ndiba ngani. 43'Ba kionga xuta je 'etjuni ni'ya sinagoga, nkjin xi judío 'ba ko xi judío kitsa'en yojore xi bekun Na'enchana kitjenngi Pablo ko Bernabé. Ngojó jakoya xutabiu 'ba 'enere nga ngata'bejin kakunntsjai kjuandare Na'enchana. 44'Ba nga xutu ngani, mejenru ngatsi'i naxinando kuañajan ngani, tuxi kuasen ñojonnire enre Na'enchana. 45Tunga kionga nchja judío tsabe xutankjiun, 'ñu kuachini 'ba kja'e kitsu ngat'are mé= xi Pablo tibe'e nijmi 'ba ch'o kitsure. 46'Ba 'batsa'en Pablo ko Bernabé ko 'ñu tse kjua'ñukakun kinchja ngisa: ―Machjen='in nga jun titjun kjua'axtiuyanu enre Na'enchana ―kitsure―. Tunga jun bi techjubetjo ion 'ba 'batsa'en tebakutsejenñu nga bi bakinnu kjuabenichun xi bi fet'a. Kui kjuañu tusa xuta xi bi tse'e Israel kuangichunnii̱ nganda'e. 47Ngat'a Na'enchana 'bi= kitsuni nga 'exani̱: Ji jo=ni jngu ndi'i xi tsitsejenre naxinanda xi tjin ngasun'ndio, tuxi k'uikoni_ri en xi sik'angi xuta ka'nda ña fet'a ngasun'ndio. 48Kionga xuta xi bi judío kjint'e enbi, kuatsjare 'ba kitsu nga enre Na'enchana tjinre kjuaje. 'Ba ngatsi'i xi Na'enchana je kiskja'ajin nga s'e̱re kjuabenichun xi bi fet'a kuakjainre ngat'a tse'e. 49'Ba kinduju enre Na'enchana nga kjinikja'axtiuya ngayéje nga'nde xi tjin nangibiu. 50Tunga nchja judío inya'a yanchjin xi bekun Na'enchana 'ba xi nda 'yaxkunre, 'ba nde inya'a ngakure naxinando nga kitsikjanre. 'Ba 'etuts'inre nga kitsjengike Pablo ko Bernabé 'ba ts'axje ngajin nangire. 51'Ba 'batsa'en Pablo ko Bernabé 'etsujme chojore ndsaku tuxi yaku chuyani nga bi kui tjinre je, 'ba kiji naxinanda xi Ikonio 'mi. 52'Ba xuta xi makjainre ngat'a tse'e Jesús, 'ñu kis'ere kjuatsja 'ba kitse Isennixtjintsjere Na'enchana ngajinre.

will be added

X\