HECHOS 12

1Kui nixtjinbiu rey Herodes 'etuts'inre nga kitsjengike yak'a xuta xi makjainre ngat'a tse'e Na'enna Jesucristo. 2'Ba 'exa nga ko kicha kjuinik'enni Santiago xi nts'e Juan. 3'Ba kionga tsabe nga nchja judío kuatsjare mé= xi kitsa'en, 'ba nde 'exa nga kjuinduba Pedro. 'Ba ngajinre s'i pascua nga 'bi kuán, nixtjin nga chine niñuxtila xi tsajainre na'yu san. 4Kionga je kitsuba Pedro, Herodes kiskanis'en nduya 'ba ñujun ka'a chasoldadu xi ñujun ñujun kitsik'endu'nda. Ngat'a Herodes kuamejénre nga sa'enre kjua Pedro ngixkun xuta naximando, kionga kjua'a s'iu. 5Kui kjua nda kjinikuendani Pedro nga kjiya nduya, tunga xuta xi makjainre ngat'a tse'e Jesús 'ñu tsi'are Na'enchana ngat'are kui. 6'Ba mé xi kuán nistjen kionga ja'e nixtjin nga Herodes mejénre sa'enre kjua Pedro ngixkun xuta naxinando tsakaiñu, Pedro tikijñafe nga kjijña ngamasenre jó chasoldadu 'ba jó na'ñu kicha tjit'a'ñut'anire 'ba kja'e chasoldadu xi inya'nda ngantja nduyo. 7Tukjia'a jngu ankjere Na'enchana kuatsejen kio 'ba tsa'naya nduyo, 'ba tje'enre Pedro kitsiko nga kitsikja'are. ―Tisetjen fani ―kitsure. 'Ba na'ñu kicha xi tji'ñukja ntsja Pedro tsixu. 8―T'ekjandai tjiuxinjnderi 'ba tjaye jnderi ―kitsure ankje, 'ba Pedro 'ba kitsa'en. 'Ba kio kitsu ngisare: ―Cheje tjiutsanga chajari 'ba ndetjenngina. 9'Ba kio Pedro 'etjutjenngi ankje ninga bi be tsa kjuakixi asa bi kjuakixi mé= xi ankje titsa'en. Joni tsa chini tiba'ere kuánre. 10Ja'a ña tjindu chasoldadu xi titjun inya'nda kio, 'ba jaskan xi majóni. 'Ba kio echu xuntja kicha xi 'betjuni ndiya xi fi ngajin naxinando. Tsix'a tajngu xuntjabiu, 'ba kionga je 'etju, kijiya jngu ndiya 'ba tukjia'a kichaja ankje nga tsakasent'axinre Pedro. 11'Ba 'batsa'en Pedro kuankjinre, joni tsa ja'a nganire 'ba kitsure yojore: ―Je kuankjinna̱ nga kjuakixi nini nga Na'enchana kitsikasen ankjere. Je kitsik'ejñandaina̱ ngaya ntsja Herodes 'ba ko ngayéje xi xuta naxinanda judío mejénre sikona̱. 12'Ba nga kuankjinre mé xi kuán, Pedro kiji ndaba María, nare Juan xi 'ba nde Marcos 'mi, 'ña nkjin xuta kuañajan nga inyafako Na'enchana. 13'Ba nga Pedro echu kio, kitsikjanet'a xuntjare xjo xi tichjandaini ni'yo, 'ba jngu ki'ndi chjun xi Rode 'mi 'etju nga kikutsejen 'yá= ñu. 14'Ba kionga ki'ndi chjunbiu kjint'e jndare Pedro, 'ñu kuatsjare 'ba nga'ndere nga skje'i xuntjo, tusa tsangatsanga nga kike'ere nijmi xuta xi yak'a nga Pedro sejñaxtiu xuntjo. 15―A ska=ri ―kik'inre. Tunga ki'ndi chjunbiu tojo 'ba= kitsu nga kjuakixi=. ―'Ba ku̱an tsa ankjere kui ―kitsu nchjabiu. 16Yejerañu Pedro janda titsikjanet'a xuntjo. 'Ba tuchan nchjabiu kiskje'i xuntjo 'ba nga tsabe nga Pedro, 'ñu kitsakjun. 17Tunga Pedro kiskjenitjen ntsja, tuxi xiu k'uenduni nchjabiu. 'Ba kio ye'ere nijmi jótsa'en Na'enchana ts'axje ngaya nduyo. ―T'e_ru nijmi Santiago 'ba ko nts'ia xi yak'a mé xi kuán ―kitsu Pedro 'ba jaskan 'etju nga xin kiji. 18'Ba kionga je kis'e isen, chasoldadu niki 'ñu= kis'ejñujinre, ngat'a bi be mé xi kuánre Pedro. 19'Ba kio Herodes 'exa nga kuinyisjai, 'ba kionga bi kuasjaire, kitsa'enre kjua chasoldadu xi inya'nda nduyo 'ba 'exa nga kjinik'en. Jaskan kibi, Herodes 'etjuni nangi Judea nga kik'ejña naxinanda Cesarea. 20Herodes stike xuta xi naxinanda Tiro tse'e 'ba ko xuta xi naxinanda Sidón tse'e. Kui kjuañu xutabiu jngu kitsa'enni yojore nga ja'ekun Herodes. Titjun chinga Blasto nda tsaka'a, jngu xi xa nk'a tjinre ngajinre nchja xi tsa'exat'are Herodes. 'Ba ngat'are Blasto tsi'are nixtjin nga ku̱an kjuako rey Herodes, tuxi skui'anire kjuaxiu, ngat'a naxinanda xi tse'e nchjabiu batse xi chine xi tjin nangire Herodes. 21'Ba meni Herodes 'ejña nixtjin nga kjuako nijmi nchjabiu. 'Ba kionga ja'e kui nixtjinbiu, tsakaja najñu tse'e s'i, tsik'ejña nga'nde ña batexuma 'ba kinchja. 22'Ba 'batsa'en xutankjiun tsé kiski'ndaya: ―Bi jngu xuta xi tinchja, tusa jngu na'en ―kitsu. 23'Ba ndekuini chubabiu, jngu ankjere Na'enchana kitsja chi'inre Herodes, tu ngat'are nga bi kitsikixiya nga Na'enchana xi tjinre kjuaje. 'Ba tjiuyaja kiskine ngaya ngats'a, 'ba k'en. 24Tunga kinduju enre Na'enchana 'ba kjinikja'axtiuya ngayéje nga'nde. 25'Ba ngat'are Bernabé ko Saulo, kionga je jet'a xa xi kitsa'ere ngat'are naxinanda Jerusalén, jendiba ngani nga jendeko Juan xi 'ba nde Marcos 'mi.

will be added

X\