HECHOS 10

1Ña naxinanda Cesarea tsik'ejña jngu xuta xi Cornelio 'mi, jngu xi ngakure jngu stin chasoldadu xi Chasoldadu Italiano 'mi. 2Kui 'ba ko ngatsi'i xi tjindu ndaba tsimején 'ba bekun Na'enchana, 'ba tsjare xuta ni̱ma̱ mé= xi machjenre, 'ba ngantsjai fako Na'enchana. 3Jngu nixtjin, chu̱ba̱ ján nga kuangixun, Cornelio kuatsejenre jngu ankjere Na'enchana ngaya nijñare. 'Ba tsabe tsejen tsejen nga ankjebiu ja'as'en ña tijña. 'Ba kitsure: ―¡Ji Cornelio! 4―¿Mé= xi mejénri na'en? ―kitsu Cornelio nga tikutsejen'a 'ba titsakjun koni. ―Na'enchana tjijintakunre nga chukue 'ba tsja mare ngat'are mé= xi teñe'en nga teba'e_ri xuta ni̱ma̱ mé= xi machjenre ―kitsu ankjebiu―. 5Tikasen tsu'ba jó ján xuta naxinanda Jope tuxi kuikja'ani jngu xuta xi Simón 'mi xi 'ba nde 'yaxkunre joni Pedro. 6Kui xi tijña ndaba Simón xi tsa'exako tjiuxin, xuta xi tiña ngandai ndachikun kjijña ni'yare. 7Kionga je kiji ankje xi jako, Cornelio kinchjare jó chu'ndare xi tsa'exa ndaba 'ba kiskja'ajin ngajinre chasoldadure xi ngantsjai batesinre jngu xi tsimején Na'enchana. 8'Ba jaskan nga je ye'ere nijmi ngayéje mé xi kuán, kitsikasen naxinanda Jope. 9Nga kuanyujun, yejerañu nchjabiu je echu tiña naxinando, Pedro tsijin ngasun nk'are ni'yo tuxi kjuakoni Na'enchana. 'Baru tsa nyusen ya'a, 10'ñu kuabojore 'ba mejénre skine niñu. Tunga yejerañu tis'endare xi chine, kis'ere jngu chini. 11Tsabe nga tju'i ngank'aa, 'ba nga ndejen 'nda t'anangiu jngu tsajmi xi matsejen joni jngu najñu tjibe xi je xi tji'ñu nga ñujun tje'enre. 12Tjinduya ngayare najñubiu ngayéje kuya tjiuba xi 'betsuma ko xi 'befe yojore t'anangiu ko tjiunise xi tutjen ngank'aa. 13'Ba Pedro kjint'ere jngu jnda xi kitsure: ―Ji Pedro, tisetjen. Tik'en tjiubabiu 'ba chine. 14―Junjun Na'en ―kitsu Pedro―. Nisañajanni kjinia̱ tsajmi xi jndi, xi bi tsje ngixkun Na'enchana. 15―Xi Na'enchana je kitsitsje, bi jndi 'miri ji ―kitsu nganire jndo. 16Ján ndiya 'ba kuán, 'ba jaskan najñubiu kitjube ngani ngank'aa. 17Kionga Pedro titsikja'etsjen mé= xi tsunire xi kuatsejenre, ndekuini chubabiu nchja xi kitsikasen Cornelio tsikinyaxtiu xuntja ni'yo nga inyamangisjai ndaba Simón. 18'Ñu kinchja nga tsiningiya tsa kio tijña Simón xi 'ba nde Pedro 'mi. 19'Ba yejerañu Pedro tojo titsikja'etsjen ngisa ngat'are xi kuatsejenre, Isennixtjintsjere Na'enchana kitsure: ―Chutsejen. Ján nchja inyamangisjairi. 20Tisetjen 'ba t'etukajen. Bi nitajai takuin 'ba t'ikue, ngat'a an kitsikasia̱n nchjabiu. 21'Ba kio Pedro 'etukajen nga ja'ekjako nchjabiu. ―An= ña̱, na'en, xi teminyisjo. ¿Mé= xa ja'eñu? ―kitsure. 22―Cornelio, xi ngakure chasoldadu, kitsikasenni̱ ―kitsu nchjabiu―. Kui xi jngu xuta xi kixi 'ba xi bekun Na'enchana, 'ba ngatsi'i xuta judío nda nchja ngat'are. Kui xi jngu ankjere Na'enchana kitsure nga tjinnere nga ji k'uinchin ndaba, 'ba nga tjinnere kuasen ñojon mé= xi k'uin_ri. 23'Ba 'batsa'en Pedro kitsikja'as'en nchjabiu, 'ba kio tsik'endu kui nistjenbiu. Nga kuanyujun, Pedro kiko nchjabiu, 'ba nde kiko yak'a xi makjainre ngat'a tse'e Na'enna Jesús xi tjindu Jope. 24'Ba nga kuanyujun echu naxinanda Cesarea, kioña Cornelio ñatjen inyakuyare ko xinkjin 'ba ko xuta xi nda ya'a xi kitsikjint'e. 25Kionga Pedro je tifa'as'en ni'yabiu, Cornelio ja'etsite'ndare 'ba tsakasenkunch'int'are nga kitsichjire. 26Tunga Pedro kitsikisetjen. ―Tisen ndiji ―kitsure―, ngat'a an jngu= ña̱ xuta joni ji. 27'Ba tifako nga ja'as'en ni'yo 'ba tsabe nga nkjin xuta kuañajan kio. 28'Ba 'batsa'en kitsure: ―Jun 'yañu nga kjuatexumare xuta judío bi tsja'ndere tsa jngu xuta judío ku̱añajanko xuta xi bi judío asa kjua'as'en ndaba. Tunga Na'enchana je yakuna̱ nga tu'yá ku̱an xin_ra̱ jndi asa bi tsje ngixkun Kui. 29Kui kjuañu kionga kjinukjuana̱, bi kitsitajaa̱ takuaa̱n nga jendiba. 'Bamani, 'ba t'innuu̱, ¿ánñu an kjinukjuaninuu̱? ―kitsu Pedro. 30'Ba Cornelio kitsu: ―Kuañujun nixtjin tjinre, kionga tefakua̱ Na'enchana nga'e ni'yana̱, nga chu̱ba̱ ján nga kuangixun. 'Ba tukjia'a ja'ekasen ngixkuaa̱n jngu xuta xi yaja jngu najñu xi 'na kji'i. 31Kui xi kitsuna̱: “Cornelio, Na'enchana tjijintakunre nga chukue 'ba tsja mare ngat'are mé= xi teñe'en nga teba'e_ri xuta ni̱ma̱ mé= xi machjenre. 32'Ba tikasen tsu'ba jó ján xuta naxinanda Jope tuxi kuikja'ani jngu xuta xi Simón 'mi xi 'ba nde 'yaxkunre joni Pedro. Kui xi tijña ndaba Simón xi tsa'exako tjiuxin, xuta xi tiña ngandai ndachikun kjijña ni'yare.” 33'Ba 'batsa'en kitsikasenfañaa̱ nga kuekinyisjairi, 'ba ji kjiña'an=ni kjuanda nga jendibai. Kui kjuañu nganda'e tetsubani̱ ngatsi'i nga'e ngixkun Na'enchana, 'ba mejénni̱ kuaseñejee̱n ngayéje xi Na'enchana je 'exari nga sji ―kitsu Cornelio. 34'Ba Pedro kitsu nga kinchja: ―Nganda'e timankjinna̱ nga kjuakixi nga Na'enchana bi kabi tsa'en ngajinre xuta. 35Tusa kjebetjo nitu'ya xuta naxinanda xi tjin ngasun'ndebi xi tsakjunke 'ba xi kixi tsa'en ngixkun. 36Na'enchana kitsikasenre en xuta xi Israel tse'e nga kitsikja'axtiuya en nda xi tsja kjuaxiu ngat'are Jesucristo. Jesucristo, kui= xi Naire ngatsi'i xuta. 37Jun 'yañu mé xi kuán jo kji'i nangi Judea, xi 'etuts'innire nangi Galilea jaskan kjuasatenda xi Juan ye'e nijmi. 38'Ba 'yañu jótsa'en Na'enchana kitsjare kjua'ñu Jesús xi Nazaret tse'e 'ba kitsikasen Isennixtjintsjere nga ja'etse ngajinre. Kui xi tsak'ajme nga tsa'en mé= xi nda 'ba tsinda ngatsi'i xi tjindujinre isennixtjin xi bi nda. Ngat'a Na'enchana tijñako kui. 39'Ba ji̱n tuxkui̱n fani kji'yani̱ ngayéje xi kitsa'en Jesús nangi Judea ko naxinanda Jerusalén. Kui xi kjinik'en nga kis'et'a kru. 40Tunga Na'enchana kitsikja'aya nganire xi majánni nixtjin 'ba kitsa'en nga ku̱atsejen nganini̱. 41Bi ngayéje naxinando kuatsejenre, tu ji̱n sani xi Na'enchana ja'ajin titjunni̱ nga kuái̱n testigo. Ji̱n kichinekue̱ 'ba kji'yukue̱ kionga je ja'aya nganire. 42'Ba 'exani̱ nga k'ue_ri̱ nijmi xuta naxinando 'ba kjuinikixiyee̱ nga Na'enchana kitsja xare Jesús nga kui= xi sa'enre kjua xuta xi tjindukun 'ba xi je jesun. 43Ngatsi'i nchja chinga profeta kitsikixiya ngat'a tse'e Jesús 'ba kitsu nga ngat'are ja'enre Jesús ku̱achat'are jere ngatsi'i xuta xi makjainre ngat'are kui. 44Kionga tojo tinchja ngisa Pedro, Isennixtjintsjere Na'enchana jendibajennere ngatsi'i xuta xi inyaminya ñojon ion. 45'Ba nchja judío xi makjainre xi tjenko Pedro tu tsikinyajma kionga tsabe nga xuta xi bi judío 'ba nde kisakure Isennixtjintsje xi tsja Na'enchana. 46Ngat'a kjint'e nga xuta xi kio= tjin kinchja kja'e kuanga en nga kitsichjire Na'enchana. 'Ba 'batsa'en Pedro tsiningiyare 47nga kitsu: ―¿A tjin xi 'bechja'nde nga satenda xutabi, xi je kisakure Isennixtjintsjere Na'enna joni ña? 48'Ba Pedro 'exa nga ko ja'enre Jesucristo satenda xutabiu. 'Ba jaskan kis'ets'are Pedro nga k'uejña jó ján nixtjin kio.

will be added

X\