2 TIMOTEO 2

1'Bamani ki'ndina̱, ta'e nga'ñu_ri yojori ko kjuanda xi tjinna ngat'are Cristo Jesús. 2'Ba xi kjinu'ye xi kixia̱n ngixkun nkjin testigo, tingantsja ngani_ri xuta xi ma chun_ra ngat'are, xuta xi ku̱an kuakuya nganire xuta xi kja'ere. 3Ngatakakori kjuanima xi kuitjaxtiukonaa̱ joni jngu chasoldadu xi nda xi tsa'exat'are Cristo Jesús. 4Nijnguú chasoldadu xi tikjan tsikjore yojore ngat'are xi tjin ngasun'ndio, ngat'a mején=re nga nda skue xi kitsja xare. 5'Ba nde 'batsa'enni xuta xi tsa'en chuya, tsa bi nda sik'etjusun kjuatexumare chuyo, bi ku̱an xuntsja tsajmi xi ba'ere xi tsa'en. 6'Ba nde xuta xi 'ñu tsa'exa nga 'bentje tsajmi tjin=re ndiyare nga kui tjun sa̱kure chan xi 'bakore. 7T'ejinkakuin mé= xi texinra̱, ngu Na'enna Jesús sa'en nga ku̱ankjinri ngayéje kibiu. 8Tikja'etsjenye ngat'are Jesucristo xi ja'aya nganire ngajinre mik'en, xi jendibani ntjere David. Kui en ndabi xi tetsikja'axtiuyaa̱. 9'Ba ngat'are en ndabiu nga tefa'aa̱ kjuanima 'ba ka'nda tjita'ñaa̱ ko na'ñu kicha joni tsa jngu xuta xi ch'okun kuáa̱n. Tunga enre Na'enchana, bi tji'ñu. 10Kui= kjua tichukjuakonina̱ ngayéje xi temata'aa̱n nga tu kjuanda tse'e xuta xi Na'enchana je ja'ajin, tuxi ko kui sa̱kut'anire nga k'uangi ngat'are Cristo Jesús 'ba sa̱kut'are kjuaje xi bi fe. 11Enbi kjuakixi=: Tsa eyakua Cristo, 'ba=nde kuetsubakunko ngaña. 12Tsa kakona nga temitjaxtia kjuanima, 'ba=nde kuatexumakua. Tsa kuixan nga bi 'yaxkuan kui, 'ba=nde kui kuetsu nga bi bexkunna. 13Tsa ña bi sik'etjusun_ra kui, tojo sik'etjusun= jotsa'en kitsja ts'a, ngat'a bi jó tsa'en enre. 14Tikja'etsjenya_ri nts'ia kibiu 'ba t'ene_ri ngixkun Na'enchana nga bi ngatafosiyare tuxkia en. Kibiu tumé chjire, tusa tsiskayare kjuafa'etsjenre xuta xi nt'e. 15Ngayéje inimari ti'en mé= xi nda ngixkun Na'enchana, tuxi nda skueni mé= xi teñe'en, joni jngu chu'nda xi bi masubare ngat'are xare, xi nda bakuya ngat'are en xi kjuakixi. 16Tisent'axin_ri en si xi tumé chjire xi tse'e ngasun'ndio. Ngu xi nchja nijmi enbiu ngisa minyat'axin ngisare Na'enchana. 17'Ba enre xutabiu jo=ni jngu chi'in fe'ndu xi tsikje 'ba bi nde mandani. 'Ba= inyatsa'en Himeneo ko Fileto. 18Kui xi je kit'axinre en xi kjuakixi. Inyatsu nga je= ja'a nixtjin nga kjua'aya nganire xuta ngajinre mik'en. 'Ba 'batsa'en inyatsiskayare kjuafa'etsjenre yak'a xuta xi makjainre ngat'a tse'e Na'enchana. 19Tunga enre Na'enchana jo=ni jngu tuts'in xjo xi 'ñu sejña, ña 'bitsa'en kua'indut'a: “Na'enna Jesús be= xuta xi tse'e.” 'Ba 'ba nde kua'indut'a ngayeje: “Ngatsi'i xi tsu nga tse'e Na'enna Jesús tjinne=re nga kuinyat'axinre xi ch'otjin.” 20Joni ngaya jngu ni'ya je, bi tu suba tsajmi xi oro ko plata tjin. Tusa 'ba nde tjin tsajmi xi kuandakoni ya ko nangikiti. Tjin xi machjen ngajin s'i 'ba tjin xi tu machjenntsjai. 21'Ba nde 'ba= tjinni ngajinna. Tsa tjin xi je kitsitsje yojore, kui jo=ni tsajmi xi machjen ngajin jngu s'i. Je tsje ya'a 'ba ku̱an sichjen Na'enchana. Je tijñandare yojore nga ku̱an sa'en ngayéje xa xi nda. 22Tisent'axin_ri xi tsu inimare nchja nisti xi yak'a. 'Ba ñatjen ko xuta xi tsje tjindu inimare nga tsichjire Na'enna Jesús tangitjenngiu xi sa'en nga kixi kueko yojonu, kjuamakjain ngat'are enre Na'enchana, kjuanimejen 'ba ko kjuaxiu. 23Bi nisin_ri en si xi tsajainre ndiyare 'ba xi tumé chjire, ngat'a 'yani nga kio ndibanire kjuasi. 24Xi tsa'exat'are Na'enna Jesús bi kjuasi skungajin, tusa nda ngatatsiko ngatsi'i xuta. Tjinnere nga nda ku̱anre kuakuyare xuta 'ba ku̱atsejndako mé= xi ku̱ata'en. 25Tjinnere nga k'uaxjenima yojore nga sja ndiyare xi stike xi kjuakixi. Ngu 'ba ku̱an tsa Na'enchana sa'en nga xutabiu sik'antjaiya inimare 'ba skue xi kjuakixi 26'ba 'batsa'en nda sikja'etsjen ngani 'ba ku̱angare chen ña chanayiu titsu'ñure nga tsa'enko chanayiu xi mejénre.

will be added

X\