2 PEDRO 2

1Tunga 'ba nde kis'e ngajinre naxinando profeta xi ndesu, jotsa'en 'ba nde tsa'en s'e̱ ngajinnu chamaestru ndesu. Ko kjuamaña kuakuya xi bi kjuakixi, 'ba enre ku̱an sikjetsunnu. Bi tsikixiya ngat'are Na'enna xi 'echjintjai̱. 'Ba 'batsa'en Na'enchana ta'a sikjekjua. 2'Ba nkjin= ku̱an xi kuetjenngi kusunre nchjabiu, 'ba sa'en jotsa'en tsja'ndere yojore nga tsa'en tume xi ch'o tjin. 'Ba tu ngat'are nchjabiu= ch'otsa'en kjuinukjua ngat'are ndiya xi kjuakixi. 3'Ba ngat'a 'ñu mejénre ton, kui kjua k'uejñuninu nga k'uaxjet'anu ton nga ko en ndesu xi tu kui 'baxjenikunii̱. Tunga je nda'e tijñandani xi skanineje nchjabiu. 'Ba xi sikjekjua bi kjijñafe. 4Ngat'a Na'enchana bi kitsichat'are ankjele xi kiskjeje. Tusa 'etsojojin nga'nde ña fa'a kjuanima xuta. Kio kitsik'endu'ñu ña jñu chun, tuxi tjindutjoni ka'nda nga kjua'e nixtjin nga sa'en kjua Na'enchana. 5Ninga bi kitsichat'are xuta xi kis'e nixtjin xi 'ñu kuatse jan ngayeje. Tusa ko nanda kitsikjekoni xuta xi bi tsabekun. Tunga Noé xi kitsikja'axtiuya ngat'are xi kixi tjin, kitsik'angi= 'ba ngiyatu ngisa xuta xi kja'ere. 6'Ba nde Na'enchana kitsa'enre kjua nga kitsikje naxinanda Sodoma ko Gomorra ka'nda nga chojo kitsa'en. 'Ba 'ba=tsa'en 'ejña kusunre mé= xi ku̱ata'en xuta xi bi skuekun kui. 7Tunga kitsik'angi Lot, xi jngu xuta kixi xi on kuánre ngat'are jótsa'en tsik'endu xuta ch'okun xi kitsja'ndere yojore nga kitsa'en tumeñu. 8Ngu xuta kixibiu xi tsik'ejñajinre xutabiu, nyujun nyujun 'ñu on kuánre inima kixire nga tsabe 'ba nga kjint'e kjuach'o xi kitsa'en xutabiu. 9'Bamani, be= Na'enchana jótsa'en sik'angi ngajinre kjuachut'ayako xuta xi bekun kui. 'Ba be= jótsa'en sik'endutjo xuta ch'okun xi tjinnere nga kjua'a kjuanima ka'nda nga kjua'e nixtjin nga ku̱anre kjua. 10'Ba kui fa xi 'ñu kjua'a kjuanima xi tjindujin kjuach'o xi tsu yojore nga'e ngasun'ndio 'ba xi 'bejñat'axin kjua'ñure Na'enchana. Xtankoni 'ba ma kakun nga tsa'en tumeñu xi ch'o tjin. Bi tsakjun nga ch'otsa'en nchja ngat'are kjua'ñu xi tjin. 11Tunga ngat'are ankjele, ninga tsa ngisa tjin ngisare nga'ñu ko kjua'ñu nga ko mare xutabiu, bi ch'otsa'en nchja ngat'are kjua'ñubiu 'ba bi baneje ngixkun Na'enchana. 12Tunga ngat'are xutabiu, jo=ni tjiuba. Tsajain kjuafa'etsjeénre. Tu chubatsa'en tjindu nga tsa'en mé= xi ndiba subare kakun. Kitsin tuxi kjuindubani 'ba kjuinik'en. Kui tu chu̱ba̱ ch'otsa'en nchja ngat'are mé= xi bi mankjinre. Kui kjua kjuinikjeni joni tjiuba. 13Kua'e ngojore chjire kjuach'okun xi kitsa'en. Tsikja'etsjen nga tsja s'e̱re nga tsitsjajin kjuatsja xi tsa'enjun tsa'ent'a ka'nda nga nixtjin. Xutabiu jo=ni jndi 'ba ko xa̱ nga tjindu ngajinnu. Ka'nda tsitsjajin kjuamañare nga kjenkonu. 14Bi ma be jngu chjun tu je ch'otsa'en inyatsikja'etsjen. Bi fejndare nga tsa'en je. 'Bonachare xuta xi bi kixi inya. Kitsikut'aya yojore jótsa'en ku̱an s'e yejere. Kjua'a= kjuanima xutabiu. 15Je kit'axinre ndiya xi kixi 'ba kichaja nga kitjenngi ndiya xi kijiya profeta Balaam ki'ndire Beor. Balaam kitsimején= nga kuejenre ton nga sa'en xi bi nda. 16Tunga kichjutiko ngat'are jere kionga jngu chaburru xi bi mare nchja kinchja nga tsaka'a jndare xuta 'ba 'echja'ndere Balaam nga janda sa'en kjuaska xi titsa'en. 17Kui xutabiu jo=ni nga'nde ña tju nanda tunga tsajainre nanda asa yufi xi fiko ntjo'ñu. 'Ba 'batsa'en Na'enchana je 'endare jngu nga'nde ña 'ñu jñu chun, ña tjinnere nga k'uendu ka'nda ngantsjai nixtjin. 18Ngu nchja= en nk'a kakun xi tsajainre ndiyare. Bakuya nga ma ña'an kjuach'o xi tsu yojore xuta 'ba nga ma ña'an tumeñu. 'Ba=tsa'en 'bonachare xi sa'e ts'axjexinre yojore ngajinre xuta xi kit'axin ndiya xi tse'e kjuakixi. 19'Ba tsu nga sindai xuta, ninga kui fa tjindujin'ñu jere xi sikjetsun. Ngat'a tsa jngu xuta tsja'nde nga nitumeñu kjua batexumare, je tsik'ejñajin'ñu kjuabiu. 20Ngu xuta xi je bexkun Jesucristo xi Na'enna mani 'ba tsik'angina, 'ba=tsa'en je ts'axjexinre yojore kjuach'o xi tjin ngasun'ndio. Tunga tsa k'uatjijin'ñu ngani kjuach'obiu 'ba 'ba=tsa'en kuatexumare, 'ba=tsa'en ngisa ch'o ku̱an ngisa nga ko mare nga titjunre. 21Tusa ngisa nda tjin ngat'are kui tsa bira tsabe ndiya xi tse'e kjuakixi, ngat'a nga je tsabe, tusa kit'axin=ngare kjuatexuma tsje xi kika'ere. 22'Ba ngat'are xutabiu 'betjusun en kjuakixi xi tsu: “Tjiunaña nde kjineya ngani ndafesure, 'ba tjiuchinga xi je kamindu nde fik'etjikjajin ngani ndasijiu.”

will be added

X\