2 CORINTIOS 9

1Bi machjen tsa si'indu_nuu̱ ngat'are kjuatjo xi tjimaku nga tu kjuanda tse'e xi makjainre ngat'a tse'e Na'enchana xi tjindu Jerusalén. 2Ngat'a 'be=ña̱ nga ngayéje inimanu mejénnu miseko 'ba tsja tjinna̱ nga nda kinchjaa̱ ngat'anu ngajinre xuta xi tse'e Macedonia. Kixin_ra̱ nga ka'nda nu xi ja'a tetsubandañu nga sikasen_ru ton chje jun xi tetsubo nangi Acaya. 'Ba nga kjint'e nga tsja tjinnu nga 'ba teño'on, 'ba nde nkjin mani xi 'ba nde titsuba kakun nga kuaseko ngayeje. 3Tunga tetsikasekun_nuu̱ nts'ia kibi, tuxi bi ch'otsa'en kuatejñaña̱ nga 'batsa'en nda nchja ngat'anu, tusa tetsubando jo kixin_ra̱ xutabiu. 4Ngat'a 'ba ku̱an tsa kuekue yak'a xuta xi tse'e Macedonia 'ba tsa skue nga bi tetsubando, ku̱asuba=ni̱ ngat'anu ngat'are nga 'batsa'en nda chun_ri̱ jun 'ba 'ba nde ku̱asubanu ngayeje. 5Kui kjua 'batsa'en kitsikja'etsjenña̱ nga machjen nga 'etsa_ra̱ nts'ia, tuxi tjun kuekunninu 'ba k'uendatitjun ton chje xi tsikixun nga kuo'o. 'Ba 'batsa'en je tijñandani 'ba xianire nga ngayéje inimanu tebo'o 'ba bi joni tsa tjis'enenu. 6Tikja'etsjion ngat'are en xi tsu: Xi chuba 'bentje, 'ba=nde chuba machare; 'ba xi tse 'bentje, 'ba=nde tse machare. 7Nga nga jngu jngu ngatatsja jotsa'en je kitsu inimare. Bi ko kjuaba ngatatsja, 'ba bi joni tsa tjis'enere ngat'a Na'enchana tsimején= xi ko kjuatsja tsja. 8'Ba Na'enchana tjinre kjua'ñu nga tse sjanu ngayéje kuya kjuanda, tuxi s'e̱ntsjaininu xi machjennu 'ba tumé xajanu. 'Ba ka'nda s'e̱nu ts'axtiu xi machjennu, 'ba 'batsa'en ku̱an kuiseko ngayéje kuya xa xi nda. 9Jotsa'en kua'indut'a enre Na'enchana: Kitsika'bisun nga kitsjare xuta ni̱ma̱ xi machjenre. 'Ba kjuanda xi kitsa'en niñajanni chiyajin. 10Ngu Na'enchana xi tsja xujma xi s'entje 'ba tsja xi chine, 'ba kui xi 'ba nde sjanu 'ba ngisa sja ngisanu tume xi machjennu. 'Ba kjuanda xi ño'on jo=ni xujma xi 'bentjio, 'ba Na'enchana sa'en nga ku̱atse kjuanda xi ño'on, tuxi sjani jngu chan xi tse. 11'Ba 'batsa'en s'e̱nu ngayéje kuya kjuanyina, 'ba ko ngayéje inimanu ku̱an kua'entsjo xi machjenre xuta xi yak'a. 'Ba ngat'are xi jun sikasenkonii̱, kui xi sa'en nga nts'ia sjare kjuanda Na'enchana. 12Ngat'a nga temiseko nts'ia, bi tu teba'e_ru xi machjenre xuta xi makjainre ngat'a tse'e Na'enna, tusa 'batsa'en ngisa nkjin ngisa xi inyatsjare kjuanda Na'enchana ngayeje. 13Ngat'a nga bo'o nga miseko xuta, 'batsa'en tebakutsijon jo kuún. 'Ba kui kjua xuta sichjinire Na'enchana, ngat'a tenikixiyo en ndare Cristo 'ba 'ba nde tenik'etjusun ion. 'Ba sichjire Na'enchana ngat'a ngayéje inimanu teba'e_ru xi machjenre xutabiu ko ngatsi'i xuta xi yak'a. 14'Ba nde kjuako Na'enchana ngat'anu ngat'a tsimejénnu ngat'are kjuanda tse xi je kitsjanu Na'enchana. 15¡Xik'uechjire Na'enchana ngat'are kjuanda xi tsjana! ¡Tsajainna en xi kuetsuya jó kji'i tse kjuanda xi kitsjana!

will be added

X\