1 Kui kjua te'bets'aniri̱ ji̱n xi teña'axat'a_ri̱ Na'enchana nga bi tu nikja'atiyo kjuandare Na'enchana. 2 Ngat'a 'bi=tsa'en kua'indut'a enre Na'enchana: Kjint'era̱ nga ja'e nixtjin xi 'ejñaa̱ nga yatesin_ra̱ xuta, tsakasekora̱ nga ja'e nixtjin nga kitsik'angia̱ xuta. 'Ba nganda'e= kui nixtjin nga tibatesinre xuta Na'enchana. Je= tesubajian nixtjin nga titsik'angi. 3 Tumé teñe'ee̱n xi ku̱anre k'uejñare kjuana'en xuta, tuxi bi ch'otsa'en kjuinukjuani ngat'are xa xi teñe'ee̱n. 4 Tusa ngayéje xi teñe'ee̱n bakutsejen nga Na'enchana teña'axat'a_ri̱. Ko kjuatsejnda tichukjuakoni̱ nkjin kuya kjuana'en ko kjuanima xi temitjaxtii̱ 'ba ko kjuandusin xi tisakuni̱. 5 Tis'eni̱ 'ba nduya tis'eteni̱ 'ba xutankjin fosi'akoni̱ xi mastikeni̱. 'Ñu ña'axai̱ 'ba chukjuakoni̱ nijña 'ba mitjaxtii̱ kjindia ngayeje. 6 'Ba tsje mangikue̱ yojoni̱, 'ba 'ya=ni xi kjuakixi, 'ba tjinni̱ kjuatsejnda, 'ba nda= nikue̱ xuta. Tijñajinni̱ Isennixtjintsjere Na'enchana 'ba ko kjuanimejen xi kjuakixi. 7 'Ba suba en xi tjinre kjuakixi= mixii̱n, 'ba kjua'ñure Na'enchana tijñajinni̱. Kich'ee̱ kjuakixire Na'enchana joni espada ko escudo. 'Ba ko kui ma 'bechja_ri̱ 'ba mixkjankue̱ tumeñu. 8 Kixi= mekue̱ yojoni̱ ninga tsa 'yakunni̱ asa ch'o 'mini̱, ninga tsa nda nukjua ngat'ani̱ asa ch'otsa'en nukjua ngat'ani̱. Suba kjuakixi= xi mixii̱n, ninga tsa xuta ndesu 'mini̱. 9 Nda 'yaxkunni̱, tunga joni xuta xi bi 'yaxkunre nikoni̱. Jo=ni xuta xi je tji'me nikoni̱, tunga tetsubakun ngisai̱. Tse kjuanima tjinikja'ani̱, tunga bi tebeyee̱. 10 Jo=ni xuta xi ba tjinre tetsubai̱, tunga tjinntsjaini̱ kjuatsja. Jo=ni xuta ni̱ma̱ tetsubai̱, tunga nkjin= teninyinai̱ nga ko xi kjuakixi. Jo=ni xuta xi tumé tjinre tetsubai̱, tunga tsajain yeje xi tjin. 11 Jun xuta xi tjindu naxinanda Corinto, nga ko fani kjuakixi kichukori̱. Techjux'atetee̱ inimani̱ ngat'anu. 12 Bi ji̱n xi te'bechjee̱ inimani̱, tusa jun xi te'bechjanii̱ inimanu. 13 Kui kjua tefako_nuu̱ joni tsa jun xi ki'ndi nistina̱ kuon. 'Ba ti'on jo teñe'ee̱n ji̱n. Chjux'atetio inimanu nga chjubetjonii̱. 14 Bi nijnguko yojonu ko xuta xi bi makjainre. Ngat'a, ¿a tu jngu= mako xinkjin kjuatsje ko kjuach'o? ¿A ma 'batjijinre xinkjin ña tsejen ko ña jñu? 15 ¿A ma nda ba'a Cristo ko chanayiu? ¿Jótsa'en tujngu ku̱an xi makjainre ngat'a tse'e Na'enchana ko xi bi makjainre ngat'a tse'e kui? 16 ¿A ku̱an ningure Na'enchana nda kua'a ko na'en xi ntsja xuta kuandani? Ngat'a ña=ña ningure Na'enchana xi tijñakun, jo nga kitsu Na'enchana: Kuatejñajin_ra̱ 'ba k'uajmejin_ra̱ xutabiu. An ku̱an Na'enre 'ba kui ku̱an naxinandana̱. 17 Kui kjuañu 'ba nde kitsu ngisani Na'enchana: T'etjujin_ru xuta xi yak'a 'ba tangint'axiun. Bi niko xi jndi ngixkuaa̱n, 'ba 'batsa'en an skjebetjo_nuu̱. 18 An ku̱aa̱n Na'ennu, 'ba jun kuon ki'ndi nistina̱. 'Ba tsu Na'enchana xi tjinre ngayéje kjua'ñu.
