2 CORINTIOS 13

1'Ba ki=bi xi majánni ndiya nga kjuikun_nuu̱. S'e̱nda= tume kjuañu koni nga jó asa ján xuta xi sikixiya ngat'are mé xi kuán. 2Nga kikun_nuu̱ ndiya xi majóni, je 'ba kixin_ra̱ xi kitsa'en je, 'ba nganda'e nga bi tejñajin_nuu̱ nde 'ba= xin ngani_ra̱ kui ko xi yak'a: tsa kjuikun ngani_nuu̱, bi kjua'animana̱ kui. 3Ngu 'ba= sa'aa̱n, meni xiañu chu̱ba̱ xi teminyisjo nga Cristo tsikinchjana̱. 'Ba Cristo bi ko kjua'inda tsikonu, tusa ko kjua'ñu tsa'exa ngajinnu. 4Ninga Cristo inda ts'axje yojore nga kis'et'a kru, tunga nganda'e kjua'ñure Na'enchana tijñakunni. 'Ba ji̱n 'ba=nde tsa'en tisakut'ani̱ kjua'indare Cristo, tunga kuetsuba=nii̱ ngat'are kjua'ñure Na'enchana nga tu jngu kuai̱n ko Cristo, tuxi 'batsa'en kuaku ndiyaniri̱ jun. 5Ndejun chut'añu yojonu, tsa kjuakixi nga kixi tenyo ngat'are xi makjainnu. Chut'ayako yojonu. ¿A bi 'yo nga Cristo tijñajin ngajinnu? Tu kio sani tsa bi tsitjaxtjiu nga kichut'ayakonu. 6'Ba 'be=ña̱ nga xio nga tsitjaxtii̱ ji̱n nga kichut'ayakoni̱. 7Techja'a_ri̱ Na'enchana ngat'anu, tuxi tumé xi ch'o si'anñu. Bi 'ba teñe'ee̱n tsa tuxi 'batsa'en xianire nga tsitjaxtii̱ nga kichut'ayakoni̱. Tusa mejénni̱ nga nda si'on, ningara 'batsa'en xiare nga bi tsitjaxtii̱ nga kichut'ayakoni̱. 8Ngat'a bi ma mixkjankue̱ xi kjuakixi, tusa teña'axai̱ nga tu kjuanda tse'e xi kjuakixi. 9Kui kjua tsja= manini̱ nga indai̱ ji̱n 'ba nga jun tjinnu nga'ñu. 'Ba tojo techja'a_ri̱ Na'enchana, tuxi ku̱atsjekjinñu. 10Kui kjua tetsi'indu_nuu̱ xujunbi nga kje kió tejñajin_nuu̱, tuxi nga kjuechukun_nuu̱ bi tjinnere ngisa 'ñu kjuako_nuu̱. Ngat'a Na'enna Jesús kitsja xana̱ nga sa'aa̱n nga ku̱atsjekjiun ngat'are xi makjainna 'ba bi sa'aa̱n nga chojo. 11'Ba xi fet'ani nts'ia̱, tsja ngatjas'enu. Tinyisjo jótsa'en tsje kuetsubo. Tijio kakun xingiu. Tu jngu kjuafa'etsjen ngatjas'enu. Ngatjas'ekokañanu kjuaxiu xingiu. 'Ba 'batsa'en Na'enchana xi tsjana kjuanimejen ko kjuaxiu k'uejñajinnu. 12Nga ko fani inimanu tite'nda_ru xingiu. 13Ngatsi'i xi makjainre ngat'a tse'e Na'enna Jesús xi tjindu nga'e tsikasennu kjuate'nda. 14Ngatjas'e tsi'inu kjuandare Na'enna Jesucristo ko kjuanimejenre Na'enchana. 'Ba Isennixtjintsjere Na'enchana ngatejñajinnu ngatsi'u. 'Ba ngatjama.

will be added

X\